زي الساعه 10 كدا جاتني رساله من رغم غريب في الواتس ، قبل ما افتحها عرفتها جايه من منو ، قلت طوالي حـ أحظرو لو دا هو.....
اول ما فتحت الرساله لقيت مكتوب فيها السلام عليكم ، مها كيفك ، قلت ليهو منو؟
كان متصل فطوالي جاتني منو رساله مكتوب فيها: قولي بسم الله و ردي السلام أول 😊
قلت ليهو بس قول لي إنت منو؟
رسل لي : أنا ملك سكرتيرة مستر هشام ، العايزا اقول ليك انو مطلوب منك تنضمي للقروب تبع الشركه الخاص بـ قسم التسويق لأنو لاحظوا انك ما فيهو ، المهم دا الرابط......
طبعاً حسيت نفسي اتسرعت ، قلت ليها طيب و طوالي عملت إنضمام للقروب ، شويه كدا جات رساله من مستر هشام كاتب فيها مرحب بيك يا مها ، قلت ليهو أهلاً ، قال لي خليك في قروبات الشركه عشان لو في حاجه مهمه تكوني على عِلم بيها ، قلت ليهو حاضر ، المهم بعدها قفلت تلفوني و نمت .....
تاني يوم صحيت بدري صليت الصبح و جهزت نفسي و مشيت الشركه اول ما وصلت كدا شفت مستر هشام شايل بتو و ماشي قدامي و كان بتكلم بالتلفون ، شويه كدا بقى يعلي في صوتو و سمعتو قال: دي ما بتك براك و بعدين ما أنا الشلتها و طلعت بيها غصب عنك هي الما عايزاك لأنك أم مهمله .......عايني انا ما فاضي ليك و دا العندي........حرام علي شنو؟ ....اقول ليك بتك هي الما عايزاك يعني أخليها معاك غصب عنها عشان تتشق بالبكى؟ .......السؤال دا اسأليهو لنفسك ...
قال كدا و طوالي قفل الخط و دخل جوه الشركه ، قلت شكلها دي مرتو و واضح انو متشاكل معاها! .....ما علي بيهم المهم دخلت الشركه و على طول مشيت باشرت شغلي ، لمن جا البريك مشيت الكافتيريا و فطرت ، بعدها قلت امشي و اشوف الحاصل شنو بخصوص الوفد ، أثناء ما أنا ماشه على مكتب مستر هشام كنت سامعه صوت جوطه شديده ، ما ركزت و ما ساقني الفضول عشان أعرف الحاصل شنو ....واصلت مشي في الممر ، فجأه سمعت صوت بقول هديك ليها ، أول ما إتلفت شفت أرجوان و معاها كذا موظف كدا و عناصر شرطه جاين علي! ....اتخلعت شديد و عاينت وراي عشان اتأكد اذا هم ماشين علي ولا لا! .....في واحد سبقهم و جا علي و أول ما وصلني قال لي بنبره عاليه إنتِ وحده خاينه و غشاشه و بقى يجوط فيني و الموظفين كلهم خلوا شغلهم و جوا يتفرجوا و انا طبعاً لحد اللحظه ديك ما فاهمه حاجه! ....قلت ليهو دقيقه في شنو؟
قال لي بتسألي كمان! انتوا شركه مخادعه ولازم تتحاسبوا ، أرجوان قالت ليهو الشركه ما ليها دخل بالشغل العملتو البت دي ، ايوه هي موظفه في الشركه بس شغلها دا الشركه ما ليها دخل فيهو عشان كدا ما تسئ للشركه ، قلت ليهم في شنو؟ ما فاهمه حاجه أنا! ....الراجل كان عايز يتكلم بس الشرطي رفع ليهو يدو و قال ليهو أسكت ، إتلفت علي و قال لي معانا أمر قبض ضدك بتهمة النصب و الإحتيال .....إتخلعت و خفت شديد و قلبي بقى شغال دق دق و عيوني إتملت دموعي ، قلت ليهو بصوت باكي بس انا ما نصبت على أي زول ، أكيد انتوا غلطانين ، قال لي دا ما وقت نقاش خلينا نشوف شغلنا و ياريت تتفضلي معانا ، طوالي دموعي نزلت و دخلت يدي جوه جيب الجاكيت الكنت لابساهو عشان اطلع تلفوني و اتصل على بابا أو مازن يجوا يلحقوني بس ما لقيتو ، قلت للشرطي انا ما عملت حاجه ، ما بمشي معاكم ، الراجل قال لي غصب عنك هتمشي عشان تاني ما تاكلي حق الناس ، العسكري قال لي اتفضلي لو سمحتي عشان ما نضطر نسوقك بالغصب ، قعدت أبكي ليهم و اقول ليهم انا ما عملت حاجه و خلاص حيلي مات و الخوف إتملكني و أرجوان دي بس شغاله لي تستاهلي عشان تاني ما تتصرفي من عندك ، كنتِ ناويه توقعي الشركه بس وقعتي براك ، فجأه مستر هشام جا و سأل العسكري في شنو؟
قال ليهو معانا أمر قبض تضدها و يا أخت لو سمحتي اتحركي قدامنا ، مستر هشام قال ليهو ثواني يا جنابو فهمني في شنو! يعني ما معقوله تدخلوا الشركه بالطريقه دي و تسوقوا موظفه من دون ما تفهمونا الحاصل! .....العسكري قال ليهو لو عايز تفهم الحاصل ألحقها في قسم ()غير كدا نحنا ما مجبورين نشرح و نبرر ليكم واحد واحد ، و يا جنابو شوف شغلك مدام هي ما عايزا تتحرك ، مستر هشام قال ليهو وينو أمر القبض دا؟
العسكري ما رد عليهو و واحد من المعاهو جا علي عشان يسحبني معاهم و انا لسه ببكي و بقول ليهم ما عملت حاجه أنا ، بالغصب جراني من يدي و مستر هشام بقى ماشي ورانا و بتناقش معاهم و أنا دموعي عشره عشره و الموظفين زافننا الطريق كلو ، أول ما وصلنا باب الشركه كدا عدنان جا داخل ، استغرب من الحاصل ، قال للعسكري في شنو؟ ....قبل ما يرد عليهو قال للماسكني بحده فكها و رجع عاين للعسكري الكبير و قال ليهو في شنو؟ ليه سايقنها بالطريقه دي؟
العسكري عاين ليهو بحده و ما رد عليهو اتحرك و طلع من الشركه و المعاهو تاني مسكني من يدي و طلعوني معاهم برا ، رغم كرهي لـ عدنان بس مع ذلك إتلفت عليهو و انا ببكي كأني بستغيث بيهو هو كأن بتكلم مع مستر هشام بعصبه و شبه كان بسألهم انا عملت شنو، للحظات افتكرت إنو حيخليني و بالجد زعلت و حسيت قلبي إنكسر للمره التانيه ، في نفسي قلت ما تنتظري مساعده من شخص ، لازم تدافعي عن نفسك و ما تضعفي فـ طوالي لزيت العسكري و حاولت أسحب يدي منو بس قبضتو كانت قويه دا كلو حاصل و نحنا لسه ماشين في ممر الشركه الخارجي ، فجأه عدنان جا جاري بالقوه فك يدي من العسكري و قال ليهو من دون ما تلمسها هتمشي معاكم ، طوالي عاينت ليهو و انا بالجد موجوعه! ...بالبساطه دي! ....للمرهـ التانيه يا عدنان تتخلى عني! ....المره دي مشيت معاهم عن سكات و العسكري ما مسكني تاني ، ركبت و انا قلبي بنزف دم بس دموعي وقفت ، بقيت ما قادره أبكي ذاتو ، طول الطريق كنت بتخيل في شكل الحياة في السجن و بفكر في ماما و بابا و مزن و مازن حيحصل ليهم شنو لمن يعرفوا ، أول ما وصلنا القسم و نزلنا اتفاجأت بـ عدنان في وشي! ....جا علي و قال لي ما تخافي معاك أنا ، بعد ما دخلنا جوه حتى فهمنا الحاصل! .....الراجل دا طلع هو التاجر الإتصل علي و طلب كميه كبيره من المنتج و نحنا وصلناها ليهو! و هسي بقول إني غشيتو و اديتو منتج ما أصلي و مدة صلاحيتو خلصانه! ....عدنان ساقني على جنب كدا و قال لي أحكي لي الحصل كلو من البدايه و وريني تفاصيل الطلبيه دي ، من دون ما أتردد حكيت ليهو ، قال لي طيب ملف الطلبيه موجود صح؟
قلت ليهو أيوه......العساكر كانوا عايزين يسجنوني لحد ما يحققوا في الموضوع بس عدنان طلع بعرف ناس عندهم رتب و إتصل عليهم و بسببهم خلوني أرجع بس نبهوني ما أحاول أهرب أو أسافر عملنا كما إجراء كدا و بعدها طلعنا ، والله ما صدقت إني طلعت من القسم ، عدنان قال لي تعالي خلينا نمشي الشركه لأنو لو مشيتي البيت بحالتك دي أهلك حـ يقلقوا عليك ، ما عارفه ليه سكته و ما إعترضت على كلامو و ركبت معاهو ، أول ما إتحركنا كدا تلفون عدنان رن ، رد و قال أيوه يا هشام و حكى ليهو الحصل و قال ليهو آي جايبها معاي......في الطريق نحنا ، بعد ما قفل منو قال لي في شي غلط ، يا إما التاجر دا بكذب يا إما فعلاً حصل ليهو غش ، قلت ليهو بس أنا متأكده اني كتبت بيانات الطلبيه صح و شحنتها ليهو و.......قاطعني و قال لي مصدقك أنا ، قصدي إنو في زول لعب و بدل الطلبيه ، بقيت ساكته ساي و هو بتكلم معاي ، لمن وصلنا الشركه صراحةً إترددت قبل ما أدخل بس عدنان قال لي ما عملتي شي غلط إنتِ عشان كدا ماف شي يخليك تترددي و تخافي ، دخل قدامي و أنا بس ماشه وراهو ، إتلفت علي و قال لي أمشي جيبي لي ملفات الطلبيات كلها و تعاليني في مكتبي ، قلت ليهو طيب ، قبل ما أدخل المكتب اترددت في الآخر اتنهدت و جيت داخله المكتب وسط أنظار كل الموظفين ، لحد ما وصلتي كمبيوتري كلهم كانوا ملاحقني بأنظارهم ، أرجوان قالت لي فكوك بالسرعه دي! ....لا عاينت ليها لا رديت عليها ، فتحت الدرج و طلعت الملفات كلها بس ملف الطلبيه بتاع التاجر دا تحديداً ما لقيتو ، فتشت فوق تحت بس ماف ليهو أثر! ....فتح الكمبيوتر و قلت ما مشكله الطلبيه موجوده في ملف هنا بس الغريبه إنو الملف ما موجود على الكمبيوتر! هنا ياداب اتأكدت انو في شخص هنا خطط للحاجه دي ، طبعاً كنت ناسيه تلفوني في المكتب شلتو معاي و بسرعه شلت الملفات و طلعت من المكتب و كنت ماشه على مكتب عدنان بس ياداب إنتبهت و قلت ليه أمشي ليهو أساساً! غبيه انتِ ولا شنو يا مها يعني بالبساطه دي نسيتي العملو!
من مكاني داك مشيت مكتب مستر هشام ، أول ما جيت داخله لقيتو بتكلم بالتلفون بعد ما خلص قال لي هسي كنت عايز أناديك حمدلله على السلامه ، قلت ليهو الله يسلمك و مشيت ختيت ليهو الملفات قدامو و قلت ليهو اقسم بالله أنا ما احتلت على زول ، قال لي شكلو في شي غلط ، قلت ليهو فعلاً في شخص خطط لـ دا كلو و الدليل إني ما لقيت ملف الطلبيه بتاعة التاجر دا حتى الملف الفي الكمبيوتر ما لقيتو ، قال لي بالجد! قلت ليهو أيوه ، قال لي خلي لي الملفات دي و انا هسي هجيب موظف التوصيل و الناس الشحنت الطلبيه دي ، قلت ليهو طيب ، قال لي ما تخافي الموضوع بسيط و حـ يتحلى ما تشيلي هم ، دموعي نزلت طوالي ، قلت ليهو ما عملت حاجه أنا ، قال لي يا مها هسي ماف زول إتهمك متأكد انو في زول عمل العمله الوسخه دي .......ما أنكر انو اول شخص خطر على بالي هي أرجوان بس ما رضيت اقول ليهو قلت خليهو براهو حيكتشف الحصل ، قلت ليهو طيب ممكن أمشي البيت؟ قال لي أيوه بتقدري تمشي ، طوالي طلعت من مكتبو و اثناء ما أنا ماشه على الباب تلفوني رن ، الرقم كان غريب فطوالي خفت و يدي بدت ترجف ، قلت يمكن ديل الشرطه ، بعد مسافه فتحت الخط و قلت بصوت راجف آلو! ......جاني صوتو بقول: مها وينك انتِ ياخ! ......طبعاً دا كان عدنان ، طوالي قفلت الخط و دخلت تلفوني جوه الشنطه و رجعت البيت و هو لحد ما رجعت بتصل علي بس ما رديت عليهو ، طبعاً بعد ما وصلت البيت و قعدت حتى اتذكرت الوفد القال حـ يجي يزور الشركه ، قلت أه ما ضروري أكون معاهم ، طبعاً قلت لـ ناس ماما اني رجعت بدري عشان أساعدهم في لملمة العفش عشان الرحول و كدا ، طبعاً بابا إشترى البيت و هسي بلم ليهو في قروش عشان نرحل بيهم ، المهم اليوم البعدو برضو ما مشيت الشركه بس كنت شايفه رسايلهم في القروب كانوا بتكلموا عن الوفد و قال إنهم قدروا يقنعوهم اشتروا مننا المنتج ، فرحت شديد والله ، في اليوم التالت مستر هشام اتصل علي و قال لي لو غايبه بسبب الحصل تعالي ساي الموضوع إتحلى ماف شي بخوف تاني ، مشينا للتاجر و فهمناهو الحصل و شرحنا ليهو انك بريئه و رجعنا ليهو قروشو و هو سحب الشكوى ، قلت ليهو الحمدلله .....عرفت العمل كدا منو؟ قال لي أيوه عرفت.....
كنت عايزا اسألو من العمل كدا بس حسيتو ما عايز يقول ، قلت حاسه انو دي أرجوان بس ما مشكله بكرا بمشي الشركه و هـ اعرف منو العمل كدا ، كدا ياداب إرتحت و قدرت أنوم كويس و كل الخوف الكان جواي إتلاشى تماماً ، المهم تاني يوم مشيت الشركه طوالي و أنا رافعه راسي لأني طلعت من القصه دي ، اتوجهت طوالي على مكتب مستر هشام قلت أشكرو على العملو لي بالجد كنت ممنونه شديد ليهو لأنو اهتم بالموضوع دا و طلعني منو ، لمن دخلت ليهو و شكرتو قال لي الشكر دا مفروض يكون لـ عدنان ما لي أنا لأنو معظم الفضل برجع لـ عدنان ، هو الجاب فيديوهات كاميرات المراقبه و راجعها كلها و اكتشف الحاصل ، قلت ليهو طيب منو العمل كدا؟
اتنهد و قال لي أرجوان و أنا آسف شديد على العملتو معاك بت عمتي و بإذن الله عملتها دي ما حـ تتكرر تاني ، من جواي زعلت زعل بس هزيت ليهو راسي و استأذنت و طلعت من مكتبو ، أول ما اتحركت كدا عدنان جا ماشي علي ، حيلي مات و قلبي بقى شغال دق دق و هو أساساً ما كان بعاين لي ، جا ماري بجنبي كأنو ما شايفني و على طول دخل مستر هشام! ما عارفه ليه بس حسيت حركتو دي وجعتني شديد! رجعت مكتبي و أنا قلبي دا حاسه بتقطع حته حته ، طبعاً أرجوان الحيوانه ما جات ، قلت ان شاء الله يكون طردها عشان نرتاح منها ، شويه كدا أريج جات سلمت علي هي و معاها كم بت كدا و سألوني عن الحاصل من دون ما أتردد فتيتوا ليهم و وريتهم إنو أرجوان هي الكانت ورا الحصل دا و أصلاً هم حيكونوا عرفوا بالعملتو و برضو قلتو ليهم ، المهم كملت باقي اليوم عادي بس الحصل خلاني اتردد و فكرت أخلي الترويج و التسويق الكنت بعملوا براي و بس ألتزم بتعليمات الشركه ، المهم بعد يومين من الكلام دا رحلنا و سكنا في بحري فـ المسافه بقت قريبه لي ، عدا أسبوع من رحولنا و عدنان دا طول الأسبوع بقى لا بعاين لي لا بحاول يتكلم معاي ، قلت كدا أحسن و بعدين انا ذاتي ليه شاغله بالي بيهو! حريقه تحرقو ياخ بكون تعب من التمثيل عشان كدا بطل حركاتو دي ، في يوم جيت داخله الشركه و اتفاجأت لمن شفت أرجوان قدامي! ....كنت مفتكره إنها اتفصلت من الشركه! .....ئهه تتفصل كيف و هي بت عمة هشام! يعني لو عملت السبعه و ذمتها ما حيفصلها من الشركه!.....شويه كدا لمحت ليك عدنان جاي.....استغربت و ما عارفه ليه بس اتضايقت لمن شفتو وقف مع أرجوان و بقى يتكلم معاها!.......يعني بعد العملتو معاي دا كلو بتكلم معاها عادي كدا؟.....ما قال عامل فيها بحبني و شنو ما بعرف بس كويس إنو أثبت لي حقيقتو للمرهـ التانيه ، جيت مارهـ بجنبهم بس خالص ما اتكلمت معاهم و ما رفعت عيني و عاينت ليهم ، المهم بعد حكاية ساعه كدا مستر هشام و الحيوان دا جونا داخلين ، بعد ما سلموا علينا عدنان قال لينا شباب خلوا شغلكم و ركزوا معاي ، طبعاً أنا ولا اشتغلت بيهو و واصلت شغل على الكمبيوتر! سامعاهو قال إننا حـ نتقسم لـ 4 قروبات و كل قروب حـ ياخد منتج معين و معاهو مبلغ معين مفروض يتصرف و يروج بيهو المنتج دا من دون ما يزيد قرش واحد ، و القروب الحـ يبيع أكبر كميه هيفوز و كل فرد في القروب حياخد مبلغ كبير بالإضافه لـ رحله حـ يحددوا مكانها بعد المنافسه .....طبعاً كلامو حمسني شديد بس ما رفعت عيني عن الكمبيوتر ، شويه كدا قال قسمناكم تقسيم عشوائي و الورقه دي مكتوب فيها اسامي اعضاء كل قروب ، مرروها لبعض و كل واحد لازم يعرف هو تبع أي قروب ، المنافسه هتبدا من بكرا و تستمر أسبوع كامل و بكرا حـ نعرض عليكم أربع منتجات كل قروب ليهو حرية اختيار المنتج ، المهم بعد ما طلع مرروا لي و الورقه و لـ سوء الحظ طلعت في القروب الفيهو أرجوان ، انا و هي و أريج و واحد كدا إسمو حاتم ، قام هو طوالي نادى أريج و جوني و قال لي زي ما شايفه حنكون فريق واحد فـ خلونا نعمل قروب في الواتس و نشوف موضوع المنافسه دي ، قلت ليهو طيب ، قال لي مليني رقمك ، المهم مليتو ليهو و طوالي عمل القروب و ضافني و ضاف أريج و أرجوان ، طبعاً هي خالص ما جات وقفت معانا و خالص ما اعتذرت أو حسستني إنها ندمانه على العملتو و انا رغم اني كنت مفتكره نفسي اتغيرت و بقيت قويه إلا اني طلعت جبانه بدليل انو ما قدرت أمشي اشاكلها على العملتو لي ، المهم رجعت البيت و بقيت منتظره بكرا دا يجب بفارغ الصبر ، بحب المنافسات شديد ، بس المنافسه دي ما مفروض تتسمى منافسه! هم قالوا حيدونا مبلغ معين عشان نروج بيهو لـ المنتج بس عادي الواحد يجيب قروش من عندو و يدفعها للصفحات و المواقع الإعلانيه عشان يبيع بيها منتجوا! هم كيف هـ يعرفوا اذا القروب دا ما زاد قرش على المبلغ الأدونا ليهو؟
طوالي شلت تلفوني و رسلت لـ مستر هشام و وريتو ، بعد مسافه رد علي و قال لي ايوه لاحظنا للحاجه دي شكلنا ما كنا مركزين بس ما مشكله بكرا حنوريكم تفاصيل المنافسه ، قلت ليهو تمام ، قال لي قبل ما اطلع من الواتس حابب اقول ليك انو انا فصلت أرجوان لمدة اسبوع بس ما قدرت افصلها فصل نهائي غير انها بت عمتي انا عارف قدر شنو الشغل دا مهم بالنسبه ليها و أسرتها و لو فقدتو ما حتقدر تشتغل بالساهل بس انا حذرتها و تاني ما حتضايقك ، قلت ليهو حصل خير ، بس ما عارفه ليه كلامو حسسني انها مسكينه و محتاجه لشغل! انا شايفاها بت ناس برجوازيين فـ ليه هو قال كدا و حسسني إنها عكس كدا؟
في كُل مرة كُنّا نختلف فيها، كان الحبُ حاضرًا، فتتحول شجاراتنا إلىٰ ضحكات، إلىٰ أحضان ربما، لكن في آخر خلافٍ دار بيننا، لم يكن الحبُ حاضرًا لينقذنا، غاب الحبُ، فاِنتصر المنطق، تبادلنا العتاب بطريقة مُؤذية، ثم تبادلنا الصمت فلم نعد كما كُنا، وربما لن نعود
يتبع........
آسفه على التأخير +لو م نزلت بوست و اعتذرت فيهو معناها البارت حينزل خلال اليوم حتى لو اتأخر عن الموحد +استعجلت ليكم و ما قدرت اكتب بارت طويل و ذاتو ما راجعت البارت دا فـ بس اتجاوزوا الأخطاء 💜💜💜🌻
