بديت أحكي ليهم بالإنقال عنهم بس من دون ما اقول ليهم الشخصين القالوا لي الكلام دا يلي هم نور و سامي ، لحد ما خلصت ماف وحده قاطعتني و الغربيه انهم ما استغربوا من الكلام القلتو ليهم! يعني كأنهم عارفين انا عايزا اقول شنو! !سكته و بقيت أعاين ليهم عشان اشوف ردة فعلهم شنو! !روان قالت لي طيب مفروض نعمل شنو يا مها!؟ميامن قالت ليها واضح انك ما فهمتيها يا روان ، هي عايزاني نأكد ليها الكلام دا! !...اذا إنتِ يا مها شايفاني كدا فـ آسفه لأني ما حـ أبرر ليك ، دامك بتسمعي من الناس فـ امشي اسمعي منهم العايزاهو و نحنا ما حـ نشرح أو نبرر ، روان قالت لي دي البت الإسمها نور هي القالت ليك كدا صح؟ ....ما تستغربي نحنا عارفين بالحصل بينك و بين سماهر بسبب بت عمها دي ، لو ما نور الألفت ليك الكلام دا معناها سامي هو القال ليك كدا و ملى ليك راسك و يا ستي زي ما قالت ميامن نحنا ما حـ نبرر ليك و لو عايزا تقطعي علاقتك بينا بسبب الكلام دا فـ على كيفك ، قلت ليها بس انا ما قلت كدا! !ميامن قالت لي ما قلتي كدا لكن بتلمحي للحاجه دي و يا ستي اصلاً حركاتك بقت واضحه من اتخرجنا خلاص إفتريتي ، لو عايز تفصليها مننا أفصليها عادي بس من دون ما تلصقي فينا كلام لا عملناهو لا فكرنا فيهو من الأساس ، روان قالت لي أنا بالجد مصدومه فيك يا مها ، الزمن كلو كنتِ كاتله حيلك و عامله فيها مسكينه! ! يعني كنتِ بتمثلي علينا؟ تاني حاجه نحنا ما حصل شحدناك حاجه عشان تجي تقولوا اننا استغليناك براك كنتِ بتدفعي لينا حتى الهدايا براك بتجيبيها من دون ما نحسسك انو لازم تجيبي لينا ، ميامن قالت لي هسسسي دي أحسبي لي كل قرش دفعتيهو لي من يوم عرفتك لحد اليوم دا ، سجليهم لي عشان ادفعهم ليك....فتحت شنطتها و مدت لي قروش و قالت لي دي حقت العصير الطلبتيهو لينا دا ، قلت ليها ميامن ....قاطعتني و قالت لي أمسكي قروشك دي ، لمن ما مسكتهم منها ختتهم لي على التربيزه و وقفت على حيلها و قالت لـ روان حـ تمشي ولا حـ تقعدي تسمعي في المهزله دي؟روان قالت ليها بري البقعدني شنو! .....وقفت على حيلها و قالت لي ما كنت قايلاك كدا ، انا ذاتي سجلي لي القروش العايزاها مني عشان ادفعها ليك بس كويس اننا عرفنا حقيقتك ، ميامن قالت ليها نحنا عرفنا حقيقتها بس سماهر ما حـ تصدقنا لأنها مخدوعه فيها يا حليلا ، قلت ليهم انا ما عايزا منكم ولا قرش و......ما إنتظروني أكمل و طوالي مشوا .....بقيت ببكي بس! مع انهم ما جاوبوا على الأسئله الفي بالي بس طريقة تعاملهم المعاي و كيف انهم قلبوا الأدوار و طلعوني كعبه بتثبت لي انو صحبتنا كانت مهزوزه و انهم فعلاً بتاعين مصالح و هسي عشان خلاص اتخرجنا و ما عايزين مني حاجه قرروا يفصلوني! !بس عايزا اعرف عملت ليهم شنو أنا؟ ليه ما عايزني بيناتهم؟ لنفترض انهم من البدايه صاحبوني عشان مصلحتهم بس معقوله تعاملي معاهم طول السنين دي ما غيرهم!؟ معقوله ما حصل حبوني زي ما أنا بحبهم؟اثناء ما أنا ببكي كدا حسيت بزول قعد في الكرسي المقاصدني! لمن رفعت راسي لقيتو عدنان ، قال لي إنتِ ليه بكايه كدا؟ لمن عرفتك ما كنتِ كدا!سكته ما رديت عليهو كنت ببكي بس ، قال لي سمعت الكلام الكان بيناتكم انتِ و صحباتك مع عارف بس من طريقة كلامهم معاك حسيتهم كأنهم ما صحباتك ، عايني اختصري على نفسك و أنهي المهزله دي ، منطقة الوسط دي أصعب منطقه بتخليك لا قادر ترجع لا قادر تواصل ، هسي اسألي نفسك سؤال ، انتِ متأكده انو ديل بتقدري تاني تقولي عنهم صحباتك؟ ؟اذا جاوبك نعم معناها انسي الحاصل و واصلي معاهم أما لو لا فـ طوالي أفصليهم و ما تتعبي نفسيتك أكتر هم الخسرانين ما إنتِ لأنك ما غلطتي و ما قصرتي معاهم و طبعاً دي نتيجة العطاء المفرط ، قلت ليهو انت ليه متأكد انهم غلطانين و أنا لا؟ ؟قال لي اصلاً انتِ واضح عليك انك بت بسيطه و ساذجه و على نياتك أما بالنسبه لصحباتك ما حـ اقول ليك واضح عليهم بس سامي سبق و حكى لي عنهم و انهم بستغلوك ، طبعاً دا في اليوم القال ليك فيهو حقيقتهم ، لمن إتلاقيت معاهو كان زهجان و متضايق لأنك ما صدقتيهو ، قلت ليهو كان صعب علي أصدق الكلام دا ، دي 4 سنوات يا عدنان ما شفت فيها شينه منهم أو بالجد كانت في شينه بس انا ما كنت منتبهه لتصرفاتهم ، بس نفسي اعرف ليه هم عملوا كدا؟ مالي أنا؟قال لي ما تستغربي في الزمن دا عادي تلقي مريض نفسي بكرهك من دون سبب ، حسب كلام سامي انتِ كنتِ محبوبه من الجامعه كلها و يمكن للسبب دا هم بكرهوك لأنهم ما قدروا يكونوا زيك ، و أصلاً هم من أول سنه كان عندهم مشكله معاك صح؟هزيت ليهو راسي بمعنى ايوه ، قال لي بس القصه بقت واضحه و ذاتا ما كانت عايزا ليها تفكير كتير ، المهم دا حيكون ليك درس لقدام ، لو صاحبتي تاني حاولي ما تتعمقي و ياريت تبطلي سذاجه و طيبه زايده عن اللزوم لأنها هي الحـ تلفت نظر الناس ليك و تخلي معظمهم يستغلوك ، قلت ليهو هسي اعمل شنو؟قال لي هسي انا كنت بقول ليك في شنو؟قلت ليهو ما قصدي ديل ، قصدي سماهر صحبتي الحـ يعرسها أخوي ، قال لي إنتِ شايفه شنو بعد العرفتيهو عنهم؟قلت ليهو هي بالذات ما قادره احدد موقفها و غير كدا لو قلت عنها أي حاجه او حاولت ألمح لـ مازن أخوي حـ يزعل مني ، قال لي في الحاله دي ما عارف انصحك بشنو لأنو موضوعها هي بالذات بقى ما مربوط بيك انتِ و بس عشان تقدري تتخلصي منو ، اخوك انا ما بعرفو شديد بس لاقيتو 3 مرات في آخر مره دي كلمني بعرسو و في أثناء كلامو هي اتصلت عليهو ابتسم و على طول استأذن مني و مشى اتكلم معاها لمن جا راجع ما قدر يخفي بسمتو مع اني ما سألتو بس هو شدة ما فرحان بيها حكى لي عنها و انو ما مصدق انهم خلاص حـ يكونوا لبعض ، فـ بالجد النقطه دي صعبه و حساسه ، بقيت ساكته و بعاين ليهو و انا مستغربه كيف هو فجأه بقى يتكلم معاي عادي و انا بقيت أحكي ليهو كأني بعرفو من زمان ، بعد سكوت قلت ليهو اممم انت عشان جربت الخذلان عشان كدا متأثر و شايل هم مازن؟لمن قلت ليهو كدا عاين لي بخلعه كدا! قلت ليهو بس هي الخسرانه ما إنت ، لسه كان بعاين لي بنفس الإستغراب بس شويه شويه الإستغراب دا إتلاشى فـ قال لي عرفتي من سامي صح؟قلت ليهو ايوه كان حصل و سألتو عنك و عن ليه انت بتتعامل مع الناس كدا! قال لي بتعامل كيف؟قلت ليهو يعني ما عارف نفسك ولا ناسي كيف انك اتعاملت معاي في اول يوم اشوفك فيها و في المرات البعدها!قال لي كنتِ شليقه و ساذجه و حشريه اعمل ليك شنو يعني!؟ قلت ليهو شنوووو شنوووو؟ ؟؟ انا حشريه؟ كويس ذاتو الغلط غلطي أنا لأني حاولت اغيرك ، قال ما فهمت كيف يعني تغيريني؟قلت ليهو هسي انت شايف نفسك طبيعي و زيك زي باقي الناس؟ غيتو براي اتحديت سامي و صحباتي و قلت ليهم حـ اغيرو حتى اني كنت واثقه من الحاجه دي بس حدث ما حدث و بعترف إني فشلت 🙂قال لي المهم ما علينا ، عاين لـ ساعة يدو و قال لي ما حتمشي بعد دا؟قلت ليهو لا أمشي إنت ، قال لي ما مستعجل و اصلاً ما عندي شغلما عارفه بس حسيتو كان عايز يمشي بس اول ما انا قلت ما حـ أمشي ، غير رأيو .....من جواي إنبسطت و بالجد حسيت انو في شي فيهو إتغير ، المهم قعدنا كدا لمن تعبنا من القعده ، ما أكذب لا تعبت لا زهجت و اتمنيت انو قعدتنا دي تطول بس كان لازم نمشي ، المهم مشينا سوا و هو وصلني لحد البيت ، نزلت من عربيتو و انا محاطه بـإحساسين احساس خذلان و احساس أمان لأني كنت مع عدنان ....من اليوم داك بقينا شبه متواصلين مع بعض ، لأنو هو اغلب الوقت بكون مشغول بس اول ما يحس إني متضايقه من حاجه برسل و بفضل يتكلم معاي كدا لحد ما يخفف عني ، طبعاً سماهر اتصلت علي و قالت لي صح انتِ قلتي اننا استغليناك و تاني فتحتي موضوع نور و و و قلت ليها لو بالجد انا شايفاكم كدا ما كنت صاحبتكم من الأساس و ما كنت جبت ميامن و روان عشان اقول ليهم الفي نفسي ، قالت لي بس كونك تسأليهم و تقولي الإنقال ليك عننا فـ دا معناهو انك مصدقه الكلام ، قلت ليها صدقيني تصرفاتكم الآخيره هي الجبرتني اسأل ، انتِ ما ملاحظه كيف انكم في الفتره الأخيره بقيتوا تتكلموا و تتعاملوا معاي! !؟ لو انا عملت ليكم حاجه ضايقتكم كلموني بس ما تستخدموا معاي أسلوب الجفا دا من دون ما تفهموني حاجه ، قالت لي بتموتي في الدراما يا مها و انا ذاتي تعبت من الشرح و التبرير بعد دا إنتِ حره و طق قفلت التلفون ، قلبي وجعني شديد ، طوالي اتصلت على عدنان و حكيت ليهو قال لي مفروض بعد دا خلاص تكوني فهمتيهم ، كفايه زعل و بكى لأنهم ما بستاهلوا دا كلو.....المهم في اليوم البعدو عملنا حفلة الحنه حقت مازن ، ما كنت مبسوطه بس غصبت نفسي و بقيت أبتسم ، طبعاً كل اصحاب مازن في الشركه و خارج الشركه جوا حفلتو حقت الحنه ، بالصدفه سمعت مازن بسأل واحد من أصحابو عن عدنان و انو ليه ما جا ، طبعاً اول ما جابوا سيرتو قلبي عمل شححح و بقى يضرب بسرعه! صاحبو قال ليهو انشغل شويه ، مازن قال ليهو مع إني كلمتو قبل اسبوع و عزمتو للعرس ، صاحب مازن قال ليهو عدنان دا شكلو ما ليهو في جو الحفلات و التجمعات دي! ....طبعاً زعلت شديد عشان هو ما جا! ....يعني مدام مازن عزمو ليه ما لبى دعوة مازن! !طوالي شلت تلفوني و إتصلت عليهو ، اول ما فتح الخط قلت ليهو انت مدام مازن عزمك لحفلة حنتو ليه ما جيت؟قال لي كنت مشغول ، قلت ليهو معقوله ما قدرت تفضي نفسك ساعه أو اتنين عشان تحضر حنة مازن؟قال لي ما قدرت و بعدين أنا ما لي في أجواء الحفلات دي! قلت ليهو ما كنت حتموت لو جيت!قال لي كنت مشغول! ! و بعدين ليه إنتِ متضايقه كدا! بوجودي أو بعدمو الحنه دي حـ تكتمل! !قلت ليهو ما كدا بس ما حلوه انو زول يعزمك و ما تستجيب ليهو 😊قال لي عادي بتوصلني دعوات كتيره و ما قاعد امشي ليها ، قلت ليهو اهاااا يعني إنت ما جيت عشان مشغول! ! ما جيت لأنك ما عايز تجي!قال لي هو حقيقة انا ما بحب الحفلات و التجمعات خاصة لو ماف معرفه شديده كدا بيني و بين الناس المفروض امشي ليهم! .....طبعاً كلامو زعلني زعل!قلت ليهو لو مازن ما كان بعرفك و ما بتعرفو ما كان عزمك ، يعني في النهايه نحنا طلعنا ناس مجهولين بالنسبه ليك صح؟ تمام يا زول ، قلت ليهو كدا و طوالي قفلت الخط ، اتصل علي بس ما رديت عليهو .... بس تاني يوم لمن اتصل ما قدرت امنع نفسي فطوالي رديت عليهو ، قال لي في شنو يا بتنا ليه امبارح قفلتي الخط و ما رديتي علي! ؟قلت ليهو يعني إنت عادي تتكلم مع وحده ما بتعرفها؟ ....قال لي مع انو الموضوع ما مستاهل الزعل دا بس آسف لو كلامي زعلك! .....طبعاً طبعاً أخدت دقيقه كامله عشان استوعب انو اعتذر مني! !ضحكت و قلت ليهو عدنان إنت كويس؟ قال لي اي مالي؟ قلت ليهو سامع نفسك قلت شنو؟ قلت لي آسف ، اعتذرت مني يا متكبر ، قال لي اعمل شنو انتِ جبرتيني! قلت ليهو جبرتك شلت ليك مسدس؟قال لي خلاص أنسي ، قلت ليهو لا قول لي شنو الخلاك تعتذر مني و انت ما النوع البحب يعتذر من الناس؟قال لي خلاص بسحب اعتذاري ، قلت ليهو لا جاوبني ، قال لي أنسي ، يلا هسي انا مشغول ، بعد ما قفل الخط حضنت التلفون و قعدت اتبسم براي 💜المهم بعد 3 أيام كان عرس مازن ، من الصباح ناس البيت جايطين و بيتنا مليان بأهلنا الجو من البلد و مزن دي من الصباح جرت الكوافير إلا أنا ما حاسه بطعم سعاده ، طبعاً لو ما كلام الناس زي ليه لسه ما جهزتي و ليه لسه قاعده مبشتنه كدا و انتِ اخت العريس ما كان جهزت نفسي ، طبعاً مازن دا من الصباح لافي في البيت داخل و طالع و الفرحه ما كانت سايعاهو ، ناداني و قال لي شوفي لي ملابسي و لو محتاجه مكوه أكويها ، من دون نفسي قلت ليهو طيب ، قال لي مالك صاره وشك كدا؟قلت ليهو ولا شي ، المهم مشيت منو و اتأكدت انو ملابسو جاهزه و كل عطورو في محلها ، غيتو اليوم دا كلو لحد ما مشينا الصاله ما فهمت ليهو حاجه ، كل الفهمتو و البقيت متأكده منو اني ما مرتاحه للعرس دا 💔يتبع......
