فعلاً مشيت و قابلت نور ، أول ما قعدت قلت ليها بالجد انا ما ناقصه كذب يا نور على الأقل احترمي حتة اني اتعاملت معاك معامله كويسه و ما شفتي مني شينه حتى بعد ما عرفت حقيقتك ، زي ما بدايتنا كانت طيبه خلي نهايتنا تكون طيبه عشان كدا لو جايباني عشان تكذبي علي و تألفي قصص خليني أمشي ، قالت لي اسمعيني بس ، ما عارفه سماهر قالت ليك شنو عني بس متأكده ما حتكون مدحتني ليك ، رغم اني ما عارفه هي قالت ليك شنو عني بس صدقيني كل القالتو كذب و......قاطعتها و قلت ليها سماهر أساساً ما جابت لي سيرتك و ما حصل قالت انها بتعرفك!
قالت لي بالجد ما حصل جابت ليك سيرتي؟ طيب ليه سألتيني اذا بعرفها أو لا؟
اتنهدت و قلت ليها ليه حاولتي تحسني صورتك قدامي و تخليني افهم انو مازن أخوي فاهمك غلط و انو في شي بينك و بينو! ؟عايزا منو شنو انتِ بس قولي لي؟
قالت لي أنا ما كدا و اساساً سماهر هي السبب و هي الخلتو يغير نظرتو لي و يشوفني بالطريقه الهي عايزاهو يشوفني بيها ، ختيت يدي على جبيني و قلت ليها أف ياخ حاسه عقلي حـ يطق ما قادره افهم اللخبطه دي كلها! علاقتك شنو انتِ بـ سماهر و بتعرفيها من وين؟
اتصدمت شديد لمن قالت لي سماهر بت عمي! .....قلت ليها شنو؟ بت عمك! كذابه والله ! قالت لي ماف شي يخليني اكذب عليك و اقول هي بت عمي و لو ما مصدقه اسأليها و يا ستي هي بتلعب بأخوك و داخله عليهو بطمع هي لا بتحبو لا حاجه و أساساً ما شايفه شي غير قروشو ، قلت ليهو لو بالجد هي بت عمك ما كنتِ حتتكلمي عنها بالطريقه دي ، قالت لي دي الحقيقه ، قلت ليها و يمكن حاصل العكس ! يمكن انتِ الخاته عينك على قروشو عشان كدا بتحاولي تتقربي منو! .....قالت لي مهمها شرحت ليك و بررت ليك ما حتصدقي إني ما بتاعة مصالح و انا بالجد تعبت من توضيح النقطه دي ، حالياً بقى ما بهمني نظرة الناس لي و ما جبتك إلا عشان أنبهك و احذرك من سماهر العامله فيها صحبتك ، ألحقي أخوك و ما تخليهو يقع في فخها ، قلت ليها يمكن انتِ ألفتي القصه دي كلها عشان تشوهي صورة سماهر قدامي و تلمعي نفسك عشان تلفتي نظر مازن ليك! ....قالت لي أسلوبك بتاع عدم التصديق بسهوله دا لو كان استخدمتيهو مع سماهر ما كنتِ حتكوني مخدوعه فيها لحد اللحظه دي ، يا بت دي بت عمي و أنا بعرفها كويس و هي ذاتها بخشمها قبل سنوات قالت إنها بتلعب بأخوك و مصاحباك صحبة مصلحه...و و و ...
انا بالجد تعبت من الكلام الكتير دا البسببو ما قادره احدد منو البكذب علي و منو الصادق! قلت ليها مازن عندو علم إنو سماهر بت عمك؟
قالت لي ما عارفه ، عن نفسي ما عرفت إنو مازن بعرف سماهر و على علاقه معاها إلا قبل شهر لمن هي جات و حذرتني و قالت لي خليك بعيده عن مازن فـ فهمت منها انو مازن أخوك هو نفسو مازن الكان حكت عنو زمان و قالت انها غاشه عليهو! ....في نفس اليوم الحذرتني فيهو مشت لـ مازن و قالت ليهو لمن جيتك في الشركه في موظفه ما اتعاملت معاي كويس ، هانت و و و و قالت ليهو كلام كتير عني الله اعلم بيهو و هي اساساً لمن جات لا اتكلمت معاها لا وقفنا مع بعض ، مازن اخوك طوالي جا اتكلم معاي و سألني و قال لي بالنسبه للبت الجات قبيل ليه عاملتيها بطريقه ما كويسه و و و في البدايه ما عرفت انو قاصدها ، بس لمن وصفها لي اتذكرت و قلت ليهو والله ما قلت ليها حاجه و ذاتي ما وقفت معاها ، في الزمن داك هو صدقني طوالي لأنو ما حصل شاف مني شي ما كويس بس في خلال اسبوع لاحظت انو في تغير في معاملتو لي ، بقى ينظر لي بقذاره كدا و لمن جيت عشان افهم منو السبب و أصريت ليهو قال لي ببساطه لأنك وحده تافهه و بتاعة أولاد ، طبعاً عرفت إنو سماهر ورا الموضوع دا ، اجتهدت شديد عشان ابرئ نفسي و أثبت ليهو انو الكلام القالتو سماهر عني كلو كذب حتى اني قلت ليهو سماهر بت عمي و عشان في مشاكل بيني و بينها بتكرهني ، طبعاً هو ما صدقني و هي نكرتني حطب و بقت تتباكى ليهو و قالت ليهو انت بتشك فيني و بتصدق البت دي مش اذا ما واثق فيني أنهي البينا و انا ذاتي تعبت منك و منها و و و و فصلتها منو شهر و كلو عشان تقوي موقفها و تخليهو يكرهني ، طبعاً هي خاصمتو شهر عشان كانت متأكده انو بحبها بجنون و ميت عليها و مستحيل يتخلى عنها ، للسبب دا هو بقى ما طايقني و حملني مسؤولية الحصل بينو و بين سماهر!
قلت ليها ما فاهمه مشكلتها شنو معاك و شنو الخلاها تجيك و تحذرك و تقول ليك خليك بعيده عن مازن! و لمن جا سألك ليه عاملتي سماهر بطريقه ما كويسه ليه ما قلتي ليهو انها بت عمك ؟
قالت لي أولاً انا ما بفتخر بإنها بت عمي و لا بحب ذاتو اقول عنها بت عمي و هي كذلك ، المهم مازن كان دايماً بمدحني قدام الموظفين و بقول اني بشتغل بأمانه و ضمير و فتره كدا كنا قراب من بعض و اظنو حصل و جاب ليها سيرتي و طبعاً هي عارفه اني بشتغل في شركتكم ، بس سبب كراهيتها الحقيقي لي واحد قريبنا اسمو مراد ، كانت ميته عليهو بس هو ما كان شغال بيها ، حاولت اكتر من مره تتقرب منو بس ما أداها مجال لأنو كان عايزني فلمن اعترفت ليهو بحبها ليهو قالها ليها عديل انا ما بحبك انا بحب نور و ناوي اتقدم ليها ، ما عارفه سماهر دي قالت لأبوي و عمي شنو عن مراد خلتهم يرفضوهو لمن جا اتقدم لي ، من يومها و هي بتكرهني و بتقول اني سرقت منها مراد و هسي لمن لقت مازن برضو قالت إني عايزا أشلبو منها ، رغم انها ما بتحبو بس ما عايزاني اقرب منو لأنها بقت تحسدني على أي حاجه ولو عليها ما يتقدم لي ولا زول و فعلاً نجحت في الحاجه دي ، أي زول يجي يتقدم لي بتقول ليهو كلام كتير ما كويس عني و بتشوه ليهو سمعتي و بتحكي ليهو حاجات ما حصلت ذاتها عني و بتطفشو مني و هسي كرّهت مازن فيني .......المهم انا جبتك و حكيت ليك الحقيقه كلها ، بعد دا إنتِ حره تصدقي أو لا......قالت كدا و شالت شنطتها و مشت خلتني في دوامه من التفكير ، ختيت يديني الإتنين على راسي و حسيت الدنيا دي لافه بي ، انا بالجلاله قدرت اقوم و اتحرك ، ما عارفه كيف و متين وصلت البيت و دخلت غرفتي و انجدعت على السرير ، أول ما ختيت راسي على المخده و عاينت للسقف دموعي جات نازله!
ما قادره اصدق انا بس كل المؤشرات ضد سماهر ، اصدق منو انا يا ربي و أكذب منو! سماهر صحبتي الروح بالروح و ما بصدق انها بتعمل كدا بس ليه نور و سامي يكذبوا و يقولوا كلام ما فيها! ليه كل المؤشرات دي ضدها!
في بعد كم يوم كدا النتيجه طلعت و كويس انو المره دي استعجلوا فيها ، غيتو ما كنت متحمسه أمشي و أشوفها ، ما مشيت في اليوم الطلعت فيهو النتيجه بس سامي اتصل علي و قال لي اني ناجحه و سألني ليه ما جيت و في النهايه اعتذر مني على االكلام القالو عن ناس سماهر ، قال لي مع انو ماف ولا كلمه غلط في الكلام القلتو ليك عن المسمياهم صحباتك ديل بس دامو الموضوع زعجك و خلاك تضايقي مني في أنا آسف شديد يا زوله و......قاطعتو و قلت ليهو سامي عايزا أقول ليك حاجه لأنو انا بالجد عقلي حيطق من كترة التفكير و ما عارفه اعمل شنو! قال لي قولي طوالي في شنو؟
بعد مسافه قلت ليهو الحصل إنو...........الخ
حكيت ليهو القصه كلها لأني بالجد كنت تايه و ما عارفه اتصرف كيف و ما قادره احدد منو الكذاب أو يمكن في سوء تفاهم ، قال لي نفس كلامي ولا ما نفسو؟
يا مها سماهر دي كل الناس قادره تشوفها على حقيقتها ما عداك إنتِ لأنك بتثقي في الزول بطريقه عميقه و بتلقي ليهو 1000 مبرر و ما بترضي تشوفي الجانب السيئ للناس ، مره وحده بس عايزك تبطلي سذاجه و تفكري بطريقه منطقيه بعيداً عن العاطفه ، قلت ليهو طيب هسي اعمل شنو؟
قال لي إنتِ شايفه شنو؟
قلت ليهو ما عارفه خايفه اظلم سماهر و .....قاطعني و قال لي بزهج تاني؟
ما بتفهمي إنتِ يا مها؟ اقول ليك حاجه اعملي البريحك انا ذاتي تعبت من الشرح و التبرير ، يلا مع السلامه....قبل ما يقفل فجأه كدا قلت ليهو دقيقه دقيقه عدنان جا متين من السفر؟
قال لي بإستغراب لقيتيهو وين؟
قلت ليهو شفتو صدفه في مطعم ، قال لي تقريباً ليهو اسبوعين ، قلت ليهو مش قلت لي إنو ما حيرجع تاني!
قال لي بزهج : أمو عيانه عشان كدا جا راجع ، قلت ليهو خلاص خلاص ما تتزهج كدا ، قفل الخط في وشي ، قلت غيتو موضوع سماهر مضايقو شديد بس اعمل شنو هي صحبتي و ما بقدر اصدق حاجه عنها بالساهل! !
بالعصريه كدا روان اتصلت علي و قالت لي وين مختفيه يا بت و ليه اليوم ما جيتي الجامعه!....طبعاً كانت بتتكلم معاي عادي كأنو ما حصل حاجه ، قلت ليها يا روان إنتِ وقت عارفه سماهر زعلانه مني في شنو ليه ما كلمتيني؟ ليه اخترتي انتِ و ميامن تقاطعوني معاها من دون ما تفهموني حاجه؟
قالت لي آسفين شديد يا مها و حقك علينا ، والله كنتِ قايلاك عارفه بالعلاقه البين مازن أخوك و سماهر عشان كدا زعلت شديد لمن كنتِ بتتكلمي عن نور و مخططه انك تعرسي ليها أخوك ، قلت ليها دا ما مبرر ليكم والله ، افهم من كلامك انكم كنتوا عارفين بـ البين سماهر و مازن أخوي؟
قالت لي أبداً والله ما عرفنا إلا لمن انتِ جبتي سيرة نور و سماهر زعلت و جات ورتنا ، قلت ليها كنتِ طوالي تواجهوني احسن من حركات الشفع دي ، قالت لي معليش شديد و ليك العتبى حتى ترضي ، المهم بقت تتكلم معاي عادي و بعد كل جمله تعتذر مني ، قالت لي ميامن ذاتا عايزا تعتذر منك بس الأيام دي تعبانه شويه ، قلت ليها لا ياخ مالا؟
قالت لي إلتهاب بس بقت أحسن شويه ، قلت ليها طيب هسي حـ أتصل عليها ، فعلاً أول ما قفلت من روان اتصلت على ميامن ، أول ما فتحت الخط بقت تشيل و تعتذر مني و تتأسف على الحصل ، طبعاً فهمت انها لمن قالت لي سماهر بتبكي عشان الإمتحان كانت بتكذب و برضو لمن قالت لي نحنا مشينا البيت و لمن لقيتهم في الكافتيريا قالت لي ما كنت عارفاهم موجودين هنا و و و ، كانوا عارفين سماهر زعلانه ليه بس مع ذلك اكتفوا بالسكوت ،، قلت ليها كدي خليك من دا و وريني بقيتي كيف روان قالت إنك عيانه ، قالت لي بقيت أحسن شويه ، تسلمي كتير انتِ كيف عامله؟
قلت ليها كويسه الحمدلله ، بقت تاني تشيل و تعتذر مني لمن حننتني! قلت ليها حصل خير يا ميامن و انا ما زعلانه بس عليكم الله تاني لمن يحصل موقف زي دا كلموني و ما تخلوني زي الأطرش في الزفه ، قالت لي حاضر و ان شاء الله ذاتو ما يحصل موقف زي دا ، قلت ليها إن شاء الله ، المهم دا كانت مكالمتي معاها ، نزلت تحت لـ ناس ماما و كلمتهم بالنتيجه ، بابا قال لي كالعاده بتي رافعه راسي ، انا فخور بيك شديد لأنك ما حصل خيبتي ظني فيك و من أول سنه ليك في الجامعه لحد آخر سنه دايماً مشرفانا بنتيجتك ، ربنا يحفظك يا بتي ، مشيت بستو على راسو و قلت ليهو ربنا يحفظك لينا يا غالي ، طبعاً ماما بتعاين لينا ساي عامله فيها لسه زعلانه من موضوع نور ، مشيت بستها على خدها و قلت ليها الزعل ما شبهك يا جميل ، بابا ضحك و قال لي الأسلوب دا ما حـ ينفع مع أمك ، قلت ليها يا ماما نحنا بالجد آسفين لأننا زعلناك بس إنتِ كمان يا ماما ما تظلمي مازن و تخليهو يعرس وحده هو ما عايزها ، نحنا ممكن نسمع كلامك في أي حاجه إلا موضوع العرس دا يا ماما لأنو الزواج حياة و ما مفروض يتم بالغصب في النهايه هم الـ يعيشوا مع بعض فإذا اي واحد من الطرفين حس انو الطرف التاني ما مناسب ليهو و متأكد انو ما حيكون سعيد معاهو فليهو حرية الرفض! مزن قالت ليها فعلاً يا ماما و بعدين انتِ مش كنتِ بتقولي لينا انو سعادتكم اكتر حاجه بتهمني و بعدين لمن تجوا تعرسوا ما حـ اغصبكم على حاجه و اكون زي الأمهات البفرضوا قراراتهم على أولادهم! مش قلتي لينا بديكم مطلق الحريه في موضوع الزواج دا!
ماما اتنهدت و قالت لينا خلااااص خلااااص اعملوا العايزنوا ! قلت ليها ما حـ يحصل العايزنوا إلا انتِ ترضي علينا و توافق على البت العايزها مازن ، قالت لي عشان صحبتك مش؟
قلت ليها أبداً ما عشان هي صحبتي بس عشان مازن هو الإختارها من دون تدخل مني أو منك ، بعد مسافه قالت لي سماهر دي البت الكان جات معاك السنه الفاتت في رمضان؟
قلت ليها آي لمن قلتي لي البت دي حلاتها! قالت لي كدي النشوف ، قلت ليها بحماس يعني موافقه؟
قالت لي ها انتوا ذاتكم موافقتي ما بتفرق معاكم ، ابوك و اخوك حددوا موعدهم عشان يمشي و يخطب البت ، طبعاً اتفاجأت لمن ماما قالت كدا! ...قلت ليهم متين الكلام دا؟
مزن قالت لي أجي! نظام ما عارفه! ....قولي ما سمعتي مننا كمان ما سمعتي من صحبتك؟!!
قلت ليها المهم ماشين متين؟ قالت لي يوم الجمعه الجايه دي ، قلت ليها كويس والله ، قمت منها و انا ما قادره اكون مبسوطه على أكمل وجه! خايفه و متردده و مقلقه و ما عارفه اعمل شنو! لمن رجعت غرفتي قعدت أبكي بس على الحيره و التوهان الأنا فيهو دا ، صليت و اتمنيت انو الفوضى و اللخبطه الحاصله دي كلها تنتهي و كل الإتهامات الإنقالت لي عن سماهر تطلع كذب أو سوء تفاهم لأني ما عايزا أنصدم في زول تاني ،، تاني يوم لمن مشيت الجامعه عشان اشوف مواضيع البحث و المناقشات قلت احسن أشوف سامي و اشكي ليهو قلة حيلتي دي! مع إني متأكده انو حـ يتزهج فيني و يقول لي نفس الكلام عن سماهر بس مع ذلك بقدر يفهمني ، طلعت تلفوني و اتصلت عليهو كذا مره بس ما كان برد علي في الآخر دخلت التلفون جوه السنطه و بقيت بفتش عليهو في الجامعه ، اثناء ما انا بفتش عليهو كدا إتلاقيت مع ناس سماهر ، جوا سلموا علي بالأحضان و قالوا لي تلفونك دا جادعاهو وين إنتِ بنتصل عليك ما بتردي!
قلت ليهم معليش تلفوني شكلو صامت ، طلعتو من الشنطه و اتأكدت انو كان صامت ، ميامن قالت لي ما مشكله خلونا نمشي نقعد في البينشات ديك و نرجع لمواضيعنا القديمه و حكاوينا الحنينه و كرفسة المشاعر و الجفاف العاطفي البتجيبهم لينا روان لمن تألف لينا قصص حب من راسها
