اسكريبت 💜صديقتى💜
-انتى بتعملى اي وسايبانى اكلم نفسى ي ليان سيبي الموبايل من ايدك بقا
-بتوتر مفيش حاجه انا معاكى اهو
-طب ردي ع اللى قولته
-خلاص بقا ي كيان مكنتش مركزة،ها قولى من الاول
-بقولك انا جايبه دريسين جداد وعايزة اشوف انهى احلى عشان اخرج بيه ف مناسبه عندى
-طب ورينى وبعدين اقولك
-دول
-الكشمير خليه للمناسبه شكله اشيك
-تمام
-انا مش هعرف أخرج النهاردة ماما مش راضيه
-والله!ومن امتي ومامتك بتقول لا لما بتخرجى معايا
-مش عارفه ي كيان
-اديهالى اكلمها
-ها لا هى نايمه
-دلوقتى! احنا العصر
-مريحه شويه
-طيب تمام
-هو انا ي بنتى لو مسالتش متساليش
-معلش ي كيان كنت مشغوله شويه
-مشغوله ف اي؟
-ها،كنت بروق مع ماما البيت بننفض
-اها طب تمام ،نتقابل بكرة الساعه 4 ف كافيه
-بس ان
-بعصبيه:مبسش انا قولت كلمه ومش هكررها بكرة نتقابل وبعد كدا ان شاء الله تقطعى علاقتك بيا لو انا مضايقاكى اوي كدا ومش طيقانى
-انتى بتقولي اي ي كيان؟
-بقول اللى شايفاه انتى بتتهربي منى بقالك أسبوعين ومتغيرة معايا كانك بتقوليلى مش عايزاكى ف حياتى
-انا
-لا انا،سلام ي ليان عشان عايزة انام
-دلوقتى لسه بدرى
-عادى ما مامتك بتنام العصر مفيهاش حاجه
-احم تمام تصبحي ع خير ي كيان
-وانتى من أهله
-ازيك ي كيان
-كويسه
طلبت شاى ليها عشان بتحبه ونسكافيه ليا
-احم مالك بقا
-انا بردو اللى مالى؟
-ف اي ي كيان انا عملت اي لكل دا؟
-انا اللى عايزة اسالك انا عملت اي عشان تتغيري بالشكل دا ؟
-انا مش متغيرة كل الموضوع انى كنت مشغوله زى ما قولتلك
قاطعنا الويتر بينزل المشروبات
-يعنى انتى عايزة تفهمينى ان انتى مشغوله بس مفيش اي سبب تانى
-قصدك اي؟
-قصدي ان انتى كان بيبقا وراكى مليون حاجه وبتكلمينى وانتي بتعمليها مش لما تخلصيها كمان ،واللى استنتجته من كدبك عليا انك يا مش عايزانى ف حياتك وبتتهربي منى ،يا ف حد اخد مكانى عندك وف الحالتين انا المفروض امشى بس انا جايه النهاردة عشان خاطر العيش والملح اللى ما بينا وبقولك شكرا ع الوقت اللطيف اللى قضيناه مع بعض كنت فاكراكى اختى زى ما كنتى بتقولى وبتمنالك السعادة ف حياتك ي ليان ،عن أذنك
-استنى ي كيان
-سيبي ايدى، مش انتى عايزة كدا انا هريحك منى
-دمعت:كيان متعمليش كدا
-مش بايدى انتى اللى اخترتي
-عيطت:كيان انا محتجالك
صعبت عليا ما هى صاحبتي واختى اللى مليش غيرها ع قد ما زعلانه منها لكن مقدرش ابعد عنها ،بحبها بقا اعمل اي؟
-حضنتها:مالك ي ليان؟
-انا خايفه
-من اي؟
-بدموع :بصى هو هو
-اشربي الشاى واهدى وامسحى دموعك وبعدين نتكلم
-كيان انا بكلم ولد
- برقت :ولد!!!
-اه بس والله اصحاب بس
-حاولت اهدى عشان متخافش : حد يعرف غيرى
-لا
-وطبعا هو اللى مرديش يخليكى تنزلى معايا يوم ما كلمتك صح؟
-اه
-وانتى زى الهبله بتسمعى كلامه. بهدوء:مين دا ي ليان
-واحد زميلى ف الكليه اسمه احمد،كنت مرة ماشيه ولقيته نده عليا عشان كان ف حاجه وقعت مني واديهالى وشكرته ومن يومها وأنا بشوفه كتير كل ما اروح الكليه اشوفه صدفه وبيسلم عليا كل مرة ،وبعدها لقيته بيكلمنى واتس بيقولى انه عايز محاضرة لواحد صاحبه قدى وهياخدها مني تانى يوم وسالته جاب رقمى منين قالى من واحدة زميلتى ف الكليه
-وبعدين ؟
-وبقا كل فترة يدخل يسال عليا وانا كنت برد ع قد السؤال لكن هو كان بيدخل يشوف الاستورى ف نفس الدقيقه اللى بتنزل فيها كانه مستنيها ومهتم بيا اوي وقالى نبقى صحاب وانا وافقت
-الموضوع دا من امتى؟
-من شهر
-انا مكنتش اعرف انك ضعيفه اوي كدا
-انا مش ضعيفه ي كيان
-لا ضعيفه لما ولد زى دا يغير مبادئك وحياتك ويتحكم فيكى تبقى ضعيفه، لما يخليكى تبعدى عنى تبقى ضعيفه،لما يلعب بمشاعرك ويغير حياتك 180درجه تبقى ضعيفه ي ليان
-احنا مجرد أصحاب مش اكتر
-تقدرى تقوليلى لما انتم اصحاب مخبيه ليه؟؟
-عشان المجتمع اللى احنا فيه مش هيسمح بالصحوبيه دى
- يسلام؟لا يا ليان مش المجتمع اللى مش هيسمح ،دينك اللى مش هيسمح بكدا
-انا عارفه بس دى مجرد صداقه بريئه مش اكتر
-صداقه؟مفيش صداقه بين ولد وبنت
-ليه بقا،كل الناس مصادقين بعض ،كل الناس اللى بتشتغل بيكون فيهم ولاد وبنات،بيتعاملوا مع بعض وبيتصادقوا وكمان ف الكليات والمداس وكل مكان بيكون فيه صداقه
-يحبيبتي افهمى اللى انتى بتتكلمى عنه من اسمه زماله يعني بيكونوا زملاء ف الشغل او الدراسه، بيتعاملوا مع بعض بكل احترام لانهم مجبرين ع كدا مش بارادتهم.
-طب ما انا كمان احمد زميلى ف الكليه.
-دا اللى هو ازاى؟ أحمد مش قدك زى ما قولتي يعني مش محتاجك ولا انتى محتاجاه
-يوووه ي كيان انتى مكبرة الموضوع اوي
-الموضوع فعلا كبير، من اللى انا شايفاه يا أحمد لعب ف دماغك وفهمك ان الموضوع عادى ،يا اما انتى حبتيه؟؟
-بتوتر:حبيته!
-اه حبتيه،هتقولي ازاى هقولك،الصداقه بين الولد والبنت غلط،ودا طبعا لان غصب عنك هتنجذبي له وهو هكذا،ودا طبيعه فينا ك بشر فلازم نحاول ع قد ما نقدر نبعد عن بعض ونغض بصرنا ومنغضبش ربنا ونرتكب أخطاء وتكون المعامله بينا بحدود. وطبعا هو فهمك ف الأول انها صداقه بريئه زى ما بتقولى وبدا يهتم بيكى ويتحكم فيكى وبعد كدا بدا يقولك كلام حلو فتتشدي له اكتر وتقعى ف حبه و بعدين هو يزهق منك ويسيبك بعد طبعا ما يقولك انه هيخطبك وهو اصلا بيتسلى بيكى ومفكرك رخيصه
-بعصبيه:كيان لاحظى انك بتغلطى
-انا مش بغلط انا بوضحلك الرؤيه،انتى معميه عن الحقيقه،شويه كلام حلو بيخلوا حياتك تتشقلب وخصوصا انك اول مرة تتعاملى مع ولد ،اما هو هتلاقيه مجرب كتير وعارف بيعمل اي،واكتر حاجه بتدل ع ان كلامى صح ان انتى اتعصبتى ؟؟مش كانت صداقه ؟يعنى كل دا محصلش متعصبه لسه بقا؟
-احم مش متعصبه ولا حاجه
-واضح .وصلتى لحد فين ف اللى قولته
-بتوتر:اعترفلى بحبه امبارح
-ضحكت
-بتضحكى ع اي
- صداقه صداقه يعني مفيش كلام
-وانتى قولتيله اي
-قولتله اني بحبه
-يخسااارة
-انتى هتندمينى اني قلتلك
-انا مش خسرانه حاجه سواء فضلتى معاه او بعدتى عنه بس اللى عايزاكى تفهميه انه واخدك تسليه مش اكتر يعني انتي كلك ع بعضك كدا بالنسباله كيس لب اول لما يخلص هيرميه ف أقرب باسكيت،وأول ما ينوى ويقول ي جواز هيختار واحده مبتقومش من ع سجادة الصلاه وانتى بقا هتبقى من المعازيم لو افتكرك اصلا،ما هو مش هيثق ف واحده كلمته وقالتله بحبك وهو غريب عنها ،يبقى اكيد قالت لغيره نفس الكلام، كل اللى عايزاه منك انك تقوليله انك هتتخطبي لاي حد من قريبك او جايلك عريس واهلك موافقين صدقينى هيجى يقابل العريس ويسلمك ليه بايديه،مكنتش اتوقع منك كدا ،ليه تخونى ثقه اهلك فيكى،دى اخرة تربيتهم ليكى،بتمنى تفوقى من الوهم اللى انتى فيه وترجعى ليان بتاعت زمان ،سلام ي ليان..
-بدموع:كيان
-ابتسمت:نعم ي ليان
-انا محتجالك
-جيالك حاضر
بعد فترة
-مالك ي ليان
-بدموع:سابنى الجبان طلع بيضحك عليا
-ابتسمت ومسحت دموعها:ميستاهلش دموعك دى ي لينو وبعدين الحمد لله انه غاار ف داهيه
-انا تعبانه اوي
-لا بقولك اي شغل العيال دا مينفعنيش،انتي تقومى تجيبلنا رضوى الشربينى وكوبايتين شاى عشان انتى بتحبيه وحبه فشار وورقه وقلم عشان الكلام المهم اللى هتقوله نكتبه
-ضحكت:انتى بتهزرى وانا زعلانه
-لما الحاجه اللى انتى زعلانه عليها يكون ليها لازمه ومهمه،انما دى حاجه مش مهمه
-مسحت دموعها:عندك حق هو ميستاهلش دموعى دى،انا دموعى غاليه اوي
-سقفت بايديا:ايوا بقا هى دى الاسترونج اندبندنت وومان اللى بحق
-بدموع :كيان انا بحبك اوي،لو قعدت اتكلم ف حقك من هنا لاخر عمرى مش هوفيكى حقك بجد، مش عارفه كنت هعمل اي لو مكنتيش معايا ،متزعليش منى انا كنت غبيه معرفش ازاى كنت هقدر ابعد عنك ،ربنا يديمك نعمه ف حياتى 💜
-مسحت دموعها وحضنتها بحب: مقدرش ازعل منك ،ويديمك ليا ي روحي💜
"وصديقا يحبك بصدق خير لك من مدينه كامله من البشر"👭
الخلاصه:مفيش حاجه اسمها صداقه بين ولد وبنت،لازم تحافظي على نفسك كبنت ومتضعفيش وتحافظى ع قلبك للي يستاهله، وتحترمى دينك و اهلك،مش هتستفيدى حاجه لما تخونى ثقه اهلك فيكى وتسوءى سمعتك وسمعة أهلك بالعكس انتى الوحيدة الخسرانه ف الموضوع، والولد اللى بيضحك عليكى دا مش خسران حاجه اهو بيتسلى بس اللى هو ميعرفوش ان كما تدين تدان وان هيتردله ف اهل بيته وف اللى هيتجوزها،وانت ك ولد بتستفاد اي لما تقهر قلب بنت بسبب انها حبتك؟ولا اي حاجه بتظلم نفسك واللى حواليك فقط،حافظوا ع نفسكوا واعرفوا ان كل دا لعب عيال واصبروا وربنا هيرزقكوا بالحلال واختاروا دايما الصاحب اللى ينصحكوا ويخاف عليكم ويكون سند ومصدر أمان ليكم لان صحبه الصالح تصلح💜
ياريت تقولوا رايكم ف الاسكريبت و ف موضوع الصداقه بين الولد والبنت💜
M.A
