هذا ليس ابني

الحلقة الخامسة الجزء الثاني

#هذا_ليس_ابني
#الجزء_الثاني
#الحلقة_الخامسة
#ياسمين_الحسيني
عادل: يعني ايه … كريم يطير مبلغ زي دا في كام يوم … اخوك دا بيهبب ايه
خالد : انا مش مطمن من ساعت ما اتلم على شوية عيال شمال كدا وانا مش مستريحله على طول مشغول ومبقتش اشوفه خالص في الشركة غير لما يكون عايز يسحب فلوس من الخزنة
عادل : خلاص كدا مش هيقدر يسحب من الخزنة تاني ولا الفيزا بتاعته بقت تشتغل المهم طمني يا سامح الفلوس دي تكفي التمويل ولا لسة
سامح : خلينا نحاول بالي معانا دلوقتي و خلال الشهور الجاية المستحقات الي لينا هتبتدي تسد اي عجز في الميزانية بس اهم حاجة المشروع دا يكمل لانه هيفرق اوي في سمعة الشركة لانها بقت في الارض انا اخدت مناقصته بالعافية ومش لازم نبوظه
عادل : خالد انت قد المشروع دا ولا نعينلك حد يساعدك
سامح : نعين ايه بس يا عادل احنا يادوب ندفع فلوس الموظفين الي عندنا و اكتر من كدا مش هنقدر
خالد : متقلقش يا بابا ان شاء الله انا قده وزيادة
عادل : ربنا معاك يابني … ربنا يستر
تدخل سامية المكتب
سامية : اذيك يا بابا .. اذيك يا خالد .. اذيك يا عمو . انا جيت اول ما سمعت المصيبة دي وقطعت اجازتي
عادل : سامية من دلوقتي انتي مسئولة عن الخزنة من دلوقتي ...انا كلمت رؤوف هيشتغل بدالك في العلاقات العامة و الموارد البشرية
سامية : ايه ….رؤوف يا بابا … على العموم هو فعلا احسن واحد يقدر يمسك المنصب دا
عادل : انا مش جايب رؤوف اعاند معاكي يا سامية بس انتي شايفة الي كريم ورطنا فيه و رؤوف لما سمع المشاكل دي ولما كلمته متأخرش عليا الراجل بصراحة ابن اصول
سامية : عارفة والله يا بابا
خالد : خير … احسن كدا فعلا انا بتعامل مع رؤوف من زمان و هو مش هيتأخر علينا في حاجة
سامية :....
سامح : طيب اروح انا اخلص الورق سلام عليكم
عادل : مع السلامة يا سامح
يخرج سامح من المكتب
عادل : … قوليلي صحيح يا سامية بتكلمي اخوك … طمنيني عليه عامل ايه و مراته و ولاده عاملين ايه
سامية : اميرة هتعمل بكرا عملية كبيرة يا بابا ربنا يسترها عليها
عادل : ايه … اذاي الكلام دا
سامية : عندها ورم ليفي في الرحم و هتشيله
خالد : لا حول ولا قوة الا بالله ودا حاجة وحشة يا سامية ولا هتبقى كويسة
سامية : هو كان هيبقى حاجة بسيطة لو شالته قبل ما تحمل في زين دلوقتي حجمه كبير و مقلق بس خير ان شاء الله هو مش حاجة خبيثة ولا حاجة الحمد لله
عادل : طيب رني عليها يا بنتي نكلمها بقالنا فترة معرفناش نكلمها بس هي مقلتلكيش من بدري ليه و ايه الي خلاها تتأخر كدا
سامية : انا عارفة من ايام الحمل بس هي كانت مخبية على الكل حتى سليم دا حتى لسة عارف من يومين و زعل مني لما كلمني في التليفون وعرف اني خبيت عليه ومقولتهوش زي اميرة بس هي الي حلفتني مجبلوش سيرة
عادل : طيب بصي خلينا نكلمها كلنا في البيت انهاردة نطمن عليها كلميها قوليلها نكلمها امتى حتى علشان امك تسلم عليها لحسن هتزعل لو مكلمتهاش
سامية : حاضر يابابا
………..
في الوقت دا كان خلاص معاد العملية بيقرب الوقت كان بيجري كل ما ابص للساعة الاقيها قدمت ساعة كنت بحاول ابين قدامها ان كله بخير بس على مين دي أميرة الي عجناني و خبزاني و هي في عز تعبها قايمة عايزة تساعدني في تحضير الغدا للولاد و مش علشان انا مش بعرف اتصرف في الغدا بس علشان عقلي كان هيشت مني و كل حاجة تقريبا على النار كانت يإما بتنحرق و يإما انحرقت خلاص ….