#ورد_العمر
الحلقة :: 9 ::
جلال: والله جايك في موضوع خاص شويا
صالح: اها تفضل
جلال: شني بالواقف امالا ماتبيش اضيفني!!
صالح: كيف مروح من العمل وراسي مصدع أجله موضوعك بعدين .. هي سلامات
ركب صالح سيارته ودخلها ومادارش لجلال اي اعتبار .. جلال لوح سبسيه ع طول ايده وتكنطا..
جلال: تي قسما بالله لما نوريك ع الحركة اهيا ياولد #$%#@%&%
,,,,,,,,,,,,,,,,,,,,,,,,,,,,,,,,,,,
زياد كان فرحاان وقريب يطير .. وحس بالفخر بللي داره مع ميار ..
محمد كان معاه في السيارة : خيرك فرحان اليوم ؟؟
زياد: خطبت ميار
محمد: تي تكدب ياراجل هوا امس وجدي تكلم عليها
زياد: معاش تجيب سيرته هداك الكلب
محمد: علاش شن دارلك ؟؟
زياد: هكي المحبة من ربي .. وانا الشخص اهوا مانحبهاش
محمد: ههههه باهي كيف صار معاك؟؟
زياد: قبل كل شي .. المدير اليوم كلمني
محمد: خيره شن يبي منك؟؟
زياد: يبيني نطلع كورس برا
محمد: كورس شني؟؟
زياد: تي وين نندري انا المهم توا نبي نأمنك ع ميار تمام!!
محمد: الكورس هدا قداش مدته ؟؟
زياد: بالك 6 شهور مش هلبااا
محمد: باهي وين؟؟
زياد: في بريطانيا
محمد: اها قلت لعيلتك والا لساا؟؟
زياد: لسااا ههه.. خلي نشوف اموري قبل
محمد: باهي تمشي وتجي بالسلامة
زياد: ان شا الله .. شن كلمتهم اماليك؟؟
محمد: ايه الصبح مكلمهم .. قالولي جاي عريس لاختك من الامارات تخايل
زياد: ايه هما الخليج بيهبلو ع الليبيات مافهمتش علاش هههه
محمد: ههههه انت بروحك هابل ع الليبية
زياد: ياراجل خودها مني الوطني وطني .. بنت بلادك الوحيدة يللي تفهمك وتسايرك وتتحملك .. امالا طامع في اسبانية بديرلك عصبان
محمد: هههههههههههه غير نحصل حتي بنقلاديش قبل وبعدين نشوفله موضوع العصبان
زياد: ايه خيرك انت معقولة مافيش وحدة زهت في عينك ؟؟
محمد: سكره الموضوع توا
زياد: هههه باهي انزل وصلنا للقهوة
,,,,,,,,,,,,,,,,,,,,,,,,,,,,,,,,,,,,,,,,,
نهلة: هيا يابنات بابا في السيارة يراجي فينا
نسيم : ماما ريتي جني؟؟
نهلة: نهاركم اسود وين خليتوها؟؟
رنيم: خليتها مع بنتك الغبية مشت تلعب وسيبتها
نهلة: ياحليلي وين مشت هالبنت
قعدو يدورو عليها لين لقتها نهلة ع الرصيف واقفة .. قصت الطريق بروحها وواقفة ع رصيف الوسطي بين الطريق والطريق .. جت نهلة ببناتها وعلاء مايندري ع شي ..
نهلة: خليك يابنتي غادي تو نجيك باهي
جني وهيا تبكي : ماما نبيك ياماما
نهلة: باهي خليك تو نجي
والسيارات يمشو مافي حد وقف خلى نهلة تقص الطريق وتاخد بنتها .. جني استعجلت وقصت الطريق وتلاقيها سيارة لشاب متهور يطيرها فووووق ويطلعها ع الجيهة التانية
نهلة: جناااااااااااااااااااااااااااااااااااااا
عيطت ع طول حسها سمعها علاء نزل يجري ونسيم ورنيم تغمرو بعض ويبكو ..
,,,,,,,,,,,,,,,,,,,,,,,,,,,,,,,,,,,,,,,,
عبير كانت تتفرج ع التلفزيون .. ع رنة نقالها لقتها نهلة ..
عبير: هههه هيجتي ؟؟
نهلة: عبير انا في المستشفي
عبير: خيرك شن في؟؟
نهلة: جني ضربتها سيارة
عبير: شن تقولي انتي ؟؟
نهلة: والله زي مانحكيلك تعاليلي بسرعة قريب نموت انا
عبير: سكري خلاص تو نجيك
اتصلت عبير وقلبها يرعش خاايفة .. كلمت زياد وكان جنب الولاد ماسعمش تليفونه يرن
عبير: هيا زياد رد عليا.. ركبت لشقة محمود طقت لين عييت مافتحلها حد .. مشت تجري لشقة صالح فتحلها علي؟؟
علي: نعم عمتي؟؟
عبير: ناديلي بوك بسرعة جني في المستشفي
علي: انزلي نرفعك انا
عبير: بالله عليك بسرعة
وهما نازلين يجرو تلقتهم مريم ..
مريم: شن في خيركم ؟؟
عبير: اااه لا شي يمي ماشية انا وعليوة بناخد حاجات
مريم: باهي ماتعطلوش
وعلا كانت راقدة ماتندري ع شي ..
,,,,,,,,,,,,,,,,,,,,,,,,,,,,,,,,,,,,,,,,,,,,
مصعب: قلتيلي زياد ؟؟
ابتهال: وامه مرا كبيرة في العمر ماشا الله عليها قداش ماعجبتني
مصعب: اسمعي يمة .. مالاحظتيش ع ميار انها فرحانة والا شي من هكي ؟؟
ابتهال: فرحانة ؟؟..ايه شويا ماهو البنت صاحبتها
مصعب: ع خاطر البنت صاحبتها بترضى بخوها؟؟
ابتهال: خيرك انت شاك في شي؟؟
مصعب: لا ان شا الله مايكونش يللي في بالي صح بس
ابتهال: قصدك ميار تعرفه زياد ؟؟
مصعب: مانعرفش .. رضاء يراجي فيا بنطلع معاه اوكي هي سلام
ابتهال: هدوما خيرهم ياربي ؟؟
,,,,,,,,,,,,,,,,,,,,,,,,
علي: عمي اعطيني مفتاح السيارة خللي نروح بالبنات لقيتهم يبكو البرا
علاء: هاك
نزل علي بيروح ببنات عمه يللي يبكو في السيارة ويدعو لربي انه جنى ماتموتش ..
عبير: وسعي بالك يانهلة تو الدكتور يطلع ويطمنا ماتخافيش
نهلة: يارب استر ياااارب
طلع الدكتور مشوله التلاتة يتجارو
علاء: طمني ع بنتي شن صار فيها ؟؟
الدكتور: الخبطة كانت قوية وو...
نهلة: شني يادكتور قولها؟؟
الدكتور: عطتكم عمرها ومكانها الجنة ان شا الله لانها ملايكة
نهلة: لاااااااااااااااا .. خليني نشوفها بالله عليك
عبير كانت تبكي ومعاش عرفت تصبر نهلة ولا تصبر علاء يللي حس بتأنيب الضمير لانه ماشدهاش معاه .. نهلة خشت لبنتها لقتها زي الملاك كأنها راقدة .. قعمزت ع ركابها وتبكي
نهلة: جنونتي حبيبتي علاش بتخلي وخياتك وبتخلي الماما وبابا وبتمشي ؟؟..ردي عليا ياماما وقوليلي انتي قاعدة صغيرة مازال الحياة قدامك خيرك مشيتي مازال بكري .. جنى كنتي تبي تشوفي جدو اهو توا بتمشيله .. جنى حرام عليك يابنتي بنعيش العمر كله متعدبة يااارب ارحمها وصبرني يااارب
خشت عليها عبير وقامتها وهيا تبكي ..عبير: خلاص يانهلة روحي ارتاحي مش باهي اديري هكي البنت صغيرة وماتت ملايكة للجنة ان شا الله
نهلة: حسي بيا ياعبير بنتي ماتت بسبب اهمالي انا
عبير: لا ماتقوليش هكي هدا قضاء وقدر
,,,,,,,,,,,,,,,,,,,,,,,,,,,,,,,,
(( نحبك موت يالغالي ونغار عليك ياغزالي ياروح الروح يادلالي ياواخد قلبي وبالي نبيك تكون من حلالي يامزهي عقلي وحالي .. انموت عليك ونغار عليك وانتي عمري وحبي .. كل يوم يزيد حبك ياريد مصيون جوا قلبي ))
محمد: نفختهم بااغاني الحب متاعك اهما
زياد: مانلومكش حسد حسد ههههههه
محمد: تتوقع مصعب مايعرفش بعلاقتكم ؟؟
زياد: ماتنقش فيها منين بيعرف ؟؟
محمد: خيرك ياغبو ؟؟.. انت درت حركة غبية نوعا ما .. مشيت خطبت اول ماسمعت بوجدي متكلم مع مصعب في الموضوع
زياد: وجدي مش ح ياخدها ميار ولو ع قطع رقبتي فهمتني !!
محمد: باهي امتي بتكلم بوها؟؟
زياد: فكرتني اختي امبكري مكلمتني اكيد ردت عليهم ام ميار ..نقص المسجل خللي نتكلم
عبير: الووو
زياد: ها بشري!!
عبير: ع شني ؟؟
زياد: شني ع شني ؟؟.. تي ام ميار كلمتكم ؟؟
عبير: مش وقته اهوا .. انا كلمتك قبل نبيك ترفعني للمستشفي
زياد: علاش شن في؟؟.. امي صايرتله حاجة
في هاللحظة زياد شد سييك قووي ووقف سيارته في نص الطريق ويسمع في كلاكسات يمين يسار بس كان مركز كل حواسه مع عبير
عبير: لا جني بنت خوك
زياد: خيرها جني؟؟,, تكلمي خيرها؟؟
عبير: عطاتك عمرها يازياد.. ضربتها السيارة اليوم
زياد: شن تقولي انتي ؟؟.. وامتي وكيف صار؟؟.. وبعدين علاش ماعنديش علم ؟؟
عبير: ماتردش شن تبيني نديرلك ؟؟.. انا توا مروحة مع عليوة خليت علاء يدير في اجراءات الوفاة .. مش عارفة كيف بنقول لامي عليها بس
زياد: خيرها الموت ماتبيش تحل علينا ؟؟؟؟
محمد : شن في يازياد ؟؟.. مني يللي مات؟؟
زياد: خلاص سكري انا مروح طووول
سكر زياد من عبير وطلع زي الطلقة للحوش ..
محمد: تكلم ياراجل شن في؟؟
زياد: جني ضربتها السيارة توفت
محمد: ياساتر امتي صار؟؟
زياد: اليوم طلعو للملاهي واماليها المسابيه شوره ماردوش بالهم منها طلعت ع الطريق ضربتها السيارة
محمد: لا حول ولا قوة الا بالله .. انا لله وانا اليه راجعون
زياد: اسمعني بو حميد .. انا بننزل للحوش سامحني خود تاكسي وروح
محمد: ولا يهمك ياصاحب .. كان تبي اي حاجة تفضل خوك ماتتحشمش منه تمام !!
زياد: تمام حبيبي .. هي سلامات
,,,,,,,,,,,,,,,,,,,,,,,,,,,,,,,
خش زياد لقي امه مقعمزة تنقي في العدس ..
زياد: وين عبير ياام ؟؟
مريم: اسم لله خيرك انت واختك اليوم ؟؟
زياد: شن تبيني نزغرط وجنى توفت يمة
مريم : من جنى ؟؟
زياد: جنى بنت علاء يمة خيرك ماسمعتيش؟؟
مريم طاحت الصفرة من ايدها ومعاش قدرت توقف قطع عليها النفس لين شدها زياد قعمزها ع الكرسي وقعد يمروح عليها ويخبط فيها ع وجهها بالشويا علي نزلة عبير من حوش علاء كانت تسكت في البنات لين رقدو ..
عبير: ان شا الله قلتلها ؟؟
زياد: تي نحسابها سامعة انا وين نندري؟؟
عبير: والنبي كان سامعة تلقاها مقعمزة اهني ادير في حاجات حتي انت !!
زياد: تي باهي ضمي فمك وجيبي صنة نفيقها
عبير: باه -_-
,,,,,,,,,,,,,,,,,,,,,,,,,,,,,,,,,,,,,
صالح: وين كنت امبكري مع عبير ومارديتش حتي ع هاتفك ؟؟
علي: كنت في المستشفي يابوي
ريهام: خيرها عبير شن فيها؟؟
علي: مش عبير يمي .. جنى بنت عمي علاء عطتكم عمرها
هادي الجملة نزلت زي الصاعقة عليهم
ريهام: كيف شن قاعد تقول ياولد؟؟
غيداء: تكلم رد علينا خيرك ساكت ؟؟
علي: تي شن بنرد .. البنت توفت الله يرحمها .. وعمي علاء قريب يخبش الحيوط من ندمه
صالح: علاش شن صار معاها البنت ؟؟.. وعلاش مانوضتنيش مشيت معاك ؟؟
علي: ضربتها سيارة .. شن بنوضك يابوي انا بروحي طلعت نجري مع عبير معاش نشوف في شي
جيداء: ياناااري البنية قاعدة صغيرة
ريهام: تفكت من هالدنيا الغبرا قوللي سعدودها من دنيتها لجنتها
غيداء: حي شن بيصبر خالتي نهلة وهيا تشوفلها وتناغي القمر
صالح: هات مفتاح سيارتي بنمشي نشوف علاء
علي: عمي علاء خليته يدير في اجراءات الوفاة وممكن توا روح ره
صالح: لا حول ولا قوة الا بالله
,,,,,,,,,,,,,,,,,,,,,,,,,,,,,,
اول بأول بدت الناس تجي .. نهلة كانت جثة هامدة حتي يكلموها ماتردش من كتر الصدمة يللي هيا فيها (( بنتها ماتت قدامها )) موقف صعب .. وكل ماتشوف نسيم ورنيم تبدا تبكي بقوة مش متوقعة في يوم وحدة من بناتها تموت قبلها .. بس هذا قضاء وقدر .. الحاجة مريم يللي تعتبر في جنى بنتها المدللة كانت طول الوقت تدعيلها بالرحمة والدموع تنزل بصبر وتبات .. زياد يتذكر كلامها (( حتي انا بنمشي للجنة )) قعد يبكي ..صح عمرها سنتين بس كان وجودها كبير في العيلة كلها .. وشخصيتها محبوبة والكل يحبها .. علاء كان سارح طوول الوقت وضميره يأنب فيه حس بالغلط من نفسه كيف خلاها مع خواتها حتي هما صغيرات مايعرفووش يشدو وخيتهم ..
::: يوم الدفينة :::
علاء دخلها بنته بايديه لامها تشوفها لاخر مرة اما بالنسبة لرنيم ونسيم روحت بيهم خالتهم مناهل لحوشها.. خشت نهلة للدار لقت بنتها والنور ع وجهها والابتسامة وكانت في كدمات ع راسها بس من كتر النور يللي عليها مش ح تبان .. باست علي راسها ومسحت دموعها ..
نهلة: ربي يرحمك يابنيتي .. سلميلي ع جدو حبيبتي تمام .. وتعاليلي في الحلم قوليلي شن فيها الجنة والا نقولك ماتخشيش لين ترفعيني معاك باهي جنونتي الحلوة .. ربي يصبرني .. سامحيني ماقدرتش اندير بالي عليك ماقدرتش نحافظ عليك يابنتي ..
وبدت تبكي وعلاء كان واقف والموقف واجعه .. بس لانه راجل كابر قدام مرته بالك لما تشوفه هكي تصبر معاه .. خشو العيلة كلها باسو جبين جنى الملاك <3 ...
,,,,,,,,,,,,,,,,,,,,,,,,,,,,,,
ميار: ماما ..انتي وين ؟؟
ابتهال: اهيا في الدار شن في؟؟
ميار: ااه بنسألك !!
ابتهال: ع موضوعك شن صار فيه ولاه !!
ميار: ايه .. ماكلمتيهمش
ابتهال: لا .. خوك قاعد يسأل عليه
ميار: باهي ماما بنقولك شي
ابتهال: قولي شن في؟؟
ميار: بنت خو عبير توفت
ابتهال: حي .. قداش عمرها ؟؟
ميار: صغيرونة .. سنتين بس والله وجعتني زي النسمة تهبل
ابتهال: الله يرحمها ان شا الله .. من دنيتها لجنتها
ميار: ايه ان شا الله .. شن رايك نمشو نعزو ونديرو الواجب!!
ابتهال: قداش ليها مسكينة ؟؟
ميار: اليوم تالت يوم
ابتهال: عيب لقطتنا مازالو ماولو نسابة وتبيني نواجبهم ؟؟
ميار: نمشو نعزو مش لانهم بيولو نسابة .. لان عبير صاحبتي بس
ابتهال: بري بروحك لصاحبتك .. والله نحس فيها حاجة غلط
ميار: باهي براحتك .. اتصلي حتي بالفون انتي وخلاص وانا تو نقول لمصعب يرفعني تمام !!
ابتهال: بري نوضيه توا امشي خمس دقايق وروحي ماتعطليش باهي !!
ميار: حاااضر ^_^
,,,,,,,,,,,,,,,,,,,,,,,,,,,,,,,,,,,,,,,,,,,
زياد يتصل بميار بس مسكر تليفونها .. طلع برا للشارع يتمشى حاس بالضيق في الحوش .. أما غيداء فاتصل بيها منذر
غيداء: نعم !!
منذر: وينك معاش تردي ؟؟
غيداء: مش فاضية بنت عمي توفت
منذر: ياساتر من امتى ؟؟
غيداء: اليوم يوم الفروق
منذر: ربي يرحمها .. عظم الله اجركم :(
غيداء: شكر الله سعيكم .. انا بنسكر مش فاضية
منذر: تمام .. نراجي فيك كلميني الليلة مش تنسي زي عوايدك
غيداء: نحاول ان شا الله .. سلام :(
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
جيداء كانت اضم في المعايين .. لابسة بيجاما تيشرت وردي ربع كم وسروال اسود ..وقايمة شعرها كودا فوق ..
عبير: جودي بالله عليك هاك صونية مديها لزياد :)
جيداء: باهي حاضر
سمعت الباب يطق (( هدا اكيد زياد خللي نرفعله الصونية )) .. فتحت الباب ع وسعه وتلاقيه !!!
#Dudu
