جنون عشقك

البارت السابع عشر

دخلت للغرفة وانصدمت بوجود إيهاب وجانو واحد ديبوس الخ بس حسو عليه ابتعدوا ضليت مصدومه اباوعلهم ومو مستوعبه الشفته
شجابه لغرفة منة بالليل وليش هيج سوو زين مو قبل فترة اعترفلي هذا شنو ديلعب على الحبلين

حجيت وصوتي يرجف
- متستحون على نفسكم تخيلوا داخل احد غيري شنو حيكون موقفكم هااا

إيهاب :- جوري والله مو بالقصد

- ماريد اسمع شي

تركتهم وطلعت واحس رأسي ضل يوجعني بسبب الشفته شوية ودخلت وراي منة

منة :- شبيج ضجتي انتِ مو مرتبطه وماتحبي

كمت وحجيت وياها بعصبيه

- ولج حيوانه لو داخل بابا بمكاني شتسوين

منة :‐ما اسوي شي غلطه وصارت

- من صدك حيوانه

منة :- لتغلطين احسنلج

- انجبي وكليلي شلون وصلت علاقتكم لهاي المرحله

منة :- ماوصلت لأي مكان مجرد اني بسته وهو مقاومته صفر وتفاعل وياي ودخلتي انتِ

- يعني انت البادرتي !!!

منة :- اي

- طيح الله حظج اي والله ولج انتِ زحتي المستحى فد مره والله عيب عليج

منة :- لتضلين تبيعين مثاليات برأسي ترا انتِ هم صارلج سنتين مرتبطه

- مرتبطه بس بعمره مالزم أيدي ولا أني سمحتله انو يسوي شي غلط وياي وانتِ تسوين هيج وتقارنين نفسج بيه

منة :- لاتحجين هيج وياي وسدي الموضوع لأن متعرفين شنو الصار

تركتني وطلعت واني غلست عنهم كلت نارهم تأكل حطبهم على شنو حاركة دمي
حظرت ملابسي ونمت

ثاني يوم من طلعت لكيت إيهاب واكفلي بباب البيت

إيهاب:- صباح الخير جُوري

- صباح النور شعجب مدخلت

إيهاب:- ردت احجي وياج بموضوع البارحه

- ليش تحجي وياي شعليه

إيهاب:- والله هي تقربت مني وانت دخلتي ماكو بينه اي شي جُوري تدرين بيه اني احبج ومستحيل افكر بمنة ولا غيرها حبيبه الي

- إيهاب كتلك ماكدر وراح ارجع اكولها احنه مستحيل نكون سوا ياريت تستوعب هذا الشي ورجاءا ابتعد عنا اني ومنة ولا تكسر كلبها وتستغلها

إيهاب:- صدك تحجين

- اي صدك

وتركته وصعدت بالسياره ورحت على دوامي
ضليت أتمشى بالكليه وجان المحه نفسه باوعلي وصارت عينه بعيني غمزلي وابتسم وراح واني حسيت دمي كله نشف ضليت أتلفت اريد اشوف الحمايه وين وهو وين اختفى راسا
كعدت على مصطبه بين الناس وبنص الهوسه حتى احس بالأمان بس صدمني من كعد بصفي ضل موجه نظره لگدام بس الكلام جان موجه الي