هذا ليس ابني

الحلقة السادسة الجزء الثاني

#هذا_ليس_ابني
#الجزء_الثاني
#الحلقة_السادسة
#ياسمين_الحسيني
سامية : ايوا يا ماما الحمد لله يا حبيبتي بقت زي الفل و فاقت و هينقلوها بكرا اوضة عادية….. لا لا مش هينفع تكلميها دلوقتي علشان هي لسة في العناية … بكرا الصبح ان شاء الله اخليكي تكلميها هعدي عليها قبل ما اروح المطار … انا هروح دلوقتي اخد الولاد من عند سلمى و سليم هيبات معاها في المستشفى ان شاء الله
أروى : كان نفسي اوي اسمع صوت اخوكي يا سامية
سامية : معلش ياماما ان شاء الله تتعدل … بس مقولكيش انتي عارفة ان سليم فيه من بابا كتير
أروى : واخد منه ايه بقا ؟!!
سامية : بينهبل على اميرة و بيخاف عليها اوي زي ما بابا بيعمل معاكي و لما قلقنا عليها لما الممرضة خرجت من اوضة العمليات تطلبلها دم ضغطه وطي زي ابويا ما بيحصل معاه و نفس قعدته و هو متوتر كدا بس انا لو قولتله الكلام دا هيحاول يغيره فخليه ميعرفش احسن هههه
أروى : ياحبيبي يابني ضغطه وطي بقولك ايه انتي قلقتيني عليه كدا بزيادة
سامية : متقلقيش والله يا ماما بقا زي الفل لما الدكتورة طمنتنا
أروى : لا لا انا عايزة اسمع صوته خليني اكلمه يا سامية
سامية : ايه تكلميه ...طيب دا كدا … يووه يا ماما كدا هيضايق مني اكتر انا لسة كنت مخبية عليه مرض مراته
أروى : وانا هفضل لحد امتى كدا منا كمان مضايقة و نفسي اسمع صوت ابني حتى …. طيب بصي متقفليش التليفون و روحي كلميه عايده اسمع صوته مش لازم يكلمني يا سيتي حتى لو هيضايق كدا بس اسمع صوته
سامية : حاضر يا ماما حاضر بس الله يخليكي حاولي متطلعيش اي صوت علشان متفقسش
أروى : طيب طيب خلصي يلا
سامية مسكت التليفون في ايدها و قفلت الشاشة و سابت المكالمة شغالة
سامية : سليم ...سليم
سليم : ايوا يا سامية انا جايلك اهو
سامية : ايه يا حبيبي عامل ايه دلوقتي … اجيبلك عصير ولا حاجة علشان تفوق شوية او اقولك اجيبلك اكل احسن انت مكلتش حاجة من امبارح ….
سليم : لا مش مشكلة انا كويس الحمد لله شوية كدا وهبقى انزل اي مطعم جنبا
سامية : خلاص يا سليم براحتك المهم انك تبقى كويس … طيب انا هروح لسلمى بقا اخد الولاد و اطلع على شقتك تمام زمان زين مغلبها خالص
سليم : طيب استنى عبد الرحمن هيوصلك
أروى : الو … يا سليم .. انا امك يا حبيبي طمني عليك علشان خاطري … طيب علشان خاطر ربنا طيب بلاش علشان خاطري
ارتبكت سامية
سليم : ايه الصوت دا انتي سامعة حاجة
سامية : ها … لا مفيش حاجة يا حبيبي هتلاقي التليفون علق ولا حاجة بيزن
سليم : مش عارف حاسس اني سمعت صوت حد .. صوت م….. هتلاقيني لسه دايخ ولا حاجة … يا عبد الرحمن تعالى علشان توصل سامية معاك
أروى : لا مش دايخ يا بني انا امك رد عليا
ساميه وطت صوت التليفون
سليم : … في صوت تاني …
سامية : ايه لا مفيش حاجة عبد الرحمن جه اهو انا هروح معاه بقا ماشي يلا سلام
سليم : ماشي سلام يا سامية خلي بالك من نفسك …
عبد الرحمن : سلام يا سليم حمد لله على سلامة أميرة
سليم : الله يسلمك يا عبدو سلام يا باشا اشكرلي سلمى تعبناها معانا وتعبناك والله
عبد الرحمن : لا يابني متقولش كدا دا احنا اخوات
…..
الحقيقة بقا اني كنت متأكد اني سمعت صوت امي ساعتها و بردو انا كنت حاسس ان أميرة بتكلمهم من ورايا بس مكنتش اعرف نهائي الي بيحصل او هيحصل بعدها تقدروا تقولوا اتفجأت … عدى فترة لحد ما أميرة بقت كويسة و كنا بنروح نطمن عند الدكتورة عليها من حين لأخر و الحمد لله بقت تمام … طبعا في الفترة دي اميرة مكنتش نسيت وعدها لأمي انها هتخليني اكلمها و فعلا كانت بتحاول معايا بس بصراحة انا كنت بتهرب منها … بعد تعب اميرة خلاني اخاف بصراحة يمكن اتعب انا كمان فجأة او يحصلي اي حاجة و ساعتها مين هيخلي باله من أميرة و الولاد … خصوصا ان عمي مؤنس هو كمان عيان والسكر عنده كان دايما عالي و كان تعبان جدا في الفترة دي بس بردو مقدرتش استجيب لأي محاولة من محاولات اميرة او سامية اني ارجع اكلمهم .. اصل بصراحة كمان مكنتش عارف هكلمهم اقولهم ايه اصلا .. يمكن مبقتش مضايق زي الاول منهم بس مش لأني سامحتهم لا لأن الموضوع مبقاش فارق معايا بقا الي هاممني اكتر اذاي اخلي بالي من مراتي و ولادي و عدى سنتين تانين على فترة المكابرة دي .. بس مكنتش بقدر امنع نفسي من اني اسأل سامية في الخباثة و من تحت لتحت عليهم بس هي كانت فقساني كالمعتاد