هذا ليس ابني

الحلقة الثامنة الجزء الثاني

#هذا_ليس_ابني
#الجزء_الثاني
#الحلقة_الثامنة
#ياسمين_الحسيني

في الفترة دي بدأت اشتغل في تجهيز المكتب و بخلص ورقه و بربط مع الشركات الي هتعامل معاها كنت مطحون بالمعنى الحرفي و كل يوم و التاني في مشوار شكل و طبعا كنت حاسس بالذنب من ناحية اميرة و الاولاد بس الغريبة انهم كانوا مش مضايقين وكانوا عادي جدا والله يعينك يا سليم خلص بس ولا تقلق علينا كانت كلمتها دايما انا مجاش في بالي قولت يمكن مشغولة مع سامية كانت بتخرج معاها كتير بس زين الي مكنش بيرضى يسيبني لما يشوفني فكنت بريحها منه و افضل معاه وعرفت ان كان في رحلة مدرسية طالعة فريدة طلبت مني تروح وانا وافقت بس قولتلهم يسيبوا زين معايا كنت مستغرب اوي هي كانت مصرة تاخده معاها الرحلة ليه

سليم : تاخديه فين بس يا أميرة مش هتعرفي تفسحي فريدة وانتي شايلاه على دراعك دا انا عايز اريحك انتي بقا عايزة تتعبي نفسك ليه
أميرة : اهو يتفسح و يخرج دا لازق في البيت خليه يتعود على الناس وبعدين انت مشغول هو انت اصلا بتفضى تقعد في البيت
سليم : لا خليه معايا انا مش هخرج يومها هفضل معاه عادي
أميرة : يعني مش هتغير رأيك
سليم : ياسيتي روحي انتي و فسحي فريدة هتظلميها وانتي محتاسة بزين
أميرة : سامية هتيجي معانا هي وسيف و هبقى اسيبهولها شوية
سليم : ياسيتي يعني هتتعبي سامية كمان روحي بقا من غيره و خلاص
فريدة : يابابا متجيبه مش عمتو ساميه بس الي هتيجي دا …
قاطعتها أميرة بسرعة قبل ما تكمل كلامها
أميرة : اه فريدة قصدها ان في اهالي كتير هيجيبوا ولادهم الصغيرين و هو هيفرح بالعيال الي قده
سليم : هممم لا بردو انا شايل هم تعبك بيه و زهقه معاكم لو حب ينام ولا حاجة خليه معايا احسن
أميرة : ………

طبعا أميرة قررت متحاولش تاني بدل ما فريدة تجيب سيرة ان مش عمتها سامية لوحدها بس الي هتيجي لا دا العيلة كلها جاية حتى سارة هتروح تغير جو  و كانو موصيين أميرة انها تجيب زين لانهم مشافهوش ولا مرة ….فريدة بقا الي كانت مستغربة هما ليه موصينها متقولش لبابا بس محاولتش تسأل لانها كانت فرحانة بحب جدها و جدتها ليها و فرحتهم اوي بيها دا غير انها و يوسف ابن عمها بقو اصحاب و بيحضروا احتفال الترم الاول مع بعض في مسرحية واحدة فانا سمعت اسمه كتير قدامي و كانت أميرة بترتبك  بس بردوا مجاش في بالي انه يوسف ابن اخويا نهائي و مكنتش بركز خصوصا اني مشغول في المكتب.
………
جمال : بصي يا سارة انا استحملت كتير اوي علشانك و مش هقدر ابدا استحمل فكرة انك عايزة تحرميني من ابني منك … انا عارف انك مبتحبينيش ولا عمرك حبتيني بس استحملت قولت يمكن تحس … دا انا استحملت علشانك اهانات كتير و بقا لقبي جوز الست رايح و جوز الست جاي بس اقسم بالله يا سارة لو نزلتيه مش هقدر اكمل المسلسل السخيف الي انتي معيشاني فيه انا هطلقك يا سارة
سارة : تطلقني يا جمال … عايز تطلقني
جمال : انتي الي وصلتيني لكدا
سارة : طيب يا جمال …. انا مش عايزة عيال انا مش قد المسؤليه دي انت شايف بنفسك اني مش قدها …. مش خايف عليه … مش خايف عليه مني
جمال : سارة …. خلفيه وانا هربي ابني و هنسيبك براحتك تعملي الي انتي عايزاه بس زي ما انا استحملت كتير اعتبري مكفأة نهاية الخدمة منك ليا انا هريحك من المسؤلية و هخدوا انا اربيه و هسيبك يا سارة لشغلك الي انتي بتحبيه اكتر مني و من ابنك الي جاي