#ورد_العمر
الحلقة :: 13 ::
كريم: انا نسيت يللي فات وانتي لازم تنسيه مش ع خاطر عيونك لا ع خاطر صاحبي وين شفت الحب في عيونه انتي والله ماتستاهلي
غيداء: مكلمني باش تهين انت ؟؟!!؟؟
كريم: هههههه مازال في اهانة بعد زواجك من منذر قصدك ؟؟
غيداء: اسمع كريم الزم حدودك
كريم: حبيبتي مافيش حدود بينا زي مانتي عارفة يعني .. خليك واعية لكل حركة بتلعبيها معاي تمام !!
غيداء: اصلا معاش ح تسمع صوتي ولا ح تشوف وجهي .. ومنذر مش ح نخليه غافل ع اللي صار .. ح نوضحله كل شي فاهم ولاه!!
كريم: الاحسن خليك نظيفة قدامه لان لو عرف بوساختك احتمال يمسحك من ع وجه الارض ياحلوة ههههه
غيداء: نفضل المووت ع انني نعيش خاينة طوول عمري
كريم: هههههه انتي وراحتك انا حذرتك بس ..سلامات ياقلبي
غيداء: سلام
سكرت عليه غيداء وقعدت تبكي (( ليش يصير معاي هكي ؟؟!!..كل مانفرح تطلعلي حاجة تبكيني ؟؟!!.. كل مانقدم خطوة نرجع مية التالي؟؟!!.. اااخ ياربي صبرني ))
,,,,,,,,,,,,,,,,,,,,,,,,,,,,,,,,,,,,,,,,,,
منذر في باله يفكر (( زياد ؟؟!!... زعما شن يقرب لغيداء ؟؟!!..قصدي نفس اللقب اكيد نفس العيلة .. مايكونش خوها ..هيا مرة مقايلتلي عندها خو اكبر منها ..بس نسيت اسمه .. تقريبا هوا صح .. خللي نتصل بيها ونسألها ))
منذر: مراحب دودي
غيداء: اهلين منذر
منذر: خيره صوتك هكي ؟؟.. كنتي تبكي؟؟؟
غيداء: لا مانبكيش بس مزكومة
منذر: ان شا الله لا باس عليك .. تبي ترقدي ترتاحي؟؟!!
غيداء: حاجة زي هكي
منذر: تمام وين تنوضي كلميني تمام !!
غيداء: تمام ^_^
,,,,,,,,,,,,,,,,,,,,,,,,,,,,,,,,,,,,,,,,,,,
مصعب : السلام عليكم
العيلة: وعليكم السلام
حميد: شرفت ياسي البي .. وين كنت ؟؟!!
مصعب: قلتلك متزرد في الجبل
حميد: مش عارف اليوم اختك جايينها خطاب وانت خوها الكبير لازم تكون حاضر ولاه !!
مصعب: نسيت .. شن صار معاكم ؟؟!!
منذر: بالنسبة ليا انا عجبني الولد وتفكيره تقول مش صاحبك
مصعب: وخيرني انا مش عاجبك .. وبعدين انت من طلب رايك -_-
منذر: ههههه خيرك تعكرشت ماعجبكش كلامي
مصعب: تو اضم فمك والا نشوطك بالتليفون ؟؟
منذر: انت الخاسر هههه
حميد: تو ماتتحشموش انتم الزوز تتنقارو قدامي ؟؟
ابتهال: والله تقول ع روس بعض
منذر: هو يللي بدي
مصعب: تو تكدب قدامي .. بشناباتك وقاعد تستف ؟؟
ابتهال: اسكت انت وياه .. قول انت مش صاحبك زياد خيرك طلعت ؟؟
مصعب: قلتلكمم نسيته بكل .. غير قولو شن فكرتو؟؟
ابتهال: بالنسبة ليا امه مرا طيبة هلباااا وعجبني تعاملها مع بناتها وكناينها مبدائيا موافقة
مصعب: والله !!.. ماتحكميش قبل ماتعاشريهم
معاذ: شن شفت عليهم انت باش تقول هكي ؟؟؟
مصعب: انت شن قاعد في الحوش والا شايش لاختك ؟؟!!
معاذ: سكتت هاا -_-
حميد: الصراحة الولد تفكيره مش زي تفكير شباب تو .. تفكير شاب ناضج تربى صح .. بيقعد مع امه لانه مايطمنش عليها بروحها
مصعب: قصدك مش باني حوش بروحه ؟؟؟..يعني بيسكن مع امه؟؟
ابتهال: ايه عنده الحق .. وانا لما سمعت كلامه ارتحت ع بنتي .. ويقولو فيها ناس زمان (( اللي مافيه خير في اماليه مافيشي خير في الناس )).. وهذا لبنتي احسن اختيار وربي يوفقها
مصعب: غير راجي رااجي.. غدوا والا بعد غدوا يمووت وتطلع ايدها ع راسها
معاذ: تي علاش الزفت تفاول ع الولد وع اختك .. تي تقول عدوانك الززززح -_-
مصعب: لتاني مرة نقولك اسكت خيرلك
حميد: انا ماندورش في المال ندور في رجال فاهم ولاه!! تفكيري مش سطحي زي تفكيرك
ابتهال: خلي اختك في حالها مش كان رفضت صاحبك القريب تقلب عليها
مصعب: مافكرتش هكي انا ؟؟.. انتم رفضتو وجدي باش تعطوها لاحسن منه مش تلوحوها تلويحة اهيا؟؟!!
منذر: حسيتك مش موافق؟؟
مصعب: ايه طبعااا فكرو فيها منطقيا
حميد: من كل الجهات لا اعتراض عليه
مصعب: يعني سكرتو راسكم؟؟
منذر: يعني خيرك حامق الحمقة اهيا انت ؟؟.. وجدي ونعرفوه مايعرف يشد دجاجة بنأمنو ع اختنا معاه ؟؟!!
معاذ: ههههههههههه قوووية يامان
مصعب: ياسر انت يعبو عليك ياسيدهم
حميد: زي العواويل بالزبط خللي انوووض خير
ابتهال: خودني معاك التقعميزة معاهم اطبق الخلوق
مصعب: ديرو اللي تبوه بس اعرفو انا مش راااضي ره تسمعو فيااا مش راااااضي
حميد: مني قالك ارضى انت ؟؟.. انا بوها حي وانا مسؤول عليها -_-
معاذ ومنذر: في نص الجبهة ههههههههه
ناضو طلعو كلهم وخلوه بروحه يسحن الخطة يللي مدايرها فشلت .. لازم يحلي في عيونهم وجدي ويدغدش صورة زياد -_-
,,,,,,,,,,,,,,,,,,,,,,,,,,,,,,,,,,,,,,,,,,,,,,,,
ريهام: عادية مافيهاش لقطة حلوة بكل
غيداء: شن بيحطها تحفة هوا .. زياد عمره ماكان تفكيره سطحي
ريهام: نقطع ايدي من هنا كان الموضوع مافيشي علاقة
جيداء شرقت بالمية وقعدت تكح ..
غيداء: خير دعوتك؟؟
جيداء: شي ضحكتني امي بس
غيداء: علاقة والا اللي هوا المهم خطبها وكان معاها راجل
ريهام: ايه بالله انا همي في بناتي بس مافيش وحدة ادير الغلط من وراي شن دخلي فيهم التانيين القلب اللي يقلب
كل وحدة فيهم اذكرت همها وسكتت .. غيداء اذكرت منذر وجيداء اذكرت يللي صار مع جلال -_-
,,,,,,,,,,,,,,,,,,,,,,,,,,,,,,,,,
ميار: وهدا يللي صار ^_^
بسمة: ربي يهنيكم ياااارب .. والله فرحتلكم صبرتو ونلتو <3
ميار: ايه والحمد لله الفال ليك يااارب .. اسمعي لكن والله قلبي ينخص فيا وان شا الله خير
بسمة: ههههه اسم لله خيرك بالك مش متعودة تقولي كلمة مخطوبة هههه
ميار: ياباردة قاعدين ماوافقوووش بس كانو يتناقشو نسمع فيهم كلهم موافقين عدا مصعب ياحليلي
بسمة: تتوقعي مصعب يدير حاجة باش يبعدكم علي بعض ؟؟
ميار: مش عارفة وان شا الله مايدير شي يااارب
بسمة: ربي يبعد عليكم كل من يفرقكم يااارب <3
,,,,,,,,,,,,,,,,,,,,,,,,,,
عبير قاعدة في صدمتها ماطلعتش من دارها بكل ,, عيونها متورمات من البكي .. رن فونها ولقت المتصل يوسف <3
عبير: اهلين يوسف شن الاخبار ؟؟
يوسف: اهلين بيك .. الحمد لله وانتي ؟؟
عبير: مستاحشاتك والله <3
يوسف: عبير معليشي اطلعي منها المواضيع اهيا معاش في بينا شي
عبير: كيف يعني يايوسف .. كلامك مخوفني الحق
يوسف: كنت نتمنى نكمل معاك كل شي حلو بس انتي حرمتيني من احلى لحظات حياتي
عبير: باهي علاش مكلمني توا ؟؟
يوسف: نبي نسمع صوتك لأخر مرة
عبير: اوكي اهو سمعته :\
يوسف: خيرك تبيني نسكر ؟؟
عبير: ايه كلامك يللي امبكري ويللي توا قلته دليل ع انه كل شي بينا انتهى .. معاش في شي نهدرزو فيه .. ح نقعد ذكرى مرة مرة نخطر عليك واحتمال بعد ماتشوف خطيبتك ح تنساني نهائيا .. انا نعتبر في روحي من هداك الوقت فسخت الخطبة وربي يعوضني خير .. وزي ماقلت معاش في بينا هالمواضيع .........
يوسف: راجي شويا انا قصدي,,,,,
عبير: معاش يهمني قصدك .. المهم كلامك كان جارح بالنسبة ليا واسفة هلباااا ضيعت من وقتك سنين وانت تراجي فيا نكون حلالك .. وان شا الله يللي اخترتها التانية تكون احسن مني وع وجهها تشوف الخير
يوسف: انتي مافيش وحدة احسن منك صدقيني انتي الاولة والاخيرة بعدك مافيش حب <3
عبير: ربي يوفقك ويهنيك .. هي سلامات
سكرت عبير الاتصال واستمرت في بكاها يللي مالووش نهاية لحد الان .. لان يوسف شي كبير بالنسبة ليها .. ولما مشي خلا فراااغ عاطفي كبير بس كان أملها بالله قوي .. وعبير شخصيتها قوية مش بالساهل تسلم روحها للحزن والحنين .. كانت اقوى من هكي بهلباااا .. توكلت ع الله ومشت قعمزت مع امها واختها بتحاول تفتح الموضوع ومنها تعرف شن صار معاهم بخصوص ( ميار <3 زياد )
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
كانت نهلة مقعمزة في دارها ومازال الاسود عليها .. خشو عليها نسيم ورنيم ..
نسيم : ماما
نهلة: هممم
رنيم: احني روحنا .. خاطري في كاكاو ياماما
نهلة: وين كنتو اصلا انتم ؟؟
نسيم: خيرك ماما مش قلنالك بنمشو للمكتبة بنشرو ادوات
نهلة: باه اطلعو خلوني نرقد شويا
رنيم: ماتبيش تشوفيهم معانا ؟؟
نهلة: بعدين نشوفهم
رنيم: باهي والكاكاو شن يصير فيه ؟؟
نهلة: دبروو روووسكم واطلعووووو من الداااااار راسي خلاااااااااص ماتبوووش تفهموووو >_<
رنيم: اطلعي بسرعة
طلعو من الدار ياناري مخلوعات وخايفات ولأول مرة يشوفو امهم تعيط بهالطريــقة ..
خشو مع بعضهم للمطبخ ^_^
نسيم: تعرفي وينه انتي الكاكاو ؟؟
رنيم: ايه .. غير طلعي الحليب وسخنيه
نسيم: كيف بنسخنه باه ؟؟
رنيم: دوري بكرج متاع الحليب .. لكن في الدولاب الفوقي كيف بنلحقوه ؟؟
نسيم: ساهلة جيبيلي كرسي بس
رنيم: مرات اطيحي وتسمعك ماما تجي تضربنا
نسيم: بعيد السو عليا ههههه .. جيبيه بس
رنيم: باه
,,,,,,,,,,,,,,,,,,,,,,,,,,,,,,,,
جيداء كانت البرا في الجنان فرحانة المدرسة قريب تبدا بتغير جوها مع صحباتها وتتفكى من الحوش شويا .. قعمزت فتحت الاي باد ع أغنية ( يابابا سناني واوا .. وديني عن الطبيب .. ماعاد بدي شكلاتة .. بس بدي اشرب الحليب .. السوسة نثرت في سناني آآآآآآآه ياسناني )
#Dudu
