هذا ليس ابني

الحلقة العاشرة الجزء الثاني

#هذا_ليس_ابني
#الجزء_الثاني
#الحلقة_العاشرة
#ياسمين_الحسيني
أروى : هو سليم هنا يا أميرة اصلا ولا برا هو احنا مش هنشوفه ؟!
أميرة : هو في الاوضة يا طنط هناديله حاضر
عادل : هو بردو مش عايز يقابلنا
…..
أميرة : ايه يا سليم بردو مش هتطلع من الاوضة حتى علشان خاطر فريدة …. الناس كلها برا مستنياك
سليم : مستنيني ليه مش المفروض دا عيد ميلاد فريدة وهي برا خلاص ميستنوش حد ….
أميرة : اخواتك كلهم برا و بابا و عمي سعيد زمانهم جايين دول كمان انت مش عايز تشوفهم
سليم : …….. ماشي يا أميرة انا قولتلك مش عايز اتحط في مواقف سخيفة وانتي بردو مهتمتيش واهم برا وانا مش ….
فريدة دخلت الاوضة
فريدة : يلا يا بابا بقا جدو مؤنس جه تعالى علشان هنطفي الشمع

معرفش ليه قدام البنت دي بضعف ، بحس في عنيها لمعة و هي بتشديني و عايزاني معاها….. بحس اني رجعت عيل و مش بقدر عليها بشوف الشمس في عنيها لما تضحك عليا وببقا عارف انها بتضحك عليا بس بطاوعها عادي جدا
سليم : حاضر يا فريدة انا جاي معاكي
فريدة مسكت ايدي و شدتني لحد برا خرجت لقيت الكل فجأة سكت و بصلي لقيت امي وابويا وقفوا و امي كانت بتفرك في اديها زي الي بتحاول تمنع نفسها من انها تجري عليا شكل عنيها وهي حاطاها عليا وانا داخل الصالون عليهم و هي بتابع كل خطوة زي شكل الواحدة الي مستنية ابنها في المطار و بتراقبه و هو جاي عليها بفرح بس المشكلة ان البصة دي جات متأخر …. قولت السلام لكل الي قاعدين مخصصتش حد و قعدت ردوا السلام و هما مبسوطين كانوا كلهم فعلا مستنيني و عايزينا نتجمع فضلت ساكت برد على الي يوجهلي الكلام بس رد مختصر يعني عامل ايه الحمد لله والشغل عامل ايه بقول تمام كلمات قليلة و مش عايز افتح مواضيع ابويا الي كان عايز يفتح معايا اي موضوع بس مكنش عارف يبدأ اذاي فقرر يكلم حمايا علشان عارف اني هكلم حمايا عادي
عادل : صحتك عاملة ايه دلوقتي يا مؤنس
مؤنس : بقت احسن من ساعت ما أميرة رجعت من السفر هي وفريدة و زين و سليم يلا بالمرة هههههه
عادل : دا انت عامل عليه حما بقا ههههه
مؤنس : لا والله ولا حما ولا حاجة ربنا يعلم سليم عندي ابني الي مخلفتهوش
سليم : وانت عندي اكتر من ابويا والله يا عمي
طبعا الجملة دي خلت ابويا يبص في الارض هو كان عارف اني قاصدها و قاصد اقولها قدامه كمان بس بصراحة مش عارف ليه ندمت بعد ما قولتها مش من عوايدي اني اكسر بخاطر حد مش من عوايدي اني اضايق حد لاني عارف معنى ان حد يكسر نفسك فمحبتش احس ولو للحظة اني ظالم غيرت الموضوع علشان انهي الاحراج خصوصا اني لقيت امي ابتدت تدمع تاني والكل انتبه لدا بس محدش عرف يعلق
سليم : يا خالد عملت ايه في التعديلات الاخيرة الي في المشروع عرضتها على العملا
خالد : بص انا عرضتها عليهم هم بصراحة انبسطوا بيها اووي و الموضوع ماشي الحمد لله وانت مكتبك عامل ايه
قاطعه ابويا علشان يفتح معايا موضوع الشركة
عادل : التعديلات الي انت عملتها يا سليم على الرسم وفرت علينا موارد كتير و عجبت العملا اوي مع انهم مكنوش بيفكروا فى النتيجة دي بس احسن حتى من حسابتهم …كتر خيرك لحقتنا والله لو تبقى معانا من الاول مكناش هننزنق كدا
سليم : خالد موجود و يوفي و يكفي انا مبحبش شغل الشركات وبطلته من زمان انا في مكتبي مدير نفسي و مش شاغل نفسي بموارد ولا ميزانيات ولا ناوي اشغل نفسي تاني
عادل : بس دي شركتك انت و اخواتك واجب عليك تشغل نفسك بيها..
سليم : وايه الي خلاه واجب و ايه الي وصله انه ميفرقش معايا انا مش شايف نفسي قصرت و مش واخد بالي بصراحة
عادل : الشركة محتجاك و اخواتك محتاجينك وانا وامك كمان
سامية طبعا حست اني ممكن على الكلمة الاخيرة دي اعمل عليها حوار فراحت متدخلة بس بصراحة انا معلقتش قولت كفاية عليه كسفة واحدة
سامية : ايه احنا هنقضيها كلام في الشغل يلا يا فريدة علشان نطفي الشمع
سارة : ايوا يلا علشان بعدها تفتح الهدايا بقا و تشوفي انهي احلى هدية و اكيد طبعا هديتي ههههههه
نور : مين عارف يمكن تعجبها هدية يوسف اكتر
سليم : اه هدية يوسف طبعا مش هدية بابا الي هتعجب صح يا فريدة
خالد : انت هتغير من دلوقتي يا سليم من يوسف ولا ايه طيب استنى لما يكبر
اروى : تعالي يا فريدة انتي حبيبة تيتا مش هيعجبك غير هديتي انا وسيبك من الناس دي
فريدة : خلاص بقا متزعلوش كلكم انا الهدايا كلها عجباني
في وسط دا كله لقيت عمي سعيد و عمي مؤنس بيشدوني من كتفي اتكلم معاهم على جنب
مؤنس : خف شوية على ابوك يا سليم
سعيد : الراجل مش عارف يرضيك اذاي وانت سايق فيها
سليم : انا معملتش حاجة ولا قولت حاجة تزعل كل الي قولته هو الحق ولا اكون كدبت وانا مش واخد بالي و بعدين لو مش عارف يرضيني اذاي فدي مشكلته هو مش مشكلتي انا هو كان عارف زمان يضايقني و يزلني اذاي كويس اوي ومكنش عنده مشاكل في دا
مؤنس : يا سليم يابني انت مش شايف مراتك و ولادك مبسوطين اذاي في وسط اهلهم مش شايف فرحة اهلك بيك و بولادك الي حصل زمان خلاص يابني انتهى و بلاش تضيع على نفسك فرحة دلوقتي بزعل زمان
سعيد : يابني انت الفرصة عندك دلوقتي انك تبقى مبسوط وسط اهلك
.
حاولت بصراحة امسك نفسي شوية و خصوصا انهم كانوا ضيوف في بيتي الحفلة خلصت و نزلت وصلت حمايا و عمي و رجعت البيت كان لسة اهلى موجودين و الكل بيسلم عليا و خالد و سارة و سامية قايمين يحضنوني علشان ماشيين و في وسطهم امي كمان قربت عليا فشيلت زين على دراعي علشان اخليها متحاولش تيجي اخواتي نزلوا و اتبقى ابويا وامي بس
أروى : بيتك جميل اوي يا سليم
سليم : شكرا
عادل : ياريت يابني تفكر في موضوع شغلك معانا تاني
سليم : مفتكرش
أروى : انا عارفة انك لسة زعلان مننا يابني بس احنا بنحبك
سليم : عمر احساسك بالذنب ما هيكون حب اشمعنا دلوقتي انا اسف بس انتي اتأخرتي اوي
عادل : متبقاش قاسي اوي كدا خلينا نفرح معاك و نحس ان احنا عيلة كفاياك غربة و فراق بقا يابني
سليم : لو انتم متخيلين ان علشان اتجمعنا مرة خلاص بقينا اسرة سعيدة فبلاش تمثلوا على نفسكم احنا عمرنا ما كنا عيلة واحدة ولا هنبقى ابدا
انا قولت كدا ...قولتها ساعتها وكنت فاكر نفسي باخد حقي منهم على الي عملوه زمان كنت شايف ان كدا ناري هتهدى و هستريح بس الحقيقة انا حسيت اني بقيت زيهم وان الوضع انقلب وانا الي بقيت امثل قدام الناس زي حمايا و عمي و اخواتي ان كله تمام وان احنا عيلة و اول ما يمشوا اقلب عليهم و احسسهم ان كل دا كدب وان ملهمش مكان الوضع زي زمان بالظبط بس انقلب الحال ... انا دلوقتي الي بقيت الجلاد انا دلوقتي الي اقدر اقول لا و هما الي بيتحايلوا حتى اني ابصلهم كل شئ انقلب بس المشكلة اني مستريحتش … منبسطش وانا بعمل كدا … تعبت من جوايا اكتر … انوجعت اكتر واكتر … خلاني افكر هما كانوا بيعملو كدا علشان موجوعين زمان بردو …