#ورد_العمر
الحلقة :: 14 ::
جيداء كانت البرا في الجنان فرحانة المدرسة قريب تبدا بتغير جوها مع صحباتها وتتفكى من الحوش شويا .. قعمزت فتحت الاي باد ع أغنية ( يابابا سناني واوا .. وديني عن الطبيب .. ماعاد بدي شكلاتة .. بس بدي اشرب الحليب .. السوسة نثرت في سناني آآآآآآآه ياسناني )
قعدت تنقز وفتحت شعرها وادووور وتلعب زي الصغار بالزبط .. ماتستغربوش في عمرها 17 بس في داخلها طفل قاعد مانضج .. قاعدة صغيرة وتفكيره برئى ونظيف .. قاعد همها الكبير ألعابها .. وتتشوق وتفرح وين تسمع قناة #طيور_الجنة منزلة آلبوم جديد لنجومها .. وتحب تمشي للملاهي .. وتحب تلعب زي الصغار .. حتي كلامها واسلوبها قعد صغير .. بس حادثة جلال بتكبرها غصبا عنها .. خلونا نرجعو لجيداء وشن قعدت ادير .. #المهم .. استمرت في اللعب وتغني فرحانة
كانت لابسة توب بيج وعليه ميكي ماوس وسروال احمر وفاتحة شعرها الاسود الطويل ..
,,,,,,,,,,,,,,,,,,,,,,,,,,,,,,,
محمد: غير بات عندي ياراجل نتونس بيك
زياد: بتونس بيك وانت معايا .. معاش نحفظها ههههه
محمد: غير هيا والا كان خطبت خلاااص
زياد: تي شن بندير عندك بالله عليك .. بنبدل تقعميزة مع أمي بيك انت ههههه
محمد: اعطينا منها شويا اللمة الحلوة اهيا .. والله قداش مستاحشها
زياد: عادي أمي هيا أمك .. اقعد بات عندي واديرلنا امي العالة شن رايك ؟؟
محمد: ياريت والله .. بالك نضايقكم والا حاجة ؟؟
زياد: لا اضايقنا لاشي .. غير توا انزل معاي المغرب قريب
محمد: خليها بعدين تو نجيك
زياد: ووووووه قداش مانفاخ بتنزل انزل بترقد ارقد .. انا نازل
نزل زياد من السيارة لحوشهم
محمد: تي غير راجي اهو بننزل مبردك الزفت -_-
طفا السيارة ونزل بيلحق زياد .. طق ع كنشيلو الحوش ماحد فتحله .. فتح الباب بالشويا وقعد يتكلم
محمد: زياد .. السلام عليكم
وأول ماقام عينه جت في جيداء يللي كانت مش منتبهة معاه وادور وترقص زي المهبولة .. قعدو عيونه عليها معاش قدر يقاوم المنظر يللي قدامه .. ويللي يوحي ان هالبنت ماهي الا طفلة صغيرة مازالت بعيدة عن خبت هالدنيا .. بعدين اذكر انه شافها في وفاة جنى المدة يللي فاتت .. ويللي طلعه من سرحانه .. صوت أمها تنادي فيها .. ( جيداء ياجيداء تعالي يامهبولة ههههه )
رد الباب وطلع وقف جنب السيارة وقعد يتكلم مع روحه
محمد: جيداء !! .. الله محلا اسمك .. زعما قداش عمرك ياجيداء ؟؟ .. اماليك يعطووك :\ .. والا يشحطوني جو بتكمل قرايتها ومش عارفة شني :\ .. لكن والله البنت حلوة ماشا الله ياريتني شفتك من زماااان.. اسسسس شن هدا يامحمد بدي الشيطان يوسوسلك .. اعوذ بالله من الشطان الرجيم
زياد: ان شا الله ربي يشفيك ههههه
محمد: اااه زياد .. وين كنت ؟؟
زياد: تعرف ليا ساعة وانا انادي محمد محمد وانت سارح تشبح للقطوسة قدامك .. عجباتك ؟؟ ههههههه
محمد: ايه والله عجبتني يازياد ااااااخ كان تكون ليا بس
زياد: ههههههه هدرز شن تبيها ليك اهيا .. خودها برا
محمد: بجديات !!
زياد: شن هوا يللي بجديات يافرخ .. بديت تودر ؟؟
محمد: آه ماتركزش خلااص .. هي تعالا نسهرو عندي شن رايك ؟؟
زياد: ليا ساعتين نقنع فيك تبات عندي وتوا تقولي نسهرو عندك .. خيرك محمد صاير لعقلك شي ؟؟
محمد: ماصاير شي .. نسيت ياراجل .. هي خش خش
زياد: ههههههههههه مالاول قلتها ربي يشفي
محمد: ^_^
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
نسيم: زيديني حليب
رنيم: باهي شويا
مدت ايديها بتاخد البكرج يللي فيه الحليب سخون ويشفطها ويطيح عليها وتنحرق رجلها صيحت بصوووت عاااالي لين امها فاقت وجتهم تجري
رنيم: آآآآه ياماما رجلي خلااااص
نسيم: حي اسسس تو تسمعك تو نديرلك الثلج
خشت عليهم نهلة
نهلة: حييي بزعتو الحليب؟؟
نسيم: تبزع ع رجل رنيم ياماما توجع فيها
نهلة: ياحي عليا وريني رجلك ترا .. باهي قلتولي تبو كاكاو راني درتلكم
نسيم: قلتلك ياماما وكشختي علينا ولزيتينا تبي ترقدي
نهلة تذكرت للي صار ولامت نفسها .. قعدت تكمد في رجل رنيم وهيا تبكي قاعدة توجع فيها لين مولية حمرا .. وكل ماتضغط عليها تزيد توجع .. نهلة قعدت تتأمل مع بنتها بسبب اهمالها قريب فقدت بنت تانية .. عاهدت نفسها تنسى الماضي وتوقف وقفة الأم الحنونة مع بناتها من أول وجديد <3
,,,,,,,,,,,,,,,,,,,,,,,,,,,,,,,,,,
غيداء تتفرج ع
The vois
فجأة جاها مسج ( غيداء تتزوجيني ؟؟! )
عرفت المسج من منذر .. تجاهلت المسج بش كانت فرحانة ومضايقة في نفس الوقت وجود كريم في النص مستحيل يريحها .. لازم ماترتاح من عذاب ضميرها وتحكي لمنذر كل شي .. يأما يرضى بيها ويتزوجها يأما يسكر الموضوع نهائيا .. الخوف مساندها ومش مخليها ترتاح
,,,,,,,,,,,,,,,,,,,,,,,,,,,,,,,,,,,,,,,,
طق الباب ع ميار وكانت تقرا عندها امتحان غدوا ..
ميار: تفضل !!
مصعب: ميار .. فاضية !!
ميار: نقرا عندي امتحان غدوا
مصعب: بنفتحلك موضوع زياد !!
ميار: من زياد ؟؟
مصعب: ماتستغبيش عليا -_-
ميار: انا مانعر......
مصعب: ماسألتكش تعرفيه او لا ؟؟... اسمعيني كووويس .. موضوع زياد سكريه بطريقتك اوكي !!
ميار: كيف يعني ؟
مصعب: يعني زياد مش ليك .. يعني ارفضيه وسكري موضوعه ^_^
ميار: شن السبب؟؟.. سألتك وطلع مش كوويس والا كيف؟؟
مصعب: مادامك ماتعرفيشي لاش تسألي هالاسئلة كلها .. ارفضيه زيه زي غيره وتمينا
ميار: قصدك زيه زي صاحبك وجدي صح !!
مصعب: هدا مش موضوعنا .. يللي نبيه منك توا .. ترفضيه بآي طريقة تبيها والا ح نخليك ترفضيه بالطريقة يللي أنـــا نبيها ..آوكي !!
ميار: مالاخير يامصعب يللي في بالك نحييه .. انا زياد نبيه ونعرفه ومستحيل نرفضه وآعلي مافي خليك اركبه .. انت بالغصب تبي كل شي بمزاجك ؟؟
وقف مصعب وعصب كيف آخته تكلم فيه بالطريقة اهيا لأول مرة .. شدها من رقبته قريب خنقها ..
مصعب: تو نوريك انا آعلي مافي خيلي تمام .. وزياد اقسم بالله ماك واخدتيه فاهمة ولاه ؟؟
ميار: مش بمزاجك هيا .. انا يللي بنتزوجه وبابا الحمد لله قاعد ع راسي ومستحيل يسلملك الراية فهمتني ؟؟
مصعب: زياد الكلب لو كان راجل ماكانش لعب من ورانا .. جي قاللنا وخلاها الدوة بين التريس .. لكن العيب مش فيه .. العيب في المسخة يللي سايراته
ميار: المهم تقدملي وجي خطبني ووجدي صاحبك تبي ادير فيه الخير .. تصافا انت وياه .. لكن مش تمحيلي سعادتي وتخربلي حياتي ع حساب سعادة صاحبك .. -_-
مصعب: ههههههه انا حذرتك
طلع مصعب وكان التهديد بصبعه ركب الخوف لميار وخلاها تتراجع خوفا ع حياة زياد من خوها وصاحبه .. سكرت الدار بالمفتاح وقعدت تبكي .. وتدعي لربي يفرج همها ويكون معاها
,,,,,,,,,,,,,,,,,,,,,,,,,,,,,,,,,,,,,,,
جيداء: ماما ماعندناش كريمة شانتي ؟؟
ريهام: شن بديري؟؟
جيداء: خاطري في تيرامسيو .. عادي نمشي لدكان متاع عمي عامر بسرررعة مانعطلش
ريهام: بري ماتعطليش بالله عليك شدي الحيط يلاقيك الفرخ جلال والا حاجة ؟؟
جيداء انقشعت الابتسامة يللي كانت مرسومة ع وجهها .. وخافت فعلا تلاقيه وهوا كان يهدد فيها بنظراته .. استغفرت ربي ولبست عبايتها الفضفاضة بالك تخفي شويا من ملامحها ع جلال .. وتوكلت ع ربي ..
,,,,,,,,,,,,,,,,,,,,,,,,,,,,,,,,,,,
محمد: زياد
زياد: هممم
محمد: شن معناها لما الواحد يشوف بنت لمرة وحدة بس ويقعد طووول الوقت يفكر فيها .. هكي حب والا اعجاب ؟؟
زياد: ههههههه حب من أول نظرة .. قوللي شن صاير معاك ؟؟
محمد: قصدي انا والله ماشفتها الا مرة وحدة .. وهكي خشت لخاطري ومرااات تخطر في بالي هلباااا .. قصدي بجديات هكي نكووون حبيتها ؟؟
زياد: والله مانعرف
محمد: انت حبيت اكيد تزبط ولاه؟؟
زياد: والله يللي نعرفه انك لما تشوف انسانة وترتاحلها اكيد مع كل مرة بتشوفها وتعرف تفاصيلها ح تحبها اكتر واكتر <3
محمد: باهي كان مانقدرش نتعرف عليها ولا نقدر نقررب جيهتها ؟؟
زياد: كيف ؟؟... بنت مني يللي مايقدرش محمد يعترفلها بشي ؟؟
محمد: مش اعتراف لكن مانقدر حتي نقوللها خير :\
زياد: حيرتني الصراحة .. من هيا تكلم ؟؟
محمد: جيداء :\
زياد: جيداء ؟؟؟؟؟.. لحظة لحظة من جيداء هادي ؟؟ معانا في الجامعة ؟؟
محمد: لا .. تبي الحق ؟؟
زياد: ايه وتوووا ؟؟ >_<
محمد: شفتها في حوشكم :\
زياد: ماعندناش جيداء الا بنت خوي هههههههه بس هادي صغيرة ياراجل ؟؟
محمد: عارفها صغيرة .. لكن والله وين شفتها ارتحتلها وحاب نعرف زي ماقلت تفاصيلها :\
زياد: تفاصيل شني ؟؟... خيرنا ياراجل معقولة هكي توصل بيك لهنا ؟؟
وقف زياد بيطلع ويسيبله المكان .. شده محمد من ايده
محمد: غير لحظة بس .. تو علاش هكي ادير ؟؟
زياد: سكر ع الموضوع نهائيا والا قسما بالله نقلبلك القهوة فوق راسك الله >_<
محمد: تي علاش باه ؟؟.. قصدي علاش تفكر فيا هكي؟؟.. انت عارفني صاحبك ولو نبي ندير الغلط فيك ومن وراك نقدر نديرها .. لكن جيتك بالتريس ووقفت عليك وتكلمت معاك وصارحتك .. باهي اعتبرها مش بنت خوك واسمعني !!
زياد: محمد !!
محمد: انت عارفني ماعنديش في الخبت وكل شي نأمنه عندك ومادسيت عليك شي .. لكن بما انك تبي تسكر الموضوع ح نسكره للابد .. واعتبرني ماقلت شي اوكي ؟؟
زياد: هههههه خيرك زعلت ياراجل .. محمد انت صاحبي وعزيزي ..بس عارف احني الليبين وغيرتنا ع بناتنا .. قصدي هيا صغيرة صح بس مش لدرجة نخلي صاحبي يدويلي عليها !!
محمد: اوكي قلتلك خلاص سكرته الموضوع
زياد: بس انا ندويلك ع ميار .. وندويلك بصراحة وماندس عليك شي لانك صحبة وتستاهل .. ويأخي بنمشي نسافر بنأمنك عليها .. اسمعني محمد سامحني .. وادويلي ع جيداء عادي .. اصلا هيا فرخة ههههه حتي توقف عليها وتقوللها نحبك تقولك شن معناها ؟؟... ادويلي مادور شي خلاااص
محمد: ههههه متأكد ؟؟
زياد: ايه والله .. انت شن تبي تعرف عليها ؟؟.. وانا ح نختصر عليك الطريق ^_^
محمد: انا يللي بنختصر عليك الطريق ونبي نخطبها
زياد: تخطبها ؟؟.. قصدي عمرها 17 ره ؟؟
محمد: ايه وشن فيها ؟؟.. أمي تزوجت وعمرها 15 ولما عمرها 17 عندها صغار .. شن قاعد تدوي انت ؟؟
زياد: ياودي هدا في زمان امي وامك .. لكن بنات توا تبي تقرا وتبي تكبر وبعدين تتزوج .. حتي تفكيرهم مش ناضج .. قاعدين زي الصغار يفكرو ومايعرفوش يتصرفو :\
محمد: قلنا خطبة احني ماقلناش بنتزوجو -_-
زياد: ان شا الله .. نشوف بوها ونرد عليك :\
,,,,,,,,,,,,,,,,,,,,,,,,,,,,,,,,,,,,,,,,
#Dudu
