=سلام عليكم
-عليكم السلام .. اؤمري يا افندم
= عايزة أعمل عملية
- خير إن شاء الله . عملية ايه ؟
= أى حاجة مش مهم .. عندكوا ايه ؟!
- نعم؟!! .
= بتعملوا عمليات ايه ؟
- حضرتك بتشتكى من ايه .. ؟
= هقولك بعدين .
_ نعم يا افندم !
_ بص مترغيش كتير ..انتوا عندكوا ايه ؟
_ مخ وممبار!
_ بتوجع دى ؟!
_ لاء خااااالص مش هتحسي بحاجه .
= لا مش حساها . شوفلى حاجة أسهل .
- يا الله .. يا أستاذة .. أرجوكي بلاش سفه .... دي عيادة محترمة وأنا وربنا ما فاضي للكلام ده
= هو في ايه ؟ .. انت متعصب ليه كده .. مش الطب ده مهنة ؟
- لا أكله يا فندم
= لا مهنة .. والمهن تخضع لقانون العرض والطلب .. أنا بعرض عليك انك تعملي عملية .. عايزة عملية .. ايه المشكلة ؟
- أنا لو فكهاني مش هتعامل كده .. أرجوكي إمشي .. أبويا ممكن ييجي أي وقت .. وانا مش عايز أتخيل أبويا بعد ما صرف عليا 7 سنين فى كلية وتدريب عملي وحقن عضل يدخل يلاقيني بتعامل زي أي فكهاني كده
= طب بص .. أنا عايزة أتعب.
- إنتي تعبانه جاهزه مش محتاجة
= لا لا .. أتعب جسديا .. أرقد .. يتركبلى البتاعة دي اللى بتتحط فى الايد وتتصور وبيتكتب عليها
وتوقف ممرضه جمبي تقول : لقد توقف النبض " ..!
- أمين يا رب
= اسمها ايه البتاعه دى ؟
- كانيولا يا فندم ،🙄
= آه هي دي
- إنتي كاميرا خفية صح ؟ ..
= لاء .
_ يبقي دا اكيد برنامج الصدمه وبتختبروا عواطفي .
= هشش .. ايه الهبل ده .. أنا مفركشة بس .
- إنتي عايزة دكتور مجدي .. مخ وأعصاب صح ؟ .. الدور اللى فوقي .. أنا دكتور جراحة
= طب براحة
- دي ألشة و لا طلب مش فاهمك ؟
= لا بقولك براحه على نفسك كدا . .. أنا هفهمك
- أرجوكي
= أنا مخطوبه تمام ؟
- جميل
= اتخانقنا من أسبوع كده ..
- ده شئ أساسي
= جربت كل الطرق عشان نرجع .. ومفيش فايدة .. رسايل على شريط قناة التهور .. سامحني يا ميدو مفيش فايدة .. صور مأسوية ع الاستورى وانا بعيط .. مفيش فايدة .. مش عايز يكلمني
- جربتي تغنيله ؟
= عملي بلوك .
- حقه..
_ جربت أزوق عليه البت سماح صاحبتى
_ قعد يرغى معاها ومعبرنيش .
-طب جربي تبعتيله ورد .
= أكيد جربت بعتله ايموشنات ورد وقلوب ومردش برضه
- آه .. فإنتي قررتي تعملي فيها تعبانة وبتموتي فهو يعرف كده وقلبه يحن وييجي جري على العياده وهو شايل ورد ؟
= دي آخر أمل بالنسبالى .. ساعدني بقى الله يسترك .
- بس الخطة كده ناقصها حاجة .. فين صاحبتك اللى هتتصل بيه وتقوله ؟
= متخانقة معايا هي كمان .. كله بينفر مني مش عارفة ليه
- كل ده ومش عارفة ليه ؟ .. انتي بابا وماما عايشين ؟
= مقاطعني
- ما هو انا طول عمري بيقولوا عليا المُرزق .. شوفتي ؟ .. 7 سنين طب .. وحقن عضل وفرهده .. وأفتح عيادة فى المكان ده بالذات .. عشان أقابل أعجب كائن بشري فى الكوكب
= إنت بقى اللى هتقوم بالدور ده .. هتتصل بيه .. هتقوله يا ميدو إلحق منار تعبانة وبتموت .. وأنا هرقد هنا على الشيزلونج ده .. وحطلي البتاع دي فى ايدي وعلقلي أى محلول على ما ييجي
- هو بيني وبينك طالما فى شخص وإسمه ميدو .. وارتبط بشخصية زيك كده .. فأكيد حركة زي كده هتدخل عليه عادي ..
= خد بقى إستني .. أنا بتصل بيه أهو
- أمري لله .. سامحني يا رب
= بيرن أهو .. جرس .. جرس .. رد .. خد
- ألو مساء الخير ؟
-- مساء النور
- أستاذ ميدو إلحق منار تعبانه وبتموت وراقده على ال..
-- اقفل يا حيوان
- أفندم... أستاذ ميدو ؟
-- اقفل يا زفت .. تامن واحد يتصل بيا انهارده ويعمل نفس الحوار .. هو أنا سيبتها من شوية ؟ .. ما هو من كمية الغباء والتخلف ده
- هو إنتي عملتي الحركة دي معاه قبل كده ؟
= قفل فى وشك صح ؟
- أه
= طب خلاص هجرب تاني .. في دكتور تاني قريب من هنا ؟...
#جنون الحب
ضوء القمر
M.A
