هذا ليس ابني

الحلقة الثانية عشر

الأمتحانات خلصت خلاص و طبعا انا و عبد الرحمن كنا هلكنا بين المذاكرة و الشغل .. كنا لقينا شغل في محل كشري و الراجل كان ابن حلال بصراحة كان لما يلاقينا بنذاكر كان يقولنا ابقو قابلوني والله ما هتفلحوا كان متفائل اوي و مصدر للبهجة في المحل علشان كدا المحل قفل ... كان لينا واجبة للغدا و كان بيدينا باليومية اهو احسن حاجة ان احنى بطلنا نعيش على المعونات كنا بنشتغل وبنكسب و بنصرف على نفسنا .... كان احسن وقت بالنسبة ليا لما كنت انزل اشتري جزمة ولا طقم صحيح كنت بروح أماكن أسعارها قليلة على قدي بس كنت بفرح اني شاريها مش شاحتها كنت شايف نفسي شيك اوي ساعتها ولا كأني عمرو دياب .... كنت بحاول ابهر أميرة بقا واد شيك و طويل كدا و وسيم هي كانت بتشوفني بتضحك وانا لما كبرت شوية و كنت بتفرج على الصور الي بتصورها انا عبد الرحمن في الأستديو عرف انها كانت بتضحك عليا ... يلا اهي دلوقتي الي بتخليني انقي معاها و تلطعني في المحلات بالساعات و تقولي اصل زوقك حلو ....جه يوم النتيجة انا من كتر ما بطني كانت وجعاني و خايف كنت بلف على السايبر و افضل اسأل من بعيد كدا و أتمنى يقولو لسة اخر ما زهقت روحت عند أستاذ سعيد وساعتها أستاذ مؤنس أبو اميرة كان هناك انكسفت ساعتها وكنت همشي بس أستاذ سعيد نده عليا و قالي تعالى

أستاذ سعيد: اه فكرتوني بايام زمان مكنتش النتيجة تطلع على النت كدا لا دول كانوا بيزيعوها في مايكروفون المدرسة الصبح بدري كل العيال كانت مفضوحة علني

أستاذ مؤنس: كانت أيام الي يجيب 80 يدخل كلية الطب و يبقا حاجة مفيش منها بقا

فجأة لقينا أميرة و سلمى داخلين علينا و فرحانين اووي و شايلين ورق و الفرحة مش سايعاهم و لقيت أميرة بتديني ورقة و بتقولي مبروك.... أميرة جابتلي النتيجة مكنتش عارف ساعتها ابص في الورقة كنت باصص في وشها و هي بتضحك و بتقولي مبروك و تنحت شوية لقيت أستاذ سعيد بيقولي

أستاذ سعيد: ما تبص يابني في الورقة وتقولنا النتيجة

أميرة: 96،5 يا عمي.... سليم جايب 96،5

أستاذ مؤنس كان بيغير على اميرة زي ما قولتلكم قبل كدا لقيته بصلها حتة بصة بس هي كانت بتعرف تخليه ميزعلشي منها و في ثانية اول ما تبصله ينسى أساسا هي كانت مضيقاه في ايه كانت بنته الوحيدة و أمها ماتت كمان و سابتهاله رباها بما يرضي الله هي بنت ناس و بنت اصول

أستاذ مؤنس: ..... طيب وانتي ياست أميرة

أميرة : انا كمان يا بابا جبت 96

سلمى : انا جبت 94،5 الحمد لله و صاحبك جاب 93،4

أستاذ سعيد : مبروووك يا ولاد مبروووك يا ولاد