Three Colors of Love

(Chapter 6) - Hearts Will Find A Way

Three Colors of Love

(Chapter 6 – Hearts Will Find A Way)

 

 

“Ang alin?” kinakabahang tanong ni Louie.

“Yung pakikipag-usap mo sa telepono. Sino ba ‘yang kausap mo? Bagong babae mo na naman?” tanong ni Louise.

Nakahinga naman nang maluwag si Louie. Akala niya ay nalamang si Denise sa kausap niya.

“Hindi ah. Ka-group ko sa project. Pinag-uusapan lang namin yung mga gagawin.” paliwanag ni Louie.

“Huuuu…. project daw? Eh diba nagbabayad ka lang ng contribution pag mga ganyang project?” natatawang sabi ni Louise.

Iniba na lang ni Louie ang usapan.

“Eh, ikaw, ba’t gising ka?”

“Eh sa maaga akong nagising eh. Tapos naririnig pa kita.” paliwanag ni Louise.

“Bahala ka na nga dyan.” sabi ni Louie sabay takip ng unan.

“Bahala ka rin.” sagot ng kakambal habang isinara ang pinto ng kwarto.

Si Louie naman ay nakatulog na din sa sobrang pagkapuyat. Makalipas ang ilang oras, kinailangan na naman niyang gumising para sa kanyang pasok sa school.

“Anak, gising na!” sabi ng isang malakas na boses habang tinatapik si Louie na tulog-mantika.

“Hmm….. ayoko pa…” reklamo ng binata.

“Sige na, gumising ka na! Nandito na ‘ko.”

Agad namulat ang mga mata ni Louie. Pagkakita niya kung sino ang gumising sa kanya ay agad siyang bumangon.

“Papa!” natutuwang sabi ni Louie sabay yakap sa ama. Ngayon lang kasi ulit umuwi ang kanilang tatay na si Enzo matapos ang ilang assignments sa iba’t-ibang parte ng Pilipinas.

“Kumusta ka na, ha? Balita ko, nambababae ka naman daw ah!” natatawang sabi ni Enzo habang ginugulo ang buhok ni Louie.

“Hindi naman po. Sino namang nagsabi niyan?”

“Ako, bakit?” nakapamewang na sabi ni Louise habang dumidila-dila pa sa kapatid.

Natatawa na lang si Enzo sa away ng magkapatid. Matagal na rin niyang hindi nakikita ang mga anak.

“Dito nga kayong dalawa. Na-miss ko ang kambal ko.” nakangiting sabi ni Enzo sabay yakap sa dalawang anak.

“Paano naman ako?” biglang singit ng asawang si Lia na nasa pinto.