-وأنا مش هخس عشانك يازين
-وأنا مش مضطر أتقبلك كدا عن إذنك
"عارف لما تبقى نايم وحد يجى يكب عليك مية ساقعة أهو ده اللى حصلى بالظبط ،ومش فاهمة أنا ليه مستغربة ومصدومة ماهو طول عمره بيعلق على وزنى ويتريق عليه ،أنا عمرى مانسى كلامه لأنه مش مجرد كلام دى سكاكين بتدبح فيا "
"لما بعتلى المسيج واتس وسكت وماقدرتش أرد لقيته جاى افتكرت إنه هيعتذر أو حاجة لأ بالعكس لاقيته جاى يعرض عليا إنى أخس مقابل إنه يفضل و ردى كان أنا مش هخس عشانك ولا عشان حد يازين "
-بعد فترة من فسخ خطوبتنا مش كبيرة قررت أروح الجيم ،قررت أخس عشان أثبتله إنى جميلة وأتحب وإنه لو إتقبلنى كما أنا كان ممكن أحرم نفسي من الأكل
"روحت لقيت الكابتن دايما متعصب وواثق من نفسه ،اكمنه يعنى عضلاته مقوية قلبه "
-أنا هنا مابهزرش فى نظام بنمشى عليه ومابقبلش بحاجتين الإهمال والكسل
-انتِ لسه جديدة مش كدا ،انتِ ..ياأنسة
-حضرتك بتكلمنى أنا
-لأ بكلم أمى
-طب ماتكلمها بتزعقلى أنا ليه
-أضحك يعنى ولا اعمل ايه ،بقولك انتِ شكلك جديدة هنا صح ؟
-صح
-أنا اسمى أنس
-وأنا رحاب
"كنت بسمع تعليماته بزهق وإنطفاء مفيش دافع يخلينى أستحمل كمية التمرينات دى وفجأة لاقيته فى وشى وبيقولى :
-انتِ حد فاشل وبأسلوبك ده مش هتخسى ابدا انتِ كدة بتضحكى على نفسك ،ومش هتخسى حتى ربع كيلو
"اتمنيت إن الأرض تنشق وتبلعنى ،بصيتله وعنيا فيها عياط وجع الدنيا كلها حتى لو فاشلة مكنش ينفع يقولى كدا قدام البنات كلها ،سبت الجيم وقررت ماروحش تانى"
-وبعدين يابنتى هتفضلى حابسة نفسك كدا
-مش عايزة أخرج ياماما،مش عايزة أطلع برة كلهم وحشين وبيأذونى ،أنا عايزة بابا كان من حقى إنه يفضل ليه سابنى ومشى هو كان شايفنى جميلة ؟!
-لأنك فعلاً جميلة
-أنا مش جميلة ،أنا تخينة وأكتر عن اللازم ده مش جسم بنت لسه 22سنة الكل بيتريق عليا، صحابى بيخرجوا ومابيقلوليش عشان بيأحرجوا وأنا معاهم ،حتى لما كنت بخرج معاهم كانوا بيتصوروا معايا ،كانوا بيقلولى بالكلمة انتِ بتبوظى الصورة
-دى مش صحاب دى ناس عامية القلب ماحبتكيش مكنش ينفع تكملى فى علاقات تأذيكى ،أنا أمك وصاحبتك هو أنا قصرت معاكى فى حاجة
-لأ خالص بالعكس انتِ استحملتينى كتير
-أنا ماستحملتش حاجة ،أنا بحبك كدا ومتقبلاكى كدا وانتِ ملبن وقمر
"الإنسانة الوحيدة اللى بتقدر تخرجنى من زعلى وحزنى ،ساعات بنبقا محتاجين حد يخرجنا من وحدتنا رغم إننا حابين الوحدة "
-طيب فى حد عايزك برا
-حد مين
-هتعرفى لما تشوفيه
..
-انت !!
-مجتيش التمرين ليه ؟!
-ياسلام عايزنى أجى بعد ماحضرتك هزقتنى وقولت عليا فاشلة
-والنهاردة أكدتيلى ..بتبصيلى كدة ليه ايوة أكدتيلى إنك مستسلمة مش فاشلة
-طيب أنا فاشلة ومستسلمة ممكن تمشى
-هتفضلى حابسة نفسك فى البيت هو ده الحل
-أه هو ده الحل ،وأنا مرتاحة كدة
-لأ مش حل لو كل واحد قعد فى البيت لسبب ما الكون هيخرب ،لازم ترجعى الشغل وتساعدى مامتك ده غير إن شغلك مهم ليكى ده كيانك إزاى تتخلى عنه بسهولة كدة
:عشان العالم برا مؤذي ،مؤذى جدا ،كل مرة بخرج فيها بتأذى وبندم إنى خرجت
-محدش أذاكى غيرك ،أه انتِ اللى سمحتيلهم يأذوكى محدش قالك اسكتى ،انتِ أصلا تحطى الناس فى بالك ليه ماهو طبيعى الناس مش بتسيب حد فى حاله
-مابعرفش ،لما حد بيحرجنى ،أو يبصلى بصة مش حلوة بحس إنى عايزة الأرض تنشق وتبلعنى مابعرفش أحرج حد
-بصى يارحاب النهاردة وبكرة هديهملك أجاذة عشان تفكرى أنتِ عايزة تخسي ولا لأ ؟وليه وعشان مين ؟!،عشان نفسك ولا عشان الناس ؟! وبعيداً عن كل ده زيادة الوزن مش عيب عشان نحبس نفسنا فى البيت
:أنا كنت عايزة أخس عشان أغيظه بس هو خطب خلاص ومابقاش فارق
-هو مين ؟
-زين ،كان خطيبى وسابنى عشان كان عايزنى أخس
-أممم ،وماعملتيش ليه كدا؟
-عشان ماتقبلنيش كما أنا ؟،هو وزنى يفرق مع واحد زيك فى أيه ؟
-فى الفرح
-نعم !!
-قصدى يعنى واحد زى زين أكيد عيل نايتى كدا مش هيقدر يشيلك يوم الفرح لكن أنا رياضى أكيد هعرف
-قال أنا تخينة وفيها ايه لو اتقبلنى كدا كان هيجرا أيه
-مكنش هيجرا حاجة والله صل عالنبى صحتك بالدنيا أهو كلب وغار
"فضلنا نضحك على لهجته اللى عاملة زى واحدة ست فى الخمسينات ،بعدها سكت
-وقالى :ماتخسيش عشان حد يارحاب،اعملى الحاجة لنفسك ،خسي عشان تعرفى تلبسى بسهولة،وتقعدى بسهولة ،خسي عشان ذاتك ،خسى عشان تعرفى تتقبلى ذاتك وماتفضليش تهربى منها وتجلدى ذاتك ،أتمنى أشوفك بعد يومين .. سلام
..
-أنا جاهزة
-مفيش صباح الخير ولا حاجة كدا
-المهم ..الجيم لوحده مش كفاية ،لازم تروحى لدكتور وأنا هرشحلك دكتور كويس
-لا أنا بكره الدكاترة وبعدين بيفضلوا يقولوا حاجات عجيبة ،قال علبة ذبادى عشاء ده أنا بتعشى كرومب
يتبع ....
