رواية : إمرأتي
الفصل الخامس والثلاثون
الكاتبة Jawhara
****************
هناك شخص كان دائما يوصيني بنفسي، ولا يعلم أنه هو نفسه الذي أفتقده في كل لحظة
****************
بيت حجي حوم ..
بعدما شاف الحجي إلزلم شلون محاوطين عبدالله ويبوسون بي ويبجون وعبدالله متوتر مايعرف شلون يتصرف وياهم التفت عليه يطلب عونته عالوضع الي هو بي ، صاح عليهم يتفضلون يكعدون تا يتعرف عليهم ويعرف من اي ديرة واصلين
سأل بصوت واضح وعبد الله كاعد بسده لأن مايريد يحجي بسالفة شلون عثو بعبدالله ، يريد يسمع منهم بالاول ..
_ منين الربع انتم غريبين ديرة ؟
ابو عبيدة رد وعينه على عبدالله ..
_ حنا من عشيرة آل .. ساكنين الرمادي
_ حياكم الله والنعم و الله
_ تحيا ودوم
_ وشنهو دليلكم تا اعرف عبدالله ابنكم انتم تكولون اخينا ودفنتو من سنة مضت بعدما استشهد ، أنا هالرجال هذا أمانة بركبتي ما أفرط بي الا ترجعلو عافيتو
التفت اكثم على ساجر ومقداد واشرله يفتح موبايله مصور مقطع فديو لمنصور جانو طالعين للصيد
صفن بي حجي محمود ورجع انطاه لعبدالله بعدما تأكد وسمع صوته يحجي وية إخوته ويضحك
عبدالله توتر أكثر ودفع الموبايل لحجي حوم ولزم رأسه بين ايديه
_ شبيك يبة شتحس ؟!
_ راسي ، وجع براسي
التفت عليهم الحجي ..
_ هذا مو دليل كافي أنا شلون انطيكم عبدالله وهذا حالو عبدالله عندو فقدان ذاكرة
رد ريكان بعصبية لأن مقهور من شاف وضع اخوه
_ والله العظيم ما نرجع للرمادي الا ومنصور ويانه
مقداد هدا اخوه وعينه على منصور ..
_ عاين خير خل نفهم الحجي ،
حجي الي اسمه عبدالله جبير إخوته واجانا خبر استشهاده بمنطقه ال .. بتاريخ ...استلمنا جثه متفحمه ودفنا واقمنا عزاه لكن والله سنة مضت واحنا حال الضيم حالنا ممصدكين اخونا الجبير يستشهد ويتفحم ومن فترة سمعنا كلام على شايفين واحد يشبهو وبقينا ندور ونسأل إلى أن وصلنا هينة
رد حجي حوم الي على أيده جان الموقف والمكان الي عثروا بي على عبدالله وفهمهم السالفة وشلون صارلهم حادث بالطريق وتاذوا عبدالله وولد حجي حوم
كل هذا الكلام وعبدالله أيده على جرحه الي بدى يشفى يحاول يجمع ويه الحجي الكلام الي يكوله وباقي ساكت يسمع
رد ابو عبيدة وهو يلتفت على منصور ..
_ لا حول ولا قوه الا بالله ، منصور يخوي حمدالله على سلامتك الله كتبلك عمر جديد
رد عليه بارتباك ..
_ عبدالله اسمي عبدالله
اكثم بتأكيد وهو يأشر بيده ..
_ منصور اسمك وانا اكثم خويك وابن عمك عساف وهذا ساجر وهذا مقداد وريكان اخوتك ونذير نسيبك تذكرهم يخوي
أنت تقرأ
إمرأتي
Romanceفي وقت اشتياقي لك، تتركّز كلّ أفكاري وتهرب منّي إليك، ويشدّني الشوق والحنـين بشدّة إليـك قصة رومانسية اجتماعية ، بقلمي ،الكاتبة Jawhara
