جنون عشقك

البارت العاشر

صرخت بـ فزع من شفته وگع بـ حضني
أتجمعو أهل البيت على صراخي وانخبصوا
بيّ نقلوا للمستشفى راحوا ويا ماما وعمو وإيهاب

طيحته هَدّت حيلي هَدّ صرت أرجف من وجع گلبي
صرت أندب هذا اليوم ماكو شيء سيء مــا صارلنا ..

بيداء :- هـاي البنيه فال شؤم من أول مـا دخلت دخلتنه أنذار

منـة :- شفتي عمه ولله هـاي البومه إذا بقت
تهدم بيتنه هدم وگولي منـة مـا گالت

بيداء :- أوف منّك محمد شسويت بـ رُوحك

أيناس :- شهل كلام قدر ومكتوب البنيه شعليها !!

بنص كلامهم صرت اتسائل عنها شعجب رُغم كُل هل فوضى الصارت مــا نزلت ؟
قاطع صفنتي صوت تلفوني وهو يدگ
چان زيد سويته سايلنت وشمرته
مـا الي خلگ أجاوبه ..

بقينا ننتظر لليل وماكو خبر عنه آخر شيء أتصل أيهاب وگال عنده تشنج بعضلة القلب وراح يبقى هل يومين بالمستشفى يخافون يدخل بنوبه ..

صرت أبچي بهستيريا بحيث حسيت گلبي تعب ابويه اعز شي بحياتي مااكدر أكرهه لو احقد عليه ابد ولا لأي سبب كان كومتني عمتي لغرفتي انطتني علاج وسدت الضوه
حاولت أغفى بَـس مـا گدرت النوم جافاني

بقيت بسريري فوگ الساعتين آخر شيء احتاجيت حمام طلعت البيت هدوء الواضح الكُل نام
باب غرفة رَتل مفتوح تقربت أشوفها مـا چانت موجودة بالغرفة أستغربت وين مُمكِن تروح بهل ليل چانت الساعه بحدود الـ ٣ ..

"رَتل"

بَعد مـا عافتني جُوري تمددت على السرير وغفيت بسرعه مــا گعدت غير على صوت أذان المغرب مااكدر اصلي لأن أيدي ملفوفه وميصير يجي عليها ماي لا يلتهب الحرق
ردت أنزل بَـس مـا ردت النفسي المغثه
بقيت بمكاني حسبه تجيبني وحسبه توديني

لحد مـا ظلم الليل وعم السكون بالمكان
گمت من مكاني لبست شالي وبوجهي للمطبخ
لأن چنت جوعانه فتحت الثلاجه بيها خيرات الله
سويتلي لفة جبن صغيره أكلتها عالماشي وصرت أتمشى بالبيت وأحس اكو غصه بداخلي مو راضيه تطلع..

طلعت برا حافيه
لفحتني نسمة هوى مُنعشه أتنفست بعمق
أتوجهت للحديقه وبرودة الثيل تلامس رجليه
والهوى يداعب بشرتي ..

أخذتلي زاويا بنهاية الحديقه مددت رجليه
وگعدت ميلت رأسي على الحايط
أجت على بالي گعدتنه بحديقتهم الصغيره
چنت دائمًا أخذلي زاويه وأگعد وهو يگابلني
ساعه نضحك ساعه نبچي ساعه يشعرلي ساعه يتغزل بيّه ساعه نتعارك ساعه نتحاضن ..

غمضت عيني ودعيت يكون بخير وين مـا چان
ويرجعلي ويرجع لـ أبنه سالم بـ أسرع وقت ..