سلم على مستر هشام و حاتم و هو لسه بعاين ليها و هي وقفت على حيلها بخلعه و نحنا بقينا نعاين ليهم من دون ما نفهم شي! .....قلت ليها أرجوان مالك في شنو؟ ...بتعرفها انت يا مازن؟
من سكاتو فهمت إنو بعرفها ...مستر هشام قال ليها لو بتعرفيهو ليه مصدومه كدا يا أرجوان؟
ما قالت حاجه بس لونها كان مخط**وف ، شالت شنطتها بس و قامت طلعت و انا و أريج لحقناها ، كانت ماشه بإستعجال ، اتسرعت و وصلتها و طوالي مسكتها من يدها و لفتها علي و قلت ليها في شنو؟ مالك يا بت الناس؟
قالت لي مازن دا الجابو هنا شنو؟ ...قلت ليها دا أخوي ...قالت لي بخلعه شنو؟ اخوك؟
قلت ليها آي بتعرفيهو ولا شنو؟ اصلاً ردة فعلكم انتوا الإتنين أوحت لينا إنكم بتعرفوا بعض! بتعرفيهو من وين يا أرجوان ؟ ....عاينت لأريج و سكتت فـ فهمت انو أريج كمان عارفه هم بعرفوا بعض من وين ...قال لي حـ امشي بعد دا يلا مع السلامه ، قلت ليها ما هتمشي إلا تقولي لي مالك! ...فجأه مستر هشام و حاتم جوا طالعين و هم مستغربين! ...حاتم قال لأرجوان خير مالك؟ ...قالت ليهم ما عايزا أرد على أي سؤال و لو ماشين أرح و اذا لا فأنا هـ أمشي براي !.....المهم هم مشوا من دون ما أرجوان تفهمنا حاجه! ...من مكاني داك مشيت لـ مازن في غرفتو و أصريت عليهو انو يحكي لي فـ بعد إلحاح كتير مني قال لي إنو عزام كان بلعب بأرجوان و هو وراها حقيقة عزام ....قلت ليهو و انت عرفتها من وين؟ قال لي عزام عرفنا على بعض ....ضيقت ليهو عيوني و قلت ليهو و شنو الخلاك تفضح صحبك قدامها؟ قال لي دا سؤال ليك؟ طبعاً ما هـ أخليهو يلعب بيها! ...قلت ليهو بس انت ما عملت كدا من باب الإنسانيه! ....إنت عايزها؟
عاين لي و سكت ....هنا ياداب اتذكرت لمن أرجوان كانت بتحكي لأريج عن زولها اللعب بيها و عن صحبو و فهمت انها كانت قاصده عزام و مازن ...بالجد إنصدمت و ما إتوقعت انو يكون في شي بين مازن أخوي و أرجوان ....إبتسمت ليهو و قلت ليهو وقت عايزها المانعك شنو؟
قال لي الموضوع ما بالسهوله دي ...هي كانت عايزا عزام فما أظن.....قاطعتو و قلت ليهو اتطمن هي ذاتا عايزاك! ...قال لي كيف كيف؟ و بعدين انتِ بتعرفيها من وين؟ ...قلت ليهو شغالين في نفس الشركه و قلت ليهو الكلام القالتو أرجوان لأريج الفي معناهو انها ما عندها إعتراض على مازن ....قال لي بالجد؟ ..قلت ليهو آي والله ...عيونو بقت قلوب قلوب و فرح فرحه ما عاديه......المهم بعد اسبوع من الكلام دا مازن قال لي ارح شارع النيل! نغير جوا شويه و نشرب لينا جبنه ، قلت ليهو المناسبه شنو؟ قال لي شايفك زهجانه و قافله معاك الأيام دي ....في البدايه رفضت بس بعد إصرار منو وافقت و فعلاً مشينا ، كان قاعد و بونس فيني ساي و انا بس ماسكه كباية الجبنه و عامله نفسي مركزه معاهو في حين انو تفكيري كان مشتت و طول الأسبوع دا ما نمت كويس ، شويه كدا تلفونو رن فـ طوالي قام و مشى مني بعيد ، جات خالتو ست الشاي عشان تشيل الكبايه بعد ما خلصت ، عاينت لي كدا و نزلت عينها ، حسيتها زي العايزا تقول حاجه ...شالت الكبابي من قدامي و أول ما إتحركت قلت ليها دقيقه يا خالتو ، لمن إتلفتت علي قلت ليها خير حاساك زي العايزا تقولي حاجه ...اترددت بس قالت لي خايفاك تضايقي مني أو تحسي اني بتحشر في حياتك ، قلت ليها عادي قولي قولي ، قالت لي كتار البجوا هنا و كلهم جوز جوز و قلة أدبهم البعملوها انا شايفاها بعيني و ساكته لأنو ما من حقي افتح خشمي و ذاتي ما بحب احشر نفسي في حاجه ما بتخصني لكن انتِ ظاهر عليك بت بريئه و حلاة الدنيا عليك فـ ليه يا بتي تخوني ثقة أهلك و تطلعي من وراهم مع الأولاد! والله ماف شي اسمح من عفة النفس و البتطلعي و بتنزلي معاهو دا صدقيني ما بعرسك ، و دا ما برضاهو لأختو ، البتعملوا فيهو دا كلو غلط و بتتحاسبوا عليهو ، العايزك يا بتي بجيك بالباب غير كدا كلام فارغ و بدخلك في حتات ضيقه و بلوث قلبك و نفسك ، ما تزعلي مني يا بتي بس حبيت أنصحك و ربنا يهديك و يستر عليك....بعد مسافه قلت ليها جزاك الله خير يا خالتو و كلامك على عيني و راسي و بالمناسبه المعاي دا أخوي ....قالت لي شنو اخوووك؟! قلت ليها آي ، قالت لي معليش معليش فهمت غلط يا بتي كنتِ تسكتيني من البدايه قلت ليها كلامك عجبني رايك شنو تقعدي معاي و تتكلمي لي اكتر عن الموضوع دا لو ما باخد من زمنك! ....قالت لي ما عندي مانع ، قعدت معاي زي ربع ساعه كدا و اتكلمت معاي كتير و كل ما تتكلم انا بتذكر مكالماتي الزمان مع عدنان من دون ما يكون في رابط شرعي بيناتنا! لا ما كدا و بس كمان في الجامعه ما كان عندي مانع اهظر مع أولاد الدفعه و باقي الدفع! كنتِ ساذجه و بتصرف بطفوله اكتر من اللزوم و ما حصل خطر على بالي انو البعمل فيهو دا غلط! ....ايوه ما حصل فكرت اني هـ اتحاسب و ذاتو موضوع زي دا ما حصل فكرت فيهو! و ما حصل زول نبهني للحاجه دي أو حسسني إنها غلط ، كنت بقول اني بصلي و بصوم و دا
معناهو اني زوله كويسه و كمان طيبه و تعاملي كويس مع كل الناس بس شكلي نسيت انو حتى المعامله عندها ضوابط و حدود و البقولوا للبنات ما مفروض ينقال للأولاد ....قلت عشان كدا ما اتوفقنا أنا و عدنان إننا نكون مع بعض! ....مازن لمن جا ما قاطعها لمن كانت بتتكلم سكت و قعد ، اتكلمت معانا الإتنين و بعدها مشت على شغلها ، لمن هي مشت انا كنت ببكي و حبيت اعترف لـ مازن و وريتو اني حاسه بالذنب لأني كنت بتكلم مع عدنان من دون علمو و قبل ما يخطبني كمان ....سكت و ما رد علي ، قال لي خلينا نمشي ، مشى ادى الخاله قروشها و مشينا ، طول الطريق كنت بفكر في كلامي الكان مع عدنان ، اتذكرتو كلو لحد لحظة ما كنت منتظراهو جنب عربيتو و الكلام القلتو ليهو جوهـ العربيه! ....ايوه ما كان قصدي حاجه و ما قصدت اعمل حاجه حرام بس دا برضو ما مبرر لي! مشكلتي اني ما كنت بفكر بالطريقه دي و شايفاها حاجه عاديه و نسيت انو الإسلام حرم الحاجات دي عشان يحفظ بيها قلوبنا و عشان عارف انو البشر خطاؤن و في طبيعتهم في غريزه جنسيه عشان كدا شرع لينا الزواج خير وسيله للحفاظ على القلب و العفه ، لمن وصلت البيت أنا كملت دموعي دي كلها و مازن دا نهاي ما إتكلم معاي ، على طول مشيت اتوضيت و جيت فرشت المصلايه و صليت ركعتين و قعدت أدعي إنو ربنا يغفر لي و يحفظ لي عفة نفسي ، آخدت عهد على نفسي اني تاني ما اصافح راجل و ما اختلط بيهم و اخلي حدود بيناتنا لو اضطريت اتعامل معاهم ، بعد ما صليت شلت المصحف و قعدت اقرا.....قريت كدا لمن نعست بعدها نمت و أنا مرتاحه.....لمن صحيت كنت حاسه براحه و إطمئنان ما عادي ...قلت اهم شي اني اعترفت بذنبي و تبت و من شروط التوبه عدم الرجوع للذنب دا تاني ...قلت من اليوم حـ اكون مها الملتزمه إلتزام صحيح من غير نقصان ....و فعلاً دا الحصل ، بقيت اتوضى قبل الأذان ، بصلي النوافل و دايماً بقرا قرآن و بستغفر كتير و بقول اذكار الصباح و المسا يعني روتيني بقى روتين ديني بحت و سبحان الله في خلال أسبوع بس بقيت احس نفسي خفيفه كأنو كل ذنوبي انزاحت ، حتى بكاي و نفسنتي و زهجي اتبخروا ....ايوه فراق عدنان واجعني بس أنا خلاص اقتنعت انو الحاجه الما مكتوبه لينا عمرها ما بتبقى لينا....انا خلاص سلمت أمري لله و وكلتو كل أموري و متأكده ربنا حـ يختار لي الأفضل ، هـ أرضى بقسمتي مهمها كانت لأنو أمر المؤمن كلو خير......في يوم و انا في غرفتي فاتحه المصحف و بقرا مازن جا داخل ، بس ما قاطعني ....خلاني بعد إنتهيت و بعدها جاني قريب و باسني على جبيني و قال لي أنا فخور بيك و مبسوط منك ...طلعتي أحسن مني و انتِ كدا دايماً ، قلت ليهو ما زعلان مني صح؟
قال لي هو انا أحسن منك عشان ازعل لمن قلتِ لي كنتِ بتكلمي عدنان بالدس و و و !.....ما اكذب كـ أخ زعلت شويه بس كمان اتذكرت إني كنت بكلم بنات قدر شعر راسي و دا غير تجارتي بـ المخ***درات ، يعني العملتيهو انتِ ولا شي قصاد العملتو انا ....المهم انا كمان قلت ألحق نفسي و استغفر لذنوبي ، عشان كدا لي يومين بصلي الصبح حاضر و بقرا قرآن زيك و لمن شفتك بتصلي النوافل انا كمان عملت كدا ، قلت ليهو بالجد! حلوووو والله و طوالي حضنتو.....قال لي في حاجه تانيه عايز اقولا بما اننا خلاص قررنا نمسك الدرب العديل من دون ما نوقع نفسنا في ذنوب ....قلت ليهو بحماس شنو شنو؟ 😍
قال لي زي ما قلت ليك كنت بكلم بنات كتار و سماهر دي برضو قبل ما اعرسها كنت بتكلم معاها و بطلع و بنزل معاها مع اني لو شفتك انتِ طالعه مع ولد ما كان رضيت و كنت هـ اتضايق و اختنق و كنتِ هتشوفي وشي التاني....المهم كلنا بنغلط بس الأحسن انو اول ما نحس على غلطنا نتراجع عنو ، مواصلتك في الذنب و انت عارف انو غلط ذنب برضو ....قلت ليهو فعلاً ، سبحان الله موقف واحد خلانا نراجع نفسنا و نحس على ذنوبنا ....عارف اني هسي كنت بدعي للخاله ديك! ....قال لي آي ربنا يديها الصحه و العافيه ، المهم عايز اقول ليك اني ناوي اعرس و المرهـ دي من دون لف و دوران ، قلت ليهو مبروووك والله و دي خطوهـ كويسه و العروس أنا عارفاها و يا بختها بيك ، ضحك و قال لي أدعي ربنا يتم لي على خير ....قلت ليهو ما بتوصيني ، المهم ناوي تتقدم ليها متين؟ ....قال لي والله انا قلت كدا نيه مني و ما عارف رايها حيكون شنو لأنو عزام لمن زعل مني حكى ليها اني كنت بتاجر بـ المخ**درات و هي أخدت موقف و زعلت مني بعد ما كنا تمام و تاني ما أدتني فرصه أشرح و أبرر ليها ....قلت ليهو خلي الموضوع دا علي ...قال لي جادهـ؟
قلت ليهو ما واثق في أختك ولا شنو ؟ قال لي لو ما وثقت فيها اثق في منو؟ قلت ليهو اذاً محلوله بإذن الله ....قال لي تمام ....اول ما قام كدا عشان يمشي قلت ليهو مازن! ....إتلفت علي و قال لي ايوه! ...قلت ليهو هـ اسألك سؤال و ياريت تجاوبني من دون ما تتهرب ، صدقني لو ما عرفت الجواب ما هـ ارتاح ، فلو عايز تريحني جاوبني.....قال لي حاضر يا أختي ، سؤالك شنو؟
قلت ليهو خالد! ....انت ليه ما بتطيقو ! كنت رافض انو مزن تعرسو و لمن عرستو معاملتك ليها اتغيرت! ؟....اتنهد و قال لي هـ اقول ليك و خلي الموضوع دا بيناتنا ، قلت ليهو بقلق حاضر ...قال لي خالد دا ذاتو كان بتاجر بالمخ**درات و انا بعرفو من زمان لأني كنت شغال نفس شغلو و لمن جا اتقدم لـ مزن اتغبينا العرفه في بعض بس انا نبهتو و قلت ليهو قول ما عايزها و أنهي الحاصل دا و لو ما عملت كدا هـ افضحك قدامهم بس ما اشتغل بي و كمل العرس و انا ما قدرت اعمل حاجه لأنكم كلكم كنتوا موافقين عليهو لأنكم ما عارفين حقيقتو و انا خفت افضحو و يقوم يفضحني قدامكم ، أبوي كان عارف انا زمان كنت شنو بس انتِ و مزن و أمي ما كنتوا عارفين حاجه و هسي مزن ما عارفه و غير كدا مزن دي انا اصلاً زعلان منها كم مرهـ قبل ما تعرس بسمعها بتتكلم بالتلفون انصاص الليالي و لمن اسألها بتقول دي صحبتها ، هي قايلاني غبي و ما فاهم حاجه و افتكرت اني بصدقها لمن بتقول كدا ، و على فكره لمن اتشاكلت مع سماهر و كل وحده فضحت التانيه انا كنت عارف بـ عمايل مزن كلها حتى قبل ما سماهر تفضحها لي و لمن فضحتها عملت نفسي رايح و ما حبيت ابشع بيها قدام أمي و أبوي و سماهر بس لمن الموضوع زاد عن حدو عديل اتكلمت معاها و جطت فيها بس برضو كلامي معاها ما وقفها عند حدها و للأسف ما قدرت أمد يدي عليها و اضربها ، انا ضعيف شديد قدام أخواتي.....طبعاً انخلعت! معقوله خالد كمان! ...ياخ دا شنو دا! ! خالد دا أبداً ما ظاهر عليهو كدا! ....قلت لـ مازن و هسي خالد لسه شغال في الشغله دي؟ ....قال لي ما عارف بس شكلو خلاها لأني بعد ما عرس مزن قلت ليهو يا إما تخلي البتعمل فيهو دا يا إما والله اكلمهم بعمايلك ، فـ قال لي انو اصلاً خلاها من زمان و وعدني ما يرجع ليها تاني بس ما كنت مصدقو لغاية اللحظه دي ، سكته و ما عرفت اقول شنو! .....بعد مسافه قلت ليهو زي ما انت كنت بتتاجر بالمخ**درات و عايز أرجوان تديك فرصه عشان تعرسها خالد برضو بستحق الحاجه دي ....انانيه شديد كونك تشوف انك تستاهل حاجه و غيرك لا.....قال لي فعلاً بس عشان هي أختي ما رضيت ليها زول زي دا ....قلت ليهو المهم هسسسي دي هسسسي عايزاك تمشي لـ مزن في بيتها و تعتذر منها و تطيب خاطرها بس ما تجيب ليها سيرة خالد و لو سألتك ليه ما كنت بتطيقو قول ليها كنت شايفو ما مناسب ليك المهم قول ليها كلام و مشيها بيهو و ياريت تتكلم كمان مع خالد عشان يأكد ليك انو بالجد خلى الشغل داك مع اني حاساهو خلاهو ، قال لي اصلاً كنت مفكر اعمل كدا .....المهم قام مني و مشى بعدها مشيت لـ ماما في المطبخ و بقيت أساعدها رغم انها من اليوم داك مخاصماني بس مع ذلك ما زعلت منها و لو بس قالت اخخ بتلقاني جنبها ، بعد ما قطعت ليها البطاطس قلت ليها اديني افرم ليك اللحمه دي! ...ما ردت علي و انا على طول شلت اللحمه و فرمتها ليها ، لمن سمعت صوت بابا عرفت انو جا راجع ، شلت ليهو مويه و مشيت وديتها ليهو ....بابا أخف قدراً من ماما لو ما قال ليك كلمه كويسه ما بقول ليك كلمه كعبه يزعلك بيها عشان كدا هو ساكت ...قلت ليهو لـ متين انت و ماما هـ تتعاملوا معاي كدا؟ انا غلطت و اعترفت بغلطي و وعدتكم ما أعيدها تاني ...معقوله واقفين لي على الغلطه! يعني كأنكم كنتوا منتظرين اغلط بس عشان تزعلوا مني و تخاصموني بالطريقه دي ....حياتي دي وهبتها ليكم و ذاتو تاني ما عايزا اتمنى شي و ما عايزا احلم بشي انتوا حرين فيني يا بابا و البرضيكم هـ اقبل بيهو حتى لو كنت ما قبلانه بس دامكم شايفين سعادتي بـ تضايقكم فـ هي ما لازماني و البتقولوا انتوا هـ يتنفذ ، قلت ليهو كدا و اول ما إتلفت عشان امشي لقيت ماما جنب الباب ...ولا عاينت ليها ، جيت مارهـ بجنبها و إتجاوزتها بس أبداً ما بكيت ، استغفرت بس و قلت وكلتك أمري يا رب و انت خير وكيل و خير معين ....
لم تكن الإستجابة دائمًا على هيئة تحقيق ما أتمنى..
لكن كانت تكفيني السكينة التي يضعها الله في قلبي بعد كل دعاء، والرضا الذي يعقُبها!💜
مهما بلغت ذنوبك عنان السماء... لا تحزن و لا تيأس أبدا من روح الله... لا تقنط من رحمته أبدا... بادر إلى التوبة... ارجع إليه سبحانه... و ابدأ صفحة جديدة معه جل وعلا و مع نفسك أيضا... و كلما أذنبت لا تؤجل التوبة أبداً... فـإن الله غفور رحيم
يتبع.......
