أول ما فتحت الخط قالت لي مها آسفه آسفه شديد على الكلام القالو ليك مازن مع اني ما عارفه قال ليك شنو بس عرفتو حـ يشاكلك بسبب الموضوع دا عشان كدا ما حصل جبت ليهو سيره بس هو أصر علي شديد عشان اقول ليهو فـ بس قلت ليهو بالكلام القالتو ليك نور و فهمتو انك ما غلطانه الغلط غلط نور لأنها بتحاول تملى ليك راسك ، انا نبهتو و قلت ليهو خليها ما تسألها هي صحبتي و برانا بنحلى مشاكلنا بس هو شكلو ما سمع مني ، آسفه شديد و بعتذر ليك بالنيابة عن مازن!دقيقه دقيقه تعتذر لي نيابة عن أخوي! !قلت ليها حصل خير و قفلنا على كدا بس عقلي إنفتح! كلام نور و سامي بقى يلف و يدور في راسي!دخلت الواتس و ختيت قلبي مكسور في الإستوري حقتي ، كان جواي كلام كتير و كميه من الأحاسيس جايطه جواي ، غلبني التعبير و احترت في أمري ، دا كلو إترجم على شكل دموع ، بكيت كدا لمن قلت بس و أنا ما عارفه نفسي ببكي على شنو تحديداً بس حسيت اني بالجد عايزا أبكي! حسيت بفراغ كبير جواي يمكن لأني يداب بديت أصدق الإنقال!مروا يومين على الكلام دا و مازن لسه زعلان مني مع إني مشيت و اعتذرت منو ، قال لي نور دي انا اكتر من مره نبهتك منها ، صراحةً انا لأول مره ما أحس نفسي غلطانه بخصوص الموضوع دا! رغم إني اعتذرت من مازن بس ما عشان انا عملت حاجه غلط كل القصه اني ما بحب زول يكون زعلان مني فالذات لو كان الشخص دا مازن ، نحنا اسره مترابطه و لطيفين مع بعض و كلنا بنحب بعض بس أنا و مازن علاقتنا أقوى ، رغم اني كبرت بس هو لسه كان بدلعني حتى أكتر من ماما عشان كدا ما بقدر اتقبل فكرة إنو زعلان مني ، المهم عملت ليهو شاي بالنعناع و شلتو مشيت بيهو لـ غرفتو ، قلت ليهو المره دي ما حـ اطلع من هنا لو ما سامحتني يا مازن و رجعت تتعامل معاي زي زمان ، أنا آسفه شديد ، قال لي مشكلتك ما بتسمعي مني و دايماً بتعملي الفي بالك ، قلت ليهو طيب آسفه آسسسفه يا مازن يووووخ ، بعد كمية من الإعتذارات و التحانيس ضحك و قال لي يا زوله ما زعلان منك ولا حاجه بس كنت عايزا اعذبك شويه عشان ما تعيدي الغلط تاني ، قلت ليهو والله اتعذبت عذاب! .....قال لي عارفك انا ما بتقدري تتحملي فكرة انو في زول يكون زعلان منك خاصة انا ، قلت ليهو حيوان رغم انك عارف كدا مع ذلك خليتني احس بتأنيب الضمير و اجري وراك يومين عشان اتكلم معاك و اخليك تسامحني ، ضحك و قال لي يلاااا تستاهلي عشان تاني تسمعي كلامي.....المهم لمن نزلت تحت لقيت ماما و مزن بتكلموا عن ترتيبات العرس الباقي ليهو اسبوعين أو اقل ، طبعاً موضوع العرس دا ضايقني بس ما عرفت اعمل شنو و لو مشيت و كلمت مازن تاني حيزعل مني و ما حـ يحاول يتأكد من صحة الكلام و يتهمني بإني بسمع كلام نور ، !! عدت الأيام و بيتنا بقى جايط و الناس داخله و طالعه و كل يوم عاملين حفله كلهم كانوا مبسوطين خاصة مازن إلا أنا ، كنت لسه تايهة و ما عارفه اعمل شنو! !شلت تلفوني و إتصلت على سامي عشان اقول ليهو كل حاجه في نفسي و اني شبه بديت اصدق كلام و استشيرو أعمل شنو ، بس ما رد علي ، فـ طوالي اتصلت على عدنان ، طوالي فتح الخط من اول رنه ، قلت ليهو عدنان كيفك؟ قال لي تمام الحمدلله ، قلت ليهو عاين سامي دا جنبك؟ ؟قال لي لا في حاجه؟ ؟قلت ليهو لا بس عايزاهو في حاجه ، قال لي لو الموضوع مهم أو حاجه ضروريه قوليها لي اوصلها ليهو أو احتمال أساعدك ، طبعاً استغربت فيهو! !قلت ليهو لا لا بس قول ليهو يتصل علي ضروري ، لازم تقول ليهو اني محتاجه ليهو شديد ، قال لي تمام و قفل الخط ، بعد اقل من 10 دقايق سامي اتصل علي ، أول ما فتح الخط قلت ليهو سامي انا شبه صدقت الكلام القلتو لي عن سماهر لأنو ..............الخهسي ما عارفه اعمل شنو! اكلم مازن؟ ....بس لو كلمتو ما حـ يصدقني و حيزعل مني زياده ، انا تايهه يا سامي و في نفس الوقت مصدومه فيهم ....طبعاً لمن قلت كدا صوت اتغير و بقى صوت باكي ، بعدها بكيت عديل و قلت ليهو انا ما قادره اصدق إنهم طلعوا بالسوء دا ، مع انك حذرتني منهم حتى نور حذرتني من سماهر بس انا ما سمعت منكم و بمناسبة نور دي اتخيل انها بت عم سماهر و نور دي يا سامي بت بتشتغل في شركة بابا ، اتعرفت عليها لمن..............الخ ، دي قصتي معاها ، هسي ياداب بديت اتذكر و احلل تصرفات سماهر و روان و ميامن! بالجد انا كنت عميانه! !بس حالياً اعمل شنو يا سامي ما قادره أواجهم!؟......سامي؟ سامعني إنت؟ ....ايوه عارفاك زعلان مني بس عمرو الزعل ما منعك انك تقيف معاي لمن احتاجك ما تخذلني إنت كمان! بالجد انا هسي حاسه بفارغ كبير يعني اتخيل فجأه كدا تكتشف انو كل الناس الحوليك مزيفين و مواقفهم معاك كلها تمثيل! ما قادره اوصف ليك يا سامي كمية الوجع و الخذلان الحاسه بيهو ، كل ما اتذكر ايامي معاهم و الحقيقه العرفتها حالياً دموعي بتنزل 💔بكيت أبكي و اشكي و احكي ليهو و هو ما اتكلم معاي و خالص ما نطق! ....لمن اقتنعت انو ما ناوي يتكلم معاي قفلت الخط و ياداب كدا بكيت كويس و حسيت اني اتخذلت من كل الإتجاهات ، في نفس اليوم دا بليل جاتني رسالة من عدنان كاتب لي فيها: "عشان الواحد يقدر يتجاوز مخاوفو لازم يواجها "= سبحان الله كأنك عارف أنا مالي!_ قال لي بالجد؟ ليه الحاصل شنو معاك؟= لا ماف شي موضوع بسيطقرا رسالتي و ما رد عليها ، كنت بعاين لـ رسالتو و بقول في نفسي فعلاً لازم أواجهم عشان اقطع الشك باليقين و اريح نفسي و عقلي من التفكير الكتير في الموضوع دا ، رسلت ليهم في القروب انو ضروري بكرا أقابلكم يا بنات و أكدت عليهم إنو الموضوع دا مهم شديد ، بعد إلحاح و إصرار شديد مني رضوا يجوا! و دا الحيرني زمان لمن اقول ليهم رايكم شنو نتقابل في الحته الفلانيه كانوا طوالي بقولوا لي موافقين أو لو في وحده ما بتقدر تجي بتقول لينا اجلو الطلعه عشاني أو بتعتذر بطريقه ظريفه اما هسي لمن طلبت منهم نتقابل ميامن قالت لي عايني نحنا ما فاضيين! ! روان قالت لي آي ما فاضيين والله و بعدين نتقابل لشنو لو في موضوع مهم قوليهو هنا يا مها ،، المهم بعد إلحاح و تأكيد انو الموضوع مهم قررنا نتقابل في ().....اول ما طلع من القروب لقيت رساله من عدنان ، غيتو بقيت استغرب فيهو! بس ما بنكر انو الموضوع عاجبني و جاني إحساس إنو بقى مركز معاي و مهتم بي! كان كاتب لي ، عشان ما ادخل سامي معاك في حته ضيقه في الحقيقه الأنا الرديت على تلفونو قبيل لمن إنتِ إتصلتي ، قلت ليهو شنو؟ .....طيب ليه ما قلتي لي و أساساً ليه كذبت و قلت لي سامي ما جنبك؟قال لي فعلاً ما كان جنبي ، قلت ليهو طيب هو ما عرف إني اتصلت؟ انت ما كلمتو بالسمعتو مني على اساس انك سامي؟قال لي هو طلع طوالي و للأسف انا بالغلط حذفت المكالمه من تلفونو......طبعاً لمن قال كدا ما صدقتو! ! كيف يعني حذف المكالمه بالغلط و ليه رد على تلفون سامي من الأساس؟في عز دا كلو إبتسمت والله و فسرت تصرفو دا بالطريقه الأنا عايزاها 🥀قلت ليهو طيب حصل خير ....قايله الدردشه حـ تنتهي على كدا مع اني كنت متمنيه. انها تطول ، فجأه قال لي اقول ليك حاجه؟قلت ليهو شنو؟_ أمشي واجهيهم عادي و أي سؤال في بالك أطرحيهو عليهم فلو لقيتي الأجوبه مقنعه اعتذري أما لو لا صدقيني بقدر الخذلان الحتحسي بيهو حـ ترتاحي من الشكوك و الإستفهامات الفي بالك ، التخلي لمن يكون عن قناعه بكون أسهل ...تلقائياً لقيت نفسي بحكي ليهو اكتر و كلمتو اني حـ ألاقيهم بكرا في () بس قلت ليهو خايفه والله اقيف قدامهم و ألمح في وشهم الكذب و النفاق ، قلبي واجعني شديد يا عدنان ، ياريتها لو جات من غريب 💔💔قال لي دا كلو بسبب السذاجه و التلقائيه البتتعاملي بيها ، انا ما بعرفك كويس بس من اول يوم شفتك فيهو عرفتك بت بسيطه و ساذجه ، صدقيني من اول يوم قلت البت دي من النوع العادي الواحد يستغلهم و يلعب بمشاعرهم و تقريباً دا العملوا معاك نص الناس الفي حياتك ، ايوه إنتِ اتعاملي بطيبتك و أصلك بس ما لدرجة العواره! ما تطنشي أي مؤشر بقول انو الشخص القدامك دا نيتو وسخانه! ما تخليك زوله اتجاها واحد ، مهمها كنتِ طيبه خلي عندك ذرة شك و لو شويه في أي شخص قدامك!قلت ليهو ما قادره استوعب يا عدنان و ما قادره افهم ليه هم عملوا معاي كدا؟ يعني لو وحده او اتنين معليش بس كلهم يطلعوا ما كويسات؟ طيب ليه انا بالذات؟ أذيت منو أنا؟_ ما ضروري تأذي زول عشان تتأذي ، في ناس في الدنيا دي تحسيهم مخلوقين عشان يحسدوك و يعادوك ، انتِ كنتِ الحلقه الأضعف بيناتهم ، الطيبه الزايده عن الزوم بتخلي الما عايز يستغلك يستغلك هسي انتِ ذاتك بـ سذاجتك دي لو لقيت شخص اطيب منك و ما بقول لا لـ زول حـ تطمعي في خدمات و تلقائياً حتلقي نفسك بتخليهو يخدمك في الكبيره و الصغيره حتى لو ما كان عندك عداوه معاهو ، الإنسان كدا بطمع في الشخص الما بقول ليهو لا و بحملوا مسؤوليتو ، ما عارف صحباتك مالهم معاك أو ليه في الآخر طلعوا كدا! بس أكيد انتِ السبب لأنك أديتيهم فرص فيك ، طبعاً انا بقرا رسايلو و ببكي ، بقيت احكي ليهو عن طبيعتي علاقتي بيهم و قدر شنو قلبي واجعني و حاساهو بتقطع حته حته ، قال لي بكرا حـ تقطعي الشك باليقين انتِ بس لاحظي لتصرفاتهم و افهم تعابير وشوشهم و حاولي ما تنخدعي فيهم تاني ، بتمنى يطلع في سوء تفاهم في الموضوع ، قلت ليهو انا ذاتي بتمنى كدا بس ما ظنيت يا عدنان ، دي اول مره اكون ما مرتاحه لحاجه قلبي بضرب شديد كأنو بنبهني اني حـ ابكي كتير بسبب الموضوع دا 💔💔اتكلمنا كدا لحد ما نعست و نمت ، تاني يوم من صباح الرحمن قمت و حالتي حاله ، طبعاً ناس البيت عشان مشغولين بترتيبات العرس ماف زول مركز معاي ، قلت ليهم انا طالعه و طوالي الساعه 11 كدا وصلت المكان الحـ نتقابل فيهو ، انتظرت كدا لحد 11 و نص بس هم لسه ما جوا! !اتصلت عليهم كذا مره في الآخر ردوا و بزهج كدا قالوا لي جايين، غيتو انا من ردودهم و نبرة كلامهم دي بقيت اتأكد شويه شويه و مع كل رد منهم انا قلبي بتقطع 💔 من متين هم بتكلموا معاي بالطريقه دي؟ ليه الكره المن دون مبرر دا! دي شنو العدوانيه دي الخلتهم يصاحبوني و هم يمكن بكرهوني في نفس الوقت! عايزا اعرف بس عملت شنو انا؟ قصرت معاهم في شنو عقلي حـ يطق و قلبي شويه كدا و حـ ينزف دم 💔لمن الساعه 12 جات ، وصلت ميامن و اول ما جاتني سلمت علي ، قعدت و قلت لي اها جايباني في الشمس دي عشان تقولي لينا شنو؟قلت ليها خلي روان تجي ، طلبت ليها مويه و عصير ، بقيت اعاين ليها ساي لمن هي استغربت فيني! قالت لي في شنو مالك؟قلت ليها خلي روان تجي! ...هنا هي صلحت قعدتها و ضيقت عيونها و قالت لي دا موضوع شنو؟ ما بصبر انا لحد ما روان تجي في شنو ياخ! !طبعاً هي استغربت و قلقت عشان دي اول مره تشوفني جاده و ملامح وشي حاده و على غير عادتي لا ابتسمت لا ضحكت لا قعدت أرغي ليها! المهم شويه كدا و روان وصلت ، سلمت علينا و قالت لي خير يا مها في شنو كمان!بقيت اعاين ليهم الإتنين و انا قلبي بعتصر من الوجع ، إتنهدت و قلت ليهم حـ احكي ليكم من البدايه بس بشرط ماف وحده تقاطعني لحد ما أخلص ، اليوم نحنا حـ ننهي الموضوع دا ، يا زال سوء التفاهم و رجعت المياه لـ مجاريها يا كل وحده مشت على إتجاه ، اليوم انا ما عايزا منكم شي غير الحقيقه ، عليكم الله قولوا لي الحقيقه و ريحوني ، عذاب يوم ارحم من دهر كامل من الشكوك ة التساؤلات ، جاوبوني اليوم و وقفوا عقلي عن التفكير في الموضوع دا 💔لمن قلت ليهم كدا الإتنين عاينوا لبعض بإستغراب! !يتبع.......
