هذا ليس ابني

الحلقة الثالثة الجزء الثاني

#هذا_ليس_ابني
#الجزء_الثاني
#الحلقة_الثالثة
#ياسمين_الحسيني
خالد : يا عمي الميزانية لازم تتظبط علشان موارد المشروع مش معقول … احنا ملناش فلوس عند حد طيب نقدر نكمل بيها المشروع دا ..
سامح : والله بحاول يا خالد يابني بس ملناش مستحقات قبل شهرين من دلوقتي كلم باباك يمكن يقدر يجي يشوف المشكلة دي تتحل اذاي انا حاولت اكلم حبايبي يظبطولنا الموضوع دا بس السوق كله نايم و هما نفسهم عندهم مشاكل
خالد : طب و بعدين ….هو ايه الي خرب الدنيا كدا انا متأكد ان كان في فلوس في خزنة الشركة للطوارئ دي و نور مراجعاها معايا كمان
سامح : انت عارف طبعا مين الي المسؤلين عن الخزنة اما تدي القط مفتاح الكرار
خالد : مش ممكن كريم يكون لحق يصرف دا كله
سامح : مهو مش لوحدوا يا خالد ...سارة بطلت تطلب من ابوك فلوس لما بطل يجي الشركة اصلا و راحت لكريم و على حد علمي قالتله عايزة تعمل مشروع مستقل تفتح سنتر ملابس حريمي ماركات هي و سي بودي بتاعها قصدي جمال
خالد : ماشي يا كريم انت وسارة ماشي ….
سامح : بترن على مين يا خالد
خالد : على بابا يا عمي يشوف المصيبة دي معانا
سامح : طيب لو جه عرفني علشان اخلع انا
خالد : بتقول كدا ليه يا عمي دا انت دراع ابويا اليمين
سامح : عارف و عارف انه ميقدرش يتخلى عني …. بس ابوك مبيستحملش يشوفني من ساعة موضوع سليم ...بفكره بسهيلة و عملت منال المهببة
خالد : لا والله لازم تفضل موجود وانا الي هحل الاشكال دا بينكم متقلقش
سامح : هههههه انت عقلت فجأة كدا امتى يا خالد
خالد : اهو بقا يا عمي …… الو… ايوا يا بابا انا في الشركة و في مصيبة و لازم تيجي تلحقنا
عادل : انا في السكة اساسا و عرفت عملت اخواتك الهباب جاي اهو و خلي عمك سامح يقابلني هاخده و نطلع على البنك
خالد : تمام حاضر هقوله هو جنبي اهو يلا في امان الله توصل بالسلامة
سامح  : كويس انه جاي .
…………
في عيادة الدكتورة
أميرة : طيب يا دكتورة هو مينفعش أاجل موضوع العملية دا لحد ما افطم زين
دكتورة رؤى : لا يا أميرة اكتر من كدت ممكن الوضع يسوء و متنسيش احنا ممكن ندخل في مرحلة خطر في اي وقت و نضطر نعمل استئصال للرحم كله وانتي سنك صغير اوي على الموضوع دا ولازم نلحق الورم دا مادام ليفي يبقى مقدور عليه قبل ما يكبر اكتر من كدا ولا قدر الله يوصل لحاجة تانية خبيثة
أميرة : يعني لحد امتى ممكن استنى يا دكتورة
سلمى : تستني يا أميرة ايه انتي مش سامعة الدكتورة يابنتي حرام عليكي نفسك اذا كان على الرضاعة خليها صناعي انتي عندك اعذارك هو انت مستحملة رضاعة اصلا يا دكتور أميرة مخبية عنك اصلا الدوخة الي بتجيلها طول اليوم و النزيف الي مش مبطل
دكتورة رؤى : أميرة لو عايزة تموتي نفسك قوليلي علشان نأجل العملية … بصي يا بنت الناس هو في اي مشاكل اسرية مخليا الموضوع دا صعب اصلي كدا ممكن ادخل جمعية الاسرة في الموضوع لو جوزك مضايقك انا عارفة انك لوحدك هنا
أميرة : ايه لا والله خالص ياخبر سليم … دا مفيش احن منه عليا و على ولاده
سلمى : لا خالص والله يا دكتورة دا سليم حاجة تانية دي اميرة اصلا مخبية عليه علشان ميخافش عليها او يجراله حاجة دا انا بفضل احنس عبد الرحمن جوزي بالي سليم بيعمله يمكن يتلحلح كدا شوية زيه
دكتورة رؤى : طيب ليه مخبية عليه يا اميرة لازم يعرف يقف جنبك دي حاجة متستخباش
أميرة : ……
سلمى : طيب يا دكتورة احنا نقدر نعمل العملية دي امتى
دكتورة رؤى : هكلملك موظفين الحجز و في خلال الاسبوع دا نقدر نعملها و نستريح بقا
سلمى : هي هتبقى كويسة بعدها يا دكتورة على طول
دكتورة رؤى : بصي علشان مضحكش عليكي الورم لو كان اتلحق قبل الحمل كان الموضوع بقا بسيط بس الحمل كبره و دلوقتي حجمه مش مريح واحنا هناخد منه عينة للتحليل بعد العملية علشان نطمن بس الحجم بتاعه دا ممكن يخلينا نضطر نستئصل الرحم لو حصل نزيف اثناء العملية بس ان شاء الله خير خلينا منستبقش الاحداث كله خير بإذن الله
أميرة : استئصال …
سلمى : مهي قلتلك متقلقيش ودا ان شاء الله مش هيحصل اتفألي خير يا اميرة
أميرة : يآرب يآرب
………….
في مكالمة فيديو بين اميرة و سامية و سلمى
سامية : ايه يا أميرة انتي بتستهبلي اذاي عايزة تعمليها من ورا سليم دا سليم لو عرف مش بعيد يجراله حاجة انتي يا بنتي نفسك محتاجة جوزك في وضع زي دا يقف جنبك اومال هو جوزك ليه يا أميرة
سلمى : قوليلها يا سامية والله غلبت فيها
أميرة : حرام عليكم سليم يعرف انتوا عارفين هو كفاية الي فيه علشان يشيل هم اكتر من كدا
سامية : ماله سليم يا أميرة سليم زي الفل و مبسوط و الهم الي انتي بتتكلمي عنه دا هو الي مشيله لنفسه محدش قاله يفضل في دايرة الماضي خلاص الموضوع خلص ان كان هو نفسه اصلا قرب ينسى خلاص انتي بقا بتعملي في نفسك كدا ليه ها
أميرة : خايفة يا سامية … خايفة اوي يعرف … دا لو حد من الولاد سخن بس بيبقى زي المجنون و ضغطه بيعلى لحد ما يخفوا ولو انا تعبت قدامه بيبقى مش عارف يتلم اصلا على اعصابه ...ليه اشيله هم زي دا كمان اقوله عندي ورم و ممكن يبقى خبيث و ممكن اشيل الرحم و ممكن اموت كمان الاسبوع دا
سامية : ...لا حول ولا قوة الا بالله ….يا أميرة سليم راجل دي مسؤليته الي ربنا ادهاله انه يبقى مسؤل عنكم و يخلي باله عليكم وان كانت نفسيته بتتأثر فدا عادي كلنا بنزعل انما الي يزعله اكتر انك اساسا تخبي عليه انك محتجاله يا أميرة
سلمى : يسلم بؤقك يا سامية والله عين العقل
أميرة : …….. خلاص طيب بصوا انا الي هقوله محدش فيكم يجبله سيرة سيبوني انا هجيبهاله بطرقتي ماشي
سامية : … مش مستريحالك بس ماشي يا أميرة
……….
الحقيقة كانت فعلا سامية معاها حق انها متستريحش لأميرة لان أميرة مكنتش هتقولي فعلا وانا اتفجأت بالخبر دا يومها لما لقيت المركز الي أميرة بتتعالج فيه بيرن عليا لان سلمى ربنا يباركلها والله حسيت ان اميرة ممكن متقوليش راحت هي للاستقبال في المركز و سابتلهم رقمي علشان يحددوا معايا معاد العملية و كانت صدمة كبيرة اوي بالنسبة ليا ان أميرة تعاني دا كله من اكتر من سنتين لوحدها وانا حتى مش واخد بالي
سليم : الو ايوا انا باشمهندس سليم مين معايا
وائل : مع حضرتك وائل من مركز صحتك أهم ...بكلم حضرتك علشان احدد معاد العملية بتاعت باشمهندسة أميرة ان شاء الله دكتورة رؤى اختارت يوم الخميس يا فندم و التواجد قبلها ب اربع ساعات

انا انصدمت و سكت بس فهمت مهي فعلا باين عليها انها مش على حالها صحيح انصدمت بس متفجأتش ...حسيت ان حد طعني بسكينة تلمة او حد رمى على راسي جبل ...بس عارفين عملت ايه رديت عليه بكل هدوء
سليم : تمام يا فندم ان شاء الله الخميس مع حضرتك سلام عليكم

جريت على اوضتنا و قلبت في كل حاجة لحد ما لتقيتهم … ورق التحاليل و تقارير السونار و كله بالتواريخ و الروشتات …. اميرة مخبياهم في درج في الدولاب ... مخبية عليا من سنتين ان عندها ورم ليفي و كبر بعد الحمل ….قلبي كان بيدق لدرجة اني سامعه ...حاسس انه عايز يخرج من قفصي الصدري …. ايدي سقعت و ارتعشت وانا بقرأ و ماسك الورق كله … انا عارف ان اميرة في الوقت دا بتروح تقعد مع سلمى اخدت الورق كله و رجعت كل حاجة مكانها و خرجت بس مروحتش لأميرة ...روحت عند اقرب مركز طبي و طلعت لاقرب دكتور قابلني علشان افهم … أميرة فيكي ايه و ساكتة على نفسك ليه … خايفة مني يا أميرة ….خايفة مقفش جنبك او اضايق ….. اذاي تسيبيني جاهل كدا و تتعبي و تتألمي و دا كله لوحدك … انا لزمتي ايه في الدنيا لو انتي شايفاني مش قد المسؤلية دي ...دا انتي مراتي و بنتي و كل حاجة ليا في الدنيا ...هو انتي ممكن تروحي مني و سايباني معرفش …. انتي ممكن تضيعي مني يأميرة وانا الي زي العبيط بشكيلك اصل ابويا ضربني وانا صغير …. ياريته كان موتني ولا اني اشيلك هم فوق تعبك يا أميرة …. أميرتي فيكي ايه
#يتبع