#ورد_العمر
الحلقة :: 6 ::
جيداء ناضت خشت للحمام .. وهيا طالعة شبحت تليفون امها محطوط .. خداته وخشت للدار سكرتها ع روحها ... وضربت رقم صفاء
صفاء: الووو
جيداء: ياحقيرة ياساقطة تتفاهمي مع خوك باش اديرو فيا هكي حسبي الله ونعم الوكيل فيكم
صفاء: عيب عليك ياجيداء والله حتي انا مرجني طريحة والله مامني الله ومانحسابه في الحوش اصلا
جيداء: اكدبي ع الموشمات مش انا .. وربي ياخد فيكم الحق
صفاء: جيداء اسمعي وحق ربي مانندري عليه في الحوش
جيداء: الحق مش فيك .. الحق في اللي صدقاتك ومشت في طريقك تفووو عليك وعلي خوك ومن رباك ياخامرة
وسكرت عليها الخط ورجعت في نوبات عياطها وماسكتتش الا ع صوت الباب يطق .. غسلت وجهها وطلعت فتحت الباب لقتها حناها مريم..
مريم: خيرك يابنيتي وجهك مخطوف لونه ؟؟
جيداء: ااه لا شي .. راسي صدااع
مريم: خشي للدار تو نعصرلك لويمات دافيات اشربيهم
جيداء: لا صحيتي اميمة والله ماعندي نية . تعالي هدرزي عليا
مريم: ماسمعتش بيك مريضة امك بالصدفة قالت
جيداء: امي شهدرت ع الفاضي والله مافيا حاجة غير شويا صداع
مريم: باهي تعالي اتكي ع رجليا ونحكيلك حكاية
جيداء: بجديات اميمة ؟؟
مريم: ايه يابنيتي عارفاتك تحبي حكاياتي
جيداء: هههه ايه والله صح
اتكت جيداء ع رجل حناها وحطت ايديها تحت وجهها .. وحناها قعدت تمسح ع شعرها وتحكيلها ..
مريم: كان يامااكان في قديم الزمان .. بنت زي فلقة القمر ربي يحفظها يللي يشوفها مايواطي عينه منها .. كانت طيبة وتحب خواتها وتراعي فيهم بعد ماامها ماتت .. وفي يوم من الايام تزوج بوها وجابهالها للحوش .. البنية ماعرفتش شن تقول لبوها .. قعدت مع مرت بوها يللي كانت تضرب فيها هيا وخوتها لما يديرو غلط صغيرون .. وبرا يازمان وتعالا يازمان وع فجر ربي لزتهم برا الحوش .. قعدت البنية تبكي وشن بدير لخوتها يللي معاها .. قعدت تبكي وتدعي لربي ينجيها من الورطة وقعدت تمشي هيا وخوتها لوين مايوصلها ربي باهي .. لقت حوش مهجور وبعيد ع الناس .. قعمزت فيه هيا وخوتها وقعدت ادفي فيهم بالنار .. تاني يوم الصغار جاعو ويبو ماياكلو .. مااعرفتش شن ادير .. مشت لقرية قريبة منهم وقعدت ادور في السوق ادور في حاجة تشبع خوتها يللي الليل بطوله يبكو ... وشن صار ياجيداء؟؟؟
جيداء كانت تبكي ومش مع القصة نهائيا .. قصتها اكبر من هادي .. قصتها ماتنحلش بالامير تزوج البنت الجميلة وين شافها بالصدفة في السوق .. قعدت تبكي لين لفتتلها وجهها حناها ..
مريم: خيرك يابنيتي شن فيك؟؟
جيداء قعمزت وتلفتت لحناها : وجعوني الصغار يااميمة .. قصدي لو الواحد خسر شي كبير في حياته شن يدير؟؟
مريم: يحاول يعوض روحه في شي تاني يابنتي معاش تبكي عيونك تنفخو من كتر البكي
جيداء: اميمة لو البنت خطفها الامير وتزوجها بالسر؟؟
مريم: لا يابنتي ماتجيش معناها مايحبهاش الامير ومايبيش يتزوجها غير بيمتع روحه وبس
جيداء ولت لرجل حناها وكملت بكاها وكل لحظة صارت معاها تذكرها وتبكي .. كانت لحظات عصيبة ماقدرتش تفيق من هالحلم مازال !!!
,,,,,,,,,,,,,,,,,,,,,,,,,,,,,,,,,,,,,,,
زياد كان مقعمز مع الشباب سهرية للفجر بيغير جوه مايحسابش هكي بيصير ومني بيلقى ...
محمد: منورين شباب
رضاء: النور نورك ياخوي تفضلو قعمزو شن الجو يازياد؟؟.. عاش من راك ؟؟
زياد: ههههه اهو الظروف والخدمة امبهدلتني
رضاء: قاعد في الامان امالا ؟؟
زياد: ايه امالا وين بنمشي ؟؟
محمد: خيرك يارضاء نسيت انه بوه توفى وليه الحاج 6 شهور
رضاء: اااه سامحني والله ماعندي علم بيه .. عظم الله اجركم
زياد: ولا يهمك ياخوي شكر الله سعيكم
محمد: تي هي عرفنا ع الشباب الداخل
رضاء: هي تفضلو .. هدا احمد ووجدي ومصعب
زياد لما سمع اسم مصعب تغيرو ملامح وجهه .. هدا خو ميار !!.. قعمز معاهم وعينه ماحطهاش في عين مصعب ..
وجدي: تي جيب المكرونة يافرخ تتقبض علينا
رضاء: تي برا ياكلب حتي من لحم انا يللي جبته .. نوض ديرها بروحك والا ارقد
محمد: شني امالا مافيش شواء الليلة
رضاء: شوا شني ياراجل والدولار راقي
مصعب: هههههههههههههه كان فكرني فيه راني جبته
وجدي: شوف كرم بو نسيب ماشا الله يقدهم الزرادي
زياد كانت ع وجهه ضحكة ع طووول اختفت وزي من نخصه بمووس وركز في ملامح مصعب بالك يتغيرو زيه باش يكدب وجدي .. لكن مصعب ضحك وكأنه فرحان بكلامه .. مصعب ماعنداش غير اخت وحدة ويللي هيا ميار .. شبح لمحمد طووول وطا راسه ...
رضاء: شني جديدة هادي نغمة بو نسيب؟؟
وجدي: جينا بناسبوهم ولتوا مافيش رد
رن تليفون زياد كان المتصل ميار .. سكر عليها يبي يكمل الموضوع معاهم ..
مصعب: ان شا الله غير ناخد شور الوخية ونرد عليه
محمد: ع خير ان شا الله .. هات ولعة ياوجدي
وجدي: جيبها مش تمشطها
محمد غير الموضوع وشقلب الدوة .. اما زياد فاكتفى بابتسامة وطول الوقت سارح مش قادر يتخايل ميار بالفيلو مع واحد غيره .. مسح ع وجهه وناض
مصعب: وين يازيزو ماشي؟؟
زياد: اااه بنتمشي شويا عجبتي الاستراحة واسعة ماشا الله
رضاء: بيكلم الكبيدة شكله
زياد اكتفى بابتسامة صفرا وجي طالع .. وقفه وجدي ورزن دمه يللي مش متقبلها زياد !!
وجدي: ههههه مرات يطلعولك جنون الليل
زياد ضحك ضحكة صفرا وجامله وحس بالكره لهالشخص تحديدا .. ناض قعد يتمشي ع اغنية ( بالي نساك مستحيل .. عقلي معاك نهار وليل ) .. قعد قريب ربع ساعة وهيا يتمشى .. مضايق ..
,,,,,,,,,,,,,,,,,,,,,,,,
عبير: ااه ميورة طلع متزرد مع صحابه
ميار: اها نشغلت عليه مالاول سكر عليا وبعدين خارج التغطية
عبير: ههههه ماتخافيش عليه مرات جنب صحابه مايبيش يرد قدامهم
ميار: ايه مرات .. هي سامحيني ع اتصالي المتاخر
عبير: ولا يهمك حبيبة اتصلي في اي وقت
ميار: هي تصبحي ع خير عبير
عبير: وانتي من اهل الخير .. سلامات
,,,,,,,,,,,,,,,,,,,,,,,,,,,,,,,,,,,,,,,,
سوسن ركبت لحوشها بعد ماتعشو خلت محمود مع خوته .. اول ماخشت الحوش اللامبة وسط الحوش نحرقت .. خافت نزلت لمحمود وقالتله
سوسن: هي محمود نروحو
محمود: تشوفي فيا نهدرز مع خوتي وتبيني نروح؟؟
سوسن: خلاص الساعة 1 وعندك شغل غدوا
محمود: اوكي تو نركب بري انتي ..
سوسن: رجلي ع رجلك
محمود: باهي .. هي تصبحو ع خير
خوته في المربوعة : وانت من اهل الخير . راك تنسى غدوا
محمود: تمام
ركب هوا ومرته ع الدروج .. لقو مريم كيف نازلة من حوش صالح
محمود: يمة شن كنتي اديري فوق؟؟
مريم: بنية خوك مريضة قعدت معاها لين رقدت .. غدوا الصبح نوض طق عليها شويا وانشد
محمود: باهي تمام هي تصبحي ع خير
مريم: وانت من اهله
,,,,,,,,,,,,,,,,,,,,,,,,,,,,,,
خشو الشباب للاستراحة بيتفرجو ع فيلم .. اما زياد قعد برا ..
عبير يللي مارقدتش الليل تفكر في كلام يوسف ودموعها ينزلووو وخايفاته يسيبها
غيداء تفكر في منذر وكيف بتقوله ع الخيانة يللي لعبتها من وراه
جيداء كانت تبكي وتأن بصوت مايسمعه حد .. كدبت ع حناها ع اساس رقدت لكن هيا كانت موجوعة من الداخل ومش قادرة تحكي لحد ع صاحبتها يللي باعتها ..
ميار خايفة مصعب يدير مافي راسه ويزوجها لصاحبه يللي ماطيقاش نهائيا ..
الحاجة مريم فضي عليها الحوش من بعد المرحوم وكل تركينة فيه يذكرها بيه ..
يوسف كان خايف ياخد قرار ويندم عليه واصرار امه زايد موتره ومش مخليه يرتاح شويا ..
,,,,,,,,,,,,,,,,,,,,,,,,,,,,
اما سوسن ناضت تعيط في الليل مخلوعة ..
:o :o
#يتبع
( توقعاتكم شن بيصير في الحلقة 7 بكرا باذن الله .. واي نقد بناء انا نتقبله :) .. )
#Dose
