رواية : إمرأتي
الفصل الرابع والثلاثون
الكاتبة Jawhara
****************
كل ما لدي
هو قلب يحبك
و يعيش ينتظرك
وانتظارك في حياتي
هو اجمل ما يكون فيها
****************
سيرين ..
متحملت كلامه عضيت شفتي بقوة ودموعي نزلت ، يا رب لاتختبرني فدوة اروحلك والله گلبي ميتحمل صدمات خايفة من كولشي بعدما فقدت منصور صرت خايفة من الدنيا كلها ، اسمع امي صاحت بي ..
_ نذيررر لا تلوع اختك مو حمل شقى شوف حالها شلونه !!
_ والله يمة مو شقى ابو عبيدة اليوم جان عدنا بالشركة مر يسلم جان جاي بشغلة وحجالي الصار حتى بقيت مصدوم شلون حال سيرين فاتح عيوني عليه
أم نذير رفعت ايديها ..
_ يا الله يا رحيم رحمتك ولطفك ارحم حال سيرين ورجع لهفتها ياقادر على كل شيء
وتوني بديت احس من اسمع امي تدعي فزيت مثل الملدوغه ..
_ هسة تأخذني للرمادي ما ابقى دقيقة هنا ، فدوة نذير اريد اتطمن اريد اسمع اي خبر
_ والله الي حجيته صحيح وأبو عبيدة يكول الديرة مكلوبة والعمام كلهم مجتمعين وينتظرون يوصلهم خبر من المكان الي يعتقدون موجود بي
_ لك عيني ما اصبر وديني لا أخذ تكسي واروح والله وأخذ ماما وياية
التفتوا على صوت بيبيتهم ام عزام صاحت من غرفتها من سمعت أصواتهم تريد تعرف شبيهم وراحت هبوب تحجيلها وسيرين ركضت فوك لغرفتها تغير ملابسها حتى تروح لبيت عيالها أهل منصور
،،،،
الوقت كله واني افكر بكلام نذير صليت ركعتين حمد وشكر لرب العالمين لأن سمعت هيج خبر ويارب يكون صحيح لأن گلبي أحسه ينفجر من التوتر والخوف والترقب
طلعنا كلنا للرمادي بسيارة نذير بيبي كاعدة كدام وتدعي مابقى دعاء ولا نذر ماكالته ، اني ساندة راسي عالجامه ومغمضه عيوني اتخيل منصور شكو موقف وكلام بيناتنا مر بذاكرتي
، احاول اسيطر على روحي مجاي اكدر لأن شي أحسه اكبر من استيعابي
وصلنا البيت ومن شفت السيارات قريب عالبيت كمت ارجف حظنتني ماما تهدي بية
ونذير التفت علية يطمني ..
_ جماعتهم واقربائهم ذولي شبيج ياعيني ليش هيج خايفه هاي وانتي تعرفين طبعهم ومتعودة عليه يلا انزلن لا تتاخرن عيب رياجيل د يطلعون
دخلنا البيت ونذير فات للمضيف ، اول ما خطت رجلية الطرمه عفت ماما وبيبي وركضت للبيت من جهة المطبخ تلكتني أميرة حظنتني وكامت تبجي من شافتني دموعي تنزل بدون توقف توسلت بيها تحجي الصدوك ردت علية ..
_ أن شاء الله نسمع الخبر الي يسر خواطرنا تعاي هينة عمتي كاعدة بالهول يمها نسوان
عفتها ودخلت جانت عمتي متربعه وكاعدة على زولية بالهول ومحاوطاتها نسوان اول ماشافتني فتحت ذراعها واني ذبيت روحي بحظنها وهي تبجي واني ابجي
_ يمممه حبيبة وليدي ومريته سودة علية يمه سيرين شوفي الصاير بيج يمة
أنت تقرأ
إمرأتي
Romanceفي وقت اشتياقي لك، تتركّز كلّ أفكاري وتهرب منّي إليك، ويشدّني الشوق والحنـين بشدّة إليـك قصة رومانسية اجتماعية ، بقلمي ،الكاتبة Jawhara
