على الحافة

23

مر شهر و حاجه و المشاكل كترت بين مزن و سماهر و مازن دا اتغير علينا كلنا ، يوم شفتو قاعد برا في الجنينه بتكلم بالتلفون ، طوالي نزلت و مشيت ليهو لقيت خلص مكالمه ، عاين لي و رجع تاني عاين لتلفونو و اداني إحساس انو ما شايفني ، مشيت عليهو مسكتو من يدو و قلت ليهو مازن إنت ليه زعلان مننا؟عاين لي بس ما رد علي ، قلت ليهو من متين إنت بتتعامل معانا كدا! ناسي اننا أخواتك؟قال لي بزهج من اليوم الأجهضت فيهو سماهر بسببكم ، اي عارف انو العلاقه بينك و بينها ما كويسه بسبب الكلام القالتو ليك نور عنها بس دا ما مبرر لـ العملتيهو إنتِ و مزن ، انا بالجد مصدوم فيكم و ما قادر استوعب إنو أخواتي طلعوا كعبات للدرجه دي! و فوق دا لسه بتشاكلوا في سماهر! على الأقل راعوا لحتة انها فقدت ولدها و حالتها النفسيه تعبانه شديد و ما بتتحمل أي ضغط و إزعاج منكم ، قلت ليهو عارف انا لو في مكانك ما كنت حـ أصدق أي كلام ينقال لي عنك ، لأنك أخوي و انا عارفاك كويس و بعرف الحاجات البتعملها و الما بتعملها ، لو كان عندك ذرة ثقه فينا ما كان صدقت كلام سماهر أو على الأقل كنت تسمع من الطرفين و تعرف الحصل ، مع انك ما أديتنا فرصه عشان نفهمك الحصل بس هسي و في اللحظه دي انا حـ اقول ليك و غصب عنك يا مازن ، صدقني لا انا لا مزن جوانا كمية الحقد البتخليني نمشي و نخلي سماهر تعبانه ، الحصل انها كانت بتستفرغ ، انا و مزن مشينا لقيها في غرفتها و سألنها حاسه بشنو لأنو لو محتاجه تمشي مستشفى كنا حنمشي معاها أو نوديها ، قالت إنها كويسه بس بطنها طامه ، كررنا ليها السؤال عشان نحنا كنا طالعين و هي أكدت لينا انها كويسه و ذاتو ما كان ظاهر عليها تعب أو إرهاق استفرغت و قالت انها بقت كويسه! دي كل القصه! اما الحصل شنو بعدها خلاها تجهض الله أعلم بيهو! و بعدين تعال هنا انت ما كنت عارف إنها حامل؟ قال لي ما عارف و اظن هي ذاتها ما كانت عارفه ، قلت ليهو المهم دا الحصل يا مازن و نحنا يشهد الله كان شفنا شنو داك من سماهر ما بنصل للدرجه دي من الكراهيه! في النهايه انت أخونا و البسعدك بسعدنا مستحيل نتمنى ليك الشر أو نسعى عشان نخرب ليك حياتك ، سكت و لف وشو مني ، فجأه جاني صوت مزن و هي بتقول لي خليهو دامو ما عايز يصدقنا ، يعني انا بالجد مستغربه فيك! نحنا عايشين مع بعض كم سنه عشان تكذبنا و تصدق وحده ما تامي معاها سنه! ! اااا لا لا انت بتعرفها من قبل 4 سنوات! لكن نحنا بتعرفنا من لمن كنا عُمر يوم ، كنت معانا خطوه خطوه و بقدر اقول انك الربيتنا و وريتنا الصح من الغلط معقوله تجي هسي و بالبساطه دي تصدق مرتك! لاحظ لإنها ما قالتها ليك عديل انو انا و مها سبب في إجهاضها كانت بتجيب ليك الكلام بفوق لأنها ما بتقدر تقولو بعباره صريحه لأنو كذب ، و بما انو اليوم جاتني فرصه و لقيتك قدامي حـ اقول ليك ليه هي عملت كدا و الرهيفه التنقد ، إتلفت عليها و قلت ليها مزن! ماف داعي للكلام دا ، ولا ردت علي جات وقفت قصاد مازن و قالت ليهو مرتك بتخونك! و انا سمعتها بتتكلم مع واحد كم مره كدا ما شكيت في الموضوع بس في المره الآخيره لمن لمحتني وراها إتوترت و إرتبكت و من خلال ردة فعلها انا اتأكدت من الفي بالي و هي شكلها فهمت إني عرفت بالبتعملو من وراك عشان كدا عملت الحركه دي عشان توصل ليك فكرة اننا بنكرها و مستعدين نكذب فيها و عشان تخلي ما تصدق أي كلمه نحنا بنقولها ليك و واضح إنها نجحت ، غيتو انا العندي قلتو بعد دا إنت حر تصدق أو لا دي حاجه بترجع ليك ولو عايز تبقى ديوث تقعد معاها كدا و انت عارف انها بتخونك فـ برضو انت حر المهم اني ما حـ أسكت ليها لو قلة أدبها معاي....طبعاً مازن بقى مخلوع و كلام مزن الآخير استفزاهو شديد ، مزن مشت و انا بقيت واقفه معاهو و ما عرفت اقول ليهو شنو! لأنو كلام مزن صح و ما بقدر اغشو و اقول ليهو مزن بتكذب عليك عشان ما يضايق و صراحة سماهر كترة المحلبيه بسبب المشاكل البقت تعملها كل يوم دي حتى ماما أخدت منها موقف و اتغيرت عليها بعد ما كانت بتحبها ، يعني كلنا بقينا نعرف حقيقتها و مزن حكت لـ ماما و بابا كل العملوهو معاي سماهر و صحباتي و حكت ليهم باليوم الجات فيهو سماهر و سمعتني كلام زي السم و البسببو هبطت و اضطروا انهم يودوني المستشفى ، دا اول سبب خلى ماما تمشي و تجوط معاها و من اليوم داك سماهر شبه ظهرت على حقيقتها قدامنا و بقت عادي ترد علينا قدام ماما ، اما مازن لسه ما عارف لأنو قاطعها معانا كلنا و ما بقعد كتير في البيت و لمن يجي بجيب معاهو اكل جاهز بمشي بيهو غرفتو هو و سماهر و بقعدوا قبلهم و شوشهم دي نادراً ما نشوفها عشان كدا أنا لمن فاض بي خلاص جيت لـ مازن و ياهو كلامي معاهو القبل شويه داالمهم وقفت معاهو شويه كدا و بعدها مشيت خليتو و انا قلبي واجعني عليهو ، اول ما دخلت غرفتي لقيت مكالمات من عدنان ، رجعت ليهو طوالي ، فتح الخط و قال لي تلفونك دا جادعاهو وين من قبيل بتصل عليك؟ ...قلت ليهو كنت بعيده عنو ، قال لي دقيقه صوتك دا مالو كدا؟ قلت ليهو ما ياها المشاكل البتحصل كل يوم دي ، قال لي ربنا يهون انتِ بس ما تزعلي نفسك لأني ما بقدر اتحمل فكرة انك متضايقه و زعلانه و انا بعيد عنك و ما قادر اعمل ليك شي عشان كدا يا ستي أنا قررت اني اجيك بالباب ....قلت ليهو بخلعه شنو شنو؟ ؟؟قال لي زي ما سمعتي يعني لمتين حـ نفضل كدا؟ احسن نكون في بيت واحد بدل الشحتفه دي.....اتلخبطت و ما عرفت اقول ليهو شنو ، بعد مسافه قلت ليهو بس يا عدنان في الوقت الحالي انا ما بقدر افتح الموضوع دا مع ناس البيت عشان......قاطعني و قال لي انا فتحت الموضوع مع ابوك أمبارح لمن جيت الشركه و قال لي الراي راي البت ، هااا يا بت رايك شنو؟قلت ليهو بخلعه ما جادي؟ بالجد اتكلمت مع بابا؟ قال لي قايلاني بهظر لمن قلت ليك بحبك؟غيتو كنت عايزا أطير من الفرح ، ما مصدقه انو عدنان اتقدم لي وااااي من الفرحه ، حضنت التلفون علي انا جسمي كلو برجف كأنو قال لي العرس بكرا ، طوالي جرييييت لـ مزن في غرفتها و وريتها ، قالت لي أخيراً ياخ قلت ليها بس بابا ما جاب لي سيره! قالت لي اصبري يمكن يفتح معاك الموضوع بعدين أو بكرا ، غيتو اليوم كلو قضيتو توزيع في الإبتسامات لمن ماما علقت و قالت لي خلاص عايزا ترجعي لـطبيعتك اثناء ما أنا و ماما بنتكلم كدا سماهر جات نازله و قعدت طبعاً ماما ولا عبرتها بالغلط ساي ما عاينت ليها مع انها كانت بتحبها شديد بس بعد عمايلها دي بطنها طمت منها ، شويه كدا مزن جات نازله اول ما قعدت كدا سماهر طوالي قامت و اتحركت من جنبنا ، مزن قالت بصوت واطي بمشيه من غير رجعه ان شاء الله ، طوالي سماهر إتلفتت عليها و قالت ليها عايني إنتِ مشكلتك شنو؟ اخلي ليك البت دا عشان تلمي لسانك عليك؟مزن قالت ليها ياريت والله عشان نرتاح منك و من كذبك و مشاكل اليوميه دي! نفسي اعرف عايزا تصلي لشنو إنتِ؟ نسابتك ديل قصروا معاك في شنو عشان تعملي المشاكل دي كلها و مازن دا عيبو شنو عشان تمشي تخونيهو! طوالي سماهر جات عليها و مدت اصبعها ليها و قالت ليها بنبره عاليه أحسن تحترمي نفسك! مزن قالت ليها الكلام دا قوليهو لنفسك ، سماهر ربعت يدينها و قالت ليها إنتِ ناسيه نفسك ولا شنو؟ قايلاني ما عارفه احمد و محمد و خالد البتتكلمي معاهم في أنصاص الليالي و كل يوم واحد جديد! لو كنت سواطه و بتاعة فتن كان الكلام دا وصل مازن من زمان عشان كدا ألزمي حدودك و عشان ما تخليني اقول البعرفو كلو لـ مازن ....للحظات مزن سكتت لمن لقتنا انا و ماما بنعاين ليها و ماما دي كانت مصدومه شديد! مزن قالت ليها يعني دا تساوم؟ ....كأنك بتقولي لي لو حكيتي لـ مازن اني بخونو حـ اقول ليهو انك بتكلمي أولاد! ...يعني بتعترفي إنك بتخوني مازن؟سماهر قالت ليها احسن ليك تبطلي كذبك دا ، كويس خلي مازن يجي ، قالت كلامها دا و رجعت غرفتها ، اول ما ماما عاينت لـ مزن كدا و كانت حـ تتكلم مزن قالت ليها أكيد ما حـ تصدقي البت الكذابه دي صح يا ماما؟ ؟ ماما سكتت ، مزن قالت ليها اصلاً دا العايزاهو هي ، و شكلها بدت تأثر عليك ، ماما قالت ليها لا لا تأثر علي شنو لا مصدقاها لا حاجه ، مزن قالت ليها طابط ما تصدقوا أي حاجه تقولها ليكم ، قالت كدا و طوالي مشت غرفتها ، ماما اقتنعت بكلام مزن و ما سألت بس انا عارفه الحقيقه و انو الكلام القالتو سماهر صح ، مشيت لمزن في غرفتها و قلت ليها الليله شيلي شيلتك مازن لو عرف حـ يضبحك ، قالت لي يعرف شنو؟ قلت ليها ما تستهبلي ياخ ، سماهر لو كلمتو حـ يقتلك و تاني حـ يصدقها هي ، مدت لي تلفونها و قالت لي فتشيهو! قلت ليهو شنو! مسكتني ليهو و قالت لي شوفي لو لقيتي اسم احمد او خالد او غيرو هنا ، شفت تلفونها كلو بس ما لقيت اسم أو رغم زول غريب حتى في الواتس ماف! قلت ليها معناها سماهر بتكذب؟ ...ابتسمت بس ما ردت علي ، قلت ليها عليك الله شوفي البت الما بتخاف الله دي! ! مزن ضحكت و قالت لي اطلعي اطلعي يا مها عايزا أنوم ، قلت ليها بتضحكي مالك؟ قالت لي عدنان دا الله يعينو على غبائك ، قلت ليها هسي عدنان الدخلو شنو؟ ضحكت شديد و قالت لي اطلعي ياخ ، المهم طلعت منها و انا ما فاهمه شي ، لمن حكيت لـ عدنان هو ذاتو ضحك علي و قال لي انتِ ما بتفهمي الخباثه دي أكيد اختك يا حذفت الأرقام و الدردشات يا عملت ليهم إخفاء قلت ليهو ايواااا ، قال لي بس كدا و قعد يضحك ، قلت ليهو ياخ ما تضحك فيني بالجد الحاجه دي ما خطرت على بالي ، قال لي تمام ما مشكله المهم قولي لي ابوك فاتحك في الموضوع؟ قلت ليهو لا لسه ، قال لي الحاج دا كمان مالو عايز يجرجرنا؟ قلت ليهو يمكن ما عجبتو ، قال لي مستحيل ، واثق انا من نفسي و متأكد اني عريس ما بترفض ، من دون ما انتبه لـ كلامي قلت ليهو و لمن حبيبتك ديك خلتك و مشت ما كنت واثق من نفسك ولا شنوطبعاً ما إنتبهت على نفسي إلا لمن هو سكت ، قلت ليهو آسفه آسفه والله ما قاصده يا عدنان ، قال لي حصل خير و بقى يتكلم معاي عادي بس نبرة صوتو كانت متغيره ، المهم بعد 3 أيام من الكلام دا بابا ناداني و فاتحني في الموضوع ، و قال انو عدنان زول كويس و اخلاقو عاليه و ما مفروض يترفض ، قلت ليهو البتشوفو إنت ، قال لي ماف حاجه اسمها البتشوفو إنت انا عايز اعرف انتِ شايفه شنو؟ ...كنت خجلانه منو و ما عرفت اقول ليهو شنو خاصة انو بابا مفتكر اني ما بعرف عدنان فلو وافقت طوالي كدا حـ يستغرب! بس كويس انو مزن كانت قاعده جنبي و قالت ليهو اكيد ما عندها مانع يا بابا ، انت لمن فتحت الموضوع قبل يومين مع ماما انا مشيت كلمتها و وريتها صور الإسمو عدنان و هي عشان ما عندها زول ما اظنها ترفض! بابا قال ليها و انتِ جبتي صور عدنان من وين؟قالت ليهو مازن كان متصور معاهو و خاتيها في حالتو و انا عرفتو لمن جا عرس مازن و زي ما قلت يا بابا دا ما مفروض يترفض ، عاينت ليها بإستغراب كدا! غيتو مزن دي كذابه جنس كذب و تأليفها لحظي ، صور عدنان دي شافتها عندي ، بابا قال لي محتاجه زمن عشان تفكري؟في نفسي قلت ليهو ما محتاجه ولا ثانيه يا بابا موافقه انا ياخ.....فجأه مزن قالت ليهو ايوه موافقه يا بابا اصلاً ماف شي يخليها تتردد خلصت جامعتها و ما عندها زول في حياتها ، بابا قال ليها خليها هي تتكلم ، قالت ليهو المتحدثه الرسميه ليها و هي عشان خجلانه منك ما قادره تقول ليك موافقه ، كدي عاين ليها كويس و براك حتعرف جوابها ، بابا عاين لي و ضحك ، وقف على حيلو و قال لي خلاص نديهو كلمتنا ، غيتو اليوم داك حسيت الفرحه ما سايعاني ، اخخخ بس من اللحظه الإتصل علي فيها عدنان و هو مبسوط من الخطوه دي قال لي الجمعه الجايه حـ اجيب اهلها و البعدها عقد طوالي ، قلت ليهو لا لا انا عايزا يكون في فترة خطوبه ، قال لي الخطوبه تضيع للزمن ساي و انا تعبت من الشحتفه دي عايز متين نتلمى في بيت واحد! ....كلامو خجلني شديد بس ما غيرت رأيي و كنت مُصره على الخطوبه دي ، هو زعل مني و ما اتكلم معاي لمدة 3 أيام بس بعدها رجع و قال انو موافق بشرط انو الفتره ما تكون طويله ، المهم اتفقنا سوا و قعدنا نخطط لـ مستقبلنا مع بعض ، ديك كانت اطول ليله و اجمل ليله في حياتي ، فعلاً يوم الجمعه لمن جا عدنان جاب أمو و خالاتو و خيلانو و أم سامي ذاتها جات معاهم ، كنت قايلاها حـ تتفاجأ لمن تشوفني بس طلعت عارفه و سامي هو الكلمها حالياً هو مسافر بس متواصل معاي و مع عدنان ، المهم قعدوا معانا و اتعرفنا عليهم و عرفونا بنفسهم و كلمت ماما انو دي أم سامي فـ طوالي قامت و سلمت عليها للمره التانيه و سألتها عن سامي و أحوالو ، طبعاً ماما و مزن شافوا سامي قبل كدا دايماً كنت بحكي ليهم عنو و عن ناس سماهر ، أم سامي فجأه كدا قالت ليهم بالمناسبه البت دي انا كنت عايزاها لـ سامي ولد لكن القسمه غلابه ، في اللحظه دي عدنان طوالي عاين لي ، شكلو غار من الكلام! ! أمي قالت ليها فعلاً القسمه غلابه ، المهم لمن جا وقت العشا ، الرجال قعدوا براهم و نحنا برانا ، ماما مشت تجهز الأكل و مزن مشت وراها بقيت قاعده من النسوان براي و متوتره شديد ، أم عدنان ضحكت و قالت لي ما تخافي يا بتي عجبتيني والله ، حلاة الدنيا عليك و بالمناسبه عدنان قال لي انك اتبرعتي لي بالدم و اخواتي قالوا لي انك جيتيني في المستشفى بس لقيتيني نايمه ، ربنا يرضى عليك يا بتي و يديك العافيه ، قلت ليها الله يعافيك يا خالتو ، قالت لي تاني قولي لي يا أمي ، وحده من أخواتها قالت ليها فيها شبه من بتك المرحومه ، قالت ليها اي والله و عيونها إتملت دموع ، المهم ناس ماما جوا و جابوا معاهم العشا و بدينا ناكل ، طبعاً سماهر ما كلفت نفسها تنزل و تسلم على الضيوف ، مازن دا رغم إنو لسه زعلان بس جا و قعد مع الرجال ، انا عارفه انو مهما يحصل بيني و بين أخوي مستحيل يخليني براي في يوم زي دا ، المهم بعد ما انتهينا من الموالات دي و جينا قعدنا سوا خال عدنان قال والله نحنا ناس عقد و اللف و الدوران دا ما عندنا لكن الولد قال عايز فترة خطوبه و دا بطلب من بتكم ، بابا قال ليهو والله نحنا ذاتنا ما ناس لف و دوران لكن بما إنهم متفقين على الحاجه دي فنحنا ما عندنا مانع ، المهم قالوا الخطوبه بعد أسبوع و حـ تستمر لمدة شهر بعدها اذا ما اتفقنا فـ خلاص و اذا اتفقنا فـ العرس بعدها طوالي بشهر ، في نفسي قلت ليهم استحاله ما نتفق ، انا و عدنان خلاص قربنا نكون مع بعض و فترة الخطوبه دي انا بحبها شديد لأني بحس انو فيها اهتمام مضاعف يعني كأنو كل طرف بسعى عشان يثبت للطرف التاني انو مناسب ليهو ، فـ أنا ما عايزا أفوت الفتره الحلوه دي ، المهم بعد ما مشوا مننا ، زي الساعه 11 كدا عدنان اتصل علي ، اول ما فتحت الخط قال لي مرتي الحلوه! قلت ليهو متين هو؟ الخواتم ما لبسناها ، قال لي ما كلو بسببك انتِ لو ما عذبتيني ما بترتاحي ، ضحكت و قلت ليهو بس انا بحب فترة الخطوبه دي قال لي و انا بحبك انتِ و لو علي الليله كنت بعقد عليك و اخطفك من الناس دي كلها و نعيش في مكان بعيد فيهو أنا و إنتِ بس.....كالعاده بلعت لساني ، قال لي بالمناسبه قبيل كنتِ طالعه حلوهـ شديد و الفستان عليك كان تحفهـ لدرجة اني ما قدرت اشيل عيوني عنك ....سكته ساي ، حال لي نحنا اتبادلنا الأدوار ولا شنو؟انا كنت انسان هادي و معظم الوقت ساكت و انتِ كنتِ عكسي و لسانك مستحيل يقعد دقيقه وحده جوه خشمك! ولا فالحه ترغي في المواضيع كلها إلا موضوعنا دا؟ قلت ليهو لا ما كدا ، قال لي اها كيف؟ قلت ليهو يخ ما عارفه ، قال لي طيب إنتِ بتحبيني ولا لا؟ ما حصل سمعت الكلمه دي منك! لاحظي اني ختيت خذلاني و عدم ثقتي في البنات على جنب و وثقت فيك و بكل بساطه إعترفت ليك و إنتِ لحد اللحظه دي ما......قاطعتو و قلت ليهو عدنان انا بحبك شااااديد و قفلت الخط! قلبي عمل شححح و بقى شغال زي الدلوكه ، رجع اتصل علي ما رديت إلا في المكالمه التانيه ، ضحك و قال لي مالك جبانه كدا؟ انا لمن اعترفت ليك جريت منك ولا غطيت وشي! ؟المهم اتكلمنا كدا لمن قلنا بس ، بعد 3 أيام من الكلام دا كلمت بابا اني نازله اشتغل في الشركه قال لي طوالي اصلاً من زمان بحنس فيك ، المهم تاني يوم طوالي نزلت شغل في الشركه و سماهر دي خالص ما كنت بتكلم معاها لا في البيت لا في الشركه طبعاً نور جاتني في اول يوم قالت عايزا تسلم و كدا قالت لي ما بتسألي عني و تقولي البت دي إختفت وين؟قلت ليها انتِ بتستهبلي يا نور؟ يعني ناسيه الحاصل شنو بيناتنا؟ قالت لي ما ناسيه حاجه بس بيني و بينك ماف حساسيات و انا ما عندي عداوه معاك رغم انو انتِ و اخوك ما صدقتوني لمن حذرتكم من سماهر و طلعتوني كذابه ، المهم قولي لي هسي علاقتها معاكم كيف؟ما رديت عليها شلت ملفاتي و مشيت منها ، طبعاً سماهر كانت واقفه و بتعاين لينا ، مشيت لـ مازن في مكتبو عشان أديهو الملفات دي ، مديتها ليهو و قعدت ، طوالي سماهر جات داخله و هي زعلانه ، مازن قال ليها خير في شنو؟قالت ليهو بزعل انت بس اسكت مني ما عايزا اتكلم مع زول انا غيتو بتدلع فيهو جنس دلع ، ما اشتغل بيها تاني بقى يشوف في الملفات ، بعد ما خلصهم قال لي خلي أبوي يشوفهم ، طبعاً بتكلم معاي من دون ما يعاين لي ، كأنو ما بعرفني ، شلت الملفات و مشيت بيهم لـ بابا ، اديتهم ليهو و رجعت مكتبي ، مزن اتصلت علي و لمن رديت عليها قالت لي يا بت نحنا اتفقنا على شنو؟قلت ليها شكلي حـ ارجع متأخره خليهو لـ بكرا ، قالت لي اي اقعدي أجلي في الموضوع كدا لحد ما تلقي نفسك في يوم الخطوبه! يا بت الخطوبه دي حقتي انا ولا حقتك إنتِ؟ قلت ليها خلاص اختاري لي الفستان إنتِ ، قالت لي رايك شنو ألبس الخاتم بدلك؟ قلت ليها هييي هييي ما جاده انتِ ولا شنو! ضحكت و قالت لي كلبه المهم بكرا غصباً عنك تسيبي الشغل و تمشي تختاري فستانك و الإكسسوارات ، قلت ليها طيب ، بعد ما قفلت منها إتصلت على عدنان بس ما رد علي ، من قبيل بتصل عليهو بس ما برد ، تاني اتصلت عليهو و المره دي عديل فصل الخط في وشي ، مع اني متأكده انو ما فصل الخط ساي بس قلت حـ انكدها عليهو و اعمل نفسي زعلت ، المهم لمن رجعت البيت هو اتصل علي ما رديت عليهو إلا بعد مسافه ، قال لي يا مها كيفك؟ قلت ليهو تمام ، قال لي دا شنو دا؟ زعلانه ولا شنو؟ قلت ليهو في حاجه بتزعل؟ قال لي اي في ، قبيل كنت في اجتماع مهم و ما قدرت ارد عليك فـ آسف شديد ، سكته ما رديت و في الحقيقه انا ما زعلانه بس عايزا اشوفو حـ يعمل شنو قال لي بالجد انا آسف والله ما قصدي افصل الخط و و و المهم بقى يشيل و يعتذر مني و انا بضحك بصوت واطي ، في الآخر ضحكت بصوت عالي و قلت ليهو أساساً انا ما زعلانه بس كنت عايزا اشوفك حتعمل شنو ، قال لي لا ياخ يعني من قبيل بصرف عربي ساي و كنت شايل هم لزعلك! قلت ليهو معليش معليش ، قال لي المره دي أنا الحـ أزعل ، قلت ليهو آسفه شديد ، قال لي اعتذارك مقبول لأني ما بقدر ازعل منك ذاتو المهم اتكلمت معاهو و وريتو. انو انا و مزن حنمشي بكرا لـ مكان فساتين كدا في بحري قال لي ليه ماشين بعيد كدا؟ قلت ليهو لأنو بتاعة المحل صحبة مزن عشان كدا ، قال لي طيب تمام ، المهم في اليوم البعدو أنا و مزن من الصباح مشينا بحري ، طبعاً المحل قولة رهيب عليهو شويه ، كان فيهو فساتين بمختلف الألوان و التشكيلات و لو عندك قصه معينه للفستان العايزاهو بفصلوها ليك ، اشترينا منها كميه من الحاجات ، بس ما رضت تشيل قروش فستاني حق الخطوبه قالت لي اعتبريهو هديه مني المهم زي الساعه 2 كدا عدنان إتصل علي قال لي رجعتو البيت ولا لسه؟ قلت ليهو لسه قال لي خلاص وصفي لي مكانكم و حـ أجي عليكم ، قلت ليهو طيب ، فعلاً وصفت ليهو المكان و قلت لـ مزن عدنان جاي علينا ، قالت لصحبتها دا الشوق الجابو ، صحبتها ضحكت و قالت ليها آي آي واضح ، متشوقه اشوف عدنان دا ، مزن قالت ليها يعني انا ما وريتك صورو؟ قالت ليها بقيتي خسيسه و ما بتشاركيني الحاجات الحلوه قلت ليهم هييي هييي احترموا نفسكم ، مزن قالت ليها خلينا نسكت عشان ما تحذف صورو من تلفوني ، صحبتها قالت ليها لا لا عايزا اشوف صورتو ، مزن قالت ليها مع انو في الصور و الحقيقه حلو إلا انو احسن تشوفيهو في الحقيقه ، ثري دي من كل الجوانب انتِ بس أصبري ، لمن حمرت ليهم الإتنين سكتوا و بقينا منتظرين عدنان....يتبع....