သူငယ်ချင်း မှသည်.. (TBC)

Part (27) - The Deal

သူငယ်ချင်းမှသည်.. (Part 27)

===

[Unicode]

နှစ်ပတ်အကြာ

လှယဉ်ထွေးနီ ဟာ ကျောင်းမှာလည်း နိုင်မင်းလတ်ကို တတ်နိုင်သလောက် စကားမပြောပဲ သူမရဲ့ မိန်းကလေး သူငယ်ချင်းတွေနဲ့ပဲ အချိန်ကုန်ဆုံးစေရင်း ရှောင်နေလိုက်တယ်။ အခုထိ သူမ သူ့ကို စိတ်ဆိုး မပြေသေးဘူးလေ။ ကိုယ့်ခံစားချက်ကို တာဝန်မယူနိုင်တဲ့ သူကို ငါက ဘာလို့ ဆက်ကြိုက်နေရမှာလဲ ဆိုတဲ့ မာနလေးနဲ့ သူမ နေနေလိုက်တော့တာပေါ့။

ခံစားချက်တွေကို ချက်ချင်းကြီး ဖျောက်ဖျက်ပစ်လို့ မရနိုင်ပေမယ့် အချိန်က ကုစားသွားမယ်ဆိုတာ သူမ ယုံတယ်။ နိုင်မင်းလတ်ကိုတော့ သူမ တစ်သက်လုံး စကားမပြောတော့ဖို့ အစီအစဉ်တော့ မရှိပါဘူး။ အခုက စိတ်ပေါက်နေလို့သာ ပစ်ထားတာ။ ငယ်ပေါင်းကြီးဖော်တွေပဲဟာ တစ်ချိန်ကျ စိတ်ဆိုးပြေသွားမှာပဲ ဆိုတာ သူမကိုယ် သူမသိတယ်လေ။

နိုင်မင်းလတ် တစ်ယောက်ကတော့ ဒီကြားထဲ သူမကို နှစ်ယောက်တည်း စကားပြောဖို့ ကြိုးစားရှာပါတယ်။ သူမက သူ့ကို အဖတ်မလုပ်တော့ သွားပြီးလည်း အတင်း မချဉ်းကပ်ရဲဘူးလေ။ သူမ လက်သံပြောင်တာ အာကျယ်တာ သိတော့ သူက လူကြားထဲ အသားလည်း မနာချင်သလို အရှက်လည်း မကွဲချင်သေးဘူး။ ဖုန်းနဲ့ကျတော့ စိတ်ရင်းနဲ့ မဟုတ်သလို သူမ ခံစားရမှာစိုးလို့ သူ မပြောတာ။

သူ ဆုံးတော့ ဆုံးဖြတ်ပြီးပါပြီ။ သူမကို သူ့ခံစားချက်တွေ ပြောပြတော့မယ်ဆိုတာ။ ဒါပေမယ့် သူလိုချင်တဲ့ perfect moment (အကောင်းဆုံး အချိန်နဲ့ အခြေအနေ) ကိုတော့ သူရှာလို့ မတွေ့သေးဘူး။

လဲ့လဲ့ဖြူကလည်း သူမ သူငယ်ချင်း လှယဉ်ထွေးနီကို အောင်မင်းမြတ်နဲ့ မတွဲစေချင်လို့ သူမအရင်ရည်းစားရသွားပါပြီ ဆိုတာကိုပဲ ဖွင့်ပြောပြီး လောင်းကြေးစားကြေးမှာ အရှုံးပေးလိုက်ရင် ကောင်းမလား ဆိုတာကို တစ်နေ့ ဆယ်ခါလောက် တွေးနေမိတယ်။ တွေးသာတွေးနေတာ လုပ်တော့ကျ မလုပ်ဖြစ်ဘူး ဘာလို့ဆို သိတဲ့အတိုင်း ရှုံးရမှာကို သူမက သေအောင် ကြောက်တာလေ။