هذا ليس ابني

الاخيرة

#هذا_ليس_ابني
#الجزء_الثاني
#الحلقة_الخامسة_عشر_الاخيرة
#ياسمين_الحسيني
بعد ما اهلى اتغدو معانا و روحوا أميرة استلمتني تاني بس المرة دي كانت غير كل مرة
أميرة : سليم … عايزاك في موضوع لو سمحت … فريدة خدي زين وادخلوا اوضتكم
سليم : اوباااا الحقي يا فريدة ماما هتعمل محكمة استر يارب
فريدة : بابا يا حبيبي اكيد تستاهل ههههههه
سليم : يرضيكي ابوكي يحاكموه يا فريدة هههههه
أميرة : انت محكمتك على ابوك لسة شغالة  اشمعنى هو
سليم : ادخلي الاوضة يا فريدة
فريدة : حاضر يا بابا
سليم : نعم يا أميرة … انهي محكمة انتي قصداها
أميرة : ايه يا سليم … مش كفاية كدا بقا  …  كفاية محاسبة في ابوك كفاية عليه كدا … في ايه … ابوك مستحمل منك كل كلامك البايخ و زهقك عليه وانت مش حاسس خالص بالوجع الي فيه يا سليم كفاية
سليم :  ياااااه يا أميرة … انا الي طلعت مش بحس … انا الي بوجع ابويا كمان
اميرة : سليم … كفاية … هيعمل اكتر من كدا ايه
سليم : اميرة … انتي بتتكلمي معايا على اساس اني مقاطعه مثلا … انا حتى مبقتش اقوله حضرتك و مش بناديه غير ب يابابا … لما يحتاجني بيلاقيني و بقف جنبه … مسيبتوش و مسمحتش لحد من العيلة يغلس عليه ولا يكسر خاطره بكلمه واحدة كل دا وابقى عامله محكمة ولا انتي شايفة اي
اميرة : مقولتش انك سايبه … بالعكس انت واقف معاه و محدش يقدر ينكر ان ربنا خلاك سبب ان الشركة ترجع على رجلها و ابوك وامك يقدروا يعدو محنة موت كريم بس انت مش شايف انك بتزودها معاه في الكلام كل مرة بيبقى قلقان عليك و خايف دايما تكسفه دايما تقوله كلمة تجرحه وانت اكتر واحد عارف ان الكلام بيوجع اكتر من الرصاص يا سليم
سليم : انا عارف يا أميرة و بالعكس احيانا ببقى قاصد عارفة ليه … علشان اتأكد منه انه بجد ندمان وانه مش بيمثل عليا القلق و الخوف وبرجع اعاتب نفسي مليون مرة اني قولتها و بعدين … بعدين امبارح انا كنت تعبان و زهقان … وهو .. بصي خلاص بقا مش عايز اتكلم في الموضوع دا تاني
أميرة : سليم … كفاية يا سليم … بطل انتقام … انت عندك ولاد و محدش يعرف احنا ممكن يحصل مننا ايه يزعلهم مننا … بلاش تلاقي نفسك بترد دين ابوك و زين او فريدة ياخدو حقه منك غير انت مش ضامن ابوك يفضل عايش يسد دينه دا لحد امتى ... الحق الي باقي في عمره زي ماكان نفسك دايما من وانت صغير يبصلك بفخر ويقول ابني اهو... ارجع من الطريق الي انت حابس نفسك فيه دا و كفاية بقى
سليم : خلاص يا أميرة انا عارف والله كل الكلام الي انتي بتقوليه ومش محتاج اسمعه و اظن انهاردة انا مزعلتوش ولا ضايقته في حاجة و انا بحاول امسك نفسي و بصي ارجوكي انا مش عايز اتكلم اكتر من كدا في الموضوع دا
اميرة : خلاص ياسليم انسى الي فات حتى الي انت مش عايز تواجهه بيه ملوش لازمة دلوقتي تعذب نفسك و تعذبه خلاص انسى ...انت الي هتفضل تعبان و مش هتقدر تفرح بخوفه عليك ولا حبه ليك دلوقتي طول مانت مش عايز تنسى
أميرة كانت دايما فهماني كانت دايما بتقولي في وشي الكلام الي انا بخاف اقوله لنفسي بتواجهني باكتر حاجة بتخوفني و عارفة اذاي تقدر توصلي خوفها عليا  ربنا كرمني بيها و الحمد لله انا فعلا كنت محتاج اسمع منها الكلمتين دول يمكن كنت محتاج اسمعها من حد اني لو نسيت الي حصل مش معنى كدا انه هيحصل تاني بالعكس لو نسيت الي حصل هشوف الحلو الي ممكن يحصل هشوف الي مانع نفسي اني اشوفه علشان خايف اخد عليه و يضيع مني فجأة و ازعل تاتي زي كأني بنكد على نفسي بدري قبل ما حد فيهم ينكد عليا اهو اكمني متعودتش على اني افرح بسببهم بس يمكن فعلا اكون انا الي بضيعهم بإيدي
………..