هذا ليس ابني

الحلقة الثانية الجزء الثاني

#هذا_ليس_ابني
#الجزء_الثاني
#الحلقة_الثانية
#ياسمين_الحسيني

خالد : يا نور ارجوكي مينفعش اكتر كدا خلاص انا عارف انك مش مصدقاني بس اخر فرصة بطلبها منك وانا مستعد لاي حاجة تطلبيها مني بس ارجوكي علشان خاطر يوسف ذنبه ايه يتربى بعيد عن ابوه
نور : يوسف انت لسة جاي تفتكر ان عندك يوسف .. مفكرتش في يوسف ليه وانت كل يوم مع واحدة شكل و مفكرتش في يوسف ليه وأنا طالع عيني وراك في الشغل مفكرتش ليه يا خالد
خالد : نور انا بعترف اني كنت مقصر بس والله مخونتكيش ولا مرة يا نور و يشهد عليا ربنا انا فعلا كنت بقضيها سهر و فسح و خروج بس كان اخري هزار و سهر مش اكتر واوعدك و احلفلك انك هتشوف واحد تاني
نور : وايه الي غيرك يا خالد فجأة كدا قررت انك تبقى كويس و تعرف ربنا مفيش حد بيتغير في يوم وليلة
خالد : الي غيرني ابويا يا نور … كسرة ضهره يوم سفر سليم .. خفت اجي في يوم وابقى زيه خفت ابني يسيبني و يبقى معاه حق والاقي نفسي لوحدي .. ابويا الي الشغل كان هوايته بقا فين و فين لما بيروح الشركة ولا حتى بقى مهتم بنخسر ولا بنكسب ولا شغالين ولا في ايه الي بيجرا الدنيا اصلا بقا زي المتبنج حد تاية مش عارف يعمل ايه …. كل الي كان بيبنيه مبقاش ليه اي قيمة من غير ابنه جنبه و بصراحة انا مش الابن الي يفخر بيه او يقدر يشيله لو وقع … انا بحاول والله يا نور بحاول اقفي جنبي و متسبينيش
نور : ….. وانا ايه الي يضمن حقي و يضمنلي كل الكلام دا يا خالد .
خالد : كل الي تطلبيه انا هأمنلك مستقبلك و مستقبل يوسف علشان تعرفي ان ميهمنيش غيرك انتي وابني
نور : ….. ماشي يا خالد اما نشوف اخرتها ايه
خالد : انتي بتتكلمي بجد !!!! … خلاص يعني هترجعي البيت … طيب يلا بينا دلوقتي
نور : ههههههه الصبر حلو انت مستعجل كدا ليه هاخد حاجتي من عند ماما واجي معاك انا ويوسف
خالد : نور ربنا يخليكي ليا و اقدر اعوضك عن كل الي فات

نور قررت تدي لخالد فرصة مهما كان الي حصل علشان يوسف و علشان لسة بتحبه و كان عندها امل فيه و بصراحة انا نفسي اتفاجأت لانه وفى بوعده ودا مكنش سهل اما بقى كريم فكان زي ما هو في التراوة كل يوم يرجع على الفجر وياريته راجع فايق حتى انك تكلمه…. كان ضايع بزيادة و مع اهمال ابويا للشغل فكان واخد راحته على الاخر و مش همه حد حتى سامح بطل يعتمد عليه و شال شغله فوق راسه

عادل : كريم انت ايه الي جايبك متأخر كدا رد عليا
كريم : بقولك ايه يا بابا انا داخل انام
عادل : انت ياحيوان انت اقف عندك هنا عدل وكلمني زي ما بكلمك
كريم : يووووه انت فاضي بقا ..انت ايه الي مصحيك اساسا لحد دلوقتي السهر غلط عليك يا عجوز
عادل : احترم نفسك و اتكلم عدل
كريم : وإلا ….
عادل : وإلا ايه ؟! انت اتهبلت في مخك ولا ايه
كريم : بابا بكرا ابقى اتكلم ماشي انا عايز انام
عادل : تنام …. انت ليك عين تنام و انت راجعلى على وش الفجر و سكران و ريحتك زفت
كريم : بجد ريحتي وحشة … مكنتش اعرف طيب بكرا استحمى واكلمك ماشي ...يلا يلا اطلع نام انت كمان
عادل : انت يا ولد تعالى هنا
أروى : في ايه يا عادل بتزعق ليه ...كريم ايه الي انت عامله في نفسك دا ايه المنظر و الريحة الهباب دي انت بتشرب زفت على دماغك
كريم : يوووووه مش نقصاكي انتي كمان عندك جوزك اهو افهمي منه ماشي .
أروى : انت يا ولد …
عادل : شايفة … شايفة بعينك ابنك الضايع عامل اذاي و سامعة بيتكلم اذاي
اروى : اهدى يا عادل … ضغطك مش ناقص … بكرا لما يصحى نكلمه و نقوله على موضوع الجواز
عادل : جواز .. انتي شايفة دا يفلح في جواز … دا اخره يفتح ازازة مش يفتح بيت … والله دا احنا يبقى بنبلي الي هتاخده … الزفت دا انا مش هجوزه غير لما يتربى وانا بقى الي هربيه من اول و من جديد
أروى : هتعمل ايه يا عادل ؟!
عادل : خلاص … مفيش فلوس ليه تاني الحيوان دا انا هقطع عنه اي فلوس ولو اخد من حد يبقا ملهوش كلام معايا تاني والكلام دا ليكي بردو  يعني متدليهوش فلوس من ورايا يا هانم
اروى : حاضر يا عادل.
…..