#ورد_العمر
الحلقة :: 4 ::
عبير كانت مقعمزة في الصيدلية وفاتحة النت وتهدرز مع صاحبتها علي خشة زبون
: السلام عليكم يااخت
قامت عينها لقاته :o
يوسف تفاجأت !!
عبير: شن ادير هنا ؟؟
يوسف: كيف تبيني نوصل فيك باه؟؟
عبير: يوسف والله نفسيتي تاعبة وجيت للصيدلية نخدم غصبا عني
يوسف: من غصب عليك ؟؟
عبير: خوتي قالولي بري اخدمي وغيري جوك
يوسف: باهي منو بيا انا ياعبورتي ؟؟
عبير: اوكي روح توا ونتكلمو بعدين .. اوكي !!
يوسف: لا تسايري فيا .. انتي من لما توفى بوك وفونك مسكر .. ماعندك حد وراك والا شنو ؟؟
عبير: اوكي روح والله لما نفتحه النقال الله
يوسف : وكان ماتفتحيشي تلقيني قبلك غدوا في الصيدلية .. تمام ياحبي
عبير: ههههه وحق ربي مجنون .. اوكي تمام
طلع يوسف من الصيدلية وفتحت نقالها .. وقعدت تراجي في ساعات شغلها لين اتم باش تكلم زياد يجي يروح بيها ...
,,,,,,,,,,,,,,,,,,,,,,,,,,,,,,,
زياد بعد مالعبهم في الملاهي .. نزل للغذائية خدالهم شكلاتة وعصاير والشيبس .. فرحو بيها روحو يغنو فرحانين .. اتصل بميار ماتردش عليه .. خش فتح التلفزيون وقعد يتفرج ع المباراة .. خشت عليه علا اخته
علا: زياد نقص شويا نبي نكلمك في موضوع
زياد: نعم .. تفضلي
علا: بنكلمك في موضوع الحوش مش ناوي توتي روحك باش نخطبولك والا شني ؟؟
زياد: وخيركم مستعجلين ؟؟.. بوي مازال ماطقش سنة باش انا نتزوج ونوتي روحي
علا: امي تبيك تجهز روحك تبي تفرح بيك
زياد: من هنا الي سنة يدير الله طريق
علا: غير زيد فكر ورد عليا اوكي ؟؟
زياد: اوكي
علا: لامتى بتقعد هكي منكد وحابس روحك
زياد: مش حابس روحي انا كنت انطلع في صغاركم باش يلعبو
علا: بديره جميل علينا توا ؟؟
زياد: هههههه بالله وراس وخيتي جيبيلي ماناكل بنموووت جوووع
علا: بجديات هههه حاضر
ناضت علا فرحانة تجري بتوتيله غداه تحسابه حق بياكل ويتغير جوه .. وهوا قاللها هكي باش يلهيها ع الموضوع يللي جاياته بيه ...
,,,,,,,,,,,,,,,,,,,,,,,,,,,,
ميار مع مصعب في السيارة ..
مصعب: اهي صيدلية انزلي
ميار: لا مش هادي .. نبي هديكا يللي تجيك ع اليمين مازالت القدام تو لما نلقاها نقولك وقف
مصعب: شن الفرق يعني ؟؟
ميار: هديكا فيها حاجتي يللي نبيها
مصعب : ربي يصبرني ع دلع النسون هدا
ميار: وقف وقف اهيا
درس سيارته وجي بينزل ,, طول نطت فيه
ميار: لا قعمز اهني راجيني مش معطلة
مصعب: فيها بنت والا ولد ؟؟
ميار: بنت وبلاش خبث عاد
مصعب: باه ماتعطليش
نزلت وخشت للصيدلية لقت عبير تتكلم بالفون واول ماخشت ميار
عبير: اوكي خلاص تو نروح نكلمك .. اوكي باي
عبير شبحت في ميار : نعم .. تفضلي ؟؟
ميار: اااه انا مش جاية نبي دوا
عبير:ااها معناها تبي نفاص بالمفروم هههههههه
ميار: ههههههه نبي زياد
عبير: والله زياد خوي ؟؟
ميار: ايه خوك
عبير: والله خوي الباين مرتبط وناوي يتزوجها ف ان شا الله تلقي نصيبك مع احسن منه
ميار: اها انا ميار
عبير: انتي ميااااار ؟؟؟
ميار: ايه خيرك انصدمتي ؟؟
عبير: باهي اتصلي بيه خيرك تعبتي روحك
ميار: اتصل ومارديتش عليه .. اسمعي زياد حاجبني عليكم ومايبيش يعرفني عليك
عبير: زياد مش من نوعه يللي يدوي بالبنت .. قصدي يخاف مايصيرش نصيب ويلقى روحه مشهدر بيها عندنا
ميار: بعيد السو ياربي.. انا خاطري نتعرف عليك بالك نكونو صاحبات
عبير: ايه عادي خودي رقمي هي .. بسرعة راهو علي جيته بيروح بيا مرات يشوفك يديرلك مشكلة
ميار: ايه حتي خوي يراجي فيا .. بالله اعطيني كريم نيفيا
عبير: هههه اوكي تفضلي
خدتها وطلعت تجري لخوها يللي هزبها ع التأخير .. اما عبير ف قعدت مستغربة :لدرجة هادي تحبه وانا يوسف يللي خطيبي مسكرة فوني شهور ومش مدوراته ياحليلي ع القلب الميت
,,,,,,,,,,,,,,,,,,,,,,,,,,,,,,,,,,
غيداء كانت مقعمزة في الجنان تشرب في نسكافي ومشرتعة كتابتها تقرى .. قطع قرايتها اتصال .. ومرة تانية الرقم الغريب .. داراته صامت وكملت قرايتها .. جتها نسيم ورنيم
نسيم : دودي عادي تسمعي عليا سورتي ؟؟
غيداء: باهي حاضر وانتي شن تبي تقري؟؟
رنيم: لا انا نبيك تنزليلي لعبة في الاي باد انا حافظتها سورتي
غيداء: باهي سمعي علي اختك ياشريرة
رنيم: قولتها ماتبيش
غيداء: وين رفعكم عمو زياد؟
نسيم: للملاهي وشرالنا حاجات حلوة
غيداء: ياريتني مشيت معاكم
بعدين شرين نقالها ومرة ثالثة الرقم الغريب طارتلها وردت : نعم .. مارديتش معناها مانبيش نرد .. مني انت ؟؟
: اسف ااا انا غالط .. سلامات
غيداء: اوكي سلامات
نسيم: ههههه خيرك تكشخي حرام عليك
غيداء: مالكش علاقة هادي حاجات كبار
وتجي في وذن امهم .. تجيهم تجري
نهلة : نسيم رنيم اركبو فوووق بسرعة
نسيم: باهي حاضر
ركبو بسرعة لشقتهم .. نهلة شبحت لغيداء : قصدي مش ضروري تكشخي راهم صغار
غيداء: ماكشختش انا .. هيا تدخل في حاجات مش ليها
نهلة: كلميني انا نفهمها .. راهو بناتي مش متعودات ع الصوت العالي
غيداء: باهي مرة تانية ان شا الله ..
مشت نهلة ركبت ولحقت بناتها والنار راكبتها من غيداء .. طبعا غيداء مش قصدها بس السية تجي في وذن صاحبها طوووول ...
,,,,,,,,,,,,,,,,,,,,,,,,,,,,,,,,,,,,
سوسن كانت في شقتها تنشف في المطبخ .. وحطت الكيكة في الكوشة .. سمعت صوت في الحمام
سوسن : اسم لله .. شن صوت التقربيعة هادي في الحمام
خشت للحمام مالقت شي .. علي خشة محمود عليها
محمود: خيرك ؟؟
سوسن: لا شي سمعت صوت في الحمام ومالقيت شي
محمود: كبرتي ههههههههههه بديتي تخرفي
سوسن : عينك هههه قاعدة صغيرة والا شني رايك؟؟
شدها من خصرها وباسها علي جبينها : صغيرة كبيرة انتي بس يللي سكنتي قلبي
سوسن: باهي حول ياسخيف الكيكة تو تنحرق
محمود: تي مش صاير منها الكيكة اصلا .. تعالي نبيك شويا
سوسن: حول ههههه خلي ندير تمرة علي عمري
محمود: ههههههههه اوكي ماتعطليش عليا نراجي فيك
وخش لداره بدل حوايجه وحط الهدية يللي كان جايبها فوق الشكماجة ومشي للحمام .. خشت سوسن للدار تلفتت يمين ويسار مالقتاش وكيف بتنادي عليه شافت الباكو .. احمر وطويل طول وعليه شريط فضي ومكتوب عليه ( كل عام وانتي حبيبتي ومرتي وبطول عمرك حبيبي)
تفكرت انه عيد ميلادها اليوم يللي ماحد تفكرها الا محمود ضحكت لين دموعها نزلو من الفرحة طلع من الحمام قعمز علي ركابه مقابلها : افتحي خلي نشوفو شن فيها ؟؟
سوسن: علي اساس مش انت يللي جايبها ؟؟
محمود: باهي شن رايك رومانسي طلعت ولاه؟؟
سوسن: بجديات محمود نحبك ومش ح نلقى خير منك
محمود: وانا نمووووت فيك .. وان شا الله العمر كله معاااي
سوسن: ان شا الله يااارب
فتحت الهدية لقتها عبارة عن ساعة ذهب عجبتها هلبا ومن الفرحة تغمراته وقعدت تبكي
محمود: تو علاش الدموع هي ؟؟
سوسن: لينا سنتين مع بعض وقاعد تحبني زي قبل؟؟
محمود: سنتين زواج بس .. نسيتي 5 سنين علاقة انتي اعظم قصة حب صارت ع الدنيا
سوسن: حتي لو ماجبتش صغار تقعد تحبني ماتتزوجش عليا ؟؟
محمود: خيرك هبلتي انتي .. تي نهبل انا كان تبعدي عليا تبيني نتزوج غيرك .. نوضي وتيلي روحك نطلعو نتعشو برا بهالمناسبة الحلوة ياحلوة هي
سوسن: نحبك نحبك
وناضت تجري بدلت حوايجها وطلعت هيا وياه .. كيف بتركب السيارة تلقتهم نهلة كانت تجيب في نعناع من برا لشاهي الليل
نهلة: علي خير وين ماشيين؟؟
محمود: طالع انا ومرتي مشوار
نهلة: مش ح نحسدكم قولو وين؟؟
سوسن: نتعشو برا ونغيرو جو
نهلة: امممم باهي بالسلامة
,,,,,,,,,,,,,,,,,,,,,,,,,,,,,,,,,,,,,,,,
في حوش صالح .. جيداء تحط في العشي وغيداء تحدد في حوايجها بتمشي للجامعة غدوا .. اما ريهام مقعمزة تسرد في احداث يومها لصالح ( شن دارتلي اللآي وشن قالتلي عبير وكيف شبحتلي علا ... وهكذا).. جيداء في المطبخ سمعت تليفون امها يشرين لقتها بنت جيرانهم صفاء ردت عليها : اهلين صفاء
صفاء: شن جو يافرخة ؟؟ عاش من شافك
جيداء: كساد في الحوش لين قلقت
صفاء: اسمعي امي مشت اليوم لحوش جدي بايتة شن رايك غدوا تجيني نهيجو ونغيرو جو
جيداء: نشوف ماما ونرد عليك .. انتي قاعدة في الحوش بروحك ؟؟
صفاء: ايه بروووحي .. خوي طالع زردة من الصبح
جيداء: اوكي طيري خللي نفتحلها الموضوع
مشت جيداء حطت العشي قدام امها وبوها وطبعا زي جيداء زي غيداء مايمشوش للجيران ولا لصحباتهم الا للضرورة ماعندهمش كتر طلووع ..
جيداء: ماما.. بابا .. صفاء امبكري كلمتني وقالتلي تعاليلي غدوا نهدرزو
ريهام: سكري الموضوع وكانه ماسمعنا شي
جيداء: بالله عليك بابا قول كلمة
صالح: خليها تمشي وماتعطلش
ريهام: نوضي جيداء نادي اختك وخوك يتعشو
جيداء ناضت مع تنفيضة وتعصب .. شبحت ريهام لصالح
ريهام: انت عارف ان عندهم ولد رديف ويخووف ولاه؟؟.. كيف تبيني نأمن علي بنتي عندهم
صالح: البنت كويسة ولاه؟؟
ريهام: كويسة زي هيا زي امها زي بوها بس هوا طلع كراع عوجة
صالح: خلاص امالا .. سويعة من الزمان وتروح ماتعطلش
خشت غيداء وجيداء وعلي معاهم
علي: وين طالعين؟؟
صالح: غدوا اختك ماشية لحوش صفاء
جيداء: اها يعني وافقتو ؟؟
صالح: ايه توكلي ع الله
جيداء تغمرت بوها بالقوووة .. : ربي يخليك ليا يااحلا اب في الدنيا حسيت بيا ديما مكسدة في الحوش
ريهام: كولي بلا تلقيح دوة .. مافيك كان طولة اللسان
جيداء: هههههه
,,,,,,,,,,,,,,,,,,,,,,,,,,,,,,,,,,,,,
عبير كانت تكلم في يوسف ..
عبير: يايوسف سبق وحكيتلك والله ظروف والدنيا ضايقه
يوسف: باهي ياحبيبتي نبيك ديما جنبي مانبيكش تبعدي تي عندك علم قريب عشر مرات نتصل بخوك ونتحشم نفتحله موضوع تسكير فونك
عبير: يلا مش مشكلة.. المهم شن ادير توا؟؟
يوسف: في القهوة مع الولاد
عبير: باهي انا تعبانة بنرقد عادي تخليني نرقد
يوسف: عينك .. النوم انسيه اليوم ياغلاتي
عبير: يوسف بلا جووو عاد .. شويا تانية معاش تسمع الا تنخيطي ره هههههه
يوسف: ايه عادي حتي تنخيطك نغمة تهبل هههههه
عبير: باهي ادويلي شن درت اليوم ؟؟
يوسف: هدا ياستي .. نضت الصبح مشيت للمعرض درت واجبي وبعدين رفعت بوي لحالة الوفاة عندنا ولد عمه في الجبل توفى رفعته .. قال بيقعد عندهم انا روحت وجيتك للصيدلية .. حق قوليلي شن رايك في مفاجأتي ؟؟؟... الوووو عبورتي ... عبير... حبيبتي ياهمي رقدتي .. باهي تصبحي انتي مرتي ياااارب .. نحبك <3
,,,,,,,,,,,,,,,,,,,,,,,,,,,,,,,,,,,
زياد: مياااار يااااسرنا نكد يابنتي انا راجل كبير مانبيش التنقنيق
ميار: ههههههه ضحكتني
زياد: ماهو بديتي معاش تفهمي بالتكشيخ يادعوة
ميار: حبيبي نبيك تجيني نبي نشوفك
زياد: حاااضر من عنوني ياعنوني شن تبي تاني هي؟؟
ميار: مادامك هكي بديت تتدلع شكلك بترقد
زياد: هههههههههه حفظتيني ياحبي
ميار: امالا شنو ؟؟,, لينا سنين هههههه
زياد: ايه بالله حق .. قداش لينا مع بعض؟؟
ميار: ياحنة هكي سنتين
زياد: وطوووول عمرنا ياااارب مع بعض
ميار: تحبني بجديات ؟؟
زياد: لا .. سنتين قدرت نكدب عليك ههههههه
ميار: خزي مشنااااك.. اسمع هي باي شكله مصعب روح خللي نحطله عشاه
زياد: وانا مني يحطلي عشاي
ميار: عبير وااااضحة يعني ههههههههههه
زياد: تي بري روحي مبردك
ميار: هي رد بالك ع روحك
زياد: حتي انتي .. وربي يخليك ليا يااغلا الناس يامهبولتي
ميار: ههههههه امممين يارب . سلامات
,,,,,,,,,,,,,,,,,,,,,,,,,,,,,,,,,,,,,,,,,,,,,,
نهلة خشت للدار لقت علاء متكي ع سريره ويشبح للسقف .. قعمزت ع سرير وتنهدت
علاء: خيرك ؟؟؟
نهلة: خوك ومرته
علاء: خيرهم؟؟
نهلة: ع خاطر عشي برا يفشكووو ورافعين خشومهم .. ع ماكلة ريت حتي حاجة كبيرة
علاء: اممم قصدك محمود ولاه؟؟
نهلة: امالا منو ؟؟.. تحسابها ريهام ياناري فنت عمرها باش تكبر صغارها
علاء: وانتي شن واجعك؟؟
نهلة: ماواجعني شي .. غير هيا حتي الصغار ماجابت وراجلها مدللها غير شن تبي بس .. تاريته مش بالصغار هيا باش يحبك راجلك
علاء: اها تبي تتعشي برا؟؟
نهلة: هدا ماخديت انت غير العشي .. ومفرخك هادو وين بنحطهم كاني بنتعشي برا ... تبيني نخليهم لامك امالا؟؟
علاء: وخيرها امي ماتنقص عليهم حاجة ربي يطول في عمرها
نهلة: ترا اخطاني الفرخة غيداء اليوم خشيت عليها لقيتها تكشخ عليهم .. وامك ماتندري عليها منين زارقة
علاء: خلاااص شدي صغارك فوق معاش تنزليهم
نهلة: ايه وشن فيها ..مش كايدة فيهم انا
علاء: نمشو نتعشو كلنا مع بعض شن رايك؟؟
نهلة: ايه باش نقعد نلاطي بين الناس اركح واهفت وقعمز .. ترا فكني
علاء: خلاص خليهم عند امك
نهلة: لا ياكبدي امي مش ناقصة يللي فيها كافيها
علاء: شن تبي مالاخير انتي؟. اي حل نعطيهولك اطلعي فيه لولة .. فوتيني وسكري الضي بنرقد
نهلة: ايه ارقد ماهو يقولو فيها الشكوة لغير الله مذلة .. ليا ربي انا .. تصبح ع خير
علاء: هههههه
طلعت نهلة وتعلي في صوتها ع الصغار فشت غلها فيهم .. واما علاء سكر الباب ورقد فاتها بالطوووويل
,,,,,,,,,,,,,,,,,,,,,,,,,,,,,,
ميار حطت العشي لخوها بسرعة بسرعة تبي تلحق ع زياد قبل مايرقد باش تهدرز عليه .. لكن شدها خوها
مصعب: قعمزي نبيك في موضوع؟
ميار: نعم
مصعب: صاحبي اليوم كلمني عليك
ميار تخزرطت ( حي كما شافني مع زياد هداك اليوم )
مصعب: الووو وين مشيتي؟؟
ميار: اها معاك .. شن قالك عليا؟؟
مصعب: يبي يخطب شن بيقول يعني وانتي شي ماتفهميش
ميار: هههههه خلعتني
مصعب: علاش انخلعتي شن مدايرة انتي ؟؟
ميار: ااه لا شي.. اسمع كنسل الموضوع نبي نكمل قرايتي
مصعب: قداش سيمستر مازالك انتي ؟؟
ميار: خيرك بتحسبلي ؟؟.. قالق مني ؟؟
مصعب: لا مش هكي .. قصدي عمرك مناسب والولد كووويس ماشا الله مهندس كهربائي وصيته عالي
ميار: ربي يحفظه ويلقى من تستاهله يارب
مصعب: يعني مسكرة راسك انتي ؟؟
ميار: ايه فوته الموضوع .. نبي نقرا قرايتي مانبيش شي يلهيني عليها
مصعب: باهي هاك الصفرة شبعت .. تصبحي ع خير
خدت ميار المعايين وقعدت تغسل فيهم وتفكر كان خوها يشك في حاجة ويقعد في جرتها .. ويحط الموضوع في راسه يكمله .. بعتت مسج لزياد ( ربي يجمعنا بالحلال يااارب ) وسكرت فونها ورقدت تفكر في زياد .. وتدعي لربي مايحرمها منه ..
,,,,,,,,,,,,,,,,,,,,,,,,,,,,,,
زياد ناض الصبح بدل حوايجه وتشيك بيمشي للعمل ... لقي امه وعبير نايضات قبله يضمو في الحوش .. صبح عليهم : صباح خير ياعويلة
مريم: اشي اشي ع وليدي ياماشا الله .. هاتي البخور ياعبير
عبير: هههههه طالع طرف سعدودها ههههه
زياد فنص فيها مشت للمطبخ تجيب البخور .. وتلفت لامه: شن رايك يمة في الطرحة بالله عليك
مريم: تبارك الرحمان مصلي ع النبي عليك
زياد: ههههه بالله عليك ادعيلي ماشي للخدمة انا توا
مريم: اقعد افطر اهو الفطور واتي
زياد: لا محمد يراجي فيا في القهوة
عبير: راجي راجي اهو البخور يمة
خدت مريم تبخر في ولدها وتدعيله وتقرا عليه .. فرحانة لانه تجاوز مرحلة اشتياقه لبوه وحسرته عليه .. ورجع لحياته الطبيعية وتخطى مرحلة صعبة في حياته
,,,,,,,,,,,,,,,,,,,,,,,,,,,,,,
زياد ولع سيارته وفرح بمسج ميار اتصل بيها طووول
زياد: الو ميرو شن الجو؟
ميار: تمام
زياد: خيرك منكدة ؟؟
ميار: لا مش منكدة .. انا توا ماشية للجامعة اوكي
زياد: باهي اسمعي بندير دورة عليك ماتخشيش لمحاضرتك قبل مانجيك اوكي
ميار: اوكي .. سلامات
,,,,,,,,,,,,,,,,,,,,,,,,,,,,,,,,
غيداء تنوض في بوها
غيداء: هيا بابا تاخرنا راه
صالح: بري قولي لعلي يرفعك
غيداء: فكني من سواقته المطيوشة ارفعني انت بالله عليك
صالح: والله تاعب شوفي عمامك بالك حد فيهم فاضي؟؟
غيداء: مانعرفش انا بنت منو .. بنتك والا بنت عمامي؟؟
اتصلت بعمها زياد..
غيداء: ايوا زيزو
زياد: ها غيداء .. صباح الخير
غيداء: عادي ترفعني للجامعة؟؟
زياد: والله طلعت .. علاء مازال ماطلعش شوفيه
غيداء: باهي اوكي باي
سكرت منه .. اتصلت بعلاء طول
غيداء: صباح الخير عمي
علاء: صباح النور بنت خوي
غيداء: كان فاضي نبيك ترفعني للجامعة
علاء: بوك وين مشي؟؟
غيداء: بوي تاعب مايقدرش يسوق اليوم
علاء: باهي عندك مني يروح بيك بعدين راني مش فاضي
غيداء: عندي عندي .. غير ارفعني بس
علاء: اوكي انا نسخن في السيارة انزلي وماتعطلينيش
غيداء: اوكي هي
,,,,,,,,,,,,,,,,,,,,,,,,,,,,,,,,,,,,,,,,
عند سوسن ومحمود ....
سوسن: تفضل قهوتك
محمود: غزالتي مانوصيكش ع امي تمام .. ماتطوليش لسانك عليها
سوسن: امك عادي كان تخطاني علا ونساوين خوتك
محمود: سايريهم وخلاص
سوسن: باهي رد بالك ع روحك
ولبساته دجاكته وسقداته ببوسة خده للعمل ..
,,,,,,,,,,,,,,,,,,,,,,,,,,,,,
حطت مريم هيا وبنتها الفطور مع الساعة 10 ..
مريم: وين الشاهي يابنتي؟؟
عبير: حي نسيته دهاب شيرة
ناضت بتجيب الشاهي .. رن تليفون مريم
مريم: جيبيلي هاتفي ياعبير
عبير: حاضر هي
شافت الرقم لقاته ام يوسف يللي تتصل
عبير: خير ان شا الله
رفعاته لامها تجري..
مريم: هاتي مني ع الخط
عبير: هادي ام يوسف شوفيها خيرها؟؟
مريم: السلام عليكم
ام يوسف: كيف حالك ياحاجة مريم؟؟
مريم: والله الحمد لله كيف حالك انتي ؟
ام يوسف: الحمد لله شن حال عروستنا؟؟
مريم: اهي جنبي تسلم عليك
ام يوسف: سلمها ياربي.. ايه ياحاجة مريم اتصلنا باش اناقشك في موضوع
مريم: خير ان شا الله؟؟
ام يوسف: العشية ان شا الله جايينكم باش نحددو العرس
مريم: ااه تفضلي ع سلامتك
ام يوسف: باهي امالا ياحويجة بالسلامة
مريم: الله يسلمك مع السلامة
سكرت منها ...
مريم: هادي عمتك تبي تحدد العرس
عبير: اوووف كلمته يوسسف انا ع الموضوع هدا وقلتله الصبر لكن شي مايفهمش بكل
مريم: عيب يابنتي وبعدين الراجل معاه حق قداش بيصبر عليك وكل مرة تأجلي
عبير: بوي مازال ماطقش سنة
مريم: ايه وكان هذا ... بتخللي الراجل يراجيك سنة ماعنده غيرك امالا؟
عبير: كانه يبيني يراجيني وكان هدا سليمته
مريم: يابنتي ديري عقلك في راسك وبلاش دوة زايدة راهو الناس معاهم حق قداش ليك توزعي فيهم
عبير: باهي .. انا شبعت الحمد لله
مريم: ربي يهديك يابنتي
,,,,,,,,,,,,,,,,,,,,,,,,,,,
زياد القي ميار واقفة مع بسمة تراجي فيه ..
زياد: صباح الخير بسمة
بسمة : صباح النور زياد شن الجو؟؟
زياد: تمام الحمد لله وانتي؟
بسمة: تمام.. شني طالع طرف اليوم ههههه
زياد: ههههه امي تبخر وتعاود غير مني بياخدني بالعين بس
بسمة: ايه والله معاها حق .. هي انا نستاذن .. ميورة كان كملتي كلميني تمام!!
ميار: اوكي تمام
مشت بسمة لمحاضرتها وميار قعمزت ع كرسي وتلفتت للجهة التانية عكس زياد ..
زياد: امس رقدتي وجوك عسل وباعتيلي مسج عسل وتو شن قلبك يابنت
ميار: مضايقة
زياد: تي لينا 8 شهور ماتلقيناش وتوا تعطي وجهك بالقفا ؟؟
ميار تلفتتله : انا خايفة تكون انت مش نصيبي
وقعدت تبكي وحطت ايديها ع وجهها
زياد استغرب من تصرفاتها: شن يللي مضايقك ومخليك تقولي كلام هكي
ميار: لانه امس جو خطابة وخوي مصعب خايفاته يقول لخوتي التانيين ويزوجوني
زياد: خيرك ماقلتليش امس ؟؟
ميار: صاحب مصعب .. بعدين اصلا شن بيغير بالله ؟
زياد: خيرك هازية انتي ؟؟
ميار: مش هازية .. بس خلوقي مضايقات
زياد: غيري جوك مانافعك شي ره .. خودي مستكة
ميار: رايق هلبااا انت .. تي نقولك مرات يزوجوني
زياد: تتزوجي غيري وانا حي .. خيرك انتي ؟؟ .. لما نموت خودي غيري بس انا حي مستحيل
ميار: متأكد زياد؟؟
زياد: متاكد ميورتي
ميار: هههه والله نحبك
زياد: امسحي دموعك مشناااك .. درتيه عزي هههههه
ميار: امالا شنو والله امس مارقدت خايفة
زياد: مرات صاحب خوك خير مني بري تزوجي نتمنالك السعادة من قلبي
ميار: زيااااااااد !!
زياد: ههههههههههه نبصر نبصر
ميار: اعزمني ع الفطور مش مستكة هههه
زياد: باهي لكن مش معطل عندك وراي شغل
ميار: ههههه باهي شوفتك لخمس دقايق تكفيني
زياد: هههههه والعمر كله ؟؟؟
ميار: هههههههه ليك وبس
زياد: ربي يخليك ليا ياغزالتي ..
,,,,,,,,,,,,,,,,,,,,,,,,,,,,,,,,,,,,,,,,,
في العشية جيداء توتي في روحها باش تمشي لجيرانهم .. خشت عليها غيداء وكيف روحت من الجامعة..
غيداء: شحطوني زي خوك زي بوك .. تخايلي من الساعة تنين كملت قرايتي وشوفي توا 5 كيف خشيت الحوش ,, والله فديت من حركاتهم اهيا يديرولي سيارة ويريحوني
جيداء: ههههه فوتي القراية اسهل ههههه
غيداء: ايه حتي انا فاضية ندويلك .. تسمع امي والله لما تبطلني
جيداء: غير اسمعي نلبس البلوزة هادي والا هادي احلى
غيداء: البسي يللي بتلبسيه ماتشاورنيش مش رايقتلك بكل
جيداء: يضحكو صحباتي حاسديني عندي اخت اكبر مني قريبة ليا والله كان يجو ياخدوها خير
غيداء: هدا فاش فالحة .. ترا درقي وجهك من عليا خللي نبدل حوايجي من غير نشافات
جيداء: باه
,,,,,,,,,,,,,,,,,,,,,,,,,,,,,,,,,,,,,,,,,
رنيم ونسيم واياد يرسمو .. خش اياد يجري لامه تهدرز هيا وامها وعبير تبدل في حوايجها بتمشي للصيدلية .. دوامها
اياد: ماما .. اعطيني الالوان يللي شراهملي عمي امبكري
علا: ريح جمالك وبرا العب ع حالك وفكني منك
اياد: تي نبي نلون بيهم
علا: والله يريح واحد والا ينكسرو نهارك يللي ادور فيه نعرفهم انا صغار خالك مايهنو ع حاجة
مريم: اسكتي عيب
عبير: تو تسمعك وحدة منهم تعاود لامها ههههههه
علا: تسمع والا ترقد تفكني منها ومن حرجها الزايد
اياد: تي باهي كيف يصير ناخدهم والا نمشي؟؟
علا: برا خودهم واهو حذرتك يريح واحد والله ماعاد شاري غيره
اياد: باه منووورة
خدي الالوان وطلع يجري لبنات خاله ..
مريم: سمعتي ياعلا .. عويلة يوسف بيجو اليوم
علا: هئ ان شا الله خير؟؟
مريم: بيحددو موعد العرس واختك مسكرة راسها ماتبيش
علا: تي خيرها هيا وزياد كلب يللي يكلبهم
عبير: خلوني في حالي .. انا يللي نحدد مصيري
علا: لو مادرتيش العرس بوي بيرجعلنا ؟؟
عبير: لا .. حزني ع بوي لتوا قاعد ومانقص حتي شويا
علا: ايه ع اساس احني فرحانين يللي بوي مات؟؟
عبير: والله الشي هدا يرجعلكم اما انا ف مستحيل ندير العرس توا وانتهينا
مريم: اطلعي حسه كلاكس اكيدة محمود جي بيرفعك
عبير: هي سلامات
وطلعت للصيدلية ... اما علا فطارتلها من اختها وخوها يللي مسكرين روسهم .. علي خشة سوسن عليهم
سوسن: كيف حالك اليوم اللآي ؟؟
مريم: الحمد لله يابنيتي .. قعمزي
سوسن: قاعدين ماجوش العويلة ؟؟
مريم: بالك بعدين شوي .. انا وتيت كل شي ناقص غير جيتهم بس
سوسن: اها باه وين عبير؟؟
علا: مشت للصيدلية مكلوبة عليها تقول اشبح شن مدايريلها فيها؟؟
سوسن: ههههه هيا غادي تلقى راحتها خليها وربي يعاونها
مريم: ايه والله .. ماريتيش سلفاتك اليوم ؟؟
سوسن: لا والله كل واحدة مسكرة شقتها وصغويرة اهم يلعبو لوطة
علا: ايه يبعتو فيهم باش حوشهم يقعد انظيف .. باهي محمود ماعنداش صغار حتي هوا كان هدا غبرت وخلاص
سوسن اضايقت من كلمة علا .. بس اكتفت ترد بابتسامة صفرة مجاملة ليها .. وناضت بتشوف الصغار شن يديرو؟؟
,,,,,,,,,,,,,,,,,,,,,,,,,,,,,,,,,,
جيداء طقت ع باب حوش جيرانهم ومتوترة لان زي ماقلتلكم ماعندهمش كتر طلووع .. فتحتلها صفاء ورحبت بيها
صفاء: اهلين جودي تفضلي تفضلي
جيداء: قلتيلي مامعاك حد ولاه ؟؟
صفاء: ايه مامعاي حد .. خشي للصالة ونحي عبايتك مش برانية انتي مابين ماجبتلك ضيافة
جيداء: اوكي تمام
صفاء مشت للمطبخ توتي في الضيافة .. وجيداء خشت للصالة نحت عبايتها
جيداء: وين مرايتهم ؟؟... كأني شفت مراية في المدخل نطلع نساوي شعري عليها وخلاص
كانت لابسة بلوزة بيضا شيفون وسروال جسكار عنابي وقايمة شعرها ديل حصان وكان واصل لنص ظهرها ومدايرة فيوكة ع القرن من فوق لونها عنابي ولابسة خراصات النازلات من فضة عليها شكل فراشة معاها سنسلتها وخاتمها وحديدة رقيقة فضة صادة .. قعدت تساوي في شعرها وحوايجها .. علي نزلت ولد جيرانها خو صفاء ( جلال) شافها كيف تتحرك وتساوي في روحها .. عجباته كل درجة ينزلها تزها في عينه اكتر .. بينما جيداء مش مركزة ع الدروج .. سمع صوت في المطبخ عرف اخته بضيف صاحبتها سكرر عليها المطبخ بالمفتاح .. بينما جيداء خشت للصالة طبست بتحط المشط في شنطتها ..
جلال: تهبلي
جيداء انخلعت وبعدت عليه : شن ادير اهني ؟؟
جلال: هدا حوشنا انتي شن اديري هنا؟؟
جيداء: بالله عليك وراس وخيي بعد عليا
جلال: ههههههه ضحكتيني تي قدامي قمر متسمي تبيني نطلع ونخليه
جيداء دفراته ..
جلال: خيرك انتي خايفة ؟؟.,.. مش ح نديرلك شي ره
جيداء: باهي كان تخاف ربي اطلع والله لما نروح ومعاد جايتكم الله
جلال: ايه بنطلع بس بعد ماندير يللي في بالي
وشدلها ايديها ولصقها في الحيط ..
جلال: شن اسمك ياحلوة؟؟
جيداء: حووول من عليا ريحة فمك اخخخخي
جلال: هههه تو تتعودي عليها
جيداء: حول من عليا حووول والله نلم عليك الجيران
جلال: انتي اساسا كيف تجيينا للحوش ؟؟.. اماليك مش خايفين عليك ؟؟
جيداء: راهو الدنيا ادوور وسيورة الدور يجي ع اختك
جلال: هههه اصلا اختي تجرب تعتب برا الحوش بس وتشوف شن يصير
جيداء كانت ترعش وقلبها قريب يطلع وتبكي وخايفة وعيونها مغمضات .. قرب منها جلال ..
صيحت باعلى صوتها : لااااااااااااااااااااااااااااااا
#يتبع
#Dudu
