ممكن نتكلم؟
انا والله عشان ما ابكي قدامو ما رديت عليهو ...لمن اتحركت تاني استعجل و وقف لي جنب الباب و قال لي بنبره حاده ما حـ تمشي من هنا لو ما إتكلمنا مع بعض ....اعصابي خلاص تلفت و ما قدرت امسك دموعي ، انفقعت بالبكى و بعد مسافه قلت ليهو نتكلم نقول شنو؟ في شنو تاني عشان يتقال و ذاتو نتكلم ليه؟ انت منو أساساً ما بعرفك انا و....
_ اشتقت ليك و فقدتك شديد والله
عاينت ليهو جوهـ عيونو و قلت ليهو ما تتعب نفسك ساي و تعمل دراما انا ما الغبيه و الهبله الزمان ديك و لو سمحت زح لي من الباب انا لا عايزا اسمعك لا عندي حاجه اقولها ليك ...
قال لي مها رجاءً اسمعيني ، فاقدك شديد انا و ما لاقي نفسي من دونك ، الـ 3 سنوات دي حسيتها 3 دهور ، من دونك انا بقيت باهت و حياتي اتغيرت 180 درجه ، لدرجة اني اهملت نفسي و شغلي و ما كنت طايق اشوف زول أو اتكلم معاهو ، بعدك انا انعزلت عن العالم و غيابك أثر علي شديد و خلق فراغ كبير جواي و.....
قاطعتو و قلت ليهو لو انت حياتك اتغيرت انا حياتي إتدمرت ، و بسببك و بسبب المعاك انا للمره التانيه قابلت طبيب نفسي ، العشتو بسببك عمري ما حـ انساهو ليك و العملتو في أخوي لحد ما أموت ما حـ اغفرو ليك ، قال لي افهميني و ختي نفسك مكاني يعني لو.....قاطعتو و قلت ليهو و انا بصرخ فيهو اسكت ياخ ما عايزا اسمع منك اي حاجه و ما عايزاك تبرر لي و اساساً ما عايزا اي تعامل معاك ياخ حريقه تحرقك و تحرق الساعه العرفتك فيها ، الله ينتقم منك و ان شاء الله تعيش ايام اسوأ من العشتها و يارب ما ترتاح في الدنيا دي و لو مُت في قبرك ما ترتاح ، حـ افضل أدعي عليك لحد ما أموت ، الله يحرقك و يقطعك حته حته و.....قال لي بصوت مكسور مها 💔
قلت ليهو ما تجيب اسمي على لسانك القذر دا و لو سمحت زح لي من الباب ، عاين لي بنظره كدا ما أديتها أي أهميه بعدها زح لي من الباب اول ما طلعت لمحت مستر هشام و معاهو كم نفر كدا جاين على غرفة الإجتماعات ، عملت نفسي بتكلم بالتلفون و انتظرتهم لحد ما وصلو و دخلت معاهم ، لقينا عدنان قاعد في الكرسي و سرحان ، هشام قال ليهو خير يا مان مالك؟
هز ليهو راسو بس بمعنى ماف حاجه ، اول ما قعدنا كدا باقي الموظفين جوا داخلين على راسهم أرجوان ....بعد ما إتلموا كلهم هشام وقف على حيلو و بعد ما قال السلام عليكم بدا يتكلم و انا طبعاً ما مركزهـ معاهو ، نظرات الكلب داك كانت موتراني و مضايقاني شديد ....فجأه سمعت هشام قال مها! !
انتبهت و قلت ليهو ايوه بخلعه كدا! قال لي زي ما شايفه كلهم قالوا اقتراحاتهم فـ عايزين نعرف اقتراحك شنو؟ ؟
قلت ليهو احم طيب فكرتي ببساطه هي انو نحسن من جودة الفيديو الإعلان و نخلي محتواهو يكون جذاب و......قاطعتني أرجوان و قالت لي دي حاجه كلنا عارفنها! ! عارفين المطلوب شنو! !
طنشتها ، واصلت و قلت ليهو انا عندي قناة في اليوتيوب و حساب في التيك توك و عدد المتابعين كبير شديد فـ ممكن نستغل الحاجه دي لـ صالحنا ، ارجوان قالت لي فكرتك غير مجديه و ما شايفه فيها أي فايدهـ.....عايزا الشركه دي كلها تسلمك شغلها و تعتمد على حساباتك الشخصيه؟ بتتكلمي بأي منطق إنتِ؟
طبعاً زعلت زعل ما عادي خاصة انو الكلام دا اتقال لي قدام كميه من الموظفين فـ حسيتها صغرتني قدامهم ، هشام قال ليها دا مجرد اقتراح و نحنا ما عندنا مانع نسمع أي اقتراح من أي شخص ، قالت ليهو ما عندنا مانع نسمع الإقتراح لكن عندنا مانع في تطبيقو ......المهم بعد كلامها دا انا سكت و خليتهم يتناقشوا براهم و عدنان دا حالف ما يشيل عيونو عني ، ياخ ما صدقت متين خلص الإجتماع دا و رجعت البيت! !
زي المسا كدا اثناء ما أنا قاعده برا في الحوش و بتصفح في الفيس مازن جا قعد جنبي و هو شايل معاهو كبايتين شاي ، مسكني وحده و شال التانيه ، قلت ليهو عملتو انت ولا ماما؟ قال لي أنا طبعاً ، شربت منو و قلت ليهو اول مرهـ تعمل شاي بنشرب ، قال لي ياااازوله ما تكذبي ، قلت ليهو المهم الشاي سمح بس عايز ليهو بسكويت ، قال لي جداً هسي البسكويت يكون عندك ، قلت ليهو مازن هييي ما جادهـ انا ساي قلت كدا ، وقف على حيلو و شال مني الكبايه و قال لي حـ ارجعهم المطبخ لأنهم حـ يحتاجوا تسخين تاني ، المهم بعد ما هو مشى دخلت اليوتيوب و شفت كميه كويس من التعليقات على آخر فيديو نزلتو و يلي كان عن منتج الشركه و في ناس قالت عايزاهو ، عملت فيديو قصير تاني و قلت فيهو اننا بنسوق للمنتج و بنبيع بالجمله يعني المنتج دا ما حـ يتباع إلا لـ لماركات تجاريه معروفه أو بالجمله ، المهم شويه كدا ماما جات و قالت لي أبوك دا لسه ما جا؟
قلت ليها لا لسه ، قالت لي خلاص تعالي معاي نطّلع ليهو سريرو دا برا في الحوش ، قلت ليها حاضر ، فعلاً مشيت طلعت معاها سرير بابا و سرير تاني لـ مازن و ختيناهم جنب بعض ، مازن جا و قال لي ما لقيت بسكويت رويال بس جبت كابتن ماجد ، قلت ليهو ما فرقت ، المهم حـ أمشي اجهز الشاي ، قال لي لا لا ياااازوله عايزا تسرقي تعبي مش؟ عايزا توهمي امي انك العملتي الشاي الظابط الخطير دا صح؟
ضحكت و قلت ليهو أبداً والله ، ماما قالت ليهو لو الشاي دا عملتو انت يا مازن انا من هسي ما عايزا ، ضحكت عليهو ضحك ، قال ليها براحه علينا يا حاجه دا شنو دا كسر الخاطر دا! 😂
المهم مشى جاب لينا الشاي و جا راجع ، ماما قالت ليهو غيتو الشاي حقك دا انا ملاوذه منو لكن البسكويت بمشيهو ، الإتنين ضحكنا على كلامها ، مازن قال ليها كدي ضوقيهو بعداك أحكمي ، شالت الشاي و شربت منو بعدها ابتسمت و سكتت ، مازن قال ليها قوووون ، ضحكت و قالت ليهو اول مره سكرك يكون مناسب و كمية حب الشاي تكون موزونه و الأهم ما دا انك ما كترت النعناع في الشاي و ما خليتو يغلي معاهو ، قال ليها خلاص فتشي لي عروس بعد دا بقيت جاهز 🙈😂
قالت ليهو ان شاء الله ناوي تمسك المطبخ لـ مرتك بعد تعرس! غيتو انت.....المهم مازن بقى ياخد و يدي في الكلام مع ماما و انا بعاين ليهو بس ....لسه قادره اشوف كمية الحزن و الوجع الفي عيونو ، لسه جروحو ما طابت! لسه ما قدر يتجاوز سماهر و ما اظنو يقدر رغم انو بحاول ينساها بس ياهو الحال في حالو ، 3 سنوات و هو لسه ما خطى خطوه جادهـ اتجاهـ وحدهـ غيرها .....المهم بعد مسافه كدا بابا جا و بعد ما ارتاح و صلى العشا جا قعد اتونس معانا و ساهرنا لحد الساعه 12 بعدها كل زول شاف سريرو بـ وين ، ماما طلعت سريرها برا و خلتني أنوم جوا براي ، اول ما دخلت الأوضه و قفلت الباب إبتسامتي إتلاشت ...اساساً أنا من قبيل كنت بتصنع الضحك و بحاول انسى إني شفت عدنان ، بحاول امنع دموعي و اطنش الإحساس المرير الحسيت بيهو بعد شوفتي للحيوان داك 💔
