مروا يومين و عدنان لا اتصل لا رسل لي تاني ، قلبي كان ماكلني بس ما قدرت اتصل عليهو لكن لمن خلاص فاض بي و وصلنا لليوم الرابع مسكت تلفوني و كنت حـ اتصل عليهو بس فحأه كدا سامي إتصل علي! ! استغربت شديد بس رديت عليهو! ! اول ما فتحت الخط من دون مقدمات قال لي لازم اشوفك اليوم الضهر في شارع النيل في نفس المكان الكنا بنقعد فيهو ما انتظر مني رد طوالي قفل الخط! !قلت معناها عرف بـ البيني و بين عدنان و هسي عايز يواجهني عشان يلومني ، من مكاني داك طوالي جريت لـ غرفة مزن ، اول ما دخلت ليها قلت ليها ألحقيني يا مزن! قالت لي بخلعه خير في شنو؟ ؟؟قلت ليها سامي هسي اتصل علي و قال لازم يشوفني اليوم ، قالت لي اها! قلت ليها اها شنو! اكيد عايز يلومني و يتحسر على الضاقو بسببنا أنا و عدنان ، قالت لي الموضوع ما خطير زي ما هو حـ يلومك و يدافع عن مشاعرو انتِ كمان لوميهو على أنانيتو و دافعي عن مشاعرك لـ عدنان ، قلت ليها ما بقدر يا مزن ، فكرة اني اقيف قدامو و اخت عيني في عيوني و اجاوبو دي براها موتراني ، قالت لي يا زوله الموضوع ما خطير ، من حقك ترفضي أي حاجه إنتِ ما عايزاها! ...المهم مشيت جهزت نفسي ، لبست اسيرتي اسود و قميص بنفسجي غامض شكيتو في الإسكيرت و طرحه و جزمه و شنطه سوداء التقول ماشه عزا ، طبعاً بابا و ماما ما كانوا موجودين عشان كدا مشيت لـ مازن في غرفتو عشان استأذن منو بس الغرفه كانت فاضيه ، فتشتو في البيت ما لقيتو قلت ما مشكله مزن حـ تكلمو لو سأل عني ، لمن جيت طالعه كدا حسيت نفسي مقلقه و متوتره شديد ، طوالي مشيت المطبخ عشان أشرب مويه ، اول ما جيت داخله كدا شفت سماهر واقفه و ماسكه بطنها و خاته يدها على خشمها و التعب واضح عليها! مشيت ليها و قلت ليها إنتِ كويسه؟ هزت لي راسها بمعنى لا ، قلت ليها حاسه بشنو و مازن وين عشان لو ماف اتصل ليك عليهو! قالت لي لا ما تتصلي عليهو حاسه نفسي حـ استفرغ و فعلاً بقت تستفرغ فـ طوالي جرت غرفتها و دخلت الحمام و انا طوالي جريت لـ مزن في غرفتها و كلمتها ، لمن مشينا ليها في غرفتها لقيناها طالعه من الحمام ، مزن قالت ليها خير يا سماهر مالك؟ قالت لينا بطني طامه بس ، مزن قالت ليها متأكده؟ قالت ليها اي ماف حاجه ، قلت ليها لو ما حاسه نفسك كويسه خلينا نوديك المستشفى أو نتصل على مازن ، قالت لي قلت ليك ماف حاجه!لمن قالت كدا مزن طوالي عاينت لي و قالت ليها على فكره هي سألتك لأنها طالعه و انا ذاتي طالعه و حـ تضطري تقعدي براك بس بما انك قلت كويسه فـ خلاص معناها كويسه ، مزن طلعت و انا طوالي طلعت وراها ، قالت لي دا شنو دا المتخلفه دي! ذاتك ما كان تسأليها اكتر من مره! قلت ليها ما مشكله المهم انا حـ أمشي ، قالت لي طيب مع السلامه ، طلعت من البيت و انا مقلقه ، كنت مفكره اتصل على عدنان و اكلمو بس اتراجعت و قلت حـ يقول لي انتِ ما عارفه نفسك عايزا شنو عشان كدا ماشه تقابلي سامي و و و بس لمن قربت من الشارع النيل غيرت رأيي و اتصلت على عدنان بس ما رد علي ، المهم وصلت شارع النيل و مشيت قعدت في مكانا الزمان داك ، اول ما قعدت كدا اشوف ليك عدنان جاي علي! ! استغربت و قلت عدنان الجابو شنو كمان؟ معقوله دي حركه منو عشان يشوفني؟ لكن الإتصل علي سامي ما عدنان! ....لمن وصلني قلع نظارتو و بقى يعاين لي بإستغراب! قال لي الحاصل شنو؟قلت ليهو ما عارفه! سامي إتصل علي و قال لي لازم اشوفك هنا! قال لي انا كمان اتصل علي و قال لازم نتقابل هنا! !.....قلت بخلعه خلاص معناها عرف البينا و جايبنا الإتنين عشان يعاتبني وااااي انا ما قادره أواجهو ، قعد و قال لي و هو مبتسم: البينا؟ ؟؟لفيت وشي منو طوالي ، قال لي القعده دي مفروض نقعدها قبل فتره عشان نتفاهم و نعرف نحنا عايزين شنو مع انو انا أموري واضحه الكلام إنتِ للحظه دي ما قادر افهم إنتِ عايزا شنو و خايفه من شنو؟قلت ليهو شفت طريقتك دي هي المخوفاني! ! يعني عدنان المغرور داك و الما بتكلم كتير و الما ليهو في الحب معقوله بالبساطه دي يجي يعترف لي و يبقى عادي يتكلم معاي عن مشاعرو من دون ما يتردد! ! قال لي منو القال ليك بالبساطه دي؟ الموضوع اخد معاي ايام و اسابيع و ليالي و صراع نفسي و خوف من الخذلان للمره التانيه، مفروض انا الأكون خايف من الحتة دي لأني اتخذلت قبل كدا ، عارفه يعني شنو خذلان!؟البت دي انا حبيتها بكل جوارحي و أديتها كل طاقتي و لسه كنت مستعد أعمل المستحيل قصاد سعادتها ، عشانها انا قطعت علاقتي بكل البنات الكنت بعرفهم حتى بنات دفعتي إحتراماً ليها و لـ البينا ، انا البت دي لو كان قالت لي اقع النار والله كنت حـ اقع فيها من دون ما اتردد ، حبيتها لدرجة إني ما بقبل فيها أي منطق و ما برضى اسمع كلمه ما كويسه في حقها ، بس هي دا كلو ما قدرتو ولا راعت لمشاعري و كمية الحب الأديتو ليها ، رمتو وراها و مشت عرست كأنو ما كان في حمار بحبها و جاري وراها و......سكت لمن سامي جا ، طبعاً لمن شفت سامي قلبي قبضني و طوالي عاينت لـ عدنان ، جا سلم علينا بـ بشاشه كدا كأنو ما كان في حساسيات بيناتنا! قعد و قال لينا اخباركم شنو يا شباب! ؟انا سكته لكن عدنان رد عليهو و قال ليهو عال العال إنت اخبارك شنو؟ قال ليهو تمام الحمدلله .....الغريبه انو عدنان كان بتكلم معاهو عادي! ! بقيت أعاين لـ عدنان و بتكلم سامي و انا مستغربه فيهم الإتنين ...شويه كدا سامي عاين لي و ضحك ، قال ليك مالك مخلوعه كدا؟ عدنان قال ليهو يعني ما عارفها مالا؟اخد نفس و قال لي عشان ما تنخلعي ساي و تتوتري ، انا جايب لـخير إن شاء الله! عاينت لـ عدنان بنفس نظرات الإستغراب! قال لي ما تعايني لي أنا ركزي مع كلام سامي ![]()
للحظات قلت معناها هم الإتنين اتفقوا مع بعض! يعني عدنان بفسر طريقة كلامي معاهو و اختصاري ليهو بإنو انا بحب سامي فـ مشى كلم سامي و قال ليهو حـ ارجعها ليك و اخليكم تتفاهموا! و هسي عدنان جاي كـ وسيط أو حلقة وصل بيني و بين سامي! ! عيوني طوالي إتملت دموع ....سامي قال لي بسم الله مالك هسي؟لمن وقفت على حيلي دموعي خلاص جرت لمن عدنان استغرب فيني! وقف على حيلو و قال لي مها مالك؟عاينت ليهو و لـ سامي و قلت ليهم عارفه العملتوهو! ! عارفاكم اتفقتوا الإتنين و قررتوا انو انا و سامي نكون مع بعض من دون ما ترجعوا لي أو تسألوني و.....فجأه كدا هم الإتنين فكوا الضحكه ، عدنان قال ليهو مش قلت ليك البت دي شافعه! عليك الله قول ليها سرعه قبل ما تألف ليها سيناريو تاني ، سامي قال لي أقعدي يا مها ، قعدت و انا ما فاهمه شي و عيوني لسه مليانه دموع و عدنان داك يضحك ساي و للأمانه ضحكتو تنسيك الدنيا و ما فيها ، اول مره أشوفو بضحك !....سامي قال لي نختصر يا مها من دون مقدمات انا و إنتِ عارفين الحصل بيناتنا شنو و السبب كان شنو و عدنان ذاتو عارف ، انا موقفي كان أناني شديد ما راعيت لمصلحتك و رغبتك لمن قفلت منك و غيرت معاملتي معاك عشان احسسك بالذنب ، اقول ليك حاجه؟انا بالجد زعلت شديد و وصلت الحد لمن عرفت إنو عدنان بحبك ، شميتكم انتوا الإتنين شديد و قطعت علاقتي معاكم ، تصرفي كان طفولي و حركة شينه ما حركة رجال والله لدرجة انو عدنان بقى احسن مني و وعدني انو ما يتكلم معاك تاني عشان! بس دي أنانيه مني يعني عشان عارف ما بتقبلي بي اخليك بالغصب ما تقبلي بـ ولد عمي! ! تفكيري كان غبي و أناني لدرجة ، لمن عدنان جاني قبل كم يوم كدا و قال لي انا ما قدرت امنع نفسي و أخلفت بالوعد الوعدتك ليهو و اتكلمت معاها ، انا اتفاجأت! ..عارفه ليه؟ لكن ما اتوقعتو ينفذ البقولو ، اتفتكرتو كلام خشم ساي و ما صدقتو! في الوقت الهو قطع علاقتو بيك و ما كان متواصل معاك انا كنت متخيلكم الإتنين مع بعض و متواصلين! القوي البيني و بين عدنان خلاهو يوعدني و القوي شديد البينك و البين عدنان خلاهو يخلف وعدو بعد فتره مع الوعد بس انا ما بلومو لأنو الحاجه دي ما بيدو و ما بقدر يتحكم فيها و كونو جا لحد عندي و صارحني انا مُقدر ليهو الحاجه دي بالجد خلاني أخجل من نفسي بس للأمانه انا ما جيت هنا عشان عدنان ، انا جاي هنا عشانك ، رغم معرفتي بيك و علمي بطيبتك و أصلك الطيب إلا اني ما إتصرفت معاك تصرف صح ، عدنان دا لمن جاني قال لي والله الحاصل كدا و كدا و الزوله دي شايفه رافضه عشان موضوعك مأزمها و محسسها بالذنب و حكى لي بالحصل معاك الفتره المضت ، أولاً أنا آسف شديد يا مها لأني ختيتك في الموقف دا و خليتك تحسي بتأنيب الضمير و زي ما إنتِ راعيتي مشاعري و فكرتي في احساسي و كنتِ حـ تتنازلي عن رغبتك عشان ما أحس بالوجع انا كمان ما حـ ابخل عليك بالسعاده دي ، موقفك دا بالذات عظيم شديد بالنسبه لي ، انتِ طلعتي أحسن مني و انا للأسف كنت ساعي احسسك بتأنيب الضمير عشان تراضيني و توافقي علي ، فـ هسي انا بحررك من كل تأنيب الضمير و عايز اقول ليك إني راضي بالقسمه دي ، سعادتك بالنسبه لي هي الأهم....هو بتكلم و انا كنت ببكي و ما قادره أسكت نفسي ، في الآخر قال لي ولا تبكي لأنو ماف شي ببكي ، انتِ زوله بت أصول و عزيزه علي و مكانتك لسه في قلبي ، مواقفي معاك و سنواتنا الجميله سوا موقف شنو الزي دا البمحيها يا مها؟ نخسر بعض عشان موضوع سخيف زي دا؟ أكيد لا ، محل ما تلقي سعادتك أمشي ليها و ما تترددي سواء كانت مع عدنان أو مع غيرو و البيني و بينك حيفضل عامر......ما قدرت ارفع راسي و اعاين ليهو بس من صوتو عرفتو حـ يبكي ، لمن خلاص الكلام غلبو ، وقف على حيلو قال لـ عدنان و انت يا أبو الشباب ما أوصيك عليها ، الزوله دي زي أختي لو يوم واحد زعلتها طوالي حـ اخطفها منك ، عدنان وقف على حيلو و ضماهو عليهو ، طبعاً سامي خلاص دموعو نزلت ، مسحهم بسرعه و زح من عدنان و قال ليهو انا جادي يا زول ![]()
إتلفت علي و قال لي ايييك إنتِ لسه بتبكي؟ ياااازوله لو ما عايزا عدنان دا هسي قولي لي بدل البكى دا كلو......حرفياً ما كنت قادره اتكلم ، هو اتكلم شويه كدا مع عدنان و قال حيمشي بعد دا عشان حـ يسافر ، لمن جا ماشي قال لي لو عندي غلاوه عندك بطلي بك لأنو والله راضي و ما جيت عشان أجاملك و زي ما قلت ليك البينا عامره و ما ضروري كل انفصال تكون نهايتو كراهيه ، لو كانت وحده غيرك ما كنت حـ اسامحها بس روحك السمحه و مواقفك الكتيره معاي اعظم من الخلاف دا بعد ما مشى انا لسه كنت ببكي ، عدنان كان ساكت ساي و بعاين حوليهو ، بعد مسافه مسحت دموعي و قلت ليهو حـ أمشي البيت ، قال لي دا الكان مفروض يحصل يا مها ، سامي بحبك بس إنتِ ما بتحبيهو لو كان في احتمال و لو بنسبة 1% بقول انك حـ تحبيهو ما كنت خطيت الخطوه دي و خليتكم لبعض ، لو ما عملت الخطوه دي كنا التلاته حنكون معلقين كدا لا قادرين نرجع لا قادرين نواصل فـ دي أحسن خطوه إنعملت ، قلت ليهو طيب بس هسي انا ماشه البيت ، قال لي تمام تعالي أوصلك ، مشيت معاهو و انا ساكته ساي و هو الطريق كلو كان بعاين لي و بلقاني لسه زعلانه ، لمن وصلنا اخد نفس عميق و قال لي قبل ما تنزلي عايز اقول ليك لو حاسه اني ما مناسب ليك أو انك ما عندك إستعداد تكوني معاي و ما لاقيه نفسك في العلاقه دي ما تترددي كلميني بس و حـ اعمل زي ما عمل سامي ، كلامو زعلني زياده ، قلت ليهو دا معناهو انا ما متمسك فيني يا عدنان و دا المخوفني ، قال لي ما كدا يا مها انا ما .. نزلت و قفلت ليهو باب العربيه بقوه و مشيت دخلت البيت ، لقيتو فاضي ، دخلت غرفتي و كلمت البكى هناك ، مزن اتصلت علي و سألتني عن الحصل ، قلت ليها لمن ترجعي بحكي ليك ، قالت لي انا بعيده و ممكن اتأخر قلت ليها ياخي متى ما تجي بحكي ليك ، قالت لي خلاص تمام ، قفلت مني كدا ربع ساعه ما تمتها اتصلت علي أول ما فتحت الخط قالت لي اسمعيني انا ماشه على المستشفى ماما اتصلت علي هسي و قالت سماهر في المستشفى ، قمت من السرير مخلوعه و قلت ليها مالا متين الكلام دا؟ قالت لي ما عارفه ماما اتصلت علي هسي و قالت هي ذاتا ياداب داخله على المستشفى ، اطلعي سرعه و تعالي في مستشفى () قلت ليها طيب طيب ، قفلت منها و خميت طرحتي و طوالي جريت على المواصلات ، بعد ما ركبت اتصلت على ماما و قلت ليها في شنو يا ماما سماهر مالا؟ قالت لي ما عارفه والله انا دي دخلتي هسي هي في غرفة العمليات و لسه نحنا ما فاهمين حاجه انتِ وين هسي؟ قلت ليها في الطريق بابا معاك؟ قالت لي لا لكن هسي اتصلت و كلمتو قال جاي ، المهم بعد ما قفلت منها قلت ربنا يستر ان شاء الله ما تحصل ليها حاجه ، طول الطريق كنت بدعي ليها لغاية ما وصلت المستشفى لقيت بابا دخل قدامي ، مزن كانت لسه ما جات لأنو مسافتها بعيده ، اول ما جيت داخله عيني وقعت على مازن ، عيونو كانوا حُمر و اعصابو تلفانه و ماما جنبو بتحاول تهدي فيهو ، خفت شديد والله لمن وصلتهم و سألتهم ماما قالت لي انو سماهر أجهضت 
ياخي زعلت زعل و بكيت جنس بكى في الدنيا دي ، حضنت مازن و بقيت ببكي فيهو لحدي ما مزن جان هي ذاتا بقت تبكي لمن عرفت ، المهم لحدي المسا كدا رجعناها البيت ، كانت ساكته ساي و ما رضت تتكلم مع زول حتى لمن كنا في المستشفى غير مازن قالت ما عايزا تشوف زول! ....مع ذلك كلنا كنا مقلقين عليها و دا داخل و دا طالع ليها و اليوم كلو واقفين في خدمتها و بنجيب ليها الحاجه قبل ما تطلبها ، بعد يومين كنت في غرفتي بتكلم مع عدنان بعد ما اتصل علي و إعتذر مني و كدا ، ما قدرت ازعل منو فتره طويله فـ طوالي سامحتو و بقيت اتكلم معاهو عادي ، فجأه كدا سمعت صوت مازن و هو بكل الضيق الفي الدنيا بنادي علينا أنا و مزن ، قلت لـ عدنان برجع ليك بعدين و طوالي قفلت الخط و بإستعجال نزلت تحت و قلت ليهو مزوووني ياخ في شنو ليه بتكورك كدا؟ ؟ما رد علي بس نظراتو خوفتني ، بقى ينادي في مزن و يقول الزفته دي مشت وين! طبعاً كنت مستغربه من أسلوبو دا! فجأه مزن جات نازله و وراها ماما ، قالت ليهو في شنو ياخ الزول ما ينوم في البيت دا ، قال لي بنبره عاليه بلا نوم معاك بلا زفت ، نايمه ليها شنو بعد ما أجهضتو الولد و إرتحتوا! ماما مشت عليهو و قالت ليهو مازن انت جنيت ولا شنو؟قال ليها اي جنيت و الإتنين ديل هم السبب ، مزن قالت ليهو دا شنو دا البتقول فيهو دا! شارب شنو إنت! قلت ليهو مازن كدي قول بسم. ...قاطعني و قال لي بضيق انتِ بالذات خليك ساكته دا كلو بسببك و بسبب غيرتك و كراهيتك لـ سماهر ، ماما قالت لي يا ولد ما تجنني مالك انت؟قال ليها اسألي بناتك! اسأليهم ليه مشوا من البيت و خلوا سماهر براها و هم عارفين إنها تعبانه! على الأقل لو ما كانوا عايزين يقعدوا معاها يتصلوا علي! مزن قالت ليهو و هي مالا مكسره؟ ليه ما اتصلت عليك ولا بس عايزا تطلعني غلطانين بأي طريقه و تقعد تتباكى ليك و.....ما خلاها تتم كلامها طوالي جا عليها و ضربها كف ! دي كانت أول مره مازن يرفع يدو و يضرب وحده فيني! ماما جات عليهو و قالت ليهو ما نصيح انت ولا شنو؟ تضرب أختك! تضربها يا مازن؟ قال ليها لو من زمان برفع يدي عليهم و بضربهم ما كان عملوا عمايلهم دي! ...طبعاً انا بالجد بقيت مصدومه فيهو ، مزن قالت ليهو لو عايز تضرب زول امشي لـ مرتك دي و اضربها و....مسكتها من يدها و مشيت بيها لأني عارفه لسانها طويل و مازن حالتو ما عجباني فـ ما معروف يعمل ليها شنو، اصلاً من مرتو أجهضت نفسيتو اتغيرت ، لمن وصلنا غرفتي مزن اتفكت مني و قالت لي الحيوانه دي اقسم بالله ما أخليها، انا أنضرب بـ سببها؟ تصبر لي بس ، بقت ماشه و جايه في غرفتي و انا بعاين لـ عصبيتها المفرطه دي ، قالت لي دا كلو عشان قبضتها يوم بتتكلم مع واحد بتلفون مع اني ما عارفه دي منو و علاقتها بيهو شنو لمن لبشتها و توترها حسسني انها بتعمل في حاجه ئهه و عشان حستني خطر عليها عملت الخطوه دي و لصقت قصة اجهاضها فينا عشان تثبت لـ مازن اننا بنكرها و تاني أي كلام نقولوا ليهو عنها ما حـ يصدق ، طلعت ما هينه والله لكن تصبر لي و ذاتو ما بعيده تكون أجهضت براها ولا يمكن هي أساساً ما حامل ، وقفت على حيلي و قلت ليها مزن دا شنو البتقولي فيهو دا ، ما ردت علي و طوالي طلعت من غرفتي و خلت راسي يضرب أخماس في أسداس ، المسا لمن بابا جا مزن طوالي مشت كلمتو انو مازن ضربها و قال اننا سبب في إجهاض سماهر، بابا ناداهو و إتناقش معاهو بس حتى بعد كلام بابا مع مازن هو ما اتغير و نظرتو لي بقت مخوفاني شديد و مضايقاني حسيت انو غضب الدنيا دي كلها اندفق في عيون مازن ، حسيتو بقى يكرهني شديد و دا الواجعني رجعت غرفتي و اتصلت على عدنان لمن رد علي بكيت و حكيت ليهو الحصل كلو ، قال لي لو اخوك اتغير عليك إنتِ ما تتغيري منو هو فعلاً صعب عليهو يفقد ولدو قبل ما ينولد بس دا ما معناهو انو من دون ما يسمع من الطرفين ياخد موقف و على الأساس دا يظلمكم .....المهم اتكلمت معاهو مسافه و قفلت منو ، لمن نزلت تحت مزن لسه كانت مضايقه من الكف كانت بتقول لـ ماما و بابا اننا لمن سألنا سماهر اذا كويسه ولا لا قالت لينا انا كويسه و كلمناها اننا طالعين و قلنا ليها عديل خلينا نتصل ليك على مازن لكن هي رفضت ، بابا قال ليها خلاص الموضوع يتقفل و تاني ماف زول يفتح السيره دي ، ماما قالت ليها غيتو ما عارفه اقول شنو كدي النقوم اشوفها بقت كيف ، مزن قالت ليها تشوفي ليها شنو بعد العملتو خليها ان شاء الله تموت ذاتو ، طبعاً مع جملتها دي مازن جا نازل ، عاين ليها جوه عينها و طلع من البيت ، بابا قال ليها بنهره مزن أنا قلت ليك شنو؟قالت ليهم كويس اي خليكم واقفين معاها كدا لحد ما تخليكم كلكم تقلبوا ضد بعض و هدي البدايه كانت بـ مازن بموقف واحد خلتو يتغير علينا و لسه الجاي كتير ، قالت كدا و طوالي قامت مشت غرفتها و انا كلامها ما فارق بالي! يعني انا ما قادره افهم سماهر دي عايزا شنو تاني؟ عرس و عرست مازن و هدي عايشه مرتاحه ناقصها شنو تاني عشان تجوط البيت و تعمل المشاكل دي كلها؟من مكاني داك مشيت ليها في غرفتها ، لقيتها راقده و بتعاين في السقف و هي واصله الحد من الضيق ، دخلت و قلت ليها بقيتي كيف؟ قالت لي احسن ، جريت كرسي و قعدت جنبها و قلت ليها ليه قلتي لـ مازن انو انا و مزن سبب في أجهاضك؟ قالت لي انا ما قلت كدا ، قلت ليها قلتي شنو؟ قالت لي ما عايزا اتكلم ، قلت ليها لا غصب عنك تتكلمي عايزا تعملي فتن بيناتنا ليه! ناقصك شنو عشان تعملي الجوطه دي كلها! بتعب قعدت و قالت لي أطلعي برا ، قلت ليها ما طالعه إلا تجاوبيني ، اتعصبت شديد و بقت تبكي و تقول لي ما ناقصاك انا اطلعي من هنا اطلعي ياخ و بقت تشيل في المخدات و تجدعهم في الغرفه و تصرخ لحد ما ماما و بابا و مازن جوا داخلين ، مازن جا داخل أول واحد و لقاها بتصرخ و بتقول لي أطلعي برا ، مازن قال ليها بزهج في شنو ياخ! قالت ليهو طلعها لي برا خليها تبعد عني ما ناقصه وجع راس أنا ، عاينت لي و قالت لي هدا مازن قدامك اسأليهو لو انا قلت ليهو انو انتِ و مزن سبب في إجهاضي ، مسكت في مازن و بقت تبكي و تقول ليهو كلمهم عشان ما يلومني ساي ، مازن قال لي أطلعي برا ، قلت ليهو مازن انا ما...قال لي بنهره قلت ليك أطلعي برا!والله عيوني لمن إتملت دموع بسبب النهره دي ، مشيت غرفتي و بكيت قدرتي هناك يتبع.....
