اسكريبت.....💃
- لا لا مش متضايقة وأنا هتضايق ليه يعني!
_ طبعا طبعا مصدقاكي
- ايوه أنا مالي أصلًا كل واحد حر في حياته، أنا حرة وهو حر وانتي حرة وكلنا أحرار
_مش عارفة ليه حاسة إني شامة ريحة شياط كدا
- لا شياط ايه، مفيش شياط ولا حاجة، أنا عادي خالص أهو مش متضايقة أنا هتضايق ليه..
_طيب مدام انتي مش متضايقة بتبصي عليهم ليه؟
فعلا كنت بكلم ملك وأنا عيني في مكان تاني خالص، على سليم كاريزما بيه أخو ملك اللي كان مع ريم زميلتنا التالتة، كانوا واقفين مع بعض بيتكلموا وأنا طبعا احساس الغيرة متملكني، كنت حاسة إني بغلي من جوا وإني عايزة أعيط من الغيظ بس بحاول أكتم كل دا على قد ما اقدر عشان مبينش حاجة، سليم أنا وهو كنا قريبين من بعض شوية بما إني موجودة عندهم على طول ومع ملك كأني فرد من البيت، بس قربي منه اتبدل بحاجة تانية مكنتش أقدر اتخيل انها هتحصل مع إنه كان موجود دايمًا، بس حصل برضه للأسف...
- ملك أنا همشي
_استني بس يا منة...
- أنا ماشية عشان أخوكي المتوحد حرق دمي وخلاص، خلي ريم تبقى تنفعه
_مش كنتي بتقولي مش متضايقة؟
- مانا مش متضايقة هتضايق ليه!..
سكت شوية تحت نظرات ملك الخبيثة...
- وبعدين من امتى ريم قريبة منه ومركزة معاه وبتاع؟، من امتى الود دا انها تسيبنا وتروح تقف مع سليم لمجرد انه واقف لوحده، مانا اللي هو انا مسيبتكوش وروحتله، هي تروح ليه برضه؟، من امتى الحنية دي اللي نزلت عليها دي!..
كنت بتكلم ووشي احمر كالعادة من الغيظ وأنا هاين عليا أروح اقتله وأكسر سنانه من خنقتي منه، وكملت وأنا بقلد سمر بتريقة...
- وطول ما هي واقفة مركزة معاه وكل شوية.. هو سليم واقف لوحده ليه يا جماعة هيهيهي، هو سليم رايح فين يا جماعة، هو سليم بيكلم مين، هو سليم بيبص علينا ليه، وفي الآخر تقولك طيب أنا هروح يا جماعة أقف مع سليم شوية بدل ما هو واقف لوحده ههه، طب انتشي مالك يبنتي انتشيي مالك يقف لوحده ولا لا!!
_احم لا واضح اوي انك مش متضايقة.
- وانا هتضايق ليه يعني انا عادي!
_ هعمل نفسي مصدقاكي.
سكت شوية ورجعت كملت...
- هتلاقي اخوكي الحيوان اصلا هو اللي دخل عليها بالشويتين بتوعه والاهتمام المبالغ كعادته يعني وخلاها تلزق فيه، ما هو بيحب لمة البنات حواليه ماشاء الله عليه..
_لاحظي انك بتتكلمي على اخويا برضه
- يا شيخة منك لله انتي واخوكي..
_طب واخوها عمل ايه طيب!
اتلفت بسرعة على صوته بعد ما اكتشفت انه واقف ورانا، اتخضيت في الاول ليكون سمع حواري معاها بس بعدين رسمت التريقة على وشي..
- لا اخوها ماشاء الله عليه ملاك مبيغلطش..
_برضه؟..لسة فيكي طولة اللسان دي برضه!
- عاجبك ولا مش عاجبك؟، في الحالتين رأيك مكانهم في الزبالة..
_ملك..لمي لسان صاحبتك عشان مطيرش سنانها دلوقت..
_طلعوا ملك من الخناقة بالله..
- جرب تعملها بس
_ما تتهدي بقا الله!
- متعليش صوتك عليا عشان مزعلكش حلو؟
_عربجي واقف قصادي والله، ما تتهدي شوية بقا!
- ربنا يهديك عشان انا على أخري لوحدي..
_يا الله يا ولي الصابرين، أنا غلطان إني جيت أسلم عليكي لما شوفتك، أنا اللي استاهل برضه عشان فكرت اعبرك!
- هه كلك نظر كتر الف خيرك..
_بقولك إيه أنا ماشي أحسن..
- ايوه روح أقف مع ريم عشان متفضلش مستنياك، يا حنين!
ابتسم ابتسامة خبيثة كإنه فهم..
_ماهو دا اللي هعمله، على الاقل رقيقة ومبتقلش ادبها..
حسيت إني بغلي اكتر، كتمت غيظي واتكلمت من بين سناني..
- حلو Have Fun يا سولي، وهوينا بقى عشان اتخنقت..
_اممم، تمام Take care...
وفعلًا سابنا ومشي بكل برود، وراح وقف مع ريم كإنه بيعاندني أكتر، ساعات بحس إنه بيقصد يخليني أغير، أو لا ودا مجرد وهم مش اكتر، الحقيقة كانت تصرفاته متناقضة كعادته طبعا ومش مفهومة نهائيا!...
- عاجبك عمايل اخوكي!
_يعني بعد المعاملة دي وعايزاه يفضل واقف كمان!..
- ليه هو أنا كان المفروض أخده بالحضن بعد وقفته وضحكه ومرقعته مع ريم دي؟!
_منة فوقي هو انتوا فيه بينكم حاجة الأول!
- لا بس لازم يعمل احترام ليا برضه..
_بصفتك إيه؟
- صاحبة اخته...
للحظة انفجرت ملك في الضحك، وحقها الصراحة بعد العك اللي قولته، كنت هرد عليها لحد ما سمعت صوت ضحك عالي، اتلفت ولقيته طبعا مندمج في الضحك والهزار مع ريم، مقدرتش افضل متابعاهم اكتر من كدا فسيبت ملك ومشيت شوية لحد ما وقفت على جمب لوحدي، وللحظة محستش غير ودموعي بتنزل من الغيرة..
_منة إنتي بتعيطي؟
مردتش عليها ومسحت دموعي بسرعة وبصيت الناحية التانية..
_منة أنا اسفة بجد مكنتش اعرف ان الموضوع بجد عندك، لو عايزاني اكلم سليم واقول.....
- اياكي، اياكي تكلميه في حاجة يا ملك والا هقطع علاقتي بيكي، انا اللي مكبرة الموضوع شوية، سليم مش شايفني غير صاحبة اخته ويمكن شوية صاحبته مش اكتر...
_لا لا مظنش يا منة، دانتوا الاتنين بترغوا مع بعض اكتر ما بتتكلمي معايا، دا أنا اللي بدأت أغير من سليم عليكي عشان واخدك مني، هو أخويا برضه وأنا عارفاه كويس..
- عادي يا ملك، زي ما بقولك مش هبقى اكتر من كدا...
كان اللي مضايقني اكتر ان سليم ما اخدش باله مني اول واحد، مجاش وقف معايا وكلمني، مستناش إني أظهر من بين الناس، ما اهتمش بيا وسط كل الموجودين في المكان، معاملنيش معاملة خاصة وبين فرحته بوجودي حتى لو مفيش بينا حاجة، بس من طبعي اني ببقى عايزة اللي قدامي يحسسني إني مميزة، إني ليا مكانة خاصة عنده، وإن كل الموجودين دول في كفة، وأنا في كفة تانية، ودا اللي كنت مستنياه من سليم بس محصلش للأسف واحبطني كالعادة، حسيت إني استنفزت طاقتي وقولت امشي احسن، وفعلا مشيت رغم اعتراض ملك في الأول...
قعدت يوم كامل بعدها مفكرتش اني اقوله اي حاجة، كنت يائسة ودخلت في اكتئاب وقعدت في عزلة، لحد ما فاجئني بمسدج منه...
_مشيتي بدري ليه؟
- كدا مليت...
_كان باين عليكي متضايقة من حاجة..
- لا كنت مرهقة شوية مش اكتر.
_انتي كويسة دلوقتي يعني؟
- آه أنا تمام..
سكتنا شوية لحد ما بدأ هو تاني...
_ تعرفي ان ريم طلعت لطيفة اوي
وطبعًا الغيرة رجعت مسكتني تاني، بسبب جملة غبية منه..
- اممم فعلا دي حقيقة، وهي شكلها استلطفتك.
_على الأقل محبتش إني أكون واقف لوحدي وجت اتكلمت معايا
- آه ما هي حنينة، ابقى سلملي عليها بقا، يلا باي..
مستنتش رده وقفلت موبايلي وحدفته على السرير بعنف، ووقفت الف حوالين نفسي وطبعًا الغيظ هيقتلني، والشك بدأ يتملكني وسؤال واحد في بالي، يا ترى عمل إيه عشان ريم تتعلق بيه!...
