رواية : إمرأتي
مقتطف 🌹❤️
الكاتبة Jawhara
*****************
حيدر الحاتمي ..
ثلاث ايام واني على اعصابي انتظر ريمان الي اختفت حتى موبايلها قافلته وكلما اباوع بساعتي ارجع أصيح رانيا سكرتيرة مكتبها واسال بيها ،، وين راحت وليش هالغموض هذا والله گلبي ما يتحمل الصد وبرود التعامل هذا من اشهر واني ندمان لأن فاتحتها بموضوع الزواج وبلحظتها ما نطتني مجال رفضت بدون ما تاخذ وقت تفكر بي ، شوگي فاض وتبدى ما اكدر اكتم بعد والله ضاغط على اعصابي ماريد ازعلها مني ومن جهة ماريدها تبعد
طلعت من مكتبي للمرة مدري شكد تيهت بالحساب ..
_ رانيا ! ست ريمان اتصلت ؟!!
_ لا ، واني هماتين انشغل بالي عليها
_ اي بعده جهازها مغلق من تحصليها انطيني خبر التفتت راجع لمكتبي دخلت ريمان سلمت وفاتت لمكتبها رحت وراها واني ااشر لرانيا تبقى بمكانها ما تلحكنا
ريمان ذبت جنطتها وتنهدت وكعدت ورى مكتبها وسندت رأسها بين ايديها ومن انسدت الباب رفعت راسها لحيدر الي تقرب عليها احنى جسمه وأيده على تجوة الكرسي ونظراته مارفعها عنها حاجاها بصوت دافي وعينه على شفايفها ..
_ بس فهميني وين جنتي مختفية ؟! تدرين شسويتي بية واني اتنطر شوكت تجين للشركه ، ريمان حرام عليج انتي مجاي تحسين بالنار الي شاعلتها بگلبي وواكفه تتفرجين
ريمان ..
قربه يربكني قريب كولش مجاي اركز بكلامه حاولت انهض واني ادفعه مانطاني مجال غرز أصابعه بزندي وقربني أكثر ، نفسي يصعد وينزل اني صارلي ايام مانايمه زين والتفكير موتني مابية حيل حيدر الي سيطر علية وقربني لحظنه ونزل رأسه يحجي وياي بصوت ناصي ..
_ والله العظيم وعيونج هاي المليانه حزن اني سند الج بس تفكرين شوية فكري بنفسج ، ريمان اني قابل باي شرط تخلينه وانطيتج وقت ليش هيج قاسية وياية ؟!!!
_ حيدر اترجاك تعوفني اني مافيدك اني مر
ة مليانه حزن ومشاكل انت ليش تريد تقحم روحك بحياتي !!؟
نترت بيها ضايج من كلامها ..
_ حياتناااا سوى لو حتى بعدنا فترة ، حتى لو تجاهلتي كلامي وياج مستحيل أتنازل عنج
_ ابعد شبيك هدني ترى كولش طوختها
نترت بي ماتحملت لأن حيل مضغوطه بسبب جيلان وبسبب حسام والسواه بية
حيدر ماتحمل برودها وهو گلبه مشتعل شعل عليها حظنها بقوة ورجع دفعها وهو يستغفر ربه لأن لحظات نسى نفسه خزرها وأخذ نفس قوي وبصوت خشن متأثر بالصار للتو ..
_ عبالج اسلوبج البارد هذا يمنعني عنج ججج غلطانه ، خليج بهالحال واني اعرف شلون اجيب راسج
عافها وطلع وبقت صافنه وراه مقهورة
،،،
دخل لمكتبه وركع الباب بقوة وبقى يفتر بغرفه مكتبه وأيده على رأسه تذكر كلامه وية كرار بسبب ملف الاوراق الي عرضه عليه ينتظر ثغرة قانونية تخلي ريمان تحت أيده
سحب موبايله يريد يتصل على اخوه ، سمع اصوات برا وصوت ريمان واضح ، طلع بسرعه من مكتبه دخل مكتبها شافها هي ورانيا ورجال يحجي بعصبية وياها
أنت تقرأ
إمرأتي
Romanceفي وقت اشتياقي لك، تتركّز كلّ أفكاري وتهرب منّي إليك، ويشدّني الشوق والحنـين بشدّة إليـك قصة رومانسية اجتماعية ، بقلمي ،الكاتبة Jawhara
