هذا ليس ابني

الحلقة التاسعة الجزء الثاني

#هذا_ليس_ابني
#الجزء_الثاني
#الحلقة_التاسعة
#ياسمين_الحسيني
اروى : شوفت سليم ياعادل شوفته … شوفته حلو اذاي شوفت ابني يا عادل شوفته
عادل : مبسوطة انك شوفتيه يا أروى؟!
أروى : ايوا طبعا ياااااه كان واحشني اوي شوفت زين شوفته كانه هو لما كان صغير كأنه هو يا عادل سيف … سيف ابني
بدأت اروى تبكي من جديد
عادل : الله يا أروى هو انتي زعلانة تعيطي فرحانة تعيطي
خالد : وحدي الله يا ماما  انتي شوفتيه و اطمنتي عليه و ماشاء الله عليه شكله مبسوط والدنيا ماشية معاه زعلانه ليه بقا
اروى : لا شكله مضايق مني و مش طايق حتى يبص في وشي وليه حق
عادل : يعني هو مضايق منك لوحدك مانا قدامك اهو مش طايق مني كلمة بس مش بعيط زيك و متقلقيش واحدة واحدة هتلاقي الموضوع كله اتحل ان شاء الله ... على العموم كانت فكرة حلوة منك يا نور بصراحة موضوع المدرسة دا و اننا نحطه قدام الامر الواقع هنشوفك يعني هنشوفك تسلم دماغك دي والله
نور : الله يخليك يا عمي رغم اني قلقانة على أميرة هي الي هتاخد الخناق كله لما يوصلوا البيت بس هي كانت موافقة و عايزة تحط حد للخلاف دا
عادل : اميرة طيبة و بنت حلال زيك يا نور الحمد لله ربنا كرمني فيكم انتم الاتنين لولادي
……………
روحنا البيت و مش عارف بصراحة كان احساسي غريب طيب انا عارف انه اضحك عليا وان اميرة كانت بتتصرف من ورايا بس مهي لو قالتلي مكنتش هوافق و بعدين شكل اهلي و تصرفاتهم معايا في الحفلة كان مخليني احس انهم ممكن يكونوا ندمانين طول الفترة الي فاتت بس بالنسبة ليا الندم لوحدوه مش كفايا انا ايه يطمني من ناحيتهم و بعدين انا ايه يأكدلي انهم بيحبوني مش بيمثلوا عليا علشان ندمانين اهو كان في حوار كبير في دماغي و كنت لازم افهم من اميرة ايه الي خلاها تتصرف كدا من ورايا بالرغم انها عارفة كمية الوجع الي انا كنت فيه منهم اذاي كانت معاهم ضدي و ليه
سليم : فريدة … يلا على اوضتك انا وماما في موضوع لازم نتكلم فيه
فريدة : حاضر يابابا
أميرة : طيب انا هلكانة انهاردة مينفعش نأجل الموضوع دا لبكرة
سليم : لبكرة علشان الاقي مفجأة جديدة بكرة
أميرة : انا مش فاهمة ايه الي مضايقك
سليم : الي مضياقني ….هو انتي شايفة اني المفروض انبسط صح و مراتي مخبية عليا و واخداني لفخ
أميرة : فخ انت بتسمي ان بنتك تبقى في وسط اهلها فخ و ان ابنك يتعرف على عيلته فخ
سليم : انتي بتسميهم عيلة اذاي بعد كل الي حصل
أميرة : اسمع يا سليم و اسمع كويس بقا علشان ننهي الموضوع دا لاني تعبت….. انت اخدت جنب و زعلت و دا حقك و محدش يقدر يلومك عليه انت حر في نفسك انما على اي اساس عايز تحرم ولادك من اهلهم الي بيحبوهم و يتمنو يشوفوهم انا مش شايفة ان ليك اي حق في دا لان دي صلة رحم … غير انت اذاي عايز فريدة و زين يعيشوا نفس عيشتنا احنا الاتنين
سليم : ملها عيشتنا يا أميرة
أميرة : احنا مقطوعين … لوحدنا … ملناش حد … انت عارف لو جرا لابويا حاجة يبقى كدا خلاص بح  ملناش اهل تاني … يرضيك فريدة وزين يعيشوا لوحدهم زينا انا اهل امي اتخلو عني علشان شوية فلوس و ابويا مكنش ليا غيره في الدنيا اتحرمت من اني يبقا ليا ولاد خال او عم افرح معاهم في الاعياد او المناسبات كنا لوحدنا مكنتش عارفة معنى اي حاجة من الحاجات دي لحد ما لقيت سامية و عمو و طنط بيعرفوني معنى ان يكون ليك عيلة كبيرة تحبك .. طيب عارف الرحلة فريدة انبسطت اد ايه مع يوسف وسيف و مرات عمها و عمها طيب عارف انها حتى قبلت سارة اختك و عرفت يعني ايه يبقالها عمات يحبوها و يخافو عليها كمان ولا يبقالها جد وجدة عايزين يشوفوها اسعد واحدة في الدنيا انت ليه تحرمنا من دا كله من حد يسأل علينا و يطمن لو كنا عايشين ولا متنا ليه علشان انت بتهرب من المواجهة احنا نتحرم ليه
سليم : خلاص يا أميرة .. كفاية كدا … انتي بس ليه متأكده انهم الاهل الي انتي نفسك فيهم
أميرة : علشان اديتهم الفرصة الي انت مش راضي تديهالهم يا سليم
سليم : انتي حرة يا أميرة براحتك عايزة تتعاملي معاهم انتي حرة انما محدش يجبرني اني اتعامل معاهم و تعملي فيا فصل زي بتاع النهاردة دا تاني هيبقى في رد فعل تاني مني يا اميرة
أميرة : و هو انا كنت عملت ايه يعني يا سليم .. هو انا لو كنت قولتلك ان اهلك جايين كنت هترضى تحضر حفلة بنتك اكيد لا كنت هتحرمها منك في يوم زي دا و هي فرحانة و طايرة انك اخيرا هتيجي المدرسة ولا ناسي انك كنت مشغول طول الشهور الي فاتت دي وحتى مروحتش معاها اي مناسبة في المدرسة
سليم : خلاص يا اميرة الي حصل حصل
أميرة : بس انا موعدكش انك مش هتشوفهم تاني علشان ساعتها هبقى بضحك عليك
سليم : قصدك ايه بقا ان شاء الله
أميرة : علشان فريدة عزمتهم على عيد ميلادها كمان اسبوع
سليم : ايه … ومن ورايا بردو … ماشي يا أميرة اعملوا الي انتو عايزينه براحتكم خالص و طظ فيا انا بقا صح
أميرة : انا مقولتش كدا ...انت عايز متتفاجأش و اديني بقولك و محدش جبرك تكلمهم براحتك بس شوف بقا ايه اهم عندك فرحة بنتك بيك وانت معاها ومع اهلها كلهم في عيد ميلادها حتى جدها مؤنس وجدها سعيد هيبقوا موجودين دا اهم ولا هروبك اهم يا سليم ….انا داخلة انام تصبح على خير
سليم :.........
ساعتها مكنتش قادر ارد على اميرة هي معاها حق في انهم يبقالهم عيلة يحبوها و تحبهم اذا كان دا كان كل املي وانا صغير اني احس ان اهلي بيحبوني بس انا مكنتش مقتنع وقتها نهائي انهم بيحبونا الي هو اذاي فجأة كدا انا ايه يثبتلي كنت في حيرة بين اني اعزل نفسي تماما و اسيبهم براحتهم بس كدا هبقى انا الي لوحدي و ولادي هيزعلوا اكيد مني وبين اني اكون موجود و اديهم الفرصة الي بيطليوها من ست سنين و اشوف فعلا الناس دي تستحق ولا لأ
طبعا كتر التفكير في الموضوع دا صدعلي دماغي فقررت اني اروح المكتب اشغل نفسي شوية خصوصا اني لازم اشد حيلي شوية في المكتب لاني دايما كان حلمي ادخل مشروع دولي و يبقالي اسم و بصمة في العمارة و كنت شغال فعلا بإيدي و سناني على دا فطلعت تاني يوم من بدري على المكتب و بما ان دا اسبوع المفاجآت فلاقيت خالد داخل عليا و في ايده هدية للمكتب كمان و طبعا مفيش داعي استغرب هو جاب العنوان من مين بس زي ما قولتلكم انا مش زعلان من خالد انا كنت زعلان عليه 
خالد : الف مبروك المكتب حلو بصراحة يا سليم احساس حلو انك شغال لحسابك و ملكش مدير انت المدير
سليم : الله يبارك فيك عقبالك
خالد : كان ابويا يجيله جلطه كدا لو سيبته دا محتاس واحنا محتاسين بصراحة يا سليم من بعد ماانت مشيت و الدنيا باظت كريم اختلس مبلغ كبير من الخزنة و سمعة الشركة بقت في الارض و يادوبك لحقنا مشروع شغالين عليه بقالنا سنتين بس كل يومين العملا يغيرو في الرسم و يطلعولنا بحاجة جديدة و مينفعش طبعا تشتكي بس المشكلة في زنقة الموارد بنبقا لسة مسددناش الفلوس الي علينا نلاقي نفسنا مديونين من اول وجديد والعملا بقا يماطلوا في الدفع و يقولولك عند الاستلام حاجة جميلة اوي بصراحة
سليم : معقول الدنيا وقعت كدا … بس طلبات العملا ابقى اعمل حسابها في الرسم و خلي بالك من التعديلات المستقبلة و حاول انت تسبقهم بخطوة
خالد : سليم انا بصراحة كنت جاي و طمعان فيك
سليم : خالد انا مش هرجع الشركة تاني فمتحاولش تطلب مني الطلب دا مجيتك دي انهاردة مفرحاني بس متخليهاش تقلب بنكد
خالد : ياسليم انا لسة مطلبتش منك ترجع مع ان دا هيبقى حلمي و حلم ابويا بيتحقق انت لو تشوفه بيتحسر عليك اذاي بس انا عارف انك مش ناوي ترجع انا طمعان فيك تعلمني اذاي اخد بالي من الحاجات دي و بصراحة انا محتاج مساعدتك في المشروع دا ولو تعتبره ياسيدي عرض عمل على المكتب و بعقد انا معنديش مشاكل بالعكس انت اولى من الغريب و في الاول و الاخر دي فلوسنا كلنا
سليم :... بتحرجني يعني علشان اساعدك على العموم انا معنديش مشاكل اساعدك انا بردو ميخلصنيش انك تبقى محتاجني وانا مقفش جنبك و سيبك من موضوع عرض العمل دا انت نفسك بتقول ان الشركة مديونة فا انتم مش قد عمولتي اصلا ههههههه
خالد : ماشي يا عم الجامد يعني بجد هتساعدني
سليم : انا معنديش مشكلة المكتب لسة فاتح و معليهوش ضغط شغل كبير فمش هاجي على شغلي لو ساعدتك و بعدين انا هرسم معاك مش هرسملك فيه فرق و فلازم تبقى موجود و هعلمك تقنية حلوة توفر بيها مجهود و تبقى سهلة لاي تعديلات
خالد : ياريت .. نبدأ امتى …. انت عارف يا سليم انا كنت عارف انك هتساعدني … ما انت طول عمرك واقف في ضهري
سليم : من ايام ما ولاد عماتك بيجرو وراك علشان يضربوك و كان ابوك يجي عليا انا يلا متشلش هم
خالد : انت لسة فاكر اهو انا قولت انت نسيت
سليم : مش سهل انسى لعبنا سوا يا خالد ولا الكور بتاعتك الي كنت بتزهق منها و تديهالي
خالد : لسة بتحب الكورة
سليم : ههههه احنا لو فضيلنا نعيد الذكريات مش هنشتغل روح هات الي اشتغلته وتعال وريني الموقع الي شغالين فيه
خالد : عارف يا سليم اني فرحت انك طلعت اخويا مش علشان الرسم والشغل لا علشان لو فعلا كانت منال بتتكلم بجد وفعلا كان حد بدلك وانت صغير انا كنت هزعل اوي على اخويا الي عشت معاه في طفولتي و كان بيلعب معايا و يدافع عني الحمد لله ان منال طلعت كدابة و الحمد لله على رجوعك لينا
سليم : …...
خالد خلاني اسأل نفسي سؤال مهم اوي طيب هو فرحان ان اخوه الي اختفى زمان رجع هل امي و ابويا بقا فرحانين اني طلعت انا الي ابنهم بجد ولا كانو يتمنو ان منال متكونش ضحكت عليهم هل انا الابن الي كانوا بيدوروا عليه و يتمنوه ولا لأ و كل احساسهم دا مجرد ندم على انهم اذوني طيب لو انا مطلعتش ابنهم كانوا هيندموا بردوا على الظلم الي عملوه معايا ولا مكنش هيبقى فارق معاهم …….بالنسبة للشغل مع خالد بقا انا مش عارف ليه وافقت اساعده بس كان دخوله عندي يومها و خوفه على الشغل خلاني مرفضش طلبه حسيته فعلا محتاح مساعدة ودي طلعت الحقيقة هو كان محتاس بس عايز يتعلم و طبعا بما ان اسبوع المفاجآت مخلصش بعدها بيومين بس الاقي سارة كمان عندنا في البيت سامية حكتلي على موضوع خوفها من الحمل والخلفة و انها محتاجة الي يقف جنبها خصوصا ان جمال جوزها لاول مرة ياخد منها موقف و سابلها البيت وهي كمان مستحملتش تفضل لوحدها فمكنش قدامها حل غير انها تكلمني بما انها خايفة انها تعيد مأساة امها تاني
أميرة : سليم سارة برا و عايزة تكلمة
سليم : سارة … سارة برا يلا علشان تبقى كملت
أميرة : وسارة كمان ملها بقا
سليم : اصل هي وكريم بس الي فاضلين يبقا كدا ناقص كريم
أميرة : قصدك ايه
سليم : خالد جالي المكتب من يومين و هساعده في مشروعه انا انشغلت نسيت اقولك … انا طالعلها
أميرة : ماشي بتردهالي يعني و بتخبي عليا
سليم : ههههه لا والله انشغلت
…….
…….
سليم : لو انتي قلقانة انك مش هتعرفي تربيه يا سارة فدا خوف ملهوش مبرر لاني انا و اميرة قبل ما نخلف كنا قلقانين بردو هنعرف نربيهم ولا لأ بس طلعو هما الي بيربونا فمتقلقيش من حاجة زي دي
سارة : يا سليم انت مش فاهمني انا خايفة انه يكرهني زي ما انت كرهت ماما و بابا
سليم : ومين قال اني بكرهم بالعكس انا عمري ما كرهتهم
سارة : اومال مش راضي تكلمهم ليه يا سليم
سليم : اقولك الحق يا سارة و تصدقيني لو دا هيخليكي متنزليش البيبي
سارة : قول يا سليم
سليم : خايف
سارة : ايه … خايف
سليم : خايف يا سارة يكون حبهم دلوقتي مجرد ندم … اذاي يكونوا بيحبوني بجد طيب مهما محبونيش و انا طفل علشان يحبوني دلوقتي  … مش يمكن بيمثلوا عليا علشان يظهروا الاسرة السعيدة الي كانوا دايما ضاحكين على نفسهم بيها قدام العيلة … خايف لو قربت منهم تاني ارجع احاول و احاول زي ما كنت طفل انهم حتى يبصولي او يحبوني زيكم و ملاقيش منهم غير الرفض … انا ايه الي يضمنلي و يخليني اصدق اصلا اني مش هتعب تاني و احاول تاني و انحسر تاني انا خايف … يمكن فرحان بإهتمامهم دلوقتي و خايف لو صالحتهم خلاص الاهتمام دا يروح او الاسوء اتحول لشئ مسلم بيه و يبقا خلاص مفيش داعي يهتموا او يبذلوا اي مجهود انا الي خايف يا سارة يكون كل ندمهم دا مجرد تمثيل خايف
سارة : يعني لو ماما و بابا بجد اثبتولك انهم بيحبوك ودا مش مجرد ندم او تظاهر كل حاجة هتتحل و ترجع تحبهم تاني
سليم : مش عارف بس دا الي المفروض يحصل بس السؤال الصح يا سارة هيحصل اذاي
سارة : اذاي ؟!!!
سليم : مقدرش اغششهم الاجابة هم الي لازم يعرفوا لوحدهم ها يا سارة هتنزلي البيبي بردوا ولا انتي مش عارفة الاجابة الصح
سارة : انا فهمت قصدك يا سليم فهمت قصدك خلاص انا هحاول والله اكون ليه الام الي يستحقها
سارة قامت ولقيتها بتترمي في حضني وانا حضنتها جامد و هي بتعيط بس قولتلها طيب متعيطيش وانا اجبلك شيكولاته طيب بلاش اجيبلك ايس كريم  ضحكت اوي و لقيتها بتقولي
سارة : انا هخلي بالي من البيبي يا سليم بشرط بقا توعدني تبقا خال جامد معاه زي ما انت مع سيف ابن سامية وانا هسمية سليم

انا فرحت اوي ان اخواتي طلعوا بيحبوني كدا مكنتش متخيل دا سامية و سارة و خالد خلوني احس بالمسؤلية تجاههم و بالخوف عليهم وفكرت في كلام اميرة طلعت فعلا كنت حارم فريدة و زين منهم واني فعلا كنت بهرب و بس الي بجد كان نفسي اطمن عليه هو كمان كان كريم لان كلامهم عليه يقلق و هو نفسه لما كنت شغال معاهم في الشركة كان اسلوبه يخوف
# يتبع