#ورد_العمر
الحلقة :: 3 ::
اما عند ميار ف ركبت مع بسمة بتروح بيها لان بوها مش فاضي استاذنت منه ونست ماكلمت زياد تقوله وهيا في الطريق شافت زياد كيف بيركب سيارته قدام القهوة ..
ميار: اوقفي وراس بسمة هنا .. شفت زيزو بننزله
بسمة : باهي بسرعة ماتعطليش
ميار: تمام
نزلت تجري لين وصلت لسيارة زياد كان يسخن فيها ويدور علي نظاراته .. طقطقت ع المرش قام عيونها لقاها ميار نزل طوول ..
زياد: شن اديري هنا انتي؟
ميار: مروحة بيا بسمة .. استاحشتك زيزو
زياد: حتي انا .. هي بري بسرعة قبل يشوفك حد
ميار: خلي نهدرزو شويا
زياد: بلا هبال .. امشي روحي هي انا مش فاضيلك
ميار: مش فاضيلي ؟؟
ركب سيارته وسكر الباب وفتح الروشن
زياد: ايه بري بسرعة للسيارة وروحي تو نكلمك انا في الليل .. بري شن نتكلم انا ؟؟؟
ميار: خزي عليك نحسابك استاحشتني حتي انت ؟؟
زياد: ميار الناس كلها تتفرج .. بري وراس حبي تو نكلمك بعدين وحق ربي
ميار: ماتكلمنيش بعدين .. اصلا حتي انا مش فاضية
ومشت طوول مابتش تتلفتله ولا بت تتكلم معاه ركبت مع بسمة وروحت بيها .. اما زياد ف ضحك عليه ( مجنونة وحق ربي هالبنت هههههه ) .. طلع بسيارته ع الحوش طووول
,,,,,,,,,,,,,,,,,,,,,,,,,,,,,,,,,
في حوش صالح ..
غيداء كاانت ادير في كيكة وجيداء مقعمزة فوق الرخامة تاكل في تفاحة وتهدرز زعميتك علي اختها
غيداء: كولي باهي وترتيني
جيداء: باه .. قلتي لماما ع الكيكة ؟؟
غيداء: وعلاش بنقوللها ؟
جيداء: ماهو مرات تقولك جدك كيف متوفي عيب اديري حاجة حلوة
غيداء: اصلا اميمة يللي قالتلي ديريلي كيكة مربي المشماش
جيداء: اها خديتي الموافقة من الكونغرس صار ؟
غيداء: يب يب .. ترا مديلي الفانيلا ؟
جيداء: ماعندناش
غيداء: علاش ماقلتيش لبوي يجيب باه مادامك عارفة انه ماعندناش اااااه ؟؟
جيداء : نسيت .. ياعليوةعليووووووووووووة
غيداء: اقعدي نادي اصلا مهناش هوا .. حولي بننزل لعميمة بالك عندها
جيداء: بلا عار .. خودي امية ورد ديريها
غيداء: مية ورد صار يامتعلمة هههههههههه .. زهر والا عطر ياغبية
جيداء: المهم مية توا هيا ولاه ؟؟
غيداء: حي تليفوني يشرين
جيداء: تو نجيبهولك ..
غيداء: تجيبي عينك خليه في الشحن نكمل الكيكة ونشوف مني ؟
جيداء: تمام انا بنبدل وبننزل .. كملي كيكتك والحقيني .. بايات
حطت غيداء الكيكة في الكوشة وضمت حوستها .. وشافت تليفونها لقت رقم غريب فاتاته .. كملت كيكتها وزينتها بالمربى ونزلت لحوش جدها ..
,,,,,,,,,,,,,,,,,,,,,,,,,,,,,,,,,,,,,,,,,,,,,
اما عند زياد قعد يتصل بميار ويلقى في تليفونها مقفل تكنطى منها هلبااا وماباش يتصل بصاحبتها بسمة لان متاكد سكراته زعلانة منه ما فيها شي .. قعد يدور بالسيارة لين اتصلت بيه امه ...
زياد: السلام عليكم
مريم: وعليكم السلام .. وينك ياوليدي الساعة خمسة ره
زياد: اوكي انا جاي غير كان عندي موضوع بس
مريم: نوتيلك غداك ؟؟
زياد: لا والله ماعندي نية .. هي مع السلامة
سكر من امه وروح طووول للحوش .. ونار غضبه علي ميار مازالت والعة غير تفتح فونها بيفصل عليها
,,,,,,,,,,,,,,,,,,,,,,,,,,,,
ميار اتصلت بصاحبتها بسمة من تليفون امها ..
ميار: الو بسووو شن الجو ؟
بسمة : تمام .. شن جوك انتي ؟
ميار: الحمد لله .. قولي ماتصلش بيك زيزو ؟؟
بسمة: لا مااتصلش علاش بيتصل بيا ؟
ميار: لاني مسكرة فوني مانشدش عليا بكل
بسمة: وااااك علي حركات الفروخ حتي انتي .. افتحي فونك بلا هبال .. انتي عارفة انه الولد يحبك ومادارلك هكي الا لان خايف عليك من لسان الناس وانتي يالطيف علي سبلة
ميار: خليه باش مرة تانية يسايرني علي اي شي نديره معاه
بسمة: تي شن يسايرك عيلة انتي ؟؟؟
ميار: اوووف سكري سكري الرصيد فنش غير في الهزايب
بسمة: تمام هههههههههه
سكرت منها .. وقعدت تفكر شن ادير معاه .. ماتبيش تفتح تليفونها اليوم تبي تعرف غلاتها عنده .. بعدين خطرتلها فكرة !!!!
,,,,,,,,,,,,,,,,,,,,,,,,,,,,,,,,,,,,,,
علاء: شن هالكيكة ياغيداء؟؟
غيداء: بنتها زي العسل ياعمي تو بندير قهوة ونحطهالكم
علاء: ومن قالك ديري كيكة ؟؟
غيداء: اميمة اصلا يللي قالتلي ديريها وانتم يللي يجي يسالني مافهمتش وين الغلط
علاء: ياريت ربي عطاك بدل طولة لسانك طول جسمك ..لسانك ملوي عليك
غيداء: ماهو قصدي ياعمي يللي يجي يسالني تقول اول مرة اندير كيكة
علاء: انا قلت بالك امي تتحسس منه الموضوع لكن مادامها قالتلك بري حطيها هي والله جت النية فيها
غيداء : باهي حاضر هي
وكيف جي علاء بيطلع .. تلفتله غيداء: عمي !!!
علاء: نعم ياعمي
غيداء: بالله عليك سامحني نطيت فيك مش قصدي
علاء: عادي عادي ياعموو .. احني رفقة ههههههه
غيداء: ههههههه
طلع علاء من المطبخ وقعمز مع امه يراجو في زياد يروح باش يحطو القهوة .. خش زياد عليهم
زياد: السلام عليكم
الكل: وعليكم السلام
زياد: عبير ترا تعالي معاي شويا
مريم: قعمز اشرب قهيوتك
زياد: اوكي غير شويا بس
ناضت عبير معاه للدار ..
عبير: خيرك شن في ؟؟ خلعتني ؟؟
زياد: تقول عايشة في تل ابيب .. ديما مخلوعة
عبير: باهي يابارد شن تبي؟؟
زياد: نبي منك خدمة صغيرة
عبير: ههههههه باهي قول
زياد: طلعي فونك واكتبي الرقم اهوا واتصلي
عبير: علاش ؟؟.. ورقم مني هدا ؟؟
زياد: رقم ام المرا
عبير: هههههههه المرا صار ؟؟.. خيرني هدا وين سمعت
زياد: علي اساس يعني في غيرك داويله انا
عبير: باهي مل عليا هي .. وشن تبيني نقوللها ؟؟
زياد: قوليلها نبي ميار شويا وين ترد ميار مديلي الهاتف تمام
عبير: وحق ربي الا مهبول .. شن مدايرلها باش مسكرة فونها
زياد: قصة هبال مش ضروري تعرفيها
عبير : تمام .. اهو ينادي
ام ميار: السلام عليكم
عبير: وعليكم السلام .. كيف حال؟؟
ام ميار: والله الحمد لله .. من معاي؟؟
عبير: بالله ياخالتي اعطيني ميار فونها مسكر وانا صاحبتها نبيها ضروري!!
ام ميار: باهي شويا بس .. مياااااار تعالي صاحبتك تبيك
ميار: من صاحبتي ؟؟
ام ميار: مانعرفش هاك شوفيها
خدت الفون ميار وردت : ايوا نعم
خدي زياد الفون من عبير : حولي من بحدا امك ؟؟
ميار: نهارك احرف كيف عرفت الرقم ؟؟
زياد: انتي شن الهبال يللي اديري فيه ؟؟
ميار: فوني مافيشي شحن
زياد: كدابة ..بري اجري افتحيه نبي نتصل توا ونلقاه مفتوح فاهمة ولاه !!
ميار: باهي خلاص علاش تكشخ
زياد: لان الجو اهو مانحباش وانتي عارفة .. ومازلتي اديري فيه؟؟
ميار: باهي بااااي .. ماما تبي فونها
زياد: ميار اسمعي قسما بالله توا نتصل ونلقاه مسكر حسابك عندي كبير ره
ميار: باهي تمام .. سكر باااي
زياد: بااااي
عبير تشبحله كيف يكشخ علي ميار!!
عبير: حرام عليك علاش تكشخ عليها؟؟
زياد: تحرق الدم .. هي بري بنشرب قهوة
عبير: قولي منين تعرفها ؟؟
زياد: ماتخلينيش نندم يللي استحقيتك
عبير: اوكي برا
,,,,,,,,,,,,,,,,,,,,,,,,,,
رنيم ونسيم واياد والياس وجني يلعبووو .. والنساوين مع بعض .. والرجالة في الجنان يللي ينظف ويللي يسقي في الغرس .. والحاجة مريم توكل في دجاجاتها .. هكي شبه الحياة رجعت طبيعية والكل التهى بشي والحاج علي يدعوله برحمة في آونة الاستذكار .. الا زياد يللي قاعد يستنى بوه يطق باب داره ويخش ويهدرز عليه .. قاعد يشوف في بوه كل تركينة من هالحوش .. قاعد يتمنى يشوفه لو خمس دقايق .. مش الصغار بس يللي يتخايلو في بوهم ممكن يرجع بعد الموت .. حتي زياد كان يتخايل .. ويتمنى لو وفاة بوه مجرد حلم ووعي منه .. الاب مكانه كبير في العيلة وصعب حد يملاه .. وزياد كان الصغير ومتعلق ببوه ومافارقاش في كل لحظات فرحه وبكاه .. قعد زياد في داره وحط فونه ع الصامت ودموعه تنزل بدون صوت .. طق الباب وكانت جني بنت خوه ..
جني: عمووو !!
زياد: نعم ياعموو
جني: اينه زدو عطل مازاش؟؟؟
زياد: انتي تعرفيه جدو ولاه ؟؟.. لما يمشي لصحابه يعطل
جني: منو صحابه؟؟.. جدو عامر بس
زياد: لا عنده صحاب تانين .
جني: نسمع في عمتو عبير تقول لاياد زدو في الجنة ؟؟
زياد: ايه جدو في الجنة مع صحابه
جني: باهي نمسوله حتي احني؟؟
زياد: ايه بنمشوله لكن مش توا .. لما ربي ينادينا نمشو باهي ؟؟
جني: زدو زمان يقولي يللي يحبه ربي يمشي الجنة .. معناها ربي يحب زدو
زياد: ايه اكيد ربي يحبه
جني: انا مايحبنيش ربي ولاه ؟؟
زياد: لا سموحة عمو ربي يحبك هلباااااا
جني: وعلاش مامشيتش الجنة باه؟
زياد: قلتلك مازال لين ينادينا ربي
جني: باهي علاش زدو مارفعنيش معاه
وقعدت تبكي جني وتعاود ( نبي الجنة ) .. قامها عمها زياد وكان متكدر حتي هوا معاش عرف شن يقوللها والا شن يسكتها ..
زياد: اسمعي هي نقولو لصغار عمك ونمشو للملاهي
جني: ايه هي نمشو
زياد: باهي امسحي دموعك .. باش ربي مايزعلش منك
جني: باه حاضر .. انا حبه ربي
زياد: والله حتي هوا يحبك .. هي عاد بسرعة ماتعطليناش
جني: باهي نمشي ندول لمااما وحواتي
طلعت جني تجري باش تقول لخواتها وامها وباقي الفريق.. هوا تلفت لفونه لقي مكالمتين من ميار .. عاود اتصل بيها
زياد: نعم ميار؟؟
ميار: تو تقولي افتحي فونك وماتتصلش ؟؟
زياد: انا رافع الصغار للملاهي ..نكلمك وين نروح تمام ؟؟
ميار: لا مش تمام .. انا غصبا عني نفضالك وانت دقيقة مستخسرها فيا ولا مش هكي بس وين نحب نديرلك مفاجاة تخرب عليا كل شي .. تتصل وتهدد .. زياد انا بنت راني نبي اهتمام
زياد: باهي ميار .. هي تشاو
وسكر عليها .. وطلع لسيارة ولعها وركب الصغار ورفعهم .. معاش بت تعاودله ع اللقطة يللي دارها .. وقعدت تسحن وتترد كيف مايفهمها شي ويسكر عليها وماعدلش عليها نهائيا .. بس لما تجو تشوفو تلقوه معاه حق مش ناقص حتي هوا ..
,,,,,,,,,,,,,,,,,,,,,,,,,,,,,,,,,,,,,,,,,,,,,,,,
ميار كانت تبكي علي يللي داره فيها زياد .. وزي ماتعرفو البنت حساسة في الاهتمام .. خشت امها عليها في الدار لقتها تبكي ..
ام ميار واسمها ( ابتهال ) : خيرك ميار تبكي ؟؟
ميار: لا شي .. مضايقة شويا :(
ابتهال: متعاركة انتي وبسمة ؟؟
ميار: لا لا امورنا طيبة والحمد لله
ابتهال: باهي بري ديري قهوة نشربها انا وياك ونهدرزو هي وغيري جوك
ميار: اوكي .. اااه ماما عادي نطلب طلب ؟؟
ابتهال: شن هوا الطلب؟؟
ميار: نبي نمشي للصيدلية في حاجات ناقصيني بناخدهم
ابتهال: باهي قولي لمصعب يرفعك بعدين
ميار: كان قاعد خللي نمشي توا وبعدين ندير قهوة .. شن رايك ؟؟
ابتهال: مش عارفة شوفيه
ميار: اوكي :)
,,,,,,,,,,,,,,,,,,,,,,,,,,,,,,,,,,,,,,,,,
عبير كانت مقعمزة في الصيدلية وفاتحة النت وتهدرز مع صاحبتها علي خشة زبون
: السلام عليكم يااخت
قامت عينها لقاته :o
#يتبع
#Dudu
