جنون عشقك

البارت الثاني

تسلل الخوف لـ گلبي رجليه صارت مـا تعيني أخاف أدخل للبيت واسمع خبر يكسرني ..

نظرات الناس اليه كُلها عُطف وشفقه
دخلت للبيت وأسمع صوت صياح وبچي مُرعب سارت الرجفه بـ جسمي دخلت واني برأسي الف فكره سوده

لكيت بيبيتي گاعده تدُگ وتلطم على وجهها وتصيح

- ولج يمه ليش عفتيني و رحتي ولچ چان المفروض اني اموت بدالج ولچ يُمه ناديه ليش هيچ كسرتي ظهورنا بروحتچ

رجف جسمي حسيت ببروده مو طبيعيه راح الدفئ الچان محاوطني وراحت روح البيت مَر على بالي شريط ذكرياتنه كُله بلمح البصر مَچانت أمي الأم الحنونه الي تعبر عن حُبها بكُل وقت بَـس چنت
دائمًا أسمع دعواتها الي تحاوطنه بصوت ناصي
احس بيها بالليل من تغطيني وتبوس راسي

چانت أمي مبتعده عنه و بنفس الوقت أقرب
وحده النــه وحتى أقرب من نفسنه ..

ظلمت الدُنيا بـ عيني وأتلاشت الأصوات مـا حسيت بـ شيء بعدها ، ماهي إلا دقايق ورجعلي وعيي حسبت نفسي چنت من كابوس مُظلم وهسه حَگعد وكُلشي ينتهي لكن سُرعان مـا فتحت عيني واني أشوف الكُل حولي إلا أمي فزيت مفزوعه الهث بخوف أحاول أستوعب لـي دَ يصير صارت عيني على بيبي لـي تباوعلي بـ آسي گالت

- هــا يُمه سوده بوجهي شچاچ

برطمت شفايفي وعيُوني غورگت بالدموع واني اسأل على أمي مثل الطفل الصغير
جاوبتني بيبي

- ماتت ولچ ماتت
مصيبتچ چبيره يا يمه

صارت تدُگ على رأسها وتنعى

عقلي مو راضي يستوعب الصار أمي مرضها مو متطور لهل درجه مجرد عدها ضعف بـ عضلة القلب واليوم على اساس أخذها اچيك وضعها شبسرعه أخذها منّي الموت شبسرعه ، أتهسترت أبچي والطم بدون وعي صفنت الكُل عليّه ..

الأصوات كُلها اختفت صرت كُلشي مـا أسمع لا صوت بچي ولا صياح هدأت رُوحِي وسكنت فصلت عن العالم ثواني وصحيت على صوت صياح وبچي عالي و يعيط بـ أسمها مثل الأسد المجروح !!!

وهي كُل أمراضها وقهرها منّه مـا عيشها يوم واحد حلو مـا فَـد يوم سمعها حچايه حلوه عيشها بذل وأهانه وفقر وجوع

صرت اتسأل يا تُرى هــاي الدموع تنزل نفاق گدام الناس لـو ندم !!!

بعد دقائق قليله هدئ الصوت ..

گمت من مكاني واني اتطوطح صرت أدور
على عاصم أكيد هو چان وياها بـ آخر لحظات
عمرها أكيد حاچته و وصته هو دائمًا يمها

طلعت برا مثل التايه أعاين بالوجوه أدور
على آخر شيء بقى الـي من ريحتها ..

فجأة أنسحبت من أيدي بقوه ودخلني للمطبخ

- وين رايحه حُوري ؟

باوعتله و حچيت بصوت خاوي من التعب

- مـااا حُسام عوفني أريد أشوف اخوي ماكو جوه