هذا ليس ابني

الحلقة الرابعة عشر الجزء الثاني

#هذا_ليس_ابني
#الجزء_الثاني
#الحلقة_الرابعة_عشر
#ياسمين_الحسيني
عادل : الو ايوا يا خالد انا بخير يا حبيبي الحمد لله الشغل عامل عندك ايه
خالد : زي الفل يا بابا متقلقش والله المشاريع الصغيرة بتسد العجز و بنلاقي عروض على مشاريع كبيرا كمان الحمد لله
عادل : الحمد لله … سليم مش عندك
خالد : مجاش النهاردة و رنيت عليه بس مردش
عادل : طيب متعرفش في ايه برن عليه بردو مش بيرد … انا قلقان عليه والله .. طيب انا هكلم اميرة يلا انت في امان الله
……...
عادل : الو ايوا يا أميرة يا بنتي عاملة ايه و اذي فريدة وزين
أميرة : الحمد لله يا عمي تمام والله انت الي عامل ايه
عادل : الحمد لله … هو سليم عندك ؟!! مرحش الشركة ليه ؟!!
أميرة : ايه ؟!! سليم مشي من بدري يا عمي وكان واخد معاه ورق ورسومات و اللاب و خارج من بدري مستعجل
عادل : بكلم خالد بيقول مش موجود و برن عليه مش بيرد و برن على مكتبه مجاش انهاردة
أميرة : مش عارفة والله يا عمي هحاول ارن عليه
عادل : ياريت يا أميرة اصلي قلقت عليه كدا زيادة
………
أروى : برن عليه بيدي مشغول
عادل : وانا كمان مش عارف في ايه
أروى : انا قلقانة يا عادل
عادل : ربنا يستر عليه ياترى انت فين يابني … لا … انا مش مطمن انا هنزل ادور عليه
أروى : تدور عليه فين يا عادل
عادل : في اي حتة … مستشفيات … اقسام بوليس اي حتة
أروى : ايه … لا ياعادل الله يخليك متخوفنيش عليه كدا زيادة … الساعة دلوقتي ٣ يمكن يكون روح انا هرن على أميرة
….
أميرة : لسة والله يا طنط ما روحش و تليفونه مغلق خالص انا حتى كلمت بابا و عمي سعيد مراحش عندهم انهاردة و عبد الرحمن صاحبه ميعرفش عنه حاجة انا قلقانة اوي اول مرة تحصل
أروى :ياترى انت فين يابني ربنا يحفظك و يحميك يارب
عادل : لا خلاص كدا مش هقدر انا نازل يا أروى ….. الو ايوا يا سامح قابلني عند القسم
……….
عادل : لا مستحيل اومال ابني فين يا سامح ابني فين
سامح : اهدى بس يا عادل …. احنا كدا لفينا على كل المستشفيات و الاقسام الي هنا تعالى بس نروح دلوقتي وانا ليا معارف حبايبي في الداخلية لو جد اي جديد هيكلموني
عادل : مش قادر يا سامح انا مش قادر اتخيل هو ممكن يكون ضاع مني تاني ممكن
سامح : ياشيخ صلي على النبي ان شاء الله مفيش حاجة تلاقي عربيته عطلت في حتة و واقف يصلحها
عادل : تفتكر يارب تيجي على قد العربية … لا انا مش هروح من غيره … روح انت لو تعبت انا هلف تاني على المستشفيات
سامح : كدا … الله يسامحك انا تعبان على تعبك يا راجل انت ضغط شكله في السما و جسمك بيترعش يا عادل
عادل : التليفون بيرن دي أروى … لا لا مش هرد عليها هقولها ايه انا لسة ملقتهوش
سامح : ياسيدي رد يمكن يكون رجع البيت
عادل : تفتكر … الو …. ايه بتقولي ايه …. لا لسة …. محدش يعرف مكانه و مش موجود لا في المستشفيات ولا في اقسام البوليس …. طيب ماشي روحي عند اميرة استنيه هناك يمكن يرجع و تطمنيني …. يلا مع السلامة
سامح : انا اعرف جماعة حبيبي ممكن يدورو معانا عليه في الكماين لو عربيته عديت عليهم يبلغونا
عادل : ياريت يا سامح يارت والله …. انت معارفك كتير … يارب يبقى بخير … يارب
………
الساعة  عشرة بليل وانا مروح و زهقان جدا وقتها كلهم كانو بيدورا عليا وانا كان في بالي مليون حاجة تانية و مخنوق ومش عايز اتكلم حتى مع حد وقفوني في كمين وقتها عادي كان سامح كلم اصحابه طبعا فانا استغربت لقيت الظابط بيقولي رخصك طلعتها وانا اساسا على اخري و راح مطلع التليفون و مكلم حد و بيقولوا تمام و سألني انت رايح فين انا استغربت من السؤال
الظابط : رايح على فين كدا ياباشمهندس
سليم : مروح البيت ان شاء الله
الظابط : هو تليفونك مالو ؟!!
سليم : مالو ؟!! مش فاهم
الظابط : يعني مش بترد على حد ليه
انا استغربت انا كنت مضايق من الصبح و قفلته بس هو عرف اذاي مسكت التليفون قدامه
سليم : فاصل شحن ؟! هو حضرتك بتسألني الاسئلة دي ليه يا فندم في حاجة
الظابط : روح البيت يا باشمهندس و ابقى رد على اهلك قالبين عليك الدنيا من الصبح في الاقسام و المستشفيات
اداني الرخص و شاور للعربية تعدي
سليم : !!!!!! بجد !!!! تمام شكرا
انا استغربت وقتها يعني انا صحيح خرجت واتأخرت برا  بس كنت مستغرب حكاية بيدورو دي انا روحت البيت قبل ما ابويا يوصل هو و سامح و بردو كنت مخنوق و مش فايق اصلا ارد على حد الي حصل يومها معايا كان محبط وقتها و بالنسبة ليا كان محطم للآمال 
دخلت البيت و رميت ورقي و الرسومات و اللاب على الكنبة
أميرة : ايه ياسليم التأخير دا كله طيب رد على تليفونك طمنا انك كويس
سليم : فصل شحن … انا كويس اهو مفيش حاجة
اروى : يابني رعبتنا عليك الله يهديك دا ابوك نزل لف على كل المستشفيات و الاقسام حوالينا يدور عليك
سليم : انا كويس يا ماما قلقتوا نفسكم على الفاضي
ابويا و سامح دخلوا البيت و ابويا كان فرحان اني بخير بس مضايق علشان كان قلقان و قلقان علشان عايز يطمن اهو كانت مشاعرة متلغبطة عايز يعرف ايه الي حصل و في نفس الوقت مش فارق معاه غير اني كويس
عادل : ايه يا سليم يابني كنت فين من الصبح وقعت قلوبنا
سامح : دا ابوك نزل زي المجنون يدور عليك في كل حتة مستشفيات و اقسام بوليس لولا الله يكرمه الظابط الي وقفك كان زمنا لسة بندور في المحفظات الي جنبنا
انا اصلا كنت مخنوق وقتها و مش عايز اتكلم و محبط و هما عايزني افضل ابرر لهم انا كنت فين وانا كنت مضايق
سليم : انا كويس مفيش حاجة … انا داخل انام
ابويا اتغاظ من رد فعلي اني بعد كل تعبه و لفه دا مش فارق معايا و عايز ادخل انام هو ميعرفش انا زهقان ليه فزهق عليا
عادل : داخل تنام !!!  مترد علينا ياسليم كنت فين دا كله و سايبنا بنلف عليك في كل حتة
انا ساعتها رديت رد مستفز بصراحة عارفين لما تبقوا عايزين تطلعوا زهقكم في حد وخلاص
سليم : يوووه انا تعبان و عايز انام و اعتبر اللف بتاعك بتاع النهاردة قصاد لف قديم ملفتهوش انت زمان وخلاص ماشي
ابويا وشه بهت و بص في الارض و مردش عليا وانا حسيت بالذنب ساعتها بس كابرت و مشيت على الاوضة
عادل : ……..
اروى : كدا يا سليم
أميرة : معلش يا طنط … معلش يا عمو متزعلش من سليم والله هو لما بيبقا متضايق من حاجة بيبقى زهقان … لما يصحى انا هفهم منه ايه الي حصل
عادل : لا يا أميرة انا مش زعلان ولا حاجة المهم عندي انه بخير الحمد لله
اروى : يلا احنا هنيجي بكرا الصبح ان شاء الله نطمن عليه و نشوف في ايه
عادل : مش عايزة حاجة يا أميرة يا بنتي
أميرة : ربنا يخليك يا عمو تسلم على كل تعبك دا معانا
عادل : انا ابوه يا أميرة لازم اتعب عليه دي حاجة مش محتاجة شكر