هذا ليس ابني

الحلقة الرابعة عشر

أميرة : معقولة ....  عماد لسة عايش.. دي غريبة اوي

سليم : اه دا انا كنت هفضح نفسي ساعتها و اسأله أساسا بس مسكت لساني

أميرة : مقبلتش حد تاني .... سامية مثلا ؟

سليم : عرفت انها شغالة في الموارد مع أستاذ عماد كان نفسي اشوفها أنا عارف انها لو عرفتني و عرفتك هتحبك أوي يا أميرة ولو شوفتي سيف الصغير كمان ... اتجدعني كدا وهاتيله عروسة ..

أميرة : ياسلام عليك يا عم سليم قال يعني بتشجعني بقا علشان اجيب عروسة طيب افرض اذا جه ولد ...

سليم : أي حاجة ربنا يبعتها انا هكون راضي بيها ... بس انتي عارفة انا نفسي تجيبي بنوتة الأول ليه

أميرة : عارفة.

سليم : ياسلام عليكي يا فقيها هانم ليه بقا ياأم العريف

الحقيقة أميرة كانت قرياني قدامها كأني كتاب مفتوح ودي اكتر حاجة كانت ولازالت بتريحني فيها لحد دلوقتي

أميرة: علشان الأخت الكبيرة بتبقا حنينة على أخواتها و لما بيغيب الأهل بتكون هي الأم ..... وهو دا الي انت كنت حاسه من ناحية سامية

سليم : ......ماشي مش هتغدينا بقا..

أميرة : ايه دا هو انت بتتغدى زي بقيت البشر عادي يعني ههههه

سليم : ماشي يا ظريفة ههههه

...............

أروى : خالد .... نفسي افهم ايه الي انت بتهببه مع مراتك دا

خالد : يوووه يا ماما ... هو انتي كل لما تشوفيني لازم تقطميني

أروى : انا بقطمك ... يعني لما نور تيجي تشتكيلي منك لانها مش قادرة عليك سهر كل يوم و رجوع على وش الفجر ...تعمل ايه الغلبانة دي فيك ... حرام عليك يا أخي دي حامل ... مش خايف على ابنك الي جاي دا

خالد : لا بقولك ايه يا ماما انا أساسا مكنتش عايز اتجوز انتو الي جبرتوني وهي مصدقت بصراحة يبقا تستحمل بقا ..

أروى : يعني دا جزاتها انها بتحبك و بتخاف عليك تصدق والله البنت خسارة فيك مش كفاية انها بتداري بلاويك و العك الي انت بتعمله في الشغل ... والله ابوكوا جاب أخره منكم ... محدش فيكم نفع ولا شايل همه .... خلفت ايه الهباب دي ... دا انا تعبت منكم كلكوا اذا كنت انت ولا اخوك الصايع الي اخرها هيجيبلنا مصيبة .

خالد : ها يا ماما يا حبيبتي وايه كمان نسيتي شكوتك من سامية المعقدة و سارة المجنونة ... وانا عملت ايه في دنيتي يارب ... وان دا كله من دلع ابوكم ... تصدقي الواحد غلطان أساسا انه جه يفك عندك شوية من زن نور في البيت طيب انا بقا خارج اسهر وانتي السبب

أروى : انا السبب ولا الصايعة الي عمالة ترن عليك و تقفل في وشها و خايف على زعلها علشان كدا بتهرب... اتقي الله في بنات الناس .. انت بقيت راجل متجوز ...