#ورد_العمر
الحلقة :: 27 ::
محمد: ههههههه يؤبرني الخجلان انا .. اسمعي جودي ...
جيداء: آها نعم :\
محمد: تحبيني !!
جيداء: :o
محمد: جاوبيني بالله عليك :\
جيداء: ءء محمد انا بنسكر .. خالي ينادي عليا :)
محمد: رغم اني عارف انها توزيعة .. بس والله متأكد انك تحبيني .. سلامات
سكرت جيداء وتنهدت من الفرحة .. وبما ان عرس عمتها قريب معناها في رجعة لطرابلس قريبة .. وشوفة محمد متشوقة ليها اكتر <3
,,,,,,,,,,,,,,,,,,,,,,,,,,,,,,,,,,
فــــاتت الايــــام زي لمــــح البصـــر .. تعالو نقوللكم كل واحد شن صار معاه :)
#ميار بدي يبان فيها الحمل بالشوي .. وكانت خايفة وماتبيش تقول لحد بس اكيد ح تكبر بطنها وبيبان فيــها اكيـــد :(
#زياد روح من لندن وكمل الكورس .. وبدي يوتي لعرس اخته .. والمجهولة مازالت مستمرة معاه في كلامها :\
#عبير فرحانة ومش قادرة توصف فرحتها لحد .. وانقطعت اخبار يوسف عليها .. والله اعلم شن بصير :\
#جيداء و #محمد عايشين الحبــ من بعيـــد لبعيـــد <3
,,,,,,,,,,,,,,,,,,,,,,,,,,,,,,,,
زياد: كيف كيف !!
علي: والله زي مانحكيلك ياعمي .. وين انت سافرت قسمو الورث وحناي عطت لكل واحد حقه .. وهونا سي محمود في الاردن مع مرته لتوا .. وبوي سكن قريب ع حوشكم
زياد وعلي كانو في السيارة .. مروح بعمه من المطار .. وبشره بالخبر السعيد :(
زياد: تي كيف تخلوووووووه كيف >_<
علي: وين تجي تشوف معاه حق .. انت عارف عمي محمود ماعنداش هداك الشغل المقوم يللي ينعبى عليه وبيطلعله رزقة باهية يمشي بيها للاردن علاج :\
زياد: تي كيف معاه حق اهيا ؟؟.. تي حوشنا هدا .. قصدي ذكرياتي مع بوي كلها محاها .. اصلا شن خاسر هوا .. ربح الفلوس وهج .. آآآخ كان نحساب هكي بيصير والله مانسافرها الله
علي: هدي بالك ياعمي .. انت قلتها ذكريات .. جدي توفى الله يرحمه وانا متأكد لو كان عايش ماخلاش عمي محمود يستحق .. راهو مدله من غير مايعد باش يعالج
زياد: والنبي سكر امه الموضوع .. حسك سكرت النية من المرواحة .. آووووف وين ساكنين توا ؟؟.. قصدي امي وعبير مع مني قعدو طووول هالفترة ؟؟
علي: اهني مش بعيد .. قعدت معاهم انا لين تشرف انت :)
زياد: استغفر الله العظيم وخلاااص >_<
,,,,,,,,,,,,,,,,,,,,,,,,,,,,,,,,,,
نهلة: علاااااء
علاء: هآآآ
نهلة: شن ادير في الكوجينا تقربع :\
علاء جاها للدار: بنديرللكم اليوم الغدي بايديا اهما :)
نهلة: سيب سيب تو انوض انديرللهم انا
علاء: مااتعبيش روحك حبيبتي .. انتي قعمزي وارتاحي انا اليوم ماعنديش عمل .. يعني مكسد مكسد وماكلة البرا هلبا هلبا مش باهية :)
نهلة: براحتك .. غير بالله عليك الكوجينا ماتقلبهااااش :\
علاء: من عيوني <3
,,,,,,,,,,,,,,,,,,,,,,,,,,,,,,
ريهام: ان شا الله .. ايه تفضلو .. ههههه بارك الله فيك .. ع سلامتكم .. يلا سلميلي ع العويلة بالسلامة :)
غيداء شادة مق نسكافيه وقعمز جنب امها ..
غيداء: مني كنتي تكلمي !!
ريهام: خطابة ياكبدي ههههههه
غيداء شرقت بالنسكافي وحطت المق ع الطاولة وتربعت لامها
غيداء: لمني !!
ريهام: ليك انتي لمني يعني .. انتي مافيش حد وقف عليك في الجامعة ؟؟
غيداء: لاالا .. علاش !!
ريهام: هوا الراجل قال لامه شفتها في الجامعة وخديت منها رقم امها :\
غيداء: آآآه .. باهي من عيلة مني ؟؟
ريهام: اسمه ياربي .. آممممم تفكرت .. من عيلة (( حميد الفلاني )) تعرفيهم !!
غيداء انصدمت وتفأجئت في نفس الوقت .. منذر رجع من جديد بخطوة جادة وقوية :(
ريهام: خيرك اسم لله ؟؟.. تعرفيهم ؟؟
غيداء: آآه لا منين بنعرفهم .. هوا اصلا قالك شفتها في الجامعة وعجبتني معناها منين بنعرفه !!
ريهام: ماهو يللي يشوف شكلك يقول مدايرة فالطة -_-
غيداء: ههههههه لا غير اول مرة ننخطب بس هههههههههه
ريهام: هي هي نحسابها كبرت وعقلت .. والنبي قوليلي كيف بنعطيك لراجل وانتي ع الغباء هدا ترا قوليلي !!
غيداء: هههههه .. انا بنخش وبنهدرز ع نوسة تبي شي !!
ريهام: غير راك تقوليلها .. فكينا ترا .. (( اقضوا حوائجكم بالكتمان )) .. تشهدري وبعدين مايصيرش والا حاجة .. وانتي عارفة البنات وماعندهم من حسد -_-
غيداء: مش ح نقول .. وبعدين نوسة صاحبتي مش ح تحسدني <3
ريهام: ايه طمني روحك .. -_-
غيداء: هههههههه
,,,,,,,,,,,,,,,,,,,,,,,,,,,,,,,,,,,,,
نهلة: حيييييييي هدا شنو ؟؟
علاء: خيرك خلعتيني .. شوية حوسة تو انضمها بري ارتاحي
نهلة: فرقت الراحة .. لا عاد نبي ناكل لا نرتاح .. حول حول
علاء: تي قلتلك خليهم .. والله ...........
نهلة: غير ماتحلفش .. تي شن بنخليلك لنخليلك .. هدا كله ع ريحة بكبوكي ياحليلي وخلاص
علاء: بدل من تقوليلي شكرا عليها -_-
نهلة: أأوف ربي يصبرني .. تي بنشكرك ع بكبوكي خيرك علاء ؟؟.. بجميلك مدايرها ؟؟.. انتم هكي الرجالة المرا تشقى واياماتها السود وين اديرو حاجة تبدو تنقرزو وتدوو بيها -_-
علاء: خيرك ولعتي معاش فصلتي انتي ؟؟ .. تي كلها ريحة..........
نهلة: طبعا ريحة خضرا محوسة ع تلبيزة اللافيندينو .. وشن تاني وع المكرونة الطايحة لوطة .. وع المعايين تي باهي باه :\
علاء: استغفر الله ياربي .. حتي الواحد بيدير فيكم الخير تنوضو فيه -_-
نهلة: ياملا خير .. خلاص علاء بارك الله فيك .. هي توا سقدني حتي الكوجينا بنسيقها واخرلك مرة اطيب حاجة .. توا انا يللي بندير كل شي اوكي عيوني !!
علاء: هههههه ايوااااه هكي مراتي الصح <3
نهلة: هي توا البرا لو سمحت -_-
علاء: تمام هههههههههه
,,,,,,,,,,,,,,,,,,,,,,,,,,,
ابتهال: خيرك ميورتي ؟؟
ميار: مافي شي .. حاسة راسي مصدع ونبي نرقد :(
ابتهال: خشي ارقدي في دارك .. مابين ماوتيت الغدي تو انوضك اوكي :)
ميار: اوكي ..
خشت ميار للدار وتلفتت يمين يسار مالقت حد .. سكرت ع روحها الدار واتصلت بزياد
زياد: آلو
ميار: زياد حبيبي استاحشتك
زياد: آآآآه
ميار: مش طايق تكلمني ؟؟
زياد: مياااار انا قلتلك مانرضهاااش فيك تكلميني وانتي ع ذمة راجل .. افهمي عاد :\
ميار: باهي نحبك .. والله مامني ولا منك هاللي صار .. كله من مصعب حسبي الله ونعم الوكيل فيه :(
زياد: عارف ياميار .. بس يللي اديري فيه اكبر حرااااام .. شوفي ميار لما تبي تكلميني امشي صلي ركعتين وادعي ربي يعطيك كل الخير ويعوضك يللي خسرتيه :)
ميار: وانت !!
زياد: وانا ليا ربي .. انا نحيتها من راسي فكرة الزواج .. وتوا خليني نسكر بنرفع عبير للسوق :(
ميار: آها .. شن عندها ؟؟
زياد: عرسها الاسبوع اهوا :(
ميار: آها بيفضى عليك الحوش ؟.. انا عارفة عبير اقرب وحدة عندك ولاه !!
زياد: اقرب وحدة هيا انتي .. وآهو خسرتك .. وتوا اختي بتتزوج .. آآآآآخ خليها في القلب تجرح ولا تطلع برا وتفضح .. هي سلامات :(
سكر زياد وحاس بغصة وخنقة ماليهاش نهاية .. عبير القريبة ليه بتتزوج .. وميار خسرها وعارف روحه للابد ومستحيل ينفتح باب امل جديد :(
,,,,,,,,,,,,,,,,,,,,,,,,,,,,,,,,,,,,,,,,,
غيداء اتصلت بمنذر اكتر من مرة هاتفه مقفل :\
ومنذر وين فتح فونه لقي اتصالاته رجع سكره من جديد .. مايبيش يرد عليها لان عارفها بتصده ومش ح توافق ع الموضوع يللي داره :(
ابتهال: منذر .. مياااااار .. معااااذ .. مصعب ... ياحميد نادي وجدي وخشو تغدو
حميد: باهي ان شا الله :)
خشو كلهم التمو ع السفرة
ميار كان وجهها منفخ .. قعمز وجدي جنبها ع الطاولة ويشبحلها . بس هيا ماعبرتاش
وجدي يوشوشلها: شن في وجهك اصفر .. ماتقوليش حامل :)
ميار توشوشله: فوتني -_-
ابتهال: وجدي كووول خيرك متحشم ههههه
مصعب: من قال بالله صاحبي ياكل معانا في نفس السفرة ههههههه
وجدي: النصيب ريته ولاه !!
معاذ: قصدك مصعب يعني -_-
حميد: معاذ كووول مش لازم تشاركنا -_-
ابتهال: ايه ايه ماقلتلكمش .. بنخطب لمنذر <3
معاذ: اييييح الخونة قبلنا !!
منذر: انت قعمز من قهوة لقهوة بالك تبيني نراجيك -_-
وجدي: عيت من ؟؟
ابتهال: صالح علي ....
وجدي: باهي مبروووووك ياولد ههههه
منذر: الله يبارك فيك :)
ميار: اقل شي ياخد يللي يبيها (( قالتها وعيونها ع خوها مصعب وسارحة فيه .. بعدين ضحكت ضحكة هزوة .. وناضت من ع الطاولة .))
لحقها وجدي .. طلعت للجنان وشافت يمين لقت جلسة من لوح يللي كانت تقعمز فيها وتطرح شيتاتها وتهدرز ع زيادها :(
وجدي: اذكرتيه ؟؟؟
ميار: ايه .. آآآآه ربي يحفظه :(
وجدي: ايه ادعيله لان مستحيل تشوفيه -_-
ميار: مش مهم .. المهم اني مستحيل نحبك وبس
وجدي: آآخ كان في الحوش راهو وريتك الكلام المعسل يللي تقولي فيه كيف شكله -_-
ميار: مش مهم .. آآآآه خللي نخش خير -_-
وجدي: اوووف هالبنت قداش مامنكدية -_-
,,,,,,,,,,,,,,,,,,,,,,,,,,,,
اسبـــــوع العــــرس ::
يوم الفــــاتحـــة <3
عبير لابسة البودري واتصلت بأسعد
أسعد: نعم ياروحي
عبير: تي انت وين ؟؟
اسعد: في الطريق .. كلها ساعة ونص وتولي حلالي .. انا مش مصدق هههه
عبير: ولا نا اصلا ياروحي فرحانة فرح مش طبيعي هههههه
اسعد: ههههه هي ماتعطلينيش <3
عبير: اوكي ههههه سلامات <3
,,,,,,,,,,,,,,,,,,,,,,,,,,,,,,
بعد ساعــــة ::
نهلة: عبير عبيرررررر .. تعالو قيموها معاي
ريهام: ياحي فجيوة فيها مسكينة :(
غيداء: ياربي كون معاها .. الصدمة في عرسها ياملا حظ عندك ياعمتي :(
عبير طاحت عليهم .. والحاجة مريم شادة تركينة وتبكي .. وكل النساوين عياطات وصدمة .. شن يللي صار قبل هالساعة ؟؟
جيداء طلعت للجنان تبكي بحرقة ومافيش حد يسمع فيها .. بالصدفة محمد كان مار من غادي وشافها .. خشلها
محمد: شن في؟؟
جيداء: :(
#Dudu
