_يا انسه أنتِ كويسه !
_تتجوزني !
_ ها
_ بقولك تتجوزني
_ أنتِ شاربه أي
_ خلاص أنت حر سلام
_ استني بس وفهميني اتجوزك إزاي
_ افهمك أي
_ بت أنتِ الشغل ده مبحبوش
_ متتكلمش معايا بالأسلوب ده
_ طيب سلام
_ استني خلاص أنا أسفه
_ يووه أنتِ عايزة أي
_ نتجوز
_ ازاي انتِ سخنه طيب، تعبانه
_ لا تحب نروح للمأذون دلوقتي ولا بكره
_ نروح نعمل اي !
_ نتجوز ما تركز شويه
_ اركز في اي انا واحد لسه جاي من شغلي وعلي أخري لقيت واحده بتعيط بسألها مالك تقولي يلا نتجوز انتِ اكيد شاربه حاجه وربنا
_ لا مش شاربه حاجه والله
_ اومال تفسري كلامك ده إزاي
_ هفهمك عمي عايز يجوزني من ابنه بالعافيه وانا مش عايزه
_ اه مش عايزه تتجوزي من ابن عمك وعادي تتجوزي واحد متعرفيش اسمه حتي
_ايوه بس اكيد احسن من ابن عمي
_ او يمكن أسوء
_ مظنش مفيش حد بغمازات شرير
_ افندم
_ اقصد شكلك طيب يعني
_ انتِ بيتك فين
_ لي !
_ علشان تروحي
_ طب والمأذون !
_ مأذون اي احنا نص الليل
_طيب نستني هنا للصبح علشان نتجوز
_ لا أنتِ شكلك هربانه منك بجد
_ ما تحترم نفسك انا سكتالك من بدري
_ ده انا اللي ماسك ايدي بالعافيه علشان مضربكيش
_ متقدرش تعملها اصلا
_ اقدر
_ لا
_ اقدر اوريكي
_ اصلا مش من الرجوله تمد إيدك علي بنت غلبانه زي في وقت زي ده
_ غلبانه ! انتِ غلبانه اتقي الله انا ماشي
_ وانا اللي افكرك طيب وجدع وميهونش عليك تسيب بنت وحدانيه زيي كده في الشارع فين الرجوله فين الشهامه
_ انتِ بتشحتي ! خلاص خلاص فسحي كده خليني اقعد لما نشوف اي حكايتك ماهو يوم أسود
قعد جمبي قدام البحر وفضلت ساكته
_ ها وبعدين
_ ولا قبلين
_ طب اي
_ بص هي خدمه صغيره تتجوزني الصبح ونتطلق بعد اسبوع علشان مش عايزه أتجوز ابن عمي
_ طيب وهتديني كام !
_ ها
_ اه هي من اولها لا روحي شوفي حد غيري
_ طب خلاص اللي أنت عايزه
_ إذا كان كده ماشي
_ أنت اسمك أي
_ إياد وانتِ يحلوه
_ نيلي
_ وانتِ طالعه من أي فزوه
_ وحشه ومتتكلمش تاني بدل ما
_ هتعملي اي
بصتله ومتكلمتش شكله هيتعبني معاه
_ طب احكيلي عنك مش معقوله نتجوز واحنا منعرفش بعض كده
_ انا يتيمه الاب والام وعايشه مع عمي ومراته وعايزني اتجوز ابنه علشان ياخد ورثي ولما رفضت ضربني وجيت علي هنا ولما لقيتك قولتلك نتجوز علشان احط عمي قدام الأمر الواقع ومش هيقدر يكلمني
_ أنتِ مجنونه وربي
_ مش ديما، وانت اي حكايتك
_ انا يستي بشتغل في كافيه قريب من هنا خلصت شغل وانا مروح لقيت واحده بتعيط استغربت مين هيجي البحر في وقت زي ده وخصوصا انها بنت وحصل اللي حصل
_ طيب انا اسفه لو كنت مندفعه شويه بس انت مش عارف اللي حصلي بسبب عمي ومراته
_ ولا يهمك
سكت وفضلت باصه للبحر عدت ساعات وبدأت الشمس تشرق ببص جمبي لقيته نام بس اي ده شكله احلي بكتير ، أي اللي بفكر فيه ده انا مش عارفه اللي عملته ده صح ولا غلط بس اي حاجه اهون من عمي
_انا عارف اني جميل بس مش لدرجه انك تفضلي بصالي نص ساعه كامله
_ علفكره كنت سرحانه ومش فيك خالص
_ طبعا طبعا
_ طيب مش هنروح للمأذون
_ كده ! هنروح كده بشكلنا ده وبعدين مأذون اي الساعه 8
_ ماله شكلنا ما انا قمر اهو وبعدين عادي الجواز ملهوش وقت معين
عطاني موبايله
_ بصي طيب كده
بصيت علي وشي الكحل كان سايح ووشي مبهدل وعيني حمرا
_ مين دي !
ضحك وقالي
_ انتِ
_ طول الوقت شايفني كده وساكت
_ عايزاني اقولك اي يعني
_ هات منديل واسكت خالص
عطاني منديل مسحت وشي
_ يلا بينا
_ علي فين
_ علي المأذون
_ بصي هو تقريبا بسبب السهر مخك حصله حاجه انتِ تروحي زي الشاطره كده وانا وعد بالليل هجيب صحابي ونتجوز
_ وعد رجاله !
_ وعد رجاله
_ طيب خد العنوان
عطيته العنوان ومشيت وصلت البيت قابلت عمي ضربني
_ كنتِ فين لحد دالواقتي وبيتي فين انطقي
_ ملكش دعوه بيا
_ ابوكي وامك ماتوا قبل ما يربوكي بس انا موجود
_اخرس انا اتربيت احسن تربيه
_واضح التربيه ادخلي أوضتك ومتطلعيش منها النهارده هتتجوزي سامح
سبته ودخلت اوضتي وانا بدعي ربنا ان إياد يجي من كتر التعب نمت صحيت علي صوت زغاريط ومرات عمي بتصحيني علشان البس الفستان لبسته بهدوء وطلعت لقيت المأذون وسامح لابس البدله بردو نفس السحنه المقرفه قعدت وبدأ الماذون يتكلم وانا علي تكه واعيط وإياد مجاش ولسه المأذون هيبدا يكتب ولقيت اياد دخل هو وصحابه ومامته
_ استنوا بص يا عمي انا عايز اتجوز نيلي
_ نيلي خلاص هتتجوز ابن عمها
_ بس هي مش موافقه وبتحبني وانا بحبها
_ هو لعب عيال مفيش الكلام ده انت اتأخرت
_ لسه الشيخ مكتبش وبالتالي متأخرتش وتقدر تاخد رائها
_ هو اي كلام اتفضل يا سيدنا الشيخ اكتب الكتاب
بصيت لاياد بإستنجاد وعيوني اتملت دموع وفجأه لقيته طلع من البيت مش معقول اتخلي عني بالسهولة دي ! اتخلي اي يا نيلي هو يعرفك ده بيشفق عليكِ مش اكتر وطبيبعي يعمل كده وقبل ما الشيخ يكتب الكتاب رن تلفونه رد وملامح وشه اتغيرت بسرعه وقام اخد حاجات
_ انا اسف لازم امشي
_ طب كتب الكتاب يا شيخ !
بص لسامح بخوف ومشي بسرعه مش عارفه اي اللي بيحصل بدأ عمي يشوف مأذون تاني بس ملقاش فقام اعتذر للكل والفرح اتأجل كل ده وانا مش مستوعبه اللي حصل دموعي نزلت من الفرحه طلعت الاوضه وغيرت الفستان وفضلت احمد ربنا لحد ما سمعت حد بيصفر بصيت من الشباك لقيت إياد
_ انت بتعمل اي هنا
_ انزلي يا نيلي بسرعه
_ مش قبل ما تقولي بتعمل اي
_ هقولك لما تنزلي بسرعه الموضوع خطير
نزلت بسرعه
_ بالبجامه والشبشب يا نيلي !!
بصيت علي هدومي
_ ما انت استعجلتني قولي موضوع اي
_ اركبي العربيه بسرعه
_ رايحين فين !
_ اركبي بس وهقولك متخفيش مش هخطفك
ركبت العربيه وساق بسرعه وانا متوتره لحد ما وقف
_ مقولتليش رايحين فين
_ المأذون
_ها !
_ ها اي معرفتش اتصرف آخر مره رغم إني من العادي امشي والموضوع يخلص بس حسيت بمشاعر غريبه وانه مينفعش تكوني لحد غيري ، رنيت علي الماذون وهددته انه لو كتب الكتاب هيموت مكنتش اتوقع انها هتدخل عليه بس لقيته طالع من البيت متوتر وخايف
_ انا مش فاهمه برضو نزلتني لي في وقت زي ده !وبعدين خلاص شكرا علي تعبك انا هتصرف مش محتاجه مساعده
_ بس انا مش بعمل كده علشان اساعدك انا بعمل كده لاني عايز اتجوزك فعلا
_ ها ؟
_ هنفضل نقضيها ها اليوم كله يلا ورانا يوم طويل
_ طب وعمي
_ ابعتيله رساله قوليله انك اتجوزتي ورايحه بيت جوزك
_ انت ازاي كده !
_ انا بحبك .
_ وانا بحب، اي ده مش ده المأذون!
_ ايوه هو تقريبا مروح البيت، استني يا شيخ استني في اتنين عايزين يتجوزوا استني
ودي كانت اسرع جوازه في تاريخ البشرية كلها، كان كل همي اخلص من تحكم عمي وابنه بس لقيتني وقعت علي وشي في حب أحدهم .
بقلم / بسملة محمد عبدالرازق
M.A
