أول ما إتلفت وراي شفت الولد الكان اصطدمت بيهو قبل كدا لمن كنت طالعهـ من الشركه ، اول ما قرب مننا كدا البت جرت ليهو ، شالها بلهفه كدا ، باسها و قال ليها مشيتي وين إنتِ؟ انا مش قلت ليك خليك مع ملك! ....لمن وصلني قال لي السلام عليكم ، قلت ليهو و عليكم السلام و كنت حـ أدخل الشركه جوه بس هو وقفني لمن سألني و قال لي انا لاقيتك قبل كدا إنتِ شغاله هنا ولا شنو؟ قلت ليهو بآخر نفس آي و طوالي دخلت جوه ، مشيت لـ مكتبي و فتحت كمبيوتري ، جاتني وحده كدا مدت لي يدها و قالت لي هاي أنا أرجوان ، عملت نفسي ما سمعتها ، حركتي غاظتها لوت خشمها و مشت للبنات القاعدين وراي سامعاهم بتهامسوا بس ما سمعتهم بقولوا في شنو و ما بعيده يكونوا بتكلموا عني ، اثناء ما انا مركزه على الكمبيوتر سمعت شخص قال السلام عليكم شباب كيفكم! ....اول ما رفعت راسي لقيتو دا الولد القبل شويه!، أبو البت! ، قلت دا كمان شكلو شغال هنا! ...المعاي ردوا ليهو السلام و سألوا عن حالو ، قال ليهم كويس الحمدلله ، اولاً حابب أرحب بالموظفين الجدد الإنضموا لينا و إن شاء الله تكونوا زيادة خير و بإذن الله ما حتشوفوا مننا شي كعب و مقابل دا بتمنى اننا ما نشوف منكم حاجه ما كويسه ، خليكم عارفين يا شباب انو التوقيت اهم حاجه بالنسبه لي بالإضافه للإخلاص في العمل ، عايزكم تشتغلوا بضمير و ما تقصروا و تتكاسلوا ، لو في اي حاجه وقفت ليكم او حاسين انكم جايطين و في حاجه رايحه عليكم استعينوا بزملائكم القدامكم في الشغل و هم أكيد ما حـ يبخلوا عليكم ، البت الجات اتكلمت معاي قبل شويه قالت ليهو هم من البدايه رافعين قزاز و ما مدين الناس وش ما عارفه شايفين نفسهم على شنو! !
هي كانت وراي و تقريباً قالت كلامها دا و هي بتعاين لي عشان كدا شفتو ابتسم و عاين لي و قال ليها معليش يمكن عشان جداد ما قادرين يتعاملوا بالصوره المطلوبه! قالت ليهو ليييه شفع مدارس هم؟
قال ليها أرجوان قلنا خلاص! !.....صراحة انا استغربت كيف هي بتتكلم بالشكل دا قدام مدير القسم! في النهايه قال لينا قبل ما أنسى ، اعرفكم بنفسي ، أنا هشام محمود مدير قسم التسويق و كلكم تحت إشرافي ، بالتوفيق يا شباب يلا.....بعد ما مشى إتلفت على البت لقيتها لسه بتعاين لي بغيظ! شكلها شمتني شديد! قلت ما مهم مالي و مالها!
المهم شويه كدا هشام مدير القسم جا و اتكلم لينا عن منتج جديد حـ تطلعوا الشركه للأسواق و المحلات التجاريه خلال اسبوع فـ قال اننا محتاجين إعلان مكثف للمنتج دا ، المهم اتكلم معانا مسافه طويله و شرح لينا أدق التفاصيل بعدها قال لينا الفيديو الإعلاني حـ يترسل ليكم و انتوا بدوركم حـ تنزلوهو في المواقع الإعلانيه ، بالنسبه للموظفين الجدد حـ ارسل ليكم اسامي شركات بنتعامل معاها ممكن تتواصلوا معاهم و تعرضوا ليهم المنتج و بتمنى إنكم تقدروا تقنعوهم بيهو ، قلنا ليهو تمام ، فعلاً اول ما وصلتنا اسامي الشركات و ايميلاتهم رسلنا ليهم ، غيتو ناس الشركه الرسلت ليهم لغاية الساعه 2 ما وصلني منهم رد ، المهم كملت شغلي و رجعت البيت و مروا اسبوعين بالروتين دا من الشركه للبيت و من البيت للشركه ، طبعاً مازن بعد مرمطه قدر يتوظف و بابا اصلاً من جينا السودان عندو صحبو قديم كدا اتواصل معاهو و خلاهو يشغلوا في ورشتو ، المهم يوم كان عندنا اجتماع مع هشام مدير القسم و انا جيت متأخره فأول ما جيت داخله كدا أرجوان قالت ليهو اها شرفت مديرة الشركه ، كلهم بقوا يعاينوا لي ، هشام قال لي بحده انا قلت ليكم شنو في اول يوم بديتوا فيهو الشغل؟ مش نبهتكم لنقطة المواعيد دي! ؟!.....هزيت ليهو راسي بس ، قال لي معليش بس اتفضلي برا ، قلت ليهو آسفه شديد دي آخر مرهـ ما حـ تتعاد تاني ، قال لي ما اكرر كلامي تاني ، اطلعي برا ، انا ما بتساهل في نقطة التأخير ، طلعت بره زهجانه! بس تاني قلت الله ريحك من النضمي الكتير الكان حيقولو جوا ، مشيت مكتبنا حق الموظفين قعدت في مكاني و بديت أصور فيديو و اتكلم فيهو عن جزو من المشاكل البتواجهنا في الدوام ، بعد ما خلصت كالعاده نزلتو في اليوتيوب ، شويه كدا الموظفين جوا داخلين و الإسمها ارجوان دي من جات داخله بتعاين لي و بتضحك بشماته! طبعاً هي كارهاني من أول يوم عشان سفهتها! ، ما ركزت معاها و خليتها تضحك قدرتها ، فجأه كدا قالت والله يا جماعه كونك تفتري و تشوف نفسك و انت في الحقيقه شخص مخك فاضي ساي دي حاجه بتهبلك شديد و بتخليك مسخره للناس المعاك 😂😂😂
في وحده قالت ليها قصدك منو يا "أرجو" الشمار حرقني ، قالت ليها القاصداهو عارف نفسو ، المهم هي بقت ترمي لي الكلام و انا أساساً ما بتلفت عليها ، استمرت كدا حكايه بتاعة اسبوع تاني و صراحة كلامها و حركاتها بقت تضايقني شديد! ، المهم يوم جيت ماره بجنب أرجوان عشان ادخل المكتب اصلاً هي كانت واقفه جنب الباب ، اول ما وصلتها كدا مدت رجلها و بسببها اتعترت و جيت واقعه قدام الموظفين كلهم ، ضيقي و إحساسي بالإحراج و قهري خلوني اقيف على حيلي و من دون ما أتردد ضربتها كف لمن كل الناس بقت تتلفت! ذاتي ما عارفه كيف قدرت اضربها! دي اول مرهـ أمد يدي على شخص ، ختت يدها على خدها و قالت لي و هي عيونها زي الشرار أنا تضربيني كف! ! صحباتها جوا جارين و زي الكلاب بدوا ينبحوا فيني و يهددوني و هي لسه بتعاين لي بكميه مبالغه من الغضب ، فجأه جات ناطه فيني و بقت تحاول تكفتني بس انا رميت الملفات و مسكت كل يد بـ يد ، بقت تشتمني و تنبذني و تقول لي والله ما أخليك و الشركه دي بجنبها ما حـ تجي ماره تاني ، الموظفين اتلموا فينا و حاولوا يفكوها مني بس هي حالفه ما تفكني ، فجأه جانا صوت بقول بنبره عاليه في شنو يا شباب!
كلهم زحوا ليهو و هو جا علينا! لمن وصلنا قال دي شنو المهزله الحاصله دي؟ شفع انتوا؟
أرجوان قالت ليهو ضربتني يا هشام ، اتخيل إنها ضربتني! قال لينا الإتنين تعالوا لاحقني! ....مشى قدامنا و نحنا وراهو وسط انظار كل الموظفين ، لمن وصلنا مكتبو قعد و قال لينا بزهج دا تصرف ليكم؟ شفع انتوا يا أرجوان؟
قالت ليهو اقول ليك ضربتني يا هشام عايزني أسكت ليها! ...قلت ليها ما ضربتك من دون سبب انتِ ليه بتحكي من النص؟
قالت لي هيي شفتي احترمي نفسك و انا هسي ما بتكلم معاك فاهمه ولا لا و بعدين انتِ ما......هشام قاطعها و قال ليها اسكتي يا أرجوان ، عاين لي و قال لي سبب المهذله الحصلت قبل شويه دي شنو؟
قلت ليهو اولاً اسفه على الحصل بس هي الجبرتني أضربها لأنو من اول يوم جيت الشركه دي و هي واقفه لي في حلقي و على الطالعه و النازله بترمي لي في الكلام و آخر ما توصلت ليهو إنها تمد رجلها و توقعني ، قالت لي ما تكذبي و بالنسبه لـ وقعتك اذا انتِ عميانه دي ما مشكلتي ، قلت ليها اذاً جهزي نفسك لكمية الكفوف الحتصلك مني في كل مره تقلي فيها أدبك علي ، انا ما حـ أسكت ليك تاني ، قالت لي شنو شنو؟ بتهدديني كمان! سامع يا هشام سامعها! ....قربت مني و قالت لي جيتك قريب حاولي بس ترفعي يدك و تمديها علي عشان ترجع ليك مكسوره ، هشام قال ليها أرجواااان بطلي البتعملي فيهو دا و هسي اعتذروا من بعض و أنهوا الحاصل دا ، قالت ليهو لو هموت ما حـ اعتذر منها ، قلت ليهو بما إني ما غلطت عليها فـ برضو ما حـ أعتذر ، أدانا نظره الإتنين بعدها قال لينا تمام ما تعتذروا بس لو الحصل دا اتكرر تاني والله العقاب حيكون شديد ....بتتقدروا تطلعوا بعد دا ، اول ما طلعنا كدا ارجوان رفعت رجعلها و عفصتني بكعبها الحاد و قالت لي والله ما أريحك و مشت مني! !
اتضايقت ضيق ما عادي بس حاولت اكون طبيعيه ، لمن دخلت مكاتبنا كل الموجودين كانوا بعاينوا لي و هناك ارجوان لامه ليها شكله و بتحكي ليهم الحصل و بتقول ليهم اقسم بالله أندمها على الساعه الجات فيها للشركه دي يعني حتى بعد ما شافتني جيت داخله ما سكتت! قضت اليوم داك كلو مطاعنات و تهديد مباشر و غير مباشر ، ما صدقت متين خلص الدوام و طلعت من الشركه و مشيت البيت طبعاً كنت زهجانه و اعصابي تلفانه بس اول ما جيت دخله و شفت مزن الزهجه طارت و كميه كبيره من السعاده غمرتني ، مشيت عليها سلمت عليها و حضنتها شديد و قلت ليها فاقداك والله و مشتاقه ليك ، قالت لي انا مشتاقه ليك اكتر و كذا مره حنستك عشان تجيني بس انتِ ما بتجي ، المهم سلمنا على بعض و قعدنا و بقيت اسألها عن حالها و كدا ،، ماما قالت ليها مواعيد ولادتك ما قربت! قالت ليها لسه قدامي شهرين أو شهر و حاجه ، ماما قالت ليها آي صحي انا خلاص بقيت بمسح و ما بتذكر حاجه ، مزن قالت لي اها الشغل ماشي كيف معاك؟ قلت ليها كويس شديد ، طبعاً ما حصل جبت ليهم سيرة أرجوان و البتعملو لي لأنو لو بابا أو مازن عرفوا حـ يقولوا لي ما تمشي الشركه دي تاني عشان كدا فضلت السكوت ، الإتحملتو انا كان اكبر و اعظم من المشاكل البتعملها لي أرجوان ، المهم مزن قيلت معانا لحد المغرب لأنها كانت منتظره بابا و مازن و فعلاً انتظرتهم لغاية ما جوا و قعدت اتونست معاهم لحد ما راجلها جا عشان يسوقها ، دخل اتونس معانا حبه كدا و سأل عن أحوالنا و ساقها و مشى ، طبعاً راجلها اسمو خالد شاب خلوق كدا و طيبان و حالو على قدرو بس أخلاقو هي الخلت بابا يوافق عليهو من دون ما يتردد ، حاول كذا مرهـ يساعدنا و كان برسل لينا قروش مع مزن لمن تجينا بس بابا برفضهم و بخليها ترجعهم ليهو زي ما جابتهم منو ، المهم بعد تلات أيام من الكلام دا في يوم جيت الشركه و شايفه البنات فايرات و أي وحده بتظبط في نفسها إلا انا و البنات الجداد بنعاين ليهم و ما فاهمين شي! ....وحده من الموظفات الجداد ديل قالت لي ديل مالم؟ من دون ما اعاين ليها قلت ليها ما عارفه ، قالت لي ممكن اعرف ليه بتتكلمي بالطريقه دي ؟
رفعت راسي و قلت ليها اتكلم كيف يعني؟ قالت لي بحسك مغروره و كلامك مستفز! لو ما متذكره فأنا البت الكان اتلاقيت معاك ايام المعاينات و برضو لمن اتكلمت معاك في اليوم داك سفهتيني! ....طبعاً لمن ركزت في ملامحها طوالي اتذكرتها ، قالت لي المهم كـ نصيحه مني احسن تغيري اسلوبك دا لأنو ما حـ يفيدك بشي بالعكس حـ يضرك شديد و الشغل دا كما صاحبتي ليهو كميه من الناس و اتعاملتي معاهم بذوق ما حـ تمشي لقدام ، قالت كدا و مشت مني ...انا عارفه انو كلامها حقيقه و انو بالجد اسلوبي ما كويس بس انا مضطره اعمل كدا لأني ما عايزا ادي اي شخص مجال عشان يدخل حياتي ، ما عايزا اتعرف على أي شخص و ما عايزا أكون أي صداقات مع شخص ، كفايه جداً الشفتو من سماهر و روان و ميامن و.......عدنان 💔💔
المهم اثناء ما انا مركزه كدا مع الكمبيوتر فجأه جات وحده من البنات داخله و هي مخلوعه و بقت شغاله ليهم جا راجع جا راجع بعد غياب يا بنات كرااااشنا وصل ارح نستقبلوا ، طبعاً كلهم اتهبلوا و اتلبشوا ، واحد من الأولاد قال ليهم خفيفات زي شاي البكى بس اطمنكم انو ما شغال بيكم و أساساً ما عندو حاجه للبنات ، أرجوان جات داخله ضحكت و قالت ليهم ما هيركز معاكم حتى لو بقيتوا ليهو سجاد أحمر 😂 البت قالت ليها أرجوان يا حاقدهـ أسكتي ياخ ، قالت ليهم على راحتكم بس إياكم تزعلوا مني لمن ما اقدر امنع نفسي من الضحك عليكم لمن يحرجكم ، قالوا ليها انتِ بس اسكتي و ما تتشائمي ، وحده من البنات الجداد قالت ليها معليش بس لو سمحتي ممكن تفهميني الحاصل شنو يا أرجوان! اسمك أرجوان صح؟
قالت ليها بنات الشركه كلهم عدا أنا طبعاً مكرشات على المدير التنفيذي للشركه بس هو ما بهبب ليهم و ما شغال بأي زول ، كان غايب ليهو فتره طويله و اليوم جا راجع ، قالت ليها اهااا فهمت شكراً ليك ، المهم البنات خلوا شغلهم و بقوا شغالين شي فاونديشن و شي روج و شي قلوس و شي ايلاينر ما خلوا مصيبه ما عملوها في وشوشهم و ريحة العطور دي ما تديك الدرب و الأولاد ديل يضحكوا بس ، المهم بعد شويه كدا كل البنات طلعوا عشان يستقبلوا المدير التنفيذي إلا انا و كم بت من الجداد ما طلعنا ، المهم بعد حكاية ربع ساعه كدا البنات جوا داخلين و هم بتكشموا ساي ، وحده قالت ليهم لاحظتوا ليهو اتغير كيف! بقى صارم أكتر من الأول! التانيه قالت ليها في كل الأحوال هو جذاب ، قالت ليها ما اختلفنا بس يكون مالو يا ربي! لأنو غيابو كتر و حالتو بقت متدهوره و ملامح وشو بقت باهته! قالت ليها فعلاً ما عارفه مالو ، أرجوان قالت ليهم لمن سألت هشام عنو قال انو حاصله معاهو مشاكل شخصيه خلتو يتغيب الفتره دي كلها و هشام نفسو ما عارف حاجه عن مشاكلو الشخصيه دي ، أصلاً هو ما بحكي لزول ، قالت ليها على فكره انتِ محظوظه يا أرجوان لأنك بتعرفيهو بس حييييا انا منك لا مشيتي اتقربتي منو لا عرفتيهو بينا ، قالت ليها هو اساساً ما شغال بزول يا رزان! و ما بهمو منو البحبو او منو البكرهو أو منو المكرش عليهو ، هو شخصيه غامضه كدا و تعاملو صارم ، قالت ليها بس الكويس انو رجع للشركه و نورها ، بعد دا ما اظن يكون في غياب ، كل الموظفات حيكونوا حضور دايماً ، أولاً عشان يصبحوا بوشو و تانياً عشان هو صارم و ما بقبل التأخير بس السبب الأول هو الوارد و الأقوى 🙈 أرجوان ضحكت و قالت ليها غيتو إنتِ يا رزان كما اداك شاكوش ما بترتاحي ....
انا دا كلو ما ركزت معاهو زي ما ركزت مع أرجوان و تعاملها مع الباقين! بتتعامل مع كل الناس عادي ما عدا أنا! مع انو ماف عداوه بيناتنا! ...تاني قلت لا لا يمكن عشان ديل صحباتها بتتعامل معاهم بطريقه كويسه ، الشي التاني المحيرني علاقة أرجوان بمدير القسم شنو؟ ؟ من طريقة كلامها عنو و تعاملها معاهو و تعاملو معاها حسيت كأنها قريبتو أو حبيتو أو حاجه بالشكل دا! ! لكن هو معرس و عندو بت !! ما فرقت اصلاً الرجال عيونهم زايغه و ماف شي بحجب نظرهم لا زواج لا غيرو ، المهم واصلت شغلي لمن خلصت شلت كذا ملف كدا من الملفات الطلبها مني هشام ، اول ما قمت من الكرسي و اتجهت على الباب سامعه صوت ضحكات و جاني صوت أرجوان بس ما ركزت معاها قلت اكيد بتعمل كدا عشان تغيظني و تضايقني ، اول ما طلعت من مكتبنا و اتجهت على مكتب هشام جاني صوت بقول اقيفي يا بت! ...لمن إتلفت عليها لقيتها ياها البت القبيل القالت لي ليه بتتعامل كدا و ادتني نصيحه و شنو ما بعرف! قلت ليها ايوه! جاتني قريب و قالت لي أديني ضهرك! قلت ليها شنو؟
اتحركت و جاتني من ورا و جرت الملصق و قلعتو من الإسكيرتي و مدتو لي و قالت لي للسبب دا كانو بضحكوا عليك ، طبعاً اتهجمت! اكيد منظري كان بايخ قدام الموظفين خاصة الأولاد! ...ما عارفه كيف قدرت تلصق فيني ملصق الإيموشن الغبي دا! ....حسيت بإحراج كبير و الدم في شراييني بدا يغلي ، البت قالت لي الإسمها ارجوان دي الظاهر عليها كريها و قادره و ناهره و دا لأنو هشام مدير القسم ولد عمتها ، قلت ليها بضيق دا ما معناها تقل أدبها على الناس ، قالت لي بس حاولي ما تحتكي بيها انا مع اني ما بعرفها كويس و جديده زيك لكن خفت منها و حالياً عامله حسابي منها ، أخدت نفس عميق و اتحركت من جنبها مشيت وديت الملفات لـ أستاذ هشام و انا بالجلاله ماسكه دموعي بسبب الموقف البايخ الحصل لي قبل شويه دا ، بعد ما شال مني الملفات لاحظ انو في تغيير في ملامحي قال لي خير في شنو؟ في نفسي قلت لو حكيت ليهو و جاب أرجوان و اتكلم معاها الوضع حـ يزيد سوء و هي حـ تطاول علي زياده و غير كدا الموقف محرج و ما حـ اقدر اقولو ليهو ،، قلت ليهو خلصت شغل ممكن اطلع قبل الدوام؟ قال لي في اجتماع مهم مع المدير التنفيذي ، انتِ عايزا تطلعي قبل الدوام ليه؟
قلت ليهو مصدعه و حاسه نفسي ما كويسه ، بعد مسافه قال لي تمام بتقدري تمشي بس ما تتعودي ، قلت ليهو تمام ، لمن طلعت منو بقيت مقلقه و متوتره ، ما عارفه كيف حـ ادخل المكتب قدامهم و اشيل شنطتي بعد الموقف الحصل بس كويس اني لقيت البت القبل شويه واقفه في الممر و بتتكلم بالتلفون ، خليتها بعد خلصت حتى مشيت قلت ليها لو سمحتي ممكن تجيبي لي شنطتي من جوه؟
قالت لي ماشه وين الدوام لسه؟ قلت ليها استأذنت اذا ممكن ياريت تجيبي لي شنطتي ، طبعاً هي فهمت اني ما قادره ادخل بعد الموقف الحصل دا فـ وصفت ليها مكان شنطتي و هي طوالي مشت جابتها لي ، شكرتها و طلعت من الشركه و انا عايزا أطق من الزعل بسبب الموقف دا يومين ما مشيت الشركه و في اليوم التالت جاني اتصال من الشركه فـ اضطريت أمشي ، قويت قلبي و دخلت المكتب و على طول اتجهت على مكاني و قعدت و انا مغمضه عيوني لمن فتحتهم طوالي عاينت لشاشة الكمبيوتر و حاولت ما اركز مع الناس الحوليني ، شويه كدا ناس الشركه الكان عرضت عليهم المنتج قالوا انهم حـ يجوا بنفسهم و يتفحصوا المنتج قبل ما يشتروا ، شويه كدا جا واحد داخل و قال انو المدير التنفيذي معصب شديد لأنو المنتج ما لقى تفاعل كبير و قال اننا ما نجحنا في ترويجو ، في نفسي قلت اساساً الفيديو العاملنو دعايه للمنتج دا بايخ شديد و ما مغري خالص! ....المهم في زمن الإستراحه مشيت لأستاذ هشام و قلت ليهو انو الشركه التجاريه العرضت عليها المنتج قالوا انهم حـ يجوا الشركه و يتفحصوا المنتج بنفسهم ، قال لي ما عندنا مانع ، حددوا ليك موعد؟ قلت ليهو لا ، قال لي تمام الأهم انك تقدري تغريهم بأسلوبك ، قلت ليهو طيب ، اتحركت كدا بس تاني رجعت و قلت ليهو تسمح لي اقول حاجه؟
قال لي اتفضلي ، قلت ليهو صراحة الفيديو تبع المنتج ضئيل و ما مغري و ما فيهو عنصر جذب يخلي المشاهد يفكر يشتريهو ، ممكن يتصور فيديو أحسن من دا ، قال لي حـ ننظر في الموضوع دا ، المهم طلعت منو مشيت الكافتيريا فطرت و اتمشيت شويه في الشركه بعدها وقفت كدا على جنب و صورت فيديو و اتكلمت فيهو بطريقه جذابه عن المنتج ، بعدها عدلت على الفيديو و دخلت فيهو صور للمنتج و نزلتو في قناتي حقت اليوتيوب ، اول ما دخلت تلفوني في شنطتي كدا و رفعت راسي لقيت البت ديك قدامي ، العرفتو إنو إسمها أريج ، بقت تعاين لي ساي و بعد مساااافه قالت لي و انا من أول يوم شفتك شبهتك و حسيت كأني شايفاك قبل كدا بس وين ما كنت متذكره! ياداب اكتشفت انك نفس البت البتعمل الفيديوهات الجميله ديك! وااااي ما قادره اصدق انك مها بتاعة الفيديوهات! ياخ ما قادره اوصف ليك قدر شنو انا بحب فيديوهاتك دي و بحسها بتمسني ، انتِ بت مبدعه ما شاء الله عليك ، قلت ليها تسلمي ، قالت لي عشان كدا مفتريه هههه بس ليك حق والله ، قلت ليها انا لا مفتريه ولا حاجه و أساساً ماف شي يخليني افتري كل القصه اني ما عايزا احتك بشخص و ما عايزا اعرف شخص هل دا اسمو إفترى؟ فجأه قالت ووووبعلي المدير التنفيذي ، لمن إتلفت وراي ما شفت زول! ! رجعت عاينت ليها بإستغراب! قالت لي هسي شفتو مشى على غرفة الإجتماعات و يا رب اجتماعو يكون معانا نحنا بس ، ما اشتغلت بيها خليتها واقفه و مشيت المكتب أول ما قعدنا كدا جات السكرتيره و قالت انو مستر هشام و المدير التنفيذي حـ يعملوا اجتماع هنا ، طبعاً البنات كالعاده اتلبشوا و اتكبكوا و بقوا يلطخوا في وشوشهم! حتى أريج ذاتا جات و بقت تظبط نفسها معاهم! غايتو مديرهم البتظبطوا عشانو دا أنا لحد اللحظه دي ما لمحتو ، المهم رتبوا المكان و جهزوا المطلوب ، شويه كدا مستر هشام جا داخل و قال اتفضل يا حبيبنا ، أول ما رفعت راسي كدا حسيت الدم اتجلط في شراييني! ! كأنو صاعقه و ضربتني! فجأه كدا الدنيا بقت لافه بي و دخلت فيني خلعه كدا ما عاديه! كل ذكرياتو القبل تلات سنوات دي مرت علي في كسر من الثانيه ، بقيت برجف من فوق لـتحت و انا ما قادره استوعب انو هو واقف قدامي! !
في أحزان و إنكسرات و خيبات مهما اجتهدنا في إخفائها حنفشل ، في فراغ مؤلم جوانا عمرو ما حيتملي ، في خدوش عميقه عمرها ما حتختفي ، في نواقص عمرها ما حتكتمل ، في جروح عمرها ما حـ تتداوى ، في خواطر مكسوره عمرها ما حتنجبر ، في حاجات عمرها ما حتتغير ، حتفضل طول العمر تجرحنا و تحطمنا و تهلكنا ، في أحزان مؤلمه نحنا مجبورين نتعايش معاها، يعني كأنو إنكتب ليها ترافقنا طول حياتنا 😴💔
#مها_حولي
يتبع.....
