جنون عشقك

البارت الثالث والعشرون

زواج المتعة او بحسب تعريفي لهذا النوع من الزيجات الفاشله ( الزنا الحلال ) :

زواج ضحيته الأبناء اليصيرون عن طريق الخطأ بهذا الزواج ..

من أهم الشروط الي لازم تتوفر بالزواج هو الاشهار لازم كل الناس تعرف هذول الاثنين متزوجين ف من يروح الأنسان ويتزوج بالسر وبعقد متعه باطل عند أكثر المذاهب بسبب مضاره على الأنسان هذا راح يكون شي كلش جبير بالمجتمع وبالإضافة لشرط الاشهار اكو شرط ثاني كلش مهم بالزواج وهو الديمومه اي دوام الزواج والانتفاع من اهدافه وذكر الله سبحانة وتعالى هذا الشي بالقرآن وجان محرم (  تحريم نكاح المتعة بالقرآن الكريم في قوله تعالى في سورة المؤمنين : الَّذِينَ هُمْ لِفُرُوجِهِمْ حَافِظُونَ (5) إِلَّا عَلَى أَزْوَاجِهِمْ أوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ (6) فَمَنِ ابْتَغَى وَرَاء ذَلِكَ فَأُوْلَئِكَ هُمُ الْعَادُونَ (7)) 

الهدف من تحريم زواج المتعه هو تحليل فروج النساء فقط للمتعة ولايوجد اي هدف او غايه في هذا الزواج غير المتعه واضافه إلى عدم الإنجاب الي يعتبر اهم هدف بالزواج الاعتيادي وزيادة النسل ...

ببداية الروايه ذكرت زواج رحمة ومحمد وجانت مضار هذا الزواج كلش كلش سيئة وعواقبه وخيمه
انتحرت رحمه بسبب نظرة المجتمع الها واعتبارها سلعه يگدر الكل يحصلها بمجرد عقد ورقي وهو شي أقرب للزنا بس محلل ، اما رَتل ف خسرت كلش هواي بسبي أهلها الي جانو سبب بتشتيتها وعيشته وي عائلة دمرتها وهدمت حياتها

رَتل جانت ضحيه حالها حال آلاف الاطفال اليرحون ضحيه لهذا الزواج الفاشل وهيج اول ضحية بقصتنا لهذا الزواج هي رَتل وهسه ضحيتنا الجديده جُوري

مرور جُوري بنفس الشي المرت بي رحمه اكبر دليل على الكارما الإلهية وانو الدنيا ماشيه بقانون كما تدين تدان مثلما محمد لعب على بنت الناس واستهان بشرفها وعرضها راح ينعاد نفس الشي ببنته وشرفه وعرضه وغير مسموحله الاعتراض ابداً

اترككم تتابعون باقي الأحداث واشكركم على ال ١٠٠ الف مشاهده

~~~~~~~~~~~~~~~~~~~~~~~~~~~~~~~~~~

" جُوري "

شمرت السلاح واديه ترجف من الخوف باوعلته واگع گدامي ودمه تارس الگاع عيونه حمر دم وآهاته مسموعه بصوت عالي

انتبهت اصابته صايره بفخذه يعني اكو امل ينجو مستحيل يموت من هيج أصابه وبالاخص بعده بوعيه

ماهي إلا ثواني وانكسر الباب علينه دخلو أثنين ما اعرفهم وشالو رأسا وواحد دخل اخذ السلاح وراد يضربني بس أواب صاح عليه بصوت عالي

أواب:- عوفوهااااا معليكم

تركوني وطلعو وقفلوا الباب وراهم
ضليت افتر بالغرفه والخوف ماخذني هسه اني شورطني اكيد ماراح يسكت عني وراح يدمرني دمار ..