လွတ်လပ်ခွင့် ( Uni + Zaw)

Part - 3(Uni +Zaw)

(Uni)

အပိုင်း ( ၃ )

* * *
မနက်၆နာရီထိုးသည်နဲ့ ခင်သိန်း ကုန်းရုန်းထရသည်။ အလုပ်ပိတ်သည့် ဥပုသ်နေ့ဖြစ်သည်လည်း အပျင်းမပိုရဲဘူး။ အမေ့ကတော့ နိုးနေလောက်ပြီ ဒါပေမဲ့ အိပ်ယာထဲ ကွေးနေဆဲ။
ရာသီဥတုက မနက်ခင်းဆိုတော့ မပူမအေးလေး နေလို့တော့ ကောင်းပါသည်။

အိပ်ယာသိမ်းပြီး အိမ်က ကျောက်ကန်ထဲက ရေတစ်ခွက် ခပ်လိုက်တယ်။ ပြီးတော့ သွားတိုက်တံကို ထုတ် သွားတိုက်ဆေးကို ညစ်ဖို့ အကြည့် သွားတိုက်ဆေးကုန်နေပါရောလား။ ဒီနေ့စျေးသွားမှ ထပ်၀ယ်ရအုံးမယ်။ ဒီနေ့တော့ ရှိသမျှလေးက်ို ကပ်သပ်ပြီး သားအမိ၂ယောက်တိုက်ရမှာပဲ မတတ်နိုင်ဘူး။ခင်သိန်း မျက်နှာသစ်ပြီးသည်နှင့် သနပ်ခါးကျောက်ပြင်ဆီကို အရောက်ပဲ။ ခင်သိန်းက အလှကြိုက်သည်လေ။ အမေ့ကိုတော့ ခင်သိန်းဖြီးလိမ်းပြီးမှ ပဲ မျက်နှာသစ်ပေးတော့မယ်။

ခင်သိန်း မှန်ထဲကို ခဏ ခဏ ပြန်ကြည့်မိသည်။ မျက်တောင်လေးက ရှည်ရှည်၊ နှုတိခမ်းက ထူထူ ၊ မျက်ခုံးမွှေးပါးပါးလေးနဲ့ တကယ့်မိန်းကလေးနဲ့တူသည်။ ဆံပင်တိုနေလို့သာ။ ငယ်ငယ်က မိန်းကလေးနဲ့ တူလိုက်တာလို့ပြောရင် ခင်သိန်းအရမ်းသဘောကျခဲ့တာ။

သနပ်ခါးကို မပျစ်မကျဲလေးသွေး။ ပါးပေါ်မှာ ပါးကွက်လေး ကွက်လိုက်တယ် နောက်ပြီး ဟိုနေ့က ၀ယ်ထားတဲ့ နှုတ်ခမ်းနီအရဲလေး ခပ်ပါးပါးလေးဆိုးလိုက်မှ ခင်သိန်းအလှက ပြည့်စုံတယ်လို့ထင်တာ။အမေက အစ်မတွေကို ဆုံးမတာ ကြားဖူးတယ် "မိန်းကလေးဆိုတာ မနက်လင်းလာရင် သနပ်ခါးလိမ်း သပ်သပ်ရပ်ရပ်နေရတယ် အပူသည်မျက်ခွက်နဲ့မနေရဘူးတဲ့"အဲ့ဒါကြားပြီးကတည်းက ခင်သိန်းမနက်တိုင်းသနပ်ခါးလိမ်းတာလား အခုဆို ၁၈နှစ်တောင်ရှိနေပြီ။အစကတည်းက အလှကြိုက်တာလဲပါတာပေါ့။ ၁၈နှစ်ဆိုတော့လူပျိုဖော်၀င်နေပြီ အဲ ဟုတ်ပါဘူး အပျိုဖော်တောင်၀င်ပြီး အပျိုဖြစ်နေပါပြီ။သနပ်ခါးလိမ်းပြီးလည်းမပြီးသေးဘူး အမေ့အတွက် သွေးခဲ့ရအုံးမှာ။
_______________________________

ရေခွက်တခွက်နဲ့ သွားတိုက်တံပေါ် သွားတိုက်ဆေးကို ဖိညစ်ထားတဲ့ အကပ်လေး။ရေခွက်ရော သွားတိုက်တံပါ လက်ထဲထည့်ပြီး အမေ့ကုတင်ဆီအပြေးလေး။ အိပ်ယာသိမ်း အိပ်ယာခေါက် ပြီး အမေ့ကို ထူရသည်။