إمرأتي

الفصل التاسع

رواية: إمرأتي

الفصل التاسع
الكاتبة Jawhara

*******************

* يقتلني الندم كلما تذكرت كلمات قلتها لشخص لا يستحق

* الحزن هو أن تحب شخصاً لم يفكر في حبك أبداً.

********************
حسام ..
بقيت صافن عليها هاي شبيها معقولة تريد تطلك  ؟!

_ جيلان بلا العاب مالي خلكج كلش
عصرتها بحظني  دفعتني تريد تنهزم من حظني رجعتها وأيدي محاوطه ذراعها  اعترضت ..

_ حسام اعتقد وضحت الاريده  والظاهر أنت ما مهتم للكلام الي كلته
_ انتي تردين تلوين ايدي مثلما سويتي حتى اتزوجج
_ انت للان مصدك ، ترى ماجان على بالي وهذا كله خالو سعد هو سواه

نترت بيها ماريد اسمع طاري خالها الزفت ..
_ اششش لا اجيبين طاري خالج الزفت واحمدي ربج قبلت اتزوجج وأصدق العقد

_ يعني انت من الاول بايع لوما الخوف

كضيت فكها بقوة وعطت بيها ..
_ انجبي مو اني الي اخاف ، بس خاطر ماتتأذى اختي وافقت

_ ابعد  كسرت فكي شبيك ، بعد ما عندي طاقة اتحمل معاملتك شهر وانت تهين بية واني ساكته اكول فترة ويرجع حسام الاعرفه

قاطعها بسخرية ..
_ شفتي شلون وحتى استعراضج وانتي تحاولين تغريني مانفع  لأن بمزاجي اتقبلج وشوكت ماريد واني هاي الفترة كلها ماعاجبتني ولا الي نفس بيج

جيلان وجها صار احمر وعيونها حستهم تريد تطلع من محاجرها بسبب كلامه المهين
ردت وهي اجر حسرة واضحه ..

_ والله جنت حاطتلك ألف عذر واكول ميخالف الرجال عنده كبرياء ميخالف ولج جيلان هذا حبيبج وماخذ على خاطره  والصار وياه من إهانة صعب يتقبلها ، للأسف طلعت غلطانه  كولشي ما افتهم

ابتعدت عنه تريد تطلع لأن ماتتحمل تبقى أكثر وهو يذبحها بتعامله البارد ، سحبت نفنوف بسيط ونزعت الي جانت كاشخه بي كل هذا وحسام عينه عليها ، بعد ما تتحمل تبقى عنده واضح بايع
كملت وهي تلف شالها وصرخت بغضب وعصبية ..
_ طلكنننني  كوووول انتي طاااالك
،،
حسام ..
علاقتنا باردة واني الي ابتعدت لأن حيل مقهور من المذلة الي انذليتها بسببها هي وخالها  ، تكول  مالي دخل هو تصرف ، اني طبعي هيج من أحد يدوسلي على طرف اخلي بدماغي الا ما اتوبة خالها اني الي صوبته وجنت ناوي على كتلته خلاص وباخر لحظة تراجعت يمكن لخاطرها مدري اني كل الي ردته صوبته رصاصه استقرب بجتفه قريب على صدره  وتأكدت  ما مات لأن  وصلتني اخبار بعد جم يوم ،
وجيلان بقيت اقهرها بمعاملتي  الها كل يوم صح ما ضربتها بعد إلا أنو الإهمال والتحقير اقوى سلاح تذل بي مرة وذاتا إذا جانت حبيبة وزوجة ، ما انكر حبي الها  بس مو على حساب كرامتي ، هي واعية عمرها ٢٦ مو بنت زعطوط د اضحك عليها من البداية جنا متفقين زواجنا بالسر لأن اني علاقاتي وية مسؤولين واحاول ابني قاعدة من العلاقات والمصالح ، تعبت هواي واني أرتب أمور حياتي من اول ما تخرجت من كلية القانون قبل ١٤ سنة  وخلال هالفترة قدمت اوراقي للكلية العسكرية وبعد تخرجي التحقت بوزارة الدفاع وهاي صارلي ثلاث سنوات برئاسة الوزراء  لمصلحتي اثابر واجتهد في سبيل احقق حلمي ، جنت ناوي أرتب علاقتي وية مسؤل جبير بزواجي من بنته وللاسف نسفت هالطموح  ، وحاليا ما اكدر اتصرف اي شي بسبب اعلان زواجي الي جنت احاول ما أظهره للناس لأن يضرب طموحاتي إذا فكرت ابني علاقة زواج ، اعترف عندي علاقات وصاحبت بنات وتزوجت وطلكت كل هذا محد يعرف  بي احتمال اكو من يعرف بس محد يتجرأ ويحجي وياي بهيج موضوع لأن علاقتي وية الكل اتعامل بجدية وضمن حدود العمل وصداقتي فقط وية اثنين من الاصدقاء واحد وياي بالعمل والثاني من الطفولة صاحب كافيه ومطعم بعض الأوقات أمر عليه ، ومن تعرفت على جيلان قبل سنة ونص جانت مشاركه باحتفالية واني جنت من ضمن الحضور  صدفة اجت كدام عيني اتذكر عطرها وملمس أيدها الناعمة وهي تحاول تمر من جانبي التفتت عليها وية ما لامست أيدها ايدي رفعت راسها بقيت مركز بعيونها المرسومات بكحل خلتني صافن بيهن نزلت راسها وراحت داخل القاعه  اني عجبتني حبيت اسال عليها وعرفت اسمها وين شغلها وبقيت عيني عليها ما طلعت من المكان الا واني ماخذ رقم موبايلها بحجة عندي شغلة بالمكتب الي تشتغل بي واريد استشارة قانونية ! هي بوكتها ماعدها علم اني شنو اشتغل ما تعرف عني فقط اسمي  ورى فترة تطورت علاقتي بيها ما انكر حبيت قربها مني حبيت حنيتها والأهم حبيت حرصها على نفسها ، اندكيت بيها من تعمقت بعلاقتي وياها وتحرشت بيها والنتيجة زعل شهر  ، اني ماشفتها حتى اتصالاتي ماترد عليها ، قررت اعرض عليها اتزوجها لكن زواج سري مثل كل الزواجات الي مرت بسنين حياتي الأخيرة اعترضت وكدرت أقنعها فقط سنة أرتب اموري وراها نعلن زواجنا لأن محتاجها كولش وماريدها تبعد عني وهي وافقت وتزوجنا والشهود جانو اصدقائي اثنين
طول السنة المضت وعلاقتنا احلى مايكون خلتني اتعلق بيها ، جيلان كلها حيوية وطاقة وإغراء ورغم حبي الها بس تبقى انانيتي بتحقيق مصلحتي ورغبتي هي سيد الموقف  فقررت أخطب لأن خطبتي من هالبنت تحقق بعض من طموحاتي لكن تفركش كولشي برفض البنت  أو يمكن حظ جيلان غلب هالمرة ، وتطورت الأمور وخرجت عن السيطرة بتدخل خالها الي ذلني من خطف اختي واهاني
تقربت عليها عصبية وتصيح طلكني  نكتت رأسها بين ايدية وضغطت عليه والغضب بدى يتصاعد بداخلي ..
_ تريحيني واخلص منج