جنون عشقك

البارت الثالث

أقسم بالله العظيم أحبچ ونيتي صافيه وياچ
وهسه بـ أشارة وحده منّچ أروح أطلبچ من أبوچ ومـا يمر هذا الأسبوع إلا وأنتِ حلالي ..

أنحطيت بموقف لا أُحسد عليّه
أحس نظراته تتوسلني حتّى مـا أرفض وأخذله
لكن أتداركت الموقف وسحبت أيدي
باوعت بعيونه وگلت

- أعذرني حُسام اني مـا أبادلك بنفس المشاعر

سكت شويه صفن بوجهي بعدين گال

- چنت متوقعها منّچ أدري بـ گلبچ قاسي عليّه
عمومًا أترخص أعذرينا على أزعاج

طلع وعافني حسيت بشعور حقير تجاه نفسي
حاولت أتناسى الموضوع بَـس صعبت عليّه

ثاني يوم داومت وحچيت الصار لـ رحمه
لـي أيدتني كلامها ريحني وخفف عنّي تأنيب الضمير

و بيوم چنت گاعدين اني وعاصم نتغدا
أنفتح الباب ودخل أبوي من رگعة الباب عرفت اكو مشكله باوعت لـ عاصم وگلت الله اليستر

- أشتغلت سوادين أبوچ

ضربته بالملعقه على كتفه خفيف
- قليل أدب شلون تحچي هيچ على أبوك

-  ما أتشرف بيّ

- اششش عاصم عيب هذا الكلام يبقى أبوك

عاط بأسمي عفت عاصم ورحت أركض
چان گاعد على كرويته وخال رجل على رجل والجكاره بحلگه ..

- هــا بابا صحتني ؟

أشرلي على كُرسي المقابيله .. أُگعدي

گعدت واني أبلع ريگي بخوف لأن واضح
هل مَرّة الموضوع غير شكل ..

- راح اسئلچ كم سؤال وإذا چذبتي بـ شيء أطفئ الجگاره بـ عينچ مفهوم ؟

سارت بجسمي رجفه وبروده غريبه
وبراسي هواي تساؤلات
عاط بيّه وهو يعيد الكلمه عليّه

- مفهوممممم !!!

هزيت رأسي بموافقه وعيونه صارت تتفحصني

- تعرفين شخص اسمه محمد ****

تفاجأت وخفت بنفس الوقت وعصبية ابويه خلت كلبي يرجف شمسوي هذا

- أي أعرفه لأن جان مريض عدنه بالمستشفى

- شنو علاقته بيّچ أحچي بدون سوالف زايده

- ماكو اي علاقه تربطني بيّ غير بيوم من الأيام چان مريض بالمستشفى لـي أشتغل بيّها حاله حال غيره

هدأ شويه وفرك وجهه بحيره ومبين عليه التمس الصدق من كلامي ضلينا ساكتين فتره بسيطه وقطع الصمت بكلماته الي جانت صدمه بالنسبه الـي

- محمد ابن **** طالبج للزواج

وجهي بهت والصدمه بينت على وجهي
و صرت أتعلثم بالكلام

- شلون طلبني وليش يطلبني

- حظي المصخم ولج تعرفين هذا منووو إذا نغلط ويا يودينه ورا الشمس ينهينا بنفوذه