أول ما وصلتو و فتحت الباب إتفاجأت لمن شفت رزان معاهو لا و كمان قاعده ليهو في تربيزة مكتبو و بتتظارف معاهو ، لمن شافتني ما نزلت و هو ما أبدا أي ردة فعل ، حسيت قلبي اتقطع حته حته و قلت كلام أرجوان بقى حقيقه 💔
عدنان كان بس بعاين لي لكن ما قال حاجه ، رزان قالت لي عايزا حاجه؟ ....طوالي اتحركت من مكاني و مشيت منهم و أنا بمسح في دموعي ، حسيت اني اتسرعت أو انو اصلاً حظي كدا وحده شقيه و ما مكتوب ليها راحة بال ، لمن مشيت على مكاتب الموظفين اريج و أرجوان كانوا واقفين جنب الباب بس ما دخلوا تقريباً أرجوان كانت بتحكي لـ أريج عن الحاصل بيني و بين عدنان لمن شافوني أرجوان قالت لي هااا مناديلك خلصت! .....مشيت عليها و أنا عيوني مليانه دموع و أول ما وصلتها و من دون ما أتردد إترميت في حضنها و قعدت أبكي ليها و قلت ليها فعلاً انا غبيه و بسببي هو ضاع مني و جات غيري شالتو ، اتخيلي اني لقيتهم سوا في المكتب و هو بتتظارف معاهو! ...قالت لي قصدك رزان؟ ...هزيت ليها براسي بس ، أريج خاته يدها على كتفي و بتهدي فيني و أنا ضامه أرجوان و هي شغاله لي اها نعمل ليك شنو أنا مش كلمتك؟ ...أريج قالت ليها خلاص يا أرجوان ما تزيديها عليها! ....أرجوان قالت ليها ياخ البت دي غبيه و جنها بكى زهجتني ياخ! ....لمن قالت كدا طوالي زحيت منها و مسحت دموعي و قلت ليها آسفه و كنت هـ ادخل المكتب بس هي جرتني من يدي و قالت لي ماشه وين؟ قلت ليها هـ اكمل باقي شغلي ، قالت لي بغيظ حييييا انا منك ياخ انتِ مالك هبله ولا ما عندك مخ؟
قلت ليها الإتنين ، قالت لأريج أمسكي مني البت دي بكفتها والله! ...فكيت يدي منها و كنت هدخل تاني جرتني و مشت بي بعيد كدا من المكتب و قالت لي متخلفه انتِ؟ بالبساطه دي بترضى بالهزيمه؟ ....أريج جات و قالت ليها يعني تعمل شنو يا أرجوان؟ قالت ليها تحارب و تجتهد عشان تحصل على الحاجه الهي عايزاها ما تخليك انسانه محبطه كدا و مخك مقفل! ...قلت ليها لمن زولك داك خلاك اجتهدتي عشان تحصلي عليهو؟
قالت لي عايني ما تقارني ، داك ما كان عندو لي حاجه و كان بستغبيني بس عدنان دا واضح إنو لسه بحبك بس انتِ غلبتيهو و استنذفتي طاقتو و هسي تعب و جا دورك إنتِ لو بالجد هو بهمك و عايزاهو ، أريج قالت ليها و رزان؟
قالت ليها مالا رزان؟ ....اريج سكتت و ما قالت حاجه و انا بس بقيت اسمع في كلام أرجوان ، قالت لي انتِ ما عندك مخ ولا ما بتعرفي تتصرفي و و و.....الخ ، قلت ليها المشكله انو أهلي ما برضو بعد الحصل ، قالت لي لو انتِ بالجد عايزاهو و متمسكه فيهو أهلك حـ يرضوا ، المهم هسي مفروض تفكري كيف تكسبي عدنان تاني و تحاولي تثقي فيهو و اهم شي انك ما في الكبيره و الصغيره تمشي تتزهجي فيهو و تنكدي ليهو حياتو.....المهم بعد كلام كتير هم رجعوا لشغلهم و انا مشيت الحمام و غسلت وشي هناك و بقيت أعاين لنفسي في المرآيه و اقول متين انا بقيت باهته كدا؟ ....ليه انفسن و أكتئب بسبب حاجه أنا بقدر أحصل عليها! ....غسلت وشي كويس و رتبت شكلي و طلعت من الحمام و طوالي مشيت لـ عدنان في مكتبو لقيت رزان لسه معاهو ، قلت ليها لو سمحتي ممكن تطلعي لأني حابه اتكلم معاهو في موضوع ضروري! ...طبعاً هي طوالي عاينت لـ عدنان و قبل ما تتحرك هو قال لي ما فاضي ليك أنا ، قلت ليهو ما حـ آخد من زمنك ، قال لي قلت ليك ما فاضي ، طبعاً زعلت بس ما يئست ، طلعت من مكتبو و انا لسه مصرهـ احاول تاني و تالت.....في نهاية الدوم خلصت سرعه سرعه و طلعت برا و وقفت جنب عربية عدنان ، انتظرتو مسافه بس ما جا طالع ، شويه كدا مستر هشام جا طالع مع بتو ، لمن شافني واقفه جنب عربية عدنان رفع لي حاجبو و ضحك ، جا سلم علي و قال لي منتظره عدنان ولا شنو؟
ابتسمت ليهو بخجل ، قال اهاااا ماشين كويس والله ، شلت منو لمى سلمت عليها و رجعتها ليهو ، قالت ليهو بابا ما نمشي البيت ، قال لي ما عايزا تمشي البيت؟ عايزا تمشي وين طيب؟ قالت ليهو: ""بث ما نمش البيت " ضحك و قال ليها طلباتك أوامر ، قلت ليهو سبحان الله بتك متعلقه فيك شديد لدرجة انها عادي تغيب عن أمها اسبوع من دون ما تبكي! ....قال لي اي متعوده علي ....يلا مع السلامه ، قلت ليهو الله يسلمك ...قلت في نفسي شكلو ما متفق مع روان و دا شي طبيعي لأنها بت دلوعه و ما بتحب تتعب نفسها و غير كدا هي ما بتقدر تتحمل أي مسؤوليه فما بالكم لو كانت المسؤوليه دي طفل! ...أكيد هتفشل بس كويس إنو مستر هشام قادر يكون ليها الأم و الأب و ما يقصر منها ، اثناء ما انا سرحانه كدا فجأه ركزت على صوت طقطقت أصابع! لمن انتبهت لقيتو دا عدنان ، إبتسمت ليهو بس ، قال لي لو سمحتي زحي لي من عربيتي! ....طبعاً انا واقفه ليهو جنب باب العربيه ، ربعت يديني و قلت ليهو ابييييت ، قال لي انا ما قاعد اتظارف معاك ، قلت ليهو و أنا كمان ، ضغط على حواجبو و قال لي مصدع أنا و ما ناقص وجع راس ، قلت ليهو مصدع من متين ؟ قال لي من اليوم العرفتك فيهو ، اتجاوزت كلامو و قلت ليهو طيب أخدت مسكن؟ ....قال لي عاين لي جوهـ عيوني و قال لي كنت هـ آخدو بس هسي خليتو و ما عايزو.....مع ذلك ابتسمت عشان فهمت إنو قاصدني ، ضحكت و قلت ليهو آي عارفه نفسي مسكن لآلامك بس انا كنت بتكلم عن مسكن الصداع ....بندول يعني! ...قال لي ما عايز أصرف عربي كتير معاك ...طلعت بندول من شنطتي و مديتو ليهو، أبى يشيلو مني ، قال لي ما عايز حاجه منك ، قلت ليهو عدنان بطل ياخ! ابلع الحبوب دي عشان الصداع يخف ...قال لي لو مشيتي من هنا صداعي هـ يخف ، قلت ليهو كذاب والله ...أمسك ياخ! مسكتو البندول و إتلفت يمين شمال و عاينت جوهـ عربيتو شفت كرستالة مويه ، قلت ليهو عندك مويه هنا ابلع بيها الحبوب ، قال لي زحي طيب ، طبعاً انا الغبيه طوالي زحيت ليهو من جنب عربيتو و أول ما عملت كدا جدع الحبوب و ركب عربيتو و قفل الباب و أول ما دورها كدا استوعبت الحصل و بحركه سريعه وقفت ليهو قصاد عربيتو ، نزل و جا قال لي بزهج عايزا تصلي لـ شنو إنتِ؟ متين تبطلي حركاتك الطفوليه دي؟ ...قلت ليهو دي ياها المصبراك علي و ما هـ أبطلها ، قال لي عاين انا ماشي من هنا و انتِ ذاتك امشي و ما تضيعي لي زمني ، قلت ليهو الزمن اتأخر و بخاف أمشي براي زي الزمن دا الشوارع بتكون مليانه أولاد و موقف العربات كلو شماسه ، قال لي إنتِ في زول قال ليك اتأخري للزمن دا؟ قلت ليهو دا كلو بسببك لأني كنت منتظراك ، قال لي و تنتظريني ليه؟ قلت ليهو عشان توصلني معاك ....استغرب فيني! قال لي شربتي شنو إنتِ اليوم؟
قلت ليهو ولا شي اصلاً انت و رزان قفلتو لي نفسي ، قال لي جادي معاك أنا شربتي أو اكلتي شنو؟ ....قلت ليهو انا ذاتي جادهـ ، اتنهد و رجع ركب عربيتو و انا لسه واقفه قدامو و متكله فيها ، لمن ضرب لي بوري مرتين طوالي جيت فتحت الباب و ركبت و انا مبتسمه و حاسه بالإنتصار ، قال لي ما تتعودي ، قلت ليهو بالعكس هـ اتعود لأنو لقدام ماف زول غيرك هـ يوصلني ، عاين لي بحيره و سكت ، طول الطريق كان ساكت و انا بس البرغي ، اتذكرت نفسي زمان و بداية معرفتي بيهو ، اليوم دا تحديداً انا اتنازلت و اتناسيت حاجه اسمها كرامه و إخترت راحة قلبي ، قلت ليهو بالمناسبه نحنا سكنا في بحري ، قال لي عارف ...ابتسمت و قلت ليهو عارف العنوان برضو ولا اقولو ليك؟
قال لي شنو المخليك تكوني واثقه اني هـ أوصلك لحد بيتكم؟ قلت ليهو واثقه شديد اصلاً انت مستحيل تخليني براي زي الوقت دا و ما هتكون مرتاح إلا لمن تتأكد اني وصلت البيت ، وصفت ليهو البيت و سكته و هو اصلاً ساكت ، عاينت ليهو مسافه بعدها قلت ليهو بالمناسبه جاي بيتنا متين؟
هنا حك فرامل و وقف العربيه و إتلفت علي و هو مخلوع! ...قال لي مها تحبي نمشي المستشفى قبل ما أوصلك بيتكم؟ ...قلت ليهو يعني هتوصلني لغاية البيت! ....قال لي لازم لأنو حالتك دي ما عاجباني ، قلت ليهو بس أنا كدا مرتاحه و ما عايزا أكابر أكتر ، قال لي شنو القلب موازينك فجأه؟ يعني قبيل كنتِ حاجه و هسي حاجه تانيه؟
قلت ليهو ما بنعرف قيمة الحاجات إلا لمن نقرب نخسرها ،.....دور عربيتو من دون ما يقول لي حاجه ...قلت ليهو هااا ما قلت لي حتجي البيت ولا لا؟
قال لي حمتك دي تقيله ، اخدي ليك يومين تلاته اجازه و فكري كويس عشان ما تتراجعي تاني و ترجعينا لنقطة الصفر ، قلت ليهو ما عايزا ولا ساعه عشان أفكر فيها! ...و بعدين منو القال ليك انك بفكر لمن الحاجه تتعلق بيك؟
ضحك ضحكه حلوهـ كدا و قال لي يا رب سكرتك دي ما تفك هسي ، تاني رجعنا نتكلم عادي و هو كل ما اقول ليهو حاجه يقول لي إنتِ ما طبيعيه ، لمن قربنا للبيت نزلني على مسافه منو ، فتحت باب العربيه و قلت ليهو تاني ما أشوفك مع الإسمها رزان دي و إلا هـ احرقكم انتوا الإتنين ....ضحك و قال لي طلباتك أوامر ، نزلت و قلت ليهو ما تنسى تاخد دوا للصداع ، قال ما بحتاج بعد دا خلاص آلامي اتسكنت ، قلت ليهو حلووو يلا بااااي ، مشيت البيت و انا حاسه بطمأنينه و راحه نفسيه ما عاديه و الإبتسامه ما فارقت وشي لحد ما دخلت غرفتي ....فجأه كدا ماما جاتني داخله بطريقه خلعتني! ...قفلت الباب و جات قالت لي دا منو الوصلك دا؟
صراحة خفت و ما عرفت اقول شنو و في نفس الوقت ما بقدر اكذب و أقول ليها ماف زول وصلني ، قلت ليها واحد معانا في الشركه و طريقنا واحد عشان كدا عرض علي انو يوصلني و ما قدرت أرفض ، قالت لي مازن بجي في الأوقات دي لو كان جا و شافك نازله من العربيه صدقيني ما هـ يرحمك و بيني و بينك الزول دا منو احسن تختيني في الصورهـ و تتكلمي؟ ....في حاجه كدا ولا كدا؟
قلت ليها حاجة شنو يا ماما! ...قالت لي بعد دا نحنا ما عايزين لعب و ما عايزنك تجيبي لينا زول ما جادي و تخليهو يلعب بيك زي ما عمل داك فـ دا لو قالها ليك عديل أو لمح ليك بالحاجه دي قولي ليها تعالني بالباب ، قلت ليها مع انو ماف حاجه بالشكل دا بس حاضر يا ماما ، نفسي قالت لي قولي ليها يا مها ، إنتِ ما متعودهـ على الكذب ...احسن تسمع مني انا و افهمها و اشرح ليها حالتي ....و أنا بفكر كدا ماما كانت ماشه على باب الغرفه بس فجأه كدا إتلفتت علي و قالت لي متأكدهـ انك ما عايزا تقولي لي حاجه؟
صراحة سكت لا عرفت اقول لا ، لا عرفت اقول آي ، رجعت تاني و جات قعدت جنبي ، قالت لي ايوه بتحصل مرات كتيره لمن مزن و مازن يكذبوا علي ما بقدر أكشفهم بس انتِ بكون واضح عليك و كلامك القبل شويه دا ما اقنعني و كنت حاسه انو في حاجه ....هااا كمان بتدسي من أمك؟ لو عايزاهو قولي لي عادي ما تخجلي مني انا امك في النهايه و مرادي اشوفك في بيتك مبسوطه و متهنيه ، نزلت راسي و قلت ليها لو كلمتك هتزعلي مني و كلكم هترفضوا ..ضحكت و قالت لي ليه بعاتي هو؟
قلت ليها لا ، شربكت أصابعي و بقيت ساكته ، قالت لي قولي عادي ما تخافي مني ...زحيت منها شويه و غمضت عيوني و قلت ليها الوصلني دا عدنان.....كنت مغمضه عيوني و ما عارفه ملامح وشها كانت كيف بس كنت مترقبه في أي لحظه اسمعها بتجوط فيني أو تضربني كف بس ما حصل ....فتحت عيوني ببطئ لقيت وشها خالي من أي تعبير ، مسكت يدينها و قلت ليها بس ماف حاجه يا ماما كل......قاطعتني و قالت لي بنبره حادهـ مخلياهو يوصلك لحد البيت و تقولي ماف حاجه! ....قلت ليها ماما خليني أشرح ليك ، فكت يديني و طلعت من غرفتي زهجانه و انا بالجد لمت نفسي شديد ، قعدت زي حكاية ساعه كدا في غرفتي بندب فيها حظي ، قلبي كان بعتصر من الألم ، مشيت اتوضيت و صليت المغرب لأنهم صلوهو قبل شويه كدا ، بعدها بقيت افتش على ماما و قلت لازم اعتذر مني ، لمن مشيت على الصالون شفتها قاعده مع بابا و كانت بتتكلم معاهو و واضح انها منزعجه ، قلت معناها الموضوع وصل بابا ، تاني هـ اعاين ليهو كيف في عيونو.....مشيت ليهم و أنا عيوني مليانه دموع ، قعدوا يعاينوا لي بس ما قالوا حاجه ، مشيت لـ بابا و قعدت على ركبي و قلت ليهو و أنا ببكي آسفه شديد يا بابا والله ما قصدي اعمل حاجه تزعلكم مني ...ماما قالت لي بزهج لقيتيهو وين؟ ....سكته ما اتكلمت ....قالت لي ردي علي لاقيتيهو وين؟ ....قلت ليها بتردد الشركه الشغاله فيها حقتو ....جاطت فيني شديد و شاكلتني قدرتها و قالت لي يخسي عليك يا ما عندك إعتبار لأخوك و كرامه لنفسك ما عندك ، من بكرا تخلي زفت الشغل دا ...عاينت لـ بابا و بقيت ابكي ليهو و اعتذر منو و قلت ليهو والله ما أعيدها تاني و اساساً انا كنت رافضه عشان ما أزعلكم مني ، ماما قالت لي رافضه شنو؟
لمن سكته هي غضبها زاد و قالت لي تاني ماف حاجه اسمها شغل ليك ، خيبتي ظني بيك ، لمن جاطت فيني شديد ما قدرت استحمل طوالي جريت غرفتي و قفلتها علي و انا قلبي دا بتقطع حته حته 💔 حسيت نفسي خذلت أهلي و انو من البدايه كنت اخلي الشركه اول ما عرفت إنو عدنان شغال فيها ، انا بسبب انانيتي و جرياني ورا قلبي زعلت أهلي و خذلتهم ....ساعتين ورا بعض و انا ببكي ، شويه كدا جاني صوت مازن و هو بقول لي أفتحي الباب يا عايز اتكلم معاك ، قلت ليهو ما قادره اتكلم مع زول أنا كل الحـ اقول ليكم اني ما هـ اعيد غلطتي دي تاني ، قال لي ما هـ تفتحي الباب لأنك عارفه نفسك غلطانه ...كويس حسابي معاك بعدين ....بعد ما قال لي كدا أنا خلاص الدنيا دي ضاقت بي ، زعلت شديد من نفسي ....
تاني يوم ما مشيت الشركه و اصلاً ما هـ أمشي تاني و ناس البيت ماف واحد فيهم اتكلم معاي و مازن ما كان موجود و سكوت بابا هو الواجعني ، زي العصر كدا إتصلت على مستر هشام و لمن رد علي كلمتو إني هـ اخلي الشغل ، قال لي ليه في شنو؟ قلت ليهو بس كدا.....بعد نص ساعه من مكالمتي معاهو عدنان إتصل علي ، ما كنت عايزا أرد بس قلت لازم أرد و افهمو الحصل أول ما رديت قال لي خليتي الشغل ليه؟
قلت ليهو ساي بس ...دا ما موضوعي العايزا اقولو ليك من اليوم دا ما تتصل علي تاني ولا ترسلي لي و احذف رقمي و أنا كمان هـ اعمل كدا ، بسببي اهلي زعلوا مني و انا ما بقدر على زعلهم ، آسفه شديد يا عدنان بس الظروف جبرتني ....سكت مسافه بعدها قفل الخط في وشي ، غصب عني حذفت رقمو ، قلبي كان واجعني وجع ما عادي ...في نفس اليوم دا مازن جا البيت و هو زهجان ، بابا اصلاً كان واقف ليهو جنب الباب فلمن جا سامعاهو كان بجوط معاهو ...مازن قال ليهو افهم يا ابوي انا الشغله دي من زمان خليتها ، أبوي قال ليهو ما تكذب هسي هيثم اتصل علي و كلمني ، مازن قال ليهو صحبك دا لفح الموضوع دا ساي ...صدقني يا أبوي عزام هو اللسه شغال في الحاجات دي و انا ما عرفت إلا قبل يومين و امبارح هو عزمني قلت امشي و اتكلم معاهو بالمرهـ و اقول ليهو يسيب درب المخـ ..درات دا ، ما تميت معاهو ربع ساعه الشرطه جات داهمت المكان و كل الناس الهناك رفعوها بـ ستات الشاي ، ودونا القسم و حققوا معانا و فعلاً الحتات ديك مشبـ..وها و عزام ذاتو هو البجيب الحاجات دي بس عشان عارف لو هو انكشف هـ يورطني معاهو قررت اساعدو و أطلعو من الورطه دي بشرط إنو يخلي الشغل دا زي ما أنا خليتو من زمان.......طبعاً لمن مازن قال كدا انا خلاص هبطت و قلبي كان هـ يقيف ...بابا عصب عليهو و قال ليهو و انت مالك و مالو ما تقول لي صحبي ولا زفت ...ماما قالت ليهو احسن يساعدو عشان ما يورطو معاهو ...و تاني يا مازن اوعك تباري لي الفارغه دي ...تعبتني معاك يا ولدي في الدنيا دي و الزمن كلو مشيلني همك ...قال ليها حاضر يا أمي اعفي لي و من اليوم ما تشيلي هم ...بخطوات مثقله مشيت عليهم! ..لمن قربت منهم قلت ليهو مازن كنت شغال في المخدرات؟
طبعاً كلهم اتخلعوا و إتلفتوا علي ، سكتوا و ما عرفوا يقولوا شنو ، دموعي جرت عشره عشره ، قلت ليهو أكيد انت ما أخوي ، انا بحلم صح؟ ...طيب سمعت غلط؟ ...سمعت غلط صح يا بابا؟ مازن ما كدا و عمرو ما بيعمل حاجات زي دي ، سكوتهم براهو كان جواب ، بكيت ليهم قدرتي و دخلت جوهـ خليتهم.....
يومين و انا مخاصماهم و مازن كل ما يحاول يتكلم معاي بصدوا ، يوم ماما جات و قالت لي ماف سبب يخليك تقاطعي اخوك بالطريقه دي ، اي هو غلط و صلح غلطو دا من زمان فـ سبب واحد يخليك تخاصمينا كلنا بطريقه دي ماف ، قلت ليها مازن دا لمن كان هـ يتسجن انا قربت اموت لأني عارفاهو ما بيأذي زول و مستحيل يمشي في طريق غلط ، عشانو كنت مستعده اتنازل عن أي حاجه و في النهايه اكتشف انو ببيع مخ....درات و بدمر بيها أولاد الناس ؟ دي حاجه عاديه يا ماما!
بابا جا داخل و قال لي ما عاديه و عمرها ما هتكون عاديه لكن دا كلو كان زمان و هسي مازن دا زول تاني ، قلت ليهو قول لي عمل شنو تاني! مجرم برضو؟ بكتل ناس و ببيع مخ...درات و تاني شنو؟ يلا يلا قولوا!
طبعاً مازن كان واقف جنب باب الغرفه و عيونو مليانه دموع و ما قادر يجي تاني و يتكلم معاي ، عاينت ليهو و قلت لـ ماما و بابا أنا خايفه انو يطلع هو الكتل ام عدنان و انتوا طلعتوا براءه ....كتلها هو صح؟ يلا أصدموني ، ماما قالت لي مجنونه انتِ؟ ....بابا قال ليها روقي ، عاين لي و قال لي لا مازن ما كتلها صاحب مازن هو العمل كدا ، قلت ليهو دقيقه دقيقه! ....لمن صحبو ضرب ام عدنان هو ذاتو كان معاهو فـ ليه مازن ما دافع عن نفسو و قال انو صحبو هو الضربها....لأنو كان ما واعي ....انا كنت فاهمه انو ما واعي لأنو جاتو فتره كان بسكر فيها بسبب العملتو سماهر و في الحقيقه هو كان بتـ.*عاطى مخ**درات! عشان كدا ما عرف يدافع عن نفسو ! طيب ثواني انا في حاجات كتيره كانت رايحه عن بالي! مازن ما اتعاقب لأنو ما كت*ل ام عدنان بس ليه ما اتعاقب لأنو مت*عاطي مخ*درات و مروج*ها! ....يعني استحاله الحاجه دي تكون راحة عن الشرطه ، عاينت لـ بابا و قلت ليهو ئهه كيف اسأل سؤال زي دي ما أكيد انت طلعتو منها زي الشعره من العجينه لأنو كان عندك نفوذ و الله اعلم طلعتو من القصص دي كم مرهـ!
انا بالجد مصدومه فيكم و ما عارفه ألقاها من منو ولا منو ، ماما قالت لي الموضوع ما خطير و دا كلو حصل زمان و هسي نحنا همنا كلو انو مازن ما يتورط تاني لأنو المرهـ دي جد جد هو ما حصل باع مخ*درات أو روج ليها و صحبو عزام هو كان بتاجر بيها، ادعي بس إنو ما يدخل مازن معاهو ، عاينت لـ مازن و قلت ليها ما مهم ...تاني ما هـ ازعل نفسي على زول ، مازن زعل لمن قلت كدا فـ طوالي مشى.....
عدوا يومين تاني ما شفت فيهم مازن مع انو قلبي ماكلني عليهو و خايفه شديد انو يتورط تاني ...يوم بالصدفه شفتو جاي داخل ، ناديتو و مشيت عليهو ، كان منزل راسو و ساكت ، ضميت و قلت ليهو كويس إنت؟
قال لي صدقيني انا الشغله دي خليتها من زمان انتِ بس.....قاطعتو و قلت ليهو طمني عليك بس ....قال لي كويس ، قلت ليهو الحصل شنو مع عزام؟
قال لي قدرنا نطلعوا منها و ابوي كلم أبوهو و عزام حلف إنو تاني ما يرجع للشغل دا بعد ما أبوهو شاكلو و جاط فيهو ، قلت ليهو بالجد نفسي أعرف يا مازن كان ناقصك شنو عشان تمشي تتجار بالم**خدرات تحديداً و تدمر بيها شباب زي الورد ...يمكن عشان كدا ربنا انتقم منك و خلاك تفقد ولدك قبل ما ينخلق و بعدو طوالي سماهر و دا كلو حق الشباب الضيعتهم و دي كلها دعوات أماتهم ، دموعو نزلت مسحها و قال لي فعلاً دا الحصل ....أول ما اتحرك كدا قلت ليهو و بالمناسبه سماهر عرست عماد الكان معانا في الجامعه و اساساً هو من زمان كان عايزها و هسي مر على زواجهم سنه......زعلي من مازن خلاني احاول احسسو بالذنب و افهمو انو الحصل معاهو دا كلو بسبب العملو ، إتلفت علي و قال لي عارف
نظراتو كان فيها انكسار حسسني بالذنب ...إتراجعت و قلت ليهو آسفه يا مازن ما كان اجيب ليك سيرتها ....قال لي لا عادي و الزوله دي انا أساساً من يوم عرفت انها عرست شلتها من حساباتي ، قلت ليهو عارف من متين و ليه ما كلمتنا؟ قال لي من شهر ...اكلمكم اقول ليكم شنو و لـ شنو؟
قال كدا و مشى مني ، تاني يوم زي العصر كدا اتفاجأت لمن مستر هشام و أرجوان و أريج و حاتم جوني زياره في البيت! ...ماما و بابا ضيفوهم ، لمن جيت نازله و بعد ما سلمت عليهم مستر هشام قال لي موظفتنا الهاربه ....أريج قالت لي صحي مالك خليتي الشغل؟ فقدناك والله ، قلت ليها ما تفقدو عزيز ان شاء الله ، حاتم قال لي اي عارفين الشغل صاغط لكن ما لدرجة انك تخليهو 😂 أرجوان قالت لي ما كنتِ تقدمي استقالتك بالطريقه ديك كنتِ تجي الشركه و تكلمينا عشان نعمل ليك افخم حفلة وداع.......طبعاً اكتشفت انو أرجوان دي من النوع الما ببوح ليك بمشاعرو بطريقه مباشره و دايماً بتستخدم الطريقه العكس عشان توصل بيها شعورها ....طبعاً ناس بابا فهموها عشان كدا ضحكوا ، ماما قالت ليها هسي ما حصل حاجه و حفلتها اعملوها ليها هنا ....قالت ليها بالجد يا خالتو بتك دي هبله و منفسنه ساي! هسي أديني سبب واحد يخليك تخلي الشركه! ....ماما قالت ليها نحنا الطلبنا منها كدا! أريج قالت ليها ليه يا خالتو؟ قالت ليها ابوها و اخوها شغالين فماف داعي هي تشتغل ....أرجوان قالت ليها اهاااا يعني انتوا ناس الدقه القديمه البمعنوا بناتهم من الشغل! ماما قالت ليها ايوه نحنا ناس الدقه القديمه....أرجوان طوالي عاينت لي....المهم شويه كدا ماما و بابا مشوا و خلوني معاهم فـ بقوا يصروا علي عشان اوريهم السبب الحقيقي! ...مستر هشام قال لي السبب عدنان ولا شنو؟ قلت ليهو ايوه ....متذكر يوم كنت واقفه جنب عربيتو و منتظراهو ، بعدها........الخ المهم حكيت ليهم ، حاتم قال دا شنو يا جماعه كدي فهموني! ...أرجوان قالت ليهو في حاجات كتيره و شيقه فايته عليك بعدين بحكي ليك ....مستر هشام قال لي طيب هسي هتعملي شنو؟ ....قلت ليهو ولا شي....فجأه مازن جا داخل و هو بتكلم بالتلفون ، قال ليهم السلام عليكم و هو ماشي علينا و اول ما وصلنا قفل الخط و بقى يعاين لـ أرجوان! ....سلم على مستر هشام و حاتم و هو لسه بعاين ليها و هي وقفت على حيلها بخلعه و نحنا بقينا نعاين ليهم من دون ما نفهم شي! .....قلت ليها أرجوان مالك في شنو؟ ...بتعرفها انت يا مازن؟
يتبع.......
الجزو دا نزلتو امبارح بس بسبب بعض الكلمات الفيس حذف البارت بعدها واجهتني مشكلتي دخول للحساب، من امبارح بحاول ادخل كل المحاولات كانت فاشله إلا قبل شويه و لمن دخلت نزلتو في التلغرام بعدها عدلت الكلمات و هسي نزلتو
