هذا ليس ابني

الحلقة الثانية عشر الجزء الثاني

#هذا_ليس_ابني
#الجزء_الثاني
#الحلقة_الثانية_عشر
#ياسمين_الحسيني
كلنا كنا واقفين صف في صوان معمول في جنينة البيت ابويا الي مكنش قادر يقف انا و خالد و جمال و رؤوف واقفين بناخد بداله العزا كل الي داخل مش مستغرب وجودي لان الكل عرف الحكاية... في العيلة في الي جاي يعزي و حايش دموعه و بجد زعلان و في الي جاي كاتم الضحك من كتر ما هو شمتان مش كل الناس مهما بينولك حبهم يكونوا بيحبوك بجد في ناس كدا شر … مهما تعمل معاهم ميصدقوا يشمتو فيك و مع الاسف لازم تلاقي منهم في كل عيلة كبيرة زي عيلتنا … كنت بشوفهم مش حتى بيحاولوا يدارو وشهم .. عنيهم فضحاهم … في البيت جوا طبعا عزا الستات من الاخر هتلاقي النص التاني بتاع الناس الشر الي برا و النص الكويس الي زعلان بجد و في وسطهم امي الي مش عارفة هي فين ولا بتعمل ايه و كل شوية تسأل سامية و سارة هو كريم اتأخر ليه …. الابن مهما يعمل و مهما يغلط و مهما كان مؤذي يفضل ابن … القلب ينعصر على فراقه و العين دموعها ابدا ما تنتهيش… ميداويش الجرح دا ولا الف طبيب … مفيش غير الصبر والدعاء … ملناش غير ربنا و ملناش غيره ملجأ في حزننا و ياريتنا نفضل فاكرينه في فرحنا ومننساش انه السبب في كل حلو قبل اي ابتلاء … نتعلم نقول الحمد لله على ابسط الحاجات في حياتنا الي واخدنها مسلمات علشان مش هنحس بنعمتها غير لما تروح
عماد : البقاء لله يا عادل
عادل : عماد … يااه ياراجل انت فين …
عماد : موجود متشلش همي
خالد : اذيك يا عمي
عماد : معلش يا خالد كان نفسي اجيلكم في ظروف احسن من كدا البقاء لله يابني البقاء لله يا سليم
سليم : الحمد لله , لله ما اخذ و لله ما اعطى
دخل علينا اتنين من قرايب بابا من الناس الي قولتلكم عليهم انا اساسا لا فاكرهم ولا عايز افتكرهم
وجدي : البقاء لله يا عادل يا خويا معلش خير
عادل : الحمد لله على كل حال ياوجدي
فوزي : ألا هو مات اذاي يا عادل دا كان كويس
طبعا موضوع موت كريم محبناش نقول حقيقته من مبدأ الستر و مش حاجة تفرح هو مات بسبب جرعة زيادة بس كان ساعتها في عربية مع صحابه ماتو بردو فقولنا حادثة عربية
عادل : ها الله يحرمه مات في حادثة ما الناس كلها عارفة يا فوزي انها حادثة
فوزي : غريبة اصلي سمعت ان العربية كانت مركونة مش ماشية
وجدي : اه صحيح انا بردو سمعت كدا تبقى حادثة اذاي
طبعا هما واضح اوي انهم عارفين بس اذاي يفوتوا على نفسهم فرصة انهم يشمتوا ان ابن كبير العيلة كان بيشرب مخدرات معنى كدا انه جه تحت درسهم انت مش احسن مننا و نعمل عليك قضاه و تستحق المحكمة
سليم : والله و هي لازم تبقى ماشية علشان تعمل حادثة و بعدين قضاء الله و قدره تفرق معاكم في ايه مات اذاي
وجدي : اه طبعا الله يرحمه انت مين بقا؟!
فوزي : انت سيف مش كدا ولاسليم زي ما بيندوك
سليم : سيف … سليم … الي يعجبك قوله مين انتم بقى اصلي معرفكمش بصراحة
خالد : دول عمي فوزي و عمي وجدي يا سليم قرايبنا ولاد عم بابا
سليم : اه طيب
فوزي : غريبة انت رجعت امتى من السفر و مش بنشوفك يعني مع باباك في الشركة و انت هتعمل ايه في الشغل يا عادل صحيح شكلك تعبان خالص و مش هتقدر تاني تتابعه خسارة كل حاجة تروح وانت عارف محدش يعرف يباشر الشغل غير الكبار