سكته لمن لقيت الواقف قدامي دا ما مازن! !قلت ليهو عدنان! !!هو ذاتو اتفاجأ لمن شافني! ....قال لي إنتِ؟ ....فجأه مازن جا و قال ليهو اتفضل اتفضل يا أبو الشباب ، عاين لي و قال لي لسه قاعده في المكتب! ...دي أختي و يا مها دا عدنان من الشركه القطريه القلت ليك عنها ، قلت ليهو اتشرفنا و انا بضحك ساي لأني مسبقاً بعرفو ، هز لي راسو بس ، مازن عاين لي و رفع لي حاجبو نظام بتضحكي ليه! قلت ليهو بابا لسه ما طلع؟قال لي لسه ، اتفضل يا أستاذ ، عدنان دخل و هو بعاين لي ، مازن طلع ليهو كم ملف كدا و مداهم لـ عدنان ، مسكهم و بقوا يراجعوهم الإتنين سوا و انا بعاين ليهم ساي ، أو خليني اقول بعاين لـ عدنان 💜 اتمنيت الزمن يقيف في اللحظات ديك ، عايزا اقعد اشوفو العمر كلو ، ما عارفه بس حاسه نفسي غرقانه في تفاصيلو ، في كل مره أشوفو فيها بحس بالبرد و انو في احساس غريب كدا و حلو في نفس الوقت محاوطني ، حتى دقات قلبي بتكون ما منتظمه و في رعشه خفيفه كدا بتصيبني لمن أشوفو......دا لو ما كان حب حيكون اسمو شنو؟ .....بكامل قواي العقليه بعترف إني بحب عدنان ، بحبو؟ لا انا حاسه نفسي بعشقو عديل من دون أي مجهود منو انا بحبو ، من دون سابق معرفه انا بحبو ، من دون ما نتعاملض كتير مع بعض و نشوف بعض يومياً انا بحبو ، حتى في الأحلام و الخيال بحبو .....فجأه كدا مازن قال لي يا مها! بخلعه قلت ليهو ايوه ايوه! طبعاً اتحير فيني! قال لي في ملف لونو أزرق في الدرج الجنبك دا ناوليني ليهو ، قلت ليهو طيب ، فتشت الأدراج كلها بس ما لقيتو ، قلت ليهو ما موجود! قال لي كيف يعني ما موجود ، قام من مكانو و جا يفتش الأدراج و برضو ما لقاهو ، قال لـ عدنان معليش ، انتظرني دقايق بس اجيب بيها الملف ، عدنان قال ليهو تمام ، مازن طلع مستعجل و من ضيقو و ملامح وشو واضح انو الملف دا مهم! بعد ما طلع انا و عدنان بقينا ساكتين ، كسرت الصمت دا و قلت ليهو سامي دا إختفى وين؟من دون ما يعاين لي قال لي مختفي بالنسبه ليك لأنو موجود ، قلت ليهو طيب ممكن تتصل لي عليهو ، قال لي تلفونك مالو؟ لمن لقاني ساكته قال لي يعني لحد اللحظه دي ما برد عليك ؟هزيت ليهو راسي بس ، طلع تلفونو ، اتصل على سامي و مد لي التلفون ، عاينت للباب و شلتو منو ، اول ما مسكتو كدا سامي فتح الخط و قال ليهو اوووو عدنان بذات نفسو متصل ، قلت ليهو سامي!بتردد قال لي منو؟قلت ليهو معقوله ما عرفتني؟قال لي مها!قلت ليهو ايوه! طبعاً زعلانه منك شديد! ممكن تجاوبيني يا أستاذ ليه ما بترد علي! في شنو يعني فهمني!قال لي ولا شي كنت مشغول ، قلت ليهو يا سلام يعني انشغالك دا ما بخليك ترد علي بس بخليك ترد على غيري! قال لي عدنان وين دا مش تلفونو! !قلت ليهو خليك من دا و جاوبني ، قال لي جاوبتك و قلت ليك كنت مشغول! قلت ليهو دا شغل شنو الما بخليك تشوف مكالماتي و رسايلي! لمدة 3 أسابيع أو أكتر! ....قال لي اها اتصلتي عشان تقولي لي شنو! قلت ليهو ممكن نتقابل!؟قال لي مشغول و ما عندي زمن فاضي ....سكت مسافه بعدها قال لي ريحي نفسك ، انا عارف إنتِ عايزا تقولي شنو ، طبعاً استغربت شديد لمن قال لي كدا! ....قلت ليهو ما فهمت!قال لي ما عارفه نفسك عايزا تقابليني ليه!؟ يا ستي انا عارف ماف داعي تزيدي علي المواجع و ما ضروري تقولي لي الكلام في وشي ، انا خلاص عرفت انا شنو بالنسبه ليك!سكته ساي و بقيت اقول سامي دا قصدو شنو؟ يعني معقوله يكون عرف بالقلتو لمن عرفت إنو بحبني! عرف كيف طيب! !_ ما تفكري كتير! يعني حـ اكون عرفت من منو؟ دي عايزا ليها تفكير ، عرفت من البتقولي عليهم صحباتك ، صوروا الدردشه حقتكم و رسلوها لي عشان يغيظوني و يحرقوا قلبي و فعلاً نجحوا في الحاجه دي ، و اوعك تقولي لي فاهم غلط و هم حيستفيدوا شنو من دا! هم عارفين اني وريتك حقيقتهم عشان كدا عايزين يطلعوا فيني كلام و يخلوك بعيده عني و نجحوا في دا و انتِ الأديتيهم فرصه ، عموماً دي نصيحتي الآخيره ليك : فتحي عيونك كويس "بقيت ساكته ساي و انا بحاول استوعب في الكلام البقولو لي!! كيف يعني هم الرسلوا ليهو دردشتي معاهم!قلت ليهو سامي انت.....ما انتظرني اكمل ، قفل الخط في وشي ، نزلت التلفون و انا مصدومه شديد! معقوله يكون في سوء تفاهم!؟ لمن رفعت راسي لقيت عدنان بعاين لي ساي و شكلو مركز معاي من قبيل ، قمت من مكاني رجعت ليهو تلفونو و طلعت من مكتب مازن حتى كلمة شكراً دي ما قدرت اقولها ليهو ، طلعت و اتكلت مع الحيطه! فجأه تلفون رن ، المتصل كان سامي ، اول ما فتح الخط قال لي ادخلي الواتس و قفل الخط ، فعلاً دخلت الواتس لقيتو مرسل لي صوره ، انتظرتها لحد ما تتحمل و اول ما ظهرت قدامي اتفاجأت بإنها اسكرين شوت لكلامي القلتو ليهم في القروب! روان هي الرسلت ليهو الكلام دا!طوالي اتصلت عليها ، اول ما ردت علي ، قلت ليها ليه نقلتي كلامي القلتو لـ سامي؟قالت لي بسم الله يا مها كلام شنو؟ قلت ليها عامله اسكرين شوت لـ رسايلي القلت فيها انو سامي زي اخوي و اني ما بحبو!قالت لي اااا صح اتذكرت بس ما فيها حاجه يا مها ، شفت انو حيكون صعب عليك تكلميهو بالحقيقه دي فـ عشان اساعدك شويه و نختصر ليهو الكلام عملت اسكرين شوت للدردشه و رسلتها ليهو ، طوالي قفلت منها لأني بالجد زعلت ، ما كنت عايزاهو يعرف بالطريقه دي! براي كنت حـ اقعد معاهو و اكلمو! متأكده انو لو كان قعدت معاهو قبل الإسكرين دا و اتفاهمنا ما كان حيزعل مني و يفصلني بالطريقه دي ، اتصلت عليهو بس تاني ما رد علي ، رسلت ليهو رساله في الواتس محتواها : خليني اشوفك يا سامي عشان نتفاهم برواقه لأنو ما معقوله تخاصمني بسبب موضوع تافه ، في نفس اللحظه رد علي و قال لي موضوع تافهه؟ شايفه حبي ليك تفاهه؟طبعاً لمن قال لي كدا حسيت قلبي خلاص حـ يقيف ، قلت ليهو جات بالغلط بس خلينا نتقابل رجاءً ، قال لي عارف العايزا تقوليهو= طيب دامك عارف ليه زعلان مني و بتتعامل معاي كدا؟ ...سامي انت زي أخوي والله و عمري ما فكرت فيك بطريقه تانيه ....قرا رسالتي و ما رد علي ، تاني كتبت ليهو : معليش شديد و ربنا يجبر خاطرك و يرزقك بت الحلال البتستاهلك و البتستاهلها بس انا لا يا سامي خلينا حلوين زي ما كنا ، انت أخوي ، أخوي و بس يا سامي ، برضو قرا الرساله دي و ما رد عليها ...شويه كدا بابا جا طالع و قال لي نمشي؟ قلت ليهو ايوه ، ركبت معاهو و رجعنا البيت و انا ما على بعضي! باقي اليوم داك كلو قضيتو تفكير في موضوع سامي دا و كلام نور معاي! ! للحظات دخل الشك جوه قلبي! شلت تلفوني و إتصلت على سماهر ، لمن ردت علي سلمت عليها عادي و سألتها عن أخبارها و هي كذلك ، في النهايه قلت ليها يا سماهر إنتِ بتعرفي وحده إسمها نور؟قالت ليها دي منو دي كمان!؟ نور الوحيده الأنا بعرفها في حياتي هي نور بت عمي! !قلت ليها اهااا ، قالت لي بتسألي ليه؟ .....اتنهدت و قلت ليها خشي الواتس ، لمن دخلت الواتس رسلت ليها صورة نور و قلت ليها دي بت عمك؟قرت رسالتي بس ما ردت علي بالعكس إتصلت اول ما رديت قالت لي آي دي بت عمي و عرفت انها شغاله في شركتكم ، قلت ليها قبل كدا انا رسلت ليكم صورها ليه ما قلتي لي إنها بت عمك و اتصرفتي عادي كأنك ما بتعرفيها و ليه ما حصل جبتي لينا سيرتها و قلتي لي انها شغاله في شركتنا ؟!!!قالت لي صراحة انا و هي بيناتنا خلافات كتيره و الإتنين ما بنطيق بعض عشان كدا ما بحب اجيب سيرتها و ذاتو ما بشرفني اقول دي بت عمي! !سكته و ما قلت حاجه ، قالت لي سؤالك دا ما ساي ، في شنو قولي لي؟ ؟صراحة ما قدرت اسكت لأنو الموضوع دا بالجد متعبني فـ طوالي حكيت ليها بالقالتو نور ، بعد ما خلصت قالت لي ما مصدومه لأنو نور أصلها كدا ما بترتاح لو ما خربت لي حياتي ، بس الصادمني انك صدقتيها عشان كدا اتصلتي علي عشان تستفسري! !! قلت ليها بالعكس يا سماهر انا ما مصدقه ولا كلمه من الكلام القالتو بدليل اني ما جبت ليك سيره خالص مع انها قالت لي الكلام دا قبل فتره ، قالت لي سؤالك دا بقول انك شكيتي فيني و لو بالجد يا مها شايفاني ما مناسبه لأخوك أو طمعانه في قروشو هسي بنهي قصة العرس دا ، بإستعجال قلت ليها لا لا يا سماهر ما تفهميني غلط والله ما قصدي حاجه بس حبيت اطلع الجواي و اقول ليك بالسمعتو من نور عشان هي القالت لي انها بت عمك فأنا استغربت و حبيت اتأكد هي بت عمك ولا لا ، قالت لي حصل خير ، قلت ليها ما زعلانه مني؟قالت لي لا ، المهم قفلنا على كدا ، تاني يوم لمن فتحت الواتس لقيت عدنان رادي على الإستوري حقي و كاتب لي : أي زول ساذج و بتعامل بحسن نيه و اندفاع أكتر من اللزوم صدقيني حـ يتخذل و يتكسر! !قريت كلامو دا تلات مرات و إنبسطت كونو رد علي ، قلت ليهو لو انت اخترت الناس الصح ما حـ تتخذل فيهم ، اهم شي تثق في اختياراتك ،، بعد مسافه رد علي و قال لي المشكله هنا ، الإختيار ما حاجه ساهله لأنو ماف زول بكون مكتوب على جبينو إنو سيئ الناس دي كلها بتكون كويسه و حلوه في البدايه ، وسخهم و غدرهم بظهر في النهايه ، قلت ليهو الناس الكويسه بكون ظاهر عليها ، قال لي شنو البخليك واثقه للدرجه دي؟ ؟قلت ليهو عشان اختياراتي صح و عشان الناس الكويسه بكونوا ظاهرين ما حصل اتخذلت في زول ، ما حصل اتعرفت على زول و في الآخر اكتشفت انو ما كويس أو ما بحب لي الخير ، الحمدلله كل الناس المحيطين بي بحبوني و بحبهم و مستحيل يجي يوم و اتخذل فيهم ، قال لي الواحد مهمها كانت نيتو صافيه و انسان مسالم لازم يكونوا عندو مساحة خاصه ، ما كل زول بتتعرف عليهو بتجيبو بيتكم كذلك ما كل زول عرفتو بدخلو توووش كدا على حياتك و زي ما قلت ليك كل الناس كويسه في البدايه ، بتمنى ما تتخذلي في ناسك ديل لكني على قناعه انو الشخص الساذج و البتعامل بتلقائيه مع الناس بكون زي المغناطيس بجذب الصالح و الطالح ، قلت ليهو غيتو ما فهمت كلامك دا ، قال لي ما فهمتيهو ولا ما عايزا تفهميهو؟ ؟المهم بقيت ارد عليهو و هو كذلك ، بنتجادل في نفس النقطه ، يمكن ساعه كامله و نحنا بنرد على بعض! !سبحان الله عدنان دا كل حاجه فيهو جذابه حتى كلامو! رسايلو دي كلها عملتها ليها اسكرين شوت و زخرفتها و زينتها بـ تطبيق و احتفظت بيهم في ألبوم براهو ، ياخ لمن يكون "جاري الكتابه " بتمنى انو ما يوقف خالص ، حروفو دي انا بقيت بتنفسها عديل و بقيت أحب اخلق موضوع عشان يجاادلني فيهو و قصداً بتغالط معاهو عشان يتكلم معاي أطول فتره ممكنه ، في الأسبوع دا ما مر يوم من دون ما نتجادل في حاجه ، يوم اثناء ما انا بغالطو في حاجه في الواتس فجأه كدا سمعت صوت الباب و من طريقة الطرق عرفت انو دا مازن ، قلت ليهو ادخل يا مزوووني ، جا داخل علي و هو متضايق ، قعد قصادي و عاين لي بنظره حاده! ، طبعاً دخولو و هو ساكت كدا و نظراتو لي خلوني استغرب! قلت ليهو في حاجه؟ ؟قال لي بنبرة ضيق : نور قالت ليك شنو عن سماهر؟قلت ليهو نـ ... نور منو؟قال لي عايني ما تلفي و تدوري لي يا مها ، عديل كدا وريني نور قالت ليك شنو عن سماهر! !قلت ليهو انت منو القال ليك نور قالت لي كلام عن سماهر! جايب الكلام دا من وين؟قال لي ما أعيد كلامي دا تاني! قلت في نفسي معقوله يكون عرف من نور !؟ ولا سماهر ....لا لا ياخ هو عارف لأنو نور قالت لي انو هي رسلت ليهو برقم تاني و ورتو الكلام دا ، بس ما اشتغل بيها فـ ليه جاي يسألني هسي و ذاتو عرف من منو انو انقال لي كلام عن سماهر! !؟؟بلعت ريقي و قلت ليهو نور قالت لي ..........الخلمن خلصت كلامي جاط فيني و قال لي شافعه انتِ عشان و انتِ تصدقيها و تمشي تسألي سماهر ولا غبيه و ما عندك مخ ؟ قلت ليهو مازن انا ...قاطعني و قال لي البت دي رسلت لي الكلام دا برقم تاني و عشان عارف نور و خباثتها ما اهتميت بالرساله الوصلتني و طوالي حظرت الرقم لأني ما بثق في نور و غير كدا انا بعرف سماهر كويس و دا الكان مفروض تعمليهو انتِ و ما تصدقي الإنقال ليك ، قلت ليهو طيب عارف إنو نور بت عمها؟ ؟قال لي آي عارف .... صدقي ما اتوقعتك غبيه للدرجه دي! نور دي بتعرفيها معرفة من متين لمن تصدقيها و تكذبي صحبتك الليكم 4 سنوات مع بعض؟ !! عشان كدا كنتِ متغيره الفتره دي و ما شايفك مبسوطه بموضوع زواجي دا! أكيد ما حـ تنبسطي و انتِ نور ماليه ليك راسك بالكذب! !قلت ليهو بصوت باكي والله ما صدقتها يا مازن و دا شنو الكلام البتقول فيهو دا! كيف يعني ما انبسط ليك! ، قال لي ما عايزك تاني تباري لي البت الإسمها نور دي تاني ، بسبب الموضوع دا سماهر كانت حـ تلغي فكرة العرس دي من الأساس كلو عشان انتِ مشككه في نيتها! قلت ليهو هي قالت ليك كدا؟ هي الورتك؟قال لي اتخيلي ما كانت ناويه تكلمني! اسبوع كامل و هي متغيره علي و لمن ضغطتها شديد و أصريت عليها كلمتني! ....المهم ما أعيد الكلام دا تاني ، نور دي خليك بعيده عنها و إياك تاني تتصرف من عندك و تفاتحي سماهر في موضوع زي دا و تخليها تزعل و تحس انها ما بتستحق تكون معاي ، قال لي كدا و طوالي قام و طلع من غرفتي و خلاني مخلوعه! ! مخلوعه بس؟ لا انا مصدومه بالجد! مازن ما حصل اتكلم معاي بالنبره دي عشان بت!! .....انا ما غيرانه منها بس هو بالجد على غير عادتو المره دي ما انصفني و سمعني للنهايه! طول عمرو كان بفهمني حتى قبل ما اتكلم و لمن اغلط ببرر لي! هسي الإتغير شنو؟ ؟من هنا خلاص الرؤيه بدت تتضح لي و كل حاجه ما كانت ناويه تدخل راسي دخلتو و اي كلام أو ملاحظه ما أديتها اهميه هسي بقيت افكر فيها و اتذكر في كلام سامي القالو عنهم و مواقفهم بعد ما نتخرج و قبل ما نتخرج بذات سماهر! !بعد نص ساعه تقريباً ، تلفوني رن ، اول ما مسكتو و شفت إسم المتصل لقيتها سماهر! !يتبع...
