Unicode
နောက်ရက်ကျတော့ပြောတဲ့အတိုင်း ဥက္ကဌကြီးကရောက်လာတယ်။ တစ်ယောက်ထဲမဟုတ်ဘဲဇနီးနဲ့သမီးပါ ပါလာတာကိုမြင်တော့ ဝမ်ရိပေါ်ဟက်ခနဲရယ်ချတယ်။ ရှောင်းကျန့်ကိုတော့ပြန်ခေါ်မှာမဟုတ်ဘူးမှတ်လား။
အိမ်ထဲမှာလူကြီးတွေစကားပြောနေတယ် ၊ အိမ်အပြင်ရဲ့တိုင်ကိုမှီပြီးဝမ်ရိပေါ်ကလက်ပိုက်လို့ရပ်နေတယ်။ သူ့မျက်လုံးတွေကတော့ ခြံထဲမှာရှိနေတဲ့ရှောင်းကျန့်နဲ့ ထိုအမျိုးသမီးဆီမှာ။
ဘာတွေပြောနေကြလဲဆိုတာကို ဝမ်ရိပေါ်မကြားရဘူး။ တစ်ခါတစ်ခါလှည့်ကြည့်လာတတ်တဲ့ရှောင်းကျန့်မျက်နှာကတော့ ပြုံးနေတယ်။ ယုံကြည်ပေးပါ ဆိုတဲ့အဓိပ္ပါယ်ပါတဲ့မျက်ဝန်းတွေကတော့ သူ့ကိုသက်သာရာရစေပါတယ်။
မိနစ်နှစ်ဆယ်လောက်ကြာသွားတဲ့နောက်မှာ ဝမ်ရိပေါ်လက်ပိုက်တာကိုဖြုတ်လိုက်တယ် ၊ မှီထားတဲ့ခန္ဓာကိုယ်လည်းမတ်လိုက်ပြီး ခြေလှမ်းတွေက ရှောင်းကျန့်ဆီဦးတည်တယ်။ ပြန်လျှောက်လာတဲ့သူမနဲ့ ထိပ်တိုက်ဆုံတော့ တစ်ယောက်မျက်နှာတစ်ယောက်ကြည့်ရင်း ဖြတ်သွားတယ်။
ဟုတ်တာပေါ့ ၊ သူတို့နှစ်ယောက်ကြားမှာပြုံးပြစရာအကြောင်းမှမရှိဘဲ။
ခြံထဲမှာ ရှောင်းကျန့်နဲ့ ဝမ်ရိပေါ် နှစ်ယောက်ထဲကျန်ခဲ့တယ်။ ဘာစကားမှမစခင် ရှောင်းကျန့်ခန္ဓာကိုယ်ကို သူဆွဲဖက်လိုက်ပြီး ကျောပြင်ကိုခပ်ဖွဖွပွတ်သပ်ပေးတော့ ပခုံးပေါ်ခေါင်းမှီချလာတယ်။
ခုနအချိန်ထိမတ်မတ်ရပ်ခဲ့တဲ့ ရှောင်းကျန့်က အခုမှာ သူ့ပခုံးပေါ်တိုးဝင်မှီကပ်လို့ငြိမ်နေတဲ့ ကြောင်ပေါက်လေးအသွင်ပြောင်းသွားတယ်။
ဝမ်ရိပေါ်ကလည်း အလိုက်သိစွာ နှစ်သိမ့်ပေးပြီး ပင်ပန်းမှုကိုလျော့နိုင်သမျှလျော့ချအောင်လုပ်ပေးတယ်။ သူ့ပါးစပ်ကတဖွဖွရေရွတ်နေတဲ့ " အဆင်ပြေသွားမှာပါ " ဆိုတဲ့စကားလုံးက ရှောင်းကျန့်အပေါ် သက်ရောက်မှုရှိလိမ့်မယ်လို့ယုံတယ်။
...
" ဟိုးအစထဲက တွဲခဲ့တဲ့လူက ရှောင်းကျန့်မှန်းမသိဘူး ၊ ဒီကောင်ကလည်းမပြောဘူးလေ အခုမှပြဿနာတွေရှာသွားပြီး ထွက်ပြေးသွားကြတယ် "
