اول ما دخلنا جوه شفنا مزن و سماهر بتشاكلوا و كل وحده كانت جاره التانيه من شعرها ، مازن جر عليهم و حاول يفكهم بس كل ما يفك وحده التانيه تشد و تحر من جهه ، من ضمن الحضور كان في أم سماهر ، جات عليهم و بالقوهـ جرت سماهر من يدها و قالت ليها بنهره جنيتي إنتِ؟قالت لأمها لو جنيت فـ حيكون بسبب البت دي و أهلها! الشفتو منهم يا أمي لو وحده غيري دقيقه وحده ما بتقعدها معاهم بس عشان مازن انا كنت ساكته و متحملاهم يعني فوق ما هم كانوا سبب في إجهاضي لسه مصرين. يضايقوني و يكرهوني العيشه ، مزن من مكانها داك نطت فيها و بقت خانقاها و بتقول ليها بتكذبي كمان يا حيوانه يا خاينه؟مازن بالقوهـ فكاها منها و هرش مزن و قال ليهم انتوا الإتنين أمشوا فوق ، مزن قالت ليهو ما بنمشي فوق و زي ما كانت ناويه تشوه سمعتنا قدام أهلها عدنان و تديهم مفهوم غلط عننا انا كمان و ما حـ اقصر و أوريهم حقيقتها ، إتلفتت علينا و قالت لـ خالتو غاده أم عدنان : ما تصدقي ولا حرف من القالتو ليك من قبيل شايفاها لافه عليكم واحد واحد و بتحاول تشويه صورة مها قدامكم ، للأسف يا جماعه دي قبل ما تكون مرة اخونا كانت صحبة مها شديد بس اتخاسسة و اتعافنت مع ذلك مها ما ردت عليها و ذاتو ما حاولت تمنع عرسها من مازن أخوي و كلو عشان مازن بس بعد العرس حقيقتها ظهرت بسبب تحريشها لـ مازن و كذبها و مشاكلها الكل يوم دي و......سماهر قاطعتها و قالت ليها كذابه انا ولا إنتِ يا بتاعة الأولاد! لا مخليه احمد لا عمر لا خالد و كل يوم بتتكلمي مع واحد جديد و عامله فيها الشريف الرضي و......مزن قالت ليها اسكتي يا بتاعة مراد ![]()
هنا حصلت لحظة صمت! سماهر نططت عيونها و اتوترت ، مازن قال ليهم بنبره عاليه ما اشوف لي وحده هنا طيروا من قدامي ، ام سماهر ساقتها و مشت بيها فوق و ماما جات جرت مزن و برضو مشت بيها!! بعدها عم الصمت و ما عرفنا نقول شنو للضيوف! حسيت بإحراج كبير قدام أهل عدنان ، هو كان واقف جنبي ، قلت ليهو عدنان آسفـ.....قاطعني و قال لي ماف داعي للإعتذار ما حصل شي! ....بابا قال ليهم معليش يا جماعه! قالوا ليهو لا عادي ماف مشكله و طوالي كلهم طلعوا برا و قعدوا في الجنينه ، من مكاني داك مشيت غرفة مزن لقيت ماما بتتناقش معاها و بتقول ليها ما كان تفضوحنا قدام الجماعه ديل! على الأقل كنت تخليهم بعد ما يمشوا! مزن قالت ليها الزفته دي استفزتني شديد كانت لافه عليهم و بترمي في الكلام على مها! عامله فيها ظريفه و بتونسهم و ونستها كلها عن مها بطريقه غير مباشره كانت بتقول عنها كلام ما كويس عشان يشيلوا فكره غلط عنها، البت الحقوده دي لو قعدت اكتر بيناتنا حـ تنسينا طعم السعاده ، لمن مزن شافتني قالت لي ما قاصده اعمل الفضيحه دي والله عشان كدا خليتها تدخل جوه و لحقتها ، قلت ليها حصل خير ، المهم انتِ كويسه؟قالت لي يدي واجعاني لأنها لوتها لي بس ما قصرت منها و خليت وشها كلو احمر من كترة الكفوف ، ماما قالت ليها المشاكل الكتيره دي نحنا تعبنا منها بعد دا إلا مازن يشوف ليها بيت و يسكنها فيهو ، مزن قالت ليها لا لأنو دا العايزاهو هي ، عايزا بأي طريقه تخلق فتن بيناتنا عشان مازن يطلعها من البيت دا و يسكنها براها ، قلت ليها ما عارفه ليه هي بتعمل كدا؟ حتستفيد شنو يعني؟ بعدين نحنا عملنا ليها عشان عشان تقلب علينا و تتشاكل معانا من دون سبب؟ ؟ ماما قالت لي في ناس طبعها كدا! تحسيهم مخلوقين بس عشان يعادوا الناس و يحقدوا عليهم! مزن قالت لي الكانت صحبتك دي عندها حب التملك عايزا تملك مازن و أموالو و في نفس الوقت عايزا الإسمو مراد داك ، دي نوعية البنات البتكون عيونهم زايغه و الوحده ممكن تربط مع 10 في نفس الوقت و في النهايه تبدا تغربلهم و عاد انتِ طبيعي تكرهك بعد ما لقتك بتشكلي ليها خطر و كمان بتعرفي نور بت عمها الهي بتكرها شديد.....فجأه خالتي جات داخله و قالت لينا دي فضيحة شنو يا بنات؟ !! مزن قالت ليها بناتك ما حكوا ليك ولا شنو؟ ؟ ماما قالت ليها بعدين بقول ليك المهم هسي خلونا ننزل للضيوف ، خالتي قالت ليها اي انزلوا عشان قالوا حيمشوا بعد دا ، المهم نزلنا ليهم و ماما و مزن اعتذروا ليهم عن الحصل ، شويه كدا مازن ذاتو جا و وعدهم معانا ، اهااا بعد ما ديل مشوا بدا نقاش طويل عريض ، بابا نادى مزن و سماهر و من هناك بدت الإتهامات و التبريرات ، كلام مزن كان مقنع شديد! ما اتوقعتها توريهم المحادثه القرتها عندي و الصور! !مازن لمن شافهم جن جنونو و اتعصب فيهم الإتنين! ما عارفه بس كنت متوقعاهو يتصدم أكتر من كدا! ! حسسني كأنو عارف! ....بابا في نهاية كلامو قال لـ سماهر انا ما حصل اتناقشت معاك و ما حصل سمعتك فارغه رغم اني شايف البتعملي فيهو ، قلت دي نقاشات بتحصل بين مرة الولد و نسيبتها و حمواتها و ما حبيت اتدخل بس كونو انها تصل معاك لدرجة انك تحاول تشويه سمعة بتي قدام الجماعه فـ دي ما حـ أسكت ليها خالص ، قدامكم كلكم البت دي ما بتقعد معانا هنا تاني! عاين لـ مازن و قال ليهو شوفي ليها مكان تاني سكنها فيهو ، مزن قالت ليهو لا يا بابا أصلاً دا العايزاهو هي و....بابا قاطعها و قال ليها دا قراري النهائي ، ما عايز مشاكل و نقاشات تاني ، احسن تسكن في بيت براها....بابا قال كدا و طوالي مشى و ماما لحقتو ، بقينا واقفين انا و مزن و مازن و سماهر و هو بالجلاله ماسك أعصابو ، سماهر مسكتو من يدو و قالا ليهو مازن أكيد ما حتصدقهم صح؟هز ليها براسو بمعنى آي و قال ليها ما حـ أخليك تقعدي في البيت دا تاني ، إبتسمت و قالت ليهو ربنا يخليك لي و ما يحرمني منك ، اتحرك. من جنبنا و طلع و انا طوالي مشيت لحقتو برا ، قلت ليهو مازن ما تزعل من كلام بابا و لو ما عايز تطلع من البيت ما تطلع منو نحنا ذاتنا ما بنقبل انك تكون بعيد عننا ، قال لي كدا أحسن ، مسكتو من يدو و قلت ليهو مازن الله يخليك ما تمشوا من هنا ، بوعدك انو تاني ما تحصل نقاشات زي دي و سماهر دي حنشيلها ليك فوق راسنا بس انت ما تمشي و تخلينا ، خلينا ننسى الفات و كلنا نبدا صفحه جديده نحنا ما بنقدر بدونك والله ، انت أخونا و تاج راسنا ، فك يدو مني و مشى و خلاني ببكي ساي ، لمن رجعت جوه لقيت مزن و سماهر لسه بتناقشوا! تعبت منهم بالجد! ما اشتغلت بيهم مشيت غرفتي طوالي و قفلتها علي و قعدت أبكي لأنو مازن حيمشي من البيت ، زي الساعه 12 كدا عدنان اتصل علي ، اول ما رديت عليهو قال لي خطيبتي السمحه! ...قلت ليهو انا متضايقه يا عدنان! قال لي ليه في شنو؟ بس ما تقولي لي متضايقه من موضوع قبيل ؟...قلت ليهو ما شفت الحصل بعد ما انتوا مشيتوا ، قال لي الحصل شنو؟قلت ليهو ........الخ المهم حكيت ليهو الحصل كلو و قلت ليهو عشان كدا انا متضايقه و ما قادره اقبل فكرة انو مازن يبعد عننا هو أخونا و صاحبنا و سندنا 
قال لي حبيبي ما تزعلي مني بس كدا أحسن ليكم من المشاكل اليوميه البتحصل بينكم و بين مرة أخوكم دي ، و أكيد مازن ما حيقيف منكم ولا انتوا كمان كل الحيحصل انو مرة اخوكم دي حتكون بعيده عنكم شويه ، قلت ليهو ما عارفه بس بالجد ما قادره اتقبل الفكره دي 
المهم بقى يتكلم معاي و بحاول يمتص الحزن و الضيق الجواي ، فضلنا نتكلم كدا لغاية ما نمت ، في اليوم البعدو بعد ما مشيت الشركه مع بابا سامي اتصل علي ، اول شي بارك لي الخطوبه و كدا بعدها قال لي انتِ يا مها الحاصل شنو ؟ امبارح لمن اتصلت على ناس امي زي السمعت انو في مشكله حصلت امبارح و قالوا اختك اتشاكلت مع مرة أخوك....قصدهم سماهر صح؟اتنهدت و قلت ليهو آي ، قال لي ما مستغرب سماهر و بعرفها كويس و انا قبل كدا حذرتك منها بس ما سمعتي مني ، البت دي قولة كعبه شويه عليها ، المهم ما تخافي اهل عدنان ما اتحسسوا من الموضوع ولا الحصل حـ يعيق علاقتكم انتِ و عدنان و للمره التانيه اعملي حسابك من سماهر دي و ما تتمسكني ليها ، قلت ليهو طيب ، قال لي بالمناسبه مشيتي عرس ميامن و أمين؟ قلت ليهو بإستغراب: شنو شنو؟ عرست متين هي؟قال لي الجمعه الفاتت ديك و انا ذاتي ما كنت عارف بس عرفت من ناسي! قلت ليهو بزعل ما كلمتني!! و لمن اتصلت و عزمتها لخطوبتي قالت لي بجي بس ما جابت لي سيره! قال لي معناها امورهم معاك بقت واضحه لأنهم تعبوا من التمثيل! ...يشهدالله زعلت زعل في الدنيا دي لمن قربت أبكي بس لا اتصلت عليها لا على روان عشان أعاتبهم ، و ليه أعاتبهم و هم أساساً ما عايزني في حياتهم؟ ليه افرض نفسي ليهم؟ ايوه صح الحصل بيناتنا واجعني و ما حصل اتخيلت انو يجي يوم و نحنا الـ 4 نتفرق! ....ئهه هم الفارقوني و فضلوا انهم يكونوا بعيدين عني لأسباب ما منطقيه يمكن ديك كانت اول مره افكر بطريقه تانيه خالص و انظر للموضوع من زاويه تانيه! كانت اول مرهـ انصف فيها نفسي و أطلعهم هم الغلطانين و الخسرانين ، كانت اول مره اشتري نفسي و أقيمها اتنهدت و قلت الحصل حصل يا مها هم اتخلوا عنك بإرادتهم و من دون دوافع قويه و انتِ لازم تتجاوزيهم زي الما حصل عرفتيهم ، كفايه جداً إنو عدنان في حياتي و ماليها لي ، غير عدنان و أهلي ما محتاجه لزول تاني ...فجأه باب مكتبي ضرب و على طول نور جات داخله ، عرفتها جايه ليه! قالت لي سمعت انو بت عمي الفقر عملت ليكم مشكله أمبارح! سكته ما رديت عليها! قالت لي غيتو انو ناس بتحيروا! هسي غالبكم توقفوها عند حدها؟قلت ليها نور انا ما ناقصه وجع راس ، كفايه العملتو بت عمك! يعني انتوا ما بترتاحوا إلا تضايقوا الناس و تزعجوهم! بالجد انتِ بت عمها لأنكم شبه بعض ، قالت لي كلامك دا معناها انو بطنك طمت منها! هااا عمايلها تعبتكم مش! قلت ليها لو ما طلعتي برا حـ أكلم بابا يتصرف معاك ، عاينت لي بغيظ و أول ما فتحت الباب كدا مازن جا داخل ، رغم انها وقفت بس هو لا وقف ليها لا سلم عليها لا عاين ليها من الأساس ، دخل مدى لي ملف و قال لي متأكده انك راجعتي الملف دا؟ قلت ليهو ما متأكده كدي اشوفو ، لمن شفتو قلت ليهو لا ما راجعتو بس هسي براجعو و....فجأه سماهر جات داخله و قالت ليهو مازن إنت هنا؟ ....إتلفت عاين ليها و تاني رجع إتلفت علي و قال لي عايزك تراجعيهو هسي دا ، قلت ليهو طيب ، قال كدا و جا ماري جنب نور و سماهر و طلع خلاهم بعاينوا ليهو بعدها الإتنين بقوا يحمروا لبعض لحد ما سماهر مشت لحقتو! ....المهم الأيام عدت على كدا و مر أسبوع على الكلام دا و سماهر تاني ما اتناقشت مع زول فيني و البيت بقى هادي شديد ، المهم يوم بعد صلاة العشا كدا اثناء ما انا بتكلم مع عدنان مزن جاتني داخله و هي بتضحك ، استعجلتني و قالت لي ألحقي ما يفوتك ، قلت ليها في شنو؟قالت لي لو عايزا تعرفي تعالي سرعه في عاصفه ضربت البيت ، قلت لـ عدنان برجع ليك شويه و طوالي قفلت منو و مشيت ورا مزن ، لقيتها ماشه على غرفة مازن! لمن وصلناها لقينا ماما و بابا واقفين جنب الباب و بحنسوا في مازن عشان يفتح الباب ، قلت لـ مزن في شنو؟ قالت لي ما سامعه؟فعلاً لمن سمعت كويس مازن كان بجوط شديد في سماهر و سمعها وسخ اضنيها و كان في أصوات كسير جايه من غرفتهم! غيتو كان في كميه من الكواريك و الجوطه جوه الغرفه و برا هنا ماما بتضرب في الباب عشان مازن يفتح ليها ، شويه كدا مازن جا طالع و هو عيونو زي الشرار ، كان جاري سماهر من يدها و يدو التانيه ماسك بيها شنطه! ....بقى جاريها و هي بتصرخ و بتبكي بحس عالي و بتقول ليهو والله انا ما عملت حاجه يا مازن انا لا خنتك لا سحبت من قروشك بقت تبكي و تصرخ و مازن جاريها لحد ما نزل بيها تحت و نحنا جاريين وراهو و بنحاول نهدي فيهو ، قلت ليهو مازن لو بتعمل كدا عشان المشاكل الحصلت بيناتنا آخر فتره فـ انت ما مغصوب والله و الحصل حصل و الخلاف البيناتنا شبه زال و ياهو بقينا عايشين بهدوء و رواق في البيت و المشاكل البيناتنا إتلاشت برضو ما رد علي و لسه كان بجرها ، بابا قال ليهو بنهره أقيف يا ولد بتكلم معاك انا! مازن قال ليهو بتكلم معاك بعد أوديها لأهلها ، بابا قال ليهو كدي قول بسم الله و فهمنا الحاصل! المشاكل ما بتتحل كدا و......مازن قال ليهو انا ما ديوث عشان اعيش مع وحده بتخوني و انا عارف! ....هنا بابا سكت و ما قدر يقول حاجه و مازن المرهـ دي جراها بكل قوهـ و مشى بيها ..بقينا قاعدين على أعصابنا و متحيرين! بالجد يعني انا زعلت شديد عشان مازن رغم اني عارفه حقيقة سماهر بس ما يستاهل والله لأنو حباها شديد ، طبعاً مزن كانت عايزا تطير من الفرحه ، قالت بلا و انجلا ، حيييي براها خربت لنفسها و كمان طلعت غبيه شديد و بتعيد غلطها مية مره 
بابا قال ليها مزن! فـطوالي سكتت بس كانت بتضحك ، على بال ما مازن يجي انا مشيت غرفتي و لقيت مكالمات من عدنان ، قلت أكيد قلق لأنك قلت ليهو برجع ليك و طوالي قفلت الخط ، لمن اتصلت عليهو و رد علي حكيت ليهو الحصل و قلت ليهو انا زعلانه شديد على مازن! قال لي انتِ ما بتملي من الزعل الكتير دا؟ يعني دايماً لمن بتكلم معاك بتقولي لي انا زعلانه او متضايقه أو مكتئبه! المشكله انو معظم الحاجات البتغير مودك تافهه ساي ....سكته ما رديت عليهو لأنو كلامو بالطريقه دي حيرني!!قال لي مها سامعاني إنتِ؟ قلت ليهو ايوه سامعاك ، قال لي زعلتي ولا شنو؟قلت ليهو ماف حاجه بتزعل ، قال لي فعلاً المهم انا مشتااااق ليك مع انك فارقتيني نص ساعه بس مع ذلك اشتقت ليك ، إبتسمت و قلت ليهو و أنا كمان ، اتكلمت معاهو مسافه و لمن نزلت تحت لقيت مازن جا و كان بقول لـ بابا رجاءً ماف زول يتكلم معاي في الموضوع دا ، إتحرك من جنبهم و جا على السلم ، انا كنت فوق السلم و بعاين ليهو بحسره كدا لغاية ما وصلني و اتجاوزني و مشى غرفتو ، لمن نزلت ليهم قلت ليهم قال ليكم شنو؟ مزن قالت لي طلقهاااا ايوووويووووي ، بابا قال ليها مزن! ! قالت ليهو خلاص اصلو الزول معاك ما بقدر ينبسط و يحتفل عشان كدا ماشه احتفل في غرفتي ، إتحركت خطوتين كدا و تاني جاتني راجعه و قالت لي لو عايزا تحتفلي معاي جيبي الكيك الفي التلاجه و جك العصير و الفشار العملتو قبيل و تعاليني فوق! قالت كدا و مشت! قلت دي متين جهزت الحاجات دي كلها! ...قعدت جنب بابا و قلت ليهو هسي نعمل شنو؟ قال لي اها نعمل شنو يعني! لو كان طلعها لسبب تاني قابل للتجاوز كنت مشيت و اتكلمت معاهو و خليتو يرجعها لكن هو عدييل قالها ليكم ما بقعد مع وحده بتخونو و للأمانه انا ذاتي لمن عرفت منكم الموضوع كان مضايقني بس عشان مازن ما كان بتقبل كلمه عنها سكته و قلت مدام عايز يقعد معاها كدا فهو حر المهم يكون مرتاح معاها بس ياهو عرف و براهو طلقها و برضو حـ اقول هو حر و خليهو يعمل البريحو ، ماما قالت ليهو دا الصح بكرا بعرس ليهو وحده تقدرو و تشيلو و تشيلنا في راسها ، قمت منهم و مشيت لـ مازن في غرفتو ، لقيت حالتو حاله ، دخلت و قعدت جنبو في السرير و قلت ليهو انت عارف انك ما بتقدر من دونها فـ ليه استعجلت و طلقتها يا مازن! يمكن انا اكتر وحده عارفه سماهر بتعني ليك شنو و قدر شنو انت بتحبها و متمسك فيها! مشى وين حبك ليها! ليه اخترت تعذب روحك دامك عارف انو روحك مربوطه بيها! ...تصرفك دا حسسني بالذنب يا مازن و انا قلبي واجعني شديد و ضميري ما مريحني لأنو بيتك انخرب بسببنا و بسبب مشاكلنا معاها ، صدقني لو كنت عارفه انو النتيجه حتكون كدا من البدايه ما كنت حـ اقول ليك الكلام القالتو لي نور عن سماهر ما كنت حـ اقولو لـ مزن برضو و ما كنت حـ أحكي ليها حاجه تخليها تكره سماهر و تشيلها معاها مع ذلك انا حاولت يا مازن إني ما اجيب ليك سيره و ما أحكي ليك حاجه تاني عشان ما تضايق و تحس اننا ضد مرتك سعادتك و راحتك عندنا بالدنيا كلها والله و مستعدين نمشي في الجمر عشانك والله ...لمن قلت ليهو كدا عيونو أتملت دموع ، غطى وشو بـ يدينو و مسح دموعو النزلت زي الشلال ، استغفر و زح يدينو عن وشو ، طوالي حضنتو و قلت ليهو لو راحتك معاها رجعها طوالي و ما تتردد يا مازن ما بقدر والله ما بقدر اشوفك مكسور بالطريقه دي ، كان ماسك فيني و ببكي زي الطفل ، بعد مسافه قال لي انا ما مستعد اعيش مع وحده ما بتحترم أهلي و فوق دا بتخوني شويه كدا ماما و بابا جوا ، هو طوالي مسح دموعو و قال ليهم انا كويس يا جماعه بس ما عايز نقاش في الموضوع ، ماما قالت ليهو طيب يا ولدي اساساً جينا نشوفك بس...المهم مر أسبوع تاني و مازن دا إتغير 180 درجه ، بقى ما بقعد في البيت و بجي أنصاص الليالي و السجاره بقت ما بتفارق خشمو و صحتو إتدهورت في أسبوع بس طبعاً بابا مشى لأهل سماهر الطلعوا إشاعه و قالوا انو مازن كعب و كان بضربها عشان كدا هي إتطلقت منو و كلو عشان يطلعوا بتهم بريئه قدام الناس ، طبعاً بابا لمن مشى ليهم لفاها معاهم و وراهم عمايل بتهم كلها من الألف للياء و قال ليهم تاني ما اسمع بواحد فيكم جايب سيرة مازن ولدي ، يخسي عليكم والله قايلكم رجال لكن طلعتوا زي نسوانكم ، المهم انا و عدنان كنا متواصلين مع بعض و كذا مره بجي الشركه و بقعد اتونس معاهو بس لاحظت في تغيير حاصل فيهو ، لمن سألتو اتزهج و قال لي كيف يعني اتغيرت عملت شنو انا هسي! ...عشان ما يتزهج بقيت ما بقول ليهو انت اليوم مالك أو ليه بقيت تتكلم معاي كدا بس التغير كان واضح في طريقة تعاملو معاي ، بالجد ما كنت عارفه هو مالو! ما متذكرهـ اني عملت ليهو حاجه بتزعل أو بتضايق! ...تاني رجعت و بقيت داخله في دوامه من التفكير لمدة أسبوعين! ....يوم مزن و هي بتتكلم معاي قالت لي و هي بتضحك ما قلت ليك ، قلت ليها ها في شنو؟ قالت لي حظرت ليان الكلبه الميته ! قلت ليها ما جاده والله! يا مزن دي صحبتك الروح بالروح! قالت لي عليك الله بلا روح معاك دي وحده حاقده و حاسده ساي ، قلت ليها حرام عليك ياخ عملت ليك شنو؟قالت لي لو وريتك حتشميها و تنبذيها معاي و دا المطلوب دي كانت بتقول لي إنو عدنان دا بتاع مزاجات و حـ يتسلى بأختك فتره كدا و بعدين يفكها عكس الهوا و انا عشان اكتشفت انو زول لعب و مغرور و شايف نفسو إنسحبت من حياتو طوالي ، قلت ليها انسحبتي عشان لقيتيهو كعب ولا عشان شبعتي من قروشو! طبعاً هي استغربت انا عرفت من وين ، قالت لي القروش ما بتشري الحب و ما بتجيب راجل و ورجغ ورجغ ورجغ و لو كان انا عايزا قروشو و بس ليه ما كملت معاهو؟ ليه ما عرستو رغم انو كان بحبني و الناس دي كلها بتشهد! كان ممكن أعرسو و ألحس قروشو بمزاااج و بكل أحقيه! قلت ليها يا زوله كلامك دا وفريهو لنفسك و لو بالجد هو زول لعب ما كان وصل بيتنا و طلبها من بابا و على فكره هي القالت ليهو عايزا فترة خطوبه مع إنو عدنان كان مصر شديد انو يعقد عليها ![]()
قالت لي عادي جداً عدنان من النوعيه البعملو أي شي عشان يتسلوا بيهو لفتره معينه ، عادي يكون اعجب بيها بس و قرب منها عشان اعجابو بيها يزول و بكرا بشوف ليهو وحده غيرها و لو عرسها عادي يطلقها وقت ما مزاجو يحكمو و...قاطعتها و قلت ليها مزن إنتِ مصدقاها ولا شنو؟ قلت لي بري ، قلت ليها بس طريقة كلامك ما بتقول كدا! قالت لي لو كنت مصدقاها ما كان حظرتها! المهم قولي لي اها قولي لي حـ تتحبسي متين؟ خطوبتكم تمت الشهر ، قلت ليها اسألي ماما لأني قبيل سمعتها بتتكلم مع خالتو غاده و اظنهم اتفقوا يحبسوني متين ، قالت لي بالمناسبه عدنان دا أبوهو مالو؟ ما شفتو غير مره وحده بس كان جا هنا لـ بابا! قلت ليها لو مهتمه كان عرفتي! ناس البيت كلهم عارفين إنو أبوهو مطلق أمو من زمان و كان برا السودان! قالت لي أنا عارفه إنو كان برا السودان بس ما كنت قايلاهو مطلق أمو ، قلت ليها خلاص هسي عرفتي المهم في اليوم البعدو ما مشيت الشغل و ماما ذاتها قالت لي بعد دا مفروض تتحبسي ، زي العصريه كدا ماما جاتني جاريه و بقت تنادي علي! قمت مخلوعه من السرير و لمن طلعت لقيتها داخله علي و كانت مخلوعه! انا ذاتي إتخلعت و قلت ليها ماما خير في شنو؟قالت لي قالوا غاده دي عملت حادث و هسي في المستشفى ، ابوك من شغلو مشى ليهم و انت اطلعي ارح معاي ، والله جريت غرفتي و ما عارفه نفسي اتناولت شنو ، اتغطيت بيهو و طلعت مع ماما ، ركبنا عربيتها و مشينا ليهم في المستشفى ، كان في كميه من الناس و الحاله الهم فيها خالص ما كانت بتطمن ، من وصلنا بقيت افتش على عدنان بس ما لقيتو ، سألنا خالاتو عن خالتو غاده قعدوا يبكوا بس و قالوا حالتها ما بتبشر بالخير ، العرفتو إنو طقشتها عربيه ، بقيت لافه و بفتش على عدنان يتبع......
