إمرأتي

الفصل الرابع

رواية : إمرأتي

الفصل الرابع
الكاتبة Jawhara

*****************

عندما تمنح ثقتك لإنسان . .
فإنّك إمّا أن تمنحها له كاملة . . .
أو تحجبها عنه كاملة . .

*****************
حيدر ..
كعدت الصبح وعلى بالي حلم اني وريمان اااخ الله الا اجى گلبي يتفجر من كثر الشوگ الها فتحت موبايلي ساعه سبعه ونص بدون وعي اصابعي راح على جهات الاتصال وضغطت رقمها ، يرن موبايلها واني مغمض عيوني اتخيلها ، زادت دگات گلبي بسماع صوتها الي واضح اثر النوم بي يمكن توها صحت لأن بحة صوتها النعسان واضحه مدري شأريد منها والله هيج اتصلت بس اريد اسمع صوتها ..
_ صباح الخيرات
ردت بصوت ناصي ..
_ صباح الخير
_ شلونج
_ زينة ، حيدر اكو شي !!!؟
_ اي اكو هواي ، ريمان لاتتاخرين عالدوام
سديته اني انزل من فراشي فتت للحمام اتوضى واتحضر للصلاه بعدها اطلع للشركه

كملت وبيدي موبايلي صبحت على امي كاعدة بالمطبخ وتفاجأت باختي جنات هي وبنتها ماس الي اجت علية حظنت رجلية دنجت رفعتها وبوست خدودها..
_ هلا خالو نور البيت حبيبتي
بعدني واكف وماس بحظني اجت امها سلمت علية وجهها مغلتم ورجعت كعدت بصف امي عالقنفه ..
_ خير شبيج جنات خوما صاير شي ؟!!

ردت بصوت تعبان ..
_ ميصير اجي لبيت اهلي لو الا اكو شي !!

_ هلا بيج هذا بيتج ياب بس ليش ضايجه !؟؟
امي كامت تصبلي چاي وحطته عالميز محضرتلي الريوك
_ تعال تريك وراك دوام وعوف اختك وسوالفها
كعدت اخوط بكوب الجاي وعيني عليها مبينه مستهضمه شربت شوية وما اجاني نفس اتريك من شفتها بهيج حال
_ كولي شبيج ؟ متعاركه انتي وأسعد ؟!!

_ من البارحه بالليل تعاركنا تقبل يغلط علية لأن كلتله لا تروح وية جماعتك

_ بالله هذا سبب حتى تتركين بيتج وأسعد وينه شلون خلاج تطلعين من الصبح !؟
نزلت راسها وردت ..
_ هو وصلني وراح للدوام

وكفت ماتحملت عذرها اختي واعرفها ما تحمل ينداس طرفها بس هذا زوجها واني اعرفه لأسعد يعاملها بما يرضي الله
_ جنات لا تكولين اخوية قسى علية ماجان تجين هنا زعلانه هسة لو ماد أيده عليج جان كلتلج حقج بس انتي الله يهديج اكيد سمعتي كلام غثه وحجى عليج
_ ماتحملت رفعت صوتي عليه وهو غلط علية

ردت امي ..
_ ماما حيدر تريك لا تشغل بالك
_ لا خلص ما أشتهي راح أمر عليه بالمصرف
واحجي وياه وانتي يمة احجي وية بنتج ترى اسعد رجال محترم وابن اصول
_ انت ما تنطي بأسعد لأن صديقك
_ جنااات لا تظلمين الرجال ترى اعرفه مراعيج انتي وبنتج

سكتت جنات بس داخلها مقهورة من أسعد لأن من البارحه ولا حجى وياها

طلع حيدر مقرر يمر عليه للبنك الي يشتغل بي وبعدها يروح لشركته
،،
بالبنك كاعدين بمكتب اسعد الي يشغل منصب معاون مدير ..
_ يعني انت تقبلها تعلي صوتها والله اجيت اضربها بس استخطيتها اولها تاليها هي زوجتي وأحبها غلطت عليها بس ماتستوجب تلم ملابسها وتجيكم من الصبح اني هماتين كلت خل اذبها ابيتكم دا شوف تقبلون على تصرفها
_ لا طبعا ما اقبل بس انت اخذها على كد عقلها وتعال لبيتنا عالغدا رجعها وياك
_ لا خليها عدكم خل اشوف شكد تكدر تقاوم
_ هههه ها يعني متعمد
_ والله يا اخي اريد اتوبها
_ الله يهديكم يلا اطلع للشركه تأخرت ، فيما لله
_ الله وياك